Yehova Anajua Namna ya Kuwakomboa Watu Wake

“Yehova anajua jinsi ya kuwakomboa watu wenye ujitoaji-kimungu kutoka katika jaribu.”​—2 PET. 2:9.

SABABU GANI TUNAWEZA KUTUMAINI KAMA YEHOVA:

Anajua vizuri sana wakati gani kila jambo linapaswa kutendeka ili kutimiza kusudi lake?

Atatumia uwezo wake ili kupigania watu wake?

Anajua vizuri sana namna mambo yatakuwa wakati wa ile ziki kubwa?

 1. Hali zitakuwa namna gani wakati wa ile ‘ziki kubwa’?

UHARIBIFU wa ulimwengu huu wa Shetani utatokea kwa gafula na bila kutazamia. (1 Thes. 5:2, 3) Wakati wa “ile siku kuu ya Yehova” ulimwengu wote utakuwa katika muchafuko. (Sef. 1:14-17) Watu watapatwa na mateso makali na shida sana. Itakuwa wakati wa taabu ‘ambayo haijapata kutukia tangu mwanzo wa ulimwengu mupaka sasa.’​—Soma Mathayo 24:21, 22.

2, 3. (a) Watu wa Mungu watapambana na mambo gani wakati wa ile ‘ziki kubwa’? (b) Ni nini inayoweza kututia nguvu ili kupambana na mambo yaliyo mbele yetu?

² ‘Ziki kubwa’ itakapokaribia mwisho, “Gogu wa inchi ya Magogu” atawageukia sasa watu wa Mungu na kuwashambulia. Wakati wa shambulio hilo, “jeshi kubwa sana” litakuja juu ya watu wa Mungu ‘kama mawingu ili kuifunika inchi.’ (Eze. 38:2, 14-16) Hakuna tengenezo lolote la wanadamu ambalo litasaidia ao kutetea watu wa Yehova. Wakati huo, ili kuokoka watamutegemea Mungu pekee yake. Watatenda namna gani watakapopambana na shambulio hilo la kutaka kuwamaliza?

³ Ikiwa wewe ni mutumishi wa Yehova, je, una imani kabisa kuwa Yehova ana uwezo wa kuwalinda watu wake wakati wa ziki kubwa? Mutume Petro aliandika: “Yehova anajua jinsi ya kuwakomboa watu wenye ujitoaji​-kimungu kutoka katika jaribu, lakini kuwaweka akiba watu wasio waadilifu kwa ajili ya ile siku ya hukumu ili wakatiliwe mbali.” (2 Pet. 2:9) Kutafakari namna Yehova alivyowaokoa watu wake zamani kunaweza kututia nguvu tupambane na mambo yaliyo mbele yetu. Acheni tujifunze mifano mitatu ambayo itatusaidia tutegemee uwezo wa Yehova wa kuokoa watu wake.

WALIOKOKA GARIKA

 4. Ni mambo gani ambayo yangepaswa kufanywa mbele ya Garika kuanza?

⁴ Tuanze na habari ya Garika ya siku za Noa. Ili mapenzi ya Yehova yatimie, iliomba mambo fulani yafanywe mbele ya Garika. Iliomba kwanza kumaliza kazi kubwa ya kujenga safina na kuingiza wanyama katika safina kwa uangalifu mbele ya garika kuanza. Kitabu cha Mwanzo hakisemi kama Yehova aligonjea safina ijengwe kwanza kisha aamue wakati wa kuleta Garika. Kufanya hivyo kungeonyesha kuwa kuja kwa garika kulitegemea ujenzi wa safina, yaani, ikiwa kazi ya kujenga safina ingechelewa Mungu pia angechelewesha garika. Lakini haikuwa hivyo, kwa kuwa, muda murefu mbele amuelezee Noa ajenge safina, Mungu alikuwa amekwisha kuweka wakati ambapo Garika ingeanza. Namna gani tunajua kama ilikuwa hivyo?

 5. Katika Mwanzo 6:3 Yehova alitangaza jambo gani, na ni wakati gani alitangaza amri hiyo?

⁵ Biblia inasema kuwa Yehova alikuwa amechukua uamuzi fulani huko mbinguni na kuutangaza huko. Katika kitabu cha Mwanzo 6:3, Mungu alisema hivi: “Roho yangu haitavumiliana sikuzote na mwanadamu kwa kuwa yeye pia ni mwili. Kwa hiyo siku zake zitakuwa miaka 120.” Katika andiko hilo Yehova hakuwa akionyesha miaka ambayo mwanadamu anapaswa kuishi. Yehova alikuwa akitoa amri ili kutangaza wakati ambapo angeisafisha dunia kwa Garika.a Kwa kuwa Garika ilianza katika mwaka wa 2370 mbele ya Kristo, tunaweza kusema kama Mungu alitoa tangazo hilo katika mwaka wa 2490 mbele ya Kristo. Wakati huo, Noa alikuwa na miaka 480. (Mwa. 7:6) Miaka 20 hivi baadaye, katika mwaka wa 2470 mbele ya Kristo, watoto wa Noa wakaanza kuzaliwa. (Mwa. 5:32) Kulibaki miaka mia moja hivi mbele Garika ianze, lakini Yehova alikuwa hajamuelezea Noa kazi ambayo angefanya na ambayo ingesaidia kuokoa wanadamu ili familia ya wanadamu iendelee kubaki duniani. Mungu alingojea mupaka wakati gani ili kumufunulia Noa jambo hilo?

 6. Ni wakati gani Yehova alimuagiza Noa ajenge safina?

⁶ Inaonekana Yehova alingojea miaka mingi ipite mbele ya kumufunulia Noa juu ya Garika. Kwa nini tunasema hivyo? Biblia inaonyesha kama wana wa Noa walikuwa wamekwisha kukomaa na kuoa wakati Mungu alimuambia Noa ajenge safina. Yehova alimuambia hivi: ‘Nami ninafanya agano langu pamoja nawe; nawe uingie ndani ya safina, wewe na wana wako na muke wako na wake za wana wako pamoja nawe.’ (Mwa. 6:9-18) Inawezekana wakati Noa alipewa agizo la kujenga safina, kulikuwa kunabaki tu miaka 40 ao 50 mbele Garika ianze.

 7. (a) Namna gani Noa na familia yake walionyesha imani? (b) Ni wakati gani Mungu alimuelezea sasa Noa wakati ambapo Garika ingeanza?

⁷ Kazi ya kujenga safina ilipokuwa ikiendelea, labda Noa na familia yake walikuwa wakijiuliza namna gani Mungu angetimiza kusudi lake na wakati gani Garika ingeanza. Ijapokuwa hawakujua mambo hayo, hilo halikuwazuia kujenga safina. Biblia inasema hivi: ‘Noa akafanya kulingana na yote ambayo Mungu alikuwa amemuamuru. Alifanya vivyo hivyo.’ (Mwa. 6:22) Siku saba mbele ya Garika kuanza ndipo Yehova alimuambia siku ambayo Garika ingeanza. Noa na familia yake walikuwa na wakati wa kutosha ili kuingiza wanyama katika safina. Kwa hiyo, mvua kubwa hiyo ilipoanza “katika mwaka wa mia sita wa maisha ya Noa, mwezi wa pili, siku ya kumi na saba ya mwezi,” mambo yote yalikuwa tayari.​—Mwa. 7:1-5, 11.

 8. Namna gani habari juu ya Garika inatusaidia kutumainia kabisa kama Yehova anajua wakati wa kuwakomboa watu wake?

⁸ Habari hiyo ya Garika inahakikisha jambo hili: Yehova ni Muheshimu-wakati lakini pia ni Mukombozi. Tunapomalizia siku za mwisho wa ulimwengu huu, tunaweza kuwa hakika kama mambo yote ambayo Yehova amekusudia yatatendeka kwa wakati wake, yaani, “siku na saa” aliyokusudia.​—Math. 24:36; soma Habakuki 2:3.

WALIKOMBOLEWA KWENYE BAHARI NYEKUNDU

9, 10. Namna gani Yehova alitumia watu wake ili kuvuta majeshi ya Misri na kuyafanya yaingie katika mutego?

⁹ Mupaka sasa, tumejifunza kuwa Yehova anajua vizuri sana wakati gani kila jambo linapaswa kutendeka ili kutimiza makusudi yake. Mufano wa pili ambao tutajifunza unaonyesha kama tunaweza kumutumainia Yehova kwa kuwa anaweza kutumia uwezo wake usio na mipaka ili kukomboa watu wake na kuhakikisha kuwa mapenzi yake yanatimizwa. Hakika Yehova ana uwezo wa kuwakomboa watumishi wake. Na wakati mwingine anawaacha watu wake wajikute katika hali fulani ya hatari ili apate njia ya kuwanasa adui zake. Alifanya hivyo alipowakomboa Waisraeli kutoka utumwa wa Wamisri.

¹⁰ Waisraeli waliotoka Misri walikuwa karibu watu milioni tatu. Yehova alimuambia Musa awaongoze Waisraeli katika njia itakayomufanya Farao afikiri kuwa ni wenye kutanga​-tanga kwa kuvurugika. (Soma Kutoka 14:1-4.) Kwa hiyo Farao alipoona hilo akafurahi, yeye na majeshi yake wakafuata wale waliokuwa watumwa wao; waliwaza kama wamewanasa Waisraeli kwenye Bahari Nyekundu. Waisraeli walionekana kuwa hawana mahali pa kuponyokea. (Kut. 14:5-10) Hata hivyo, Waisraeli hawakuwa katika hatari yoyote. Sababu gani? Kwa sababu Yehova alikuwa tayari kuwapigania.

11, 12. (a) Namna gani Yehova aliwapigania watu wake? (b) Matokeo yalikuwa nini Mungu alipotenda, na habari hiyo inatufundisha nini juu ya Yehova?

¹¹ “Nguzo ya wingu” iliyokuwa ikiwaongoza Waisraeli ikaenda kusimama nyuma yao, na hivyo ikazuia majeshi ya Farao kuwakaribia Waisraeli na kuyafanya majeshi hayo ya Farao yawe katika giza. Lakini kwa njia ya muujiza, nguzo hiyo iliwaangazia Waisraeli usiku. (Soma Kutoka 14:19, 20.) Kisha Yehova akatenganisha bahari kwa upepo wenye nguvu wa mashariki, ‘na kuligeuza bonde la bahari liwe inchi kavu.’ Bila shaka hilo lilichukua muda wa kutosha, kwa kuwa Biblia inasema: ‘Mwishowe wana wa Israeli wakapita katikati ya bahari juu ya inchi kavu.’ Magari ya vita yalikuwa yakitembeza majeshi ya Farao mbio sana, lakini wana wa Israeli walikuwa wakitembea polepole. Hata hivyo, hawakuweza kuwafikia wana wa Israeli, kwa kuwa Yehova alikuwa akiwapigania Waisraeli. Biblia inasema hivi: “Naye [Yehova] akaivuruga kambi ya Wamisri. Naye akawa akiyaondoa magurudumu kutoka kwenye magari yao hivi kwamba wakawa wakiyaendesha kwa shida.”​—Kut. 14:21-25.

¹² Wana wa Israeli walipovuka kwa usalama na kufika upande mwingine wa bahari, Yehova akamuamuru Musa hivi: ‘Unyooshe mukono wako juu ya bahari, ili maji yarudi juu ya Wamisri, magari yao ya vita na askari wao wapanda​-farasi.’ Askari walipojaribu kukimbia maji, ‘Yehova akawakunguta Wamisri katikati ya bahari.’ Haikuwezekana kukimbia. ‘Hakuna hata mumoja kati yao aliyebaki.’ (Kut. 14:26-28) Kwa hiyo, Yehova akaonyesha kama alikuwa na uwezo wa kukomboa watu wake hata ikiwa hali iwe ya namna gani.

WALIEPUKA UHARIBIFU WA YERUSALEMU

13. Yesu alitolea wanafunzi wake maagizo gani, na labda wanafunzi wake wangejiuliza nini?

¹³ Yehova anajua vizuri sana namna mambo yatatendeka ili kutimiza makusudi yake. Hilo litaonyeshwa wazi katika mufano wa tatu ambao tutajifunza. Mufano huo unazungumuzia kushambuliwa kwa Yerusalemu na majeshi ya Waroma wakati wa mitume. Kupitia Mwana wake, Yehova alitolea Wakristo walioishi Yerusalemu na Yudea maagizo fulani ili waepuke uharibifu wa muji katika mwaka wa 70 kisha Kristo. Yesu alisema: ‘Mutakapoona lile chukizo linalosababisha ukiwa, kama vile lilivyosemwa kupitia nabii Danieli, likiwa limesimama katika mahali patakatifu, ndipo wale walio katika Yudea waanze kukimbilia milimani.’ (Mt. 24:15, 16) Lakini namna gani wafuasi wa Yesu wangejua wakati unabii huo ungeanza kutimia?

14. Ni mambo gani yaliyotokea katika Yerusalemu yaliyofanya maagizo ya Yesu yawe wazi?

¹⁴ Kisha miaka mingi, maneno ya Yesu yakaanza kutimia. Katika mwaka wa 66 kisha Kristo, majeshi ya Roma yaliyoongozwa na Cestius Gallus yakafika Yerusalemu ili kumaliza uasi wa Wayahudi. Wakati Wayahudi waasi, waliojulikana kuwa Wazeloti, walikimbilia katika hekalu, askari Waroma wakaanza kuharibu kuta za hekalu. Wakristo waliokuwa macho, waliona hilo kuwa utimizo wa maneno ya Yesu. Waliona majeshi ya wapagani na bendera zao za ibada ya sanamu (“chukizo”) wakiingia ndani kabisa ya kuta za hekalu (“mahali patakatifu”). Huo ulikuwa wakati kwa wafuasi wa Yesu ‘kuanza kukimbilia milimani.’ Lakini namna gani wangetoka katika muji ambao ulizunguukwa na majeshi ya Roma? Jambo fulani lisilotazamiwa lilikuwa karibu kutokea.

15, 16. (a) Ni maagizo gani yaliyo wazi ambayo Yesu aliwatolea wanafunzi wake, na kwa nini ilifaa watii maagizo hayo? (b) Ukombozi wetu utategemea nini?

¹⁵ Bila sababu yoyote, Cestius Gallus na majeshi yake waliondoka katika Yerusalemu na kurudi kwao. Wazeloti wakawafuatilia. Kwa kuwa vikundi vya wapiganaji hao vilikuwa sasa inje ya muji, mara moja wafuasi wa Yesu wakapata nafasi ya kukimbia. Yesu aliwaagiza waache vitu vyao vya kimwili na waondoke bila kuchelewa. (Soma Mathayo 24:17, 18.) Je, ilikuwa lazima waondoke haraka hivyo? Hakika. Kisha siku chache, Wazeloti waliofuatilia majeshi ya Roma walirudi na kuanza kuwakaza wakaaji wa Yerusalemu na Yudea kujiunga nao katika uasi. Hali katika muji zikawa mbaya sana kwa kuwa vikundi vinavyoshindana vya Wayahudi vilianza kupigana ili kutawala. Mapigano yakawa makali. Waroma waliporudi katika mwaka wa 70 kisha Kristo, mutu hangeweza tena kutoka katika muji ili kukimbia. (Luka 19:43) Na mutu yeyote aliyebaki alishikwa! Wakristo waliotii maagizo ya Yesu na kukimbilia milimani, waliokoa maisha yao. Walijionea wenyewe ukweli wa maneno haya: Yehova anajua namna ya kuwakomboa watu wake. Habari hii inatufundisha nini?

¹⁶ Mambo yatakapotokea wakati wa ile ziki kubwa, Wakristo watapaswa kutii maagizo yanayotolewa na Neno la Mungu na tengenezo lake. Kwa mufano, Yesu aliagiza wanafunzi wake ‘kukimbilia milimani,’ sisi pia tutapewa agizo kama hilo wakati wa ile ziki kubwa. Mupaka sasa hatujui namna tukavyokimbia.b Lakini tunaweza kuwa hakika kama Yehova atatolea watu wake maelezo yaliyo wazi kuhusu maagizo hayo kwa wakati unaofaa. Kwa kuwa ukombozi wetu utategemea utii wetu, kila mumoja anaweza kujiuliza: ‘Je, ninatii maagizo ambayo Yehova anawatolea watu wake sasa? Je, ninatii haraka, ao ninasita?’​—Yak. 3:17.

TUNATIWA NGUVU ILI KUPAMBANA NA MAMBO YATAKAYOTOKEA WAKATI UJAO

17. Unabii wa Habakuki ulifunua nini kuhusu kushambuliwa kwa watu wa Mungu wakati ujao?

¹⁷ Acheni turudilie sasa habari tuliyozungumuzia hapo mwanzo juu ya shambulio la Gogu. Katika unabii unaofanana na huo wa Ezekieli, Habakuki alisema: ‘Nilisikia, tumbo langu likaanza kutetemeka; midomo yangu ilitetemeka kwa sababu ya ule muvumo; kuoza kukaanza kuingia katika mifupa yangu; na katika hali yangu nikafazaika, kwamba ningojee kimya siku ya taabu, kuja kwake [Mungu] kwa watu [majeshi yenye kuogopesha], apate kuwavamia.’ (Hab. 3:16) Kusikia tu habari ya namna watu wa Mungu watashambuliwa wakati ujao kulifanya tumbo la nabii na midomo yake vitetemeke, na akaishiwa na nguvu. Hali hiyo ya Habakuki inaonyesha kama hali itakuwa ngumu sana wakati majeshi ya Gogu yatakuja kutushambulia. Hata hivyo, nabii Habakuki alikuwa tayari kungojea kwa utulivu siku kubwa ya Yehova, alitumaini kabisa kuwa Yehova atawakomboa watu wake. Sisi pia tunaweza kuwa na tumaini kama Habakuki.​—Hab. 3:18, 19.

18. (a) Kwa nini hatuna sababu ya kuogopa shambulizi linalokuja? (b) Tutazungumuzia nini katika habari inayofuata?

¹⁸ Mifano mitatu ambayo tumejifunza inaonyesha kabisakabisa kama Yehova anajua namna ya kuwakomboa watu wake. Haiwezekani kusudi lake lishindwe; hakika atashinda. Lakini, ikiwa tunapenda kuona ushindi huo na kufurahi, basi, tunapaswa kubaki waaminifu mupaka mwisho. Namna gani Yehova anatusaidia tuendelee kuwa waaminifu tangu sasa? Tutazungumuzia hilo katika habari inayofuata.

[Maelezo ya chini]

[Picha katika ukurasa wa 24]

Je, Waisraeli walikuwa katika hatari yoyote walipofuatwa na majeshi ya Farao?