MAULIZO JUU YA HABARI ZA BIBLIA YANAJIBIWA
Malaika wanaweza kutusaidia?
Kama walivyomusaidia Danieli, mutumishi muaminifu wa Mungu wa zamani, leo malaika wanasaidia watu wenye mioyo mizuri wafaidike na habari njema
Yehova Mungu aliumba mamilioni ya malaika zamani sana mbele ya kuumba watu. (Ayubu 38:4, 7) Malaika hao ni viumbe wa kiroho wenye nguvu wanaofanya kazi ya Mungu, wakati fulani Mungu anawatuma ili kuongoza na kulinda watumishi wake duniani. (Zaburi 91:10, 11) Leo, malaika wanasaidia watu ili wafaidike na habari njema ambayo wafuasi wa Yesu wanahubiri.—Soma Ufunuo 14:6, 7.
Tunapaswa kuomba malaika watusaidie? Hapana. Sala ni tendo la ibada, linalostahili Mungu tu. (Ufunuo 19:10) Kwa sababu malaika ni watumishi wa Mungu, wanakubali maagizo ya Mungu lakini hawakubali maagizo ya watu. Kwa hiyo, sikuzote tunapaswa kusali kwa Mungu tu kupitia Yesu.—Soma Zaburi 103:20, 21; Mathayo 26:53.
Kuna malaika wabaya?
Kama wanadamu, malaika waliumbwa wakiwa na uhuru wa kuchagua na wanaweza kuchagua kufanya mambo mazuri ao mabaya. Jambo la kuhuzunisha ni kwamba malaika wengi walimuasi Mungu. (2 Petro 2:4) Wa kwanza kati ya malaika hao ni Shetani; wengine walimufuata na wakakuwa mashetani. Katika miaka ya hivi karibuni, Shetani na mashetani wake walifukuzwa mbinguni na wakatupwa duniani.—Soma Ufunuo 12:7-9.
Kuongezeka sana kwa uovu na jeuri tangu mwaka wa 1914 kunaonyesha kwamba hivi karibuni Mungu atazuia Shetani na mashetani wake wasidanganye tena watu. Kisha Mungu atarudisha dunia katika hali yake nzuri.—Soma Ufunuo 12:12; 21:3, 4.