‘Ufalme Wako Uje’​—Lakini, Utakuja Wakati Gani?

1, 2. (a) Ni katika njia gani nyingine mutu anaweza kuwa kipofu? (b) Tunajua nini kuhusiana na Ufalme wa Mungu?

PENGINE umetambua kwamba, kisha watu kujionea tukio fulani, kila mutu anaeleza mambo aliyoona kwa njia tofauti. Vivyo hivyo, mutu anaweza kusahau mambo fulani ambayo muganga alimuambia kisha kuvumbua ugonjwa wake. Pia, mutu fulani anaweza kushindwa kuona funguo ao lineti yake, ijapokuwa iko karibu naye. Watafiti fulani wanasema kwamba hali hizo zote ni namna fulani ya kuwa kipofu, ni kusema, kutokuona kitu fulani, ao kusahau jambo fulani, kwa sababu mutu anafikiria mambo mengine. Ubongo wetu unafanya kazi kwa njia hiyo pia.

² Watu wengi wamekuwa kama vipofu kuhusiana na maana ya matukio ya ulimwengu huu. Wanaweza kukubali kwamba ulimwengu umebadilika sana tangu mwaka wa 1914, lakini hawaelewe matukio hayo yanamaanisha nini kabisa. Sisi wanafunzi wa Biblia, tunajua kwamba, katika maana fulani, Ufalme wa Mungu ulikuja katika mwaka wa 1914 wakati Yesu aliwekwa kuwa Mufalme huko mbinguni. Lakini tunajua kwamba jibu la sala ‘Ufalme wako uje. Mapenzi yako yatendeke duniani kama ilivyo mbinguni,’ linatia ndani mambo mengi. (Mt. 6:10) Bila shaka, jibu la sala hiyo linatia ndani mwisho wa ulimwengu huu muovu. Ni wakati tu mwisho huo utakapofika ndipo mapenzi ya Mungu yatatendeka duniani kama yanavyotendeka huko mbinguni.

 3. Kujifunza Neno la Mungu kunatusaidia tujue nini?

³ Kwa kuwa tunajifunza Neno la Mungu kwa ukawaida, tunaweza kuona namna unabii wa Biblia unavyotimia kabisa leo. Lakini watu wengine wako katika giza kabisa. Wanaendelea na shuguli zao na miradi yao hivi kwamba wanakataa ushuhuda ulio wazi unaoonyesha kwamba Kristo ameanza kutawala tangu mwaka wa 1914 na kwamba karibuni ataharibu ulimwengu huu muovu. Hata hivyo, jiulize hivi: Ikiwa nimemutumikia Mungu kwa miaka mingi, je, ningali ninatambua kwamba mwisho unakaribia na kwamba mambo yanayotukia katika ulimwengu yanaonyesha hivyo? Hata ikiwa umekuwa Shahidi hivi karibuni, ni mambo gani unayotia pa nafasi ya kwanza katika maisha yako? Hata jibu letu liwe gani, acheni tuchunguze tena sababu tatu za maana zinazotuhakikishia kwamba hivi karibuni Mufalme aliyetiwa mafuta na Mungu atachukua hatua ili mapenzi ya Mungu yatendeke kabisa hapa duniani.

4, 5. (a) Yesu amekuwa akifanya nini tangu mwaka wa 1914? (Ona picha mwanzoni mwa habari hii.) (b) Wapanda​-farasi watatu wanaomufuata Yesu wanafananisha nini, na unabii huo umetimia namna gani?

⁴ Katika mwaka wa 1914, Yesu anayeonyeshwa akiwa ameketi juu ya farasi mweupe, aliwekwa kuwa Mufalme huko mbinguni. Mara moja alianza mwendo wake ili kukamilisha ushindi wake juu ya ulimwengu muovu wa Shetani. (Soma Ufunuo 6:1, 2.) Unabii unaopatikana katika Ufunuo sura ya 6 ulionyesha kwamba kisha tu Ufalme wa Mungu kuanza kutawala, hali za ulimwengu zingeharibika mbio sana​—vita, upungufu wa chakula, magonjwa ya kuambukiza, na mambo mengine ya kutokeza kifo. Hali hizo zinafananishwa na wapanda-farasi watatu wanaomufuata Yesu Kristo kwa ukaribu.​—Ufu. 6:3-8.

⁵ Kama ilivyotabiriwa, amani ‘iliondolewa duniani,’ ijapokuwa mataifa mengi yalifanya mapatano ya kutumika pamoja ili kuleta amani. Vita ya Kwanza ya Ulimwengu ndio iliyokuwa vita ya kwanza iliyoondoa amani duniani pote. Na ijapokuwa wanadamu wamefanya maendeleo katika mambo ya feza na sayansi tangu mwaka wa 1914, njaa inaendelea kuwasumbua watu katika ulimwengu. Zaidi ya hayo, sisi wote tunakubali kwamba magonjwa ya kuambukiza, misiba ya asili, na ‘mapigo mengine yenye kufisha’ yanaendelea kuua watu wengi kila mwaka. Matukio hayo ni yenye kuenea sana, yanatokea mara nyingi na ni yenye kuumiza zaidi kuliko hapo zamani. Je, unaelewa maana ya matukio hayo?

 6. Ni nani walioelewa utimizo wa unabii wa Biblia, na walifanya nini?

⁶ Watu wengi walishangaa sana wakati Vita ya Kwanza ya Ulimwengu na homa ya Kihispania ilitokea. Lakini, Wakristo watiwa​-mafuta walijua kwamba Nyakati za Mataifa ao “nyakati zilizowekwa za mataifa” zingefikia mwisho katika mwaka wa 1914. (Lu. 21:24) Hawakuelewa vizuri kabisa namna unabii wa Biblia ungetimia. Lakini walijua kwamba katika mwaka wa 1914 kungetokea tukio fulani la maana sana kuhusiana na utawala wa Mungu. Kadiri walivyoendelea kuelewa utimizo wa unabii wa Biblia, walitangazia wengine kwa bidii kwamba Ufalme wa Mungu ulikuwa umeanza kutawala. Wengi waliteswa sana kwa sababu ya kutangaza habari hizo za Ufalme. Lakini, mateso hayo yalitimiza unabii mwingine wa Biblia. Katika miaka iliyofuata, maadui wa Ufalme ‘walitunga matatizo kwa njia ya amri.’ Walitendea pia ndugu na dada kwa jeuri, waliwatia katika vifungo, na hata waliwaua kwa kuwatundika, kwa kuwapiga masasi, ao kuwakata vichwa.​—Zab. 94:20; Ufu. 12:15.

 7. Sababu gani watu wengi hawaelewe maana ya matukio ya ulimwengu?

⁷ Kwa kuwa kuna ushuhuda mwingi unaoonyesha wazi kwamba tayari Ufalme wa Mungu umeanza kutawala huko mbinguni, sababu gani watu wengi hawatambue maana ya jambo hilo? Sababu gani hawatambue kwamba matukio ya ulimwengu yanatimiza kabisa unabii wa Biblia kama vile watu wa Mungu wamekuwa wakitangaza kwa miaka mingi? Je, ni kwa sababu wanaamini tu mambo ambayo macho yao yanaweza kuona? (2 Kor. 5:7) Je, shuguli za maisha zimewapofusha ili wasitambue yale ambayo Mungu anaendelea kufanya? (Mt. 24:37-39) Je, wengine kati yao wamedanganywa na mawazo na miradi ya ulimwengu wa Shetani? (2 Kor. 4:4) Tunahitaji kuwa na imani na utambuzi wa kiroho ili tuelewe yale ambayo Ufalme wa Mungu unaendelea kutimiza. Sisi ni wenye furaha sana kwa sababu tunaelewa mambo yanayoendelea kutendeka!

8-10. (a) Andiko la 2 Timotheo 3:1-5 limetimia namna gani? (b) Sababu gani tunaweza kusema kwamba ubaya unaendelea kuongezeka?

⁸ Jambo lingine linalotufanya tuamini kwamba karibuni Ufalme wa Mungu utaitawala dunia ni hili: Ubaya unaendelea kuongezeka kuliko zamani, na hali ya ulimwengu inaendelea kuwa mbaya zaidi. Katika kipindi cha miaka 100 hivi, hali zilizotabiriwa katika 2 Timotheo 3:1-5 zimeonekana wazi. Pia, mambo hayo ni yenye kuenea sana, yanatokea mara nyingi na kwa muda murefu. Je, umetambua kwamba utimizo wa unabii huo unaendelea kuonekana wazi leo? Acheni tuzungumuzie mifano fulani.​—Soma 2 Timotheo 3:1, 13.

⁹ Fikiria tofauti iliyo kati ya mambo ambayo watu waliona kuwa yenye kuchukiza katika miaka ya 1940 ao 1950 na yale yanayotendeka leo katika mambo ya kujifurahisha, michezo, na katika mitindo. Mauaji na matendo machafu ya ngono yameenea sana kila mahali leo. Watu wanashindana ili waonekane kuwa wao ndio wakali, ao wenye kujua mambo ya ngono kuliko mutu mwengine yeyote. Mambo ambayo watu waliona kuwa yenye kuchukiza kwenye televizyo katika miaka ya 1950 yanaonekana sasa kuwa yenye kufaa kwa familia. Na wengi wanatambua kwamba matendo ya wanaume wanaolala na wanaume na wanawake wanaolala na wanawake yanapatikana sana katika mambo ya kujifurahisha na mitindo na watu hao wanaonyesha matendo yao waziwazi. Sisi ni wenye furaha sana kwa sababu tunajua maoni ya Mungu kuhusu mambo hayo!​—Soma Yuda 14, 15.

¹⁰ Pia, tulinganishe matendo ya vijana yaliyoonwa kuwa uasi katika miaka ya 1950 na yale ambayo vijana wanafanya leo. Kwa mufano, wazazi walihuzunika sana walipowaona watoto wao wakivuta sigareti, kunywa pombe ao kucheza dansi zenye kuamusha hamu ya ngono. Leo, tunasikia habari zenye kuhuzunisha kama hizi: Kijana aliye na miaka 15 amewapiga wanafunzi wenzake masasi, ameua wawili kati yao na kuwaumiza vikali wengine 13. Kikundi cha vijana waliokuwa wamelewa, wamemuua binti wa miaka kenda na kupiga baba na binamu wa binti huyo. Imeripotiwa kwamba katika inchi moja ya Asia, nusu ya mauaji yaliyofanyika katika kipindi cha miaka kumi iliyopita yalifanywa na vijana. Bila shaka, sisi wote tunakubali kwamba hali imekuwa mbaya zaidi, sivyo?

11. Sababu gani watu wengi hawatambue kwamba hali inaendelea kuwa mbaya zaidi?

¹¹ Mutume Petro alieleza wazi kwamba: “Katika siku za mwisho watakuja wazihaki na zihaka zao, wakiendelea kulingana na tamaa zao wenyewe na kusema: ‘Huku kuwapo kwake kulikoahidiwa kuko wapi? Kwani, tangu siku mababu zetu walipolala katika kifo, mambo yote yanaendelea sawasawa kama tangu mwanzo wa uumbaji.’” (2 Pet. 3:3, 4) Sababu gani watu wana mawazo hayo? Inaonekana kwamba tunaweza kuona jambo fulani kuwa la kawaida tu ikiwa tunazoea kuliona. Tunaweza kuumizwa katika moyo wetu ikiwa mwenendo wa rafiki yetu unabadilika haraka. Lakini pengine hatuwezi kutambua kwa urahisi namna mutazamo na mwenendo wa watu wengi unavyobadilika kwa sababu hilo linaweza kutokea polepole na kwa muda murefu. Hata hivyo, mabadiliko hayo ya mwenendo yanayotokea polepole ni hatari.

12, 13. (a) Sababu gani mambo yanayotokea katika ulimwengu hayapaswe kutuvunja moyo? (b) Ni nini itatusaidia tuvumilie siku hizi za mwisho “zilizo ngumu kushugulika nazo”?

¹² Mutume Paulo alitushauri kwamba “katika siku za mwisho” hali zingekuwa “ngumu kushugulika nazo.” (2 Tim. 3:1) Haiwezekani kuepuka hali za ulimwengu huu. Lakini, kwa musaada wa Yehova, roho yake, na kutaniko la Kikristo, tunaweza kushinda jaribu lolote na kubaki waaminifu. Mungu atatupatia “nguvu zinazopita zile za kawaida.”​—2 Kor. 4:7-10.

¹³ Inapendeza kuona kwamba mutume Paulo alianza unabii kuhusu siku za mwisho kwa kutumia maneno “ujue jambo hili.” Maneno hayo yanahakikisha kwamba unabii huo utatimia kabisa. Bila shaka hali ya ulimwengu huu muovu itaendelea kuwa mbaya zaidi mupaka Yehova alete mwisho. Historia imeonyesha kwamba mataifa fulani yalianguka wakati watu walianza kujiendesha vibaya sana. Leo, watu wanajiendesha vibaya sana kuliko wakati mwingine wowote. Watu wengi wanaweza kushindwa kuelewa maana ya mambo hayo, lakini mambo ambayo yametukia tangu mwaka wa 1914 yanatufanya tuwe hakika kwamba karibuni Ufalme wa Mungu utaondoa uovu wote.

14-16. Ni jambo gani la tatu linalotufanya tuwe hakika kwamba Ufalme wa Mungu ‘utakuja’ karibuni?

¹⁴ Historia ya watu wa Mungu inatuonyesha jambo la tatu linalotufanya tuwe hakika kwamba mwisho unakaribia. Kwa mufano, mbele Ufalme wa Mungu uanze kutawala huko mbinguni, kikundi cha watiwa-mafuta waaminifu kilikuwa kinamutumikia Mungu kwa bidii. Mambo yalipotendeka tofauti na namna walivyotazamia katika mwaka wa 1914, watiwa​-mafuta hao walitenda namna gani? Wengi kati yao waliendelea kumutumikia Yehova kwa uaminifu wakati wa majaribu na mateso makali. Kwa miaka mingi, watiwa​-mafuta karibu wote wamemaliza kwa uaminifu mwendo wao hapa duniani.

¹⁵ Katika unabii wake kuhusu ulimwengu muovu wa Shetani, Yesu alisema hivi: ‘Kizazi hiki hakitapitilia mbali kamwe mupaka mambo yote hayo yatukie.’ (Soma Mathayo 24:33-35.) Tunaelewa kwamba Yesu aliposema “kizazi hiki” alikuwa akizungumuzia vikundi viwili vya Wakristo watiwa​-mafuta. Kikundi cha kwanza cha Wakristo hao waliishi katika mwaka wa 1914 na walielewa kwamba Kristo ameanza kutawala huko mbinguni katika mwaka huo. Wale wanaofanyiza kikundi hicho hawakuishi tu katika mwaka wa 1914, lakini walitiwa pia mafuta kwa roho takatifu kuwa wana wa Mungu katika mwaka huo ao mbele ya hapo.​—Rom. 8:14-17.

¹⁶ Kikundi cha pili cha watiwa​-mafuta kinachofanyiza “kizazi hiki” ni watiwa-mafuta walioishi wakati mumoja na wale wa kikundi cha kwanza. Watiwa-mafuta hao hawakuishi tu katika kipindi kimoja na kikundi cha kwanza cha watiwa​-mafuta, lakini pia walitiwa mafuta kwa roho takatifu wakati watiwa​-mafuta wa kikundi cha kwanza walikuwa wangali duniani. Kwa hiyo, kila mutiwa​-mafuta aliye hai leo haiko katika “kizazi hiki” ambacho Yesu alizungumuzia katika unabii wake. Leo, wale wanaofanyiza kikundi cha pili wana umri mukubwa. Lakini, maneno ya Yesu kwenye Mathayo 24:34 yanatufanya tuwe hakika kwamba ndugu fulani wa ‘kizazi hiki hawatapitilia mbali kamwe’ bila kuona mwanzo wa ziki kubwa. Maneno hayo yanatuhakikishia kwamba kunabaki wakati mufupi tu mbele Ufalme wa Mungu uharibu watu waovu na kuleta ulimwengu mupya wenye haki.​—2 Pet. 3:13.

17. Mambo matatu ambayo tumezungumuzia yanatufundisha nini?

¹⁷ Tuseme nini basi kuhusu unabii mbalimbali ambao tumezungumuzia? Yesu alionyesha kwamba hatujue ni siku gani ao saa gani mwisho utakuja. (Mt. 24:36; 25:13) Lakini, kama mutume Paulo alivyosema, tunaweza kujua “majira.” (Soma Waroma 13:11.) Tunaishi katika majira hayo, ni kusema, siku za mwisho. Ikiwa tunakazia uangalifu unabii wa Biblia na mambo ambayo Yehova na Yesu wanaendelea kutimiza, tutaona ushuhuda ulio wazi na unaoonyesha kwamba mwisho wa ulimwengu huu muovu unakaribia sana.

18. Wale wanaokataa Ufalme wa Mungu watapatwa na nini?

¹⁸ Wale ambao wamekataa kutambua mamlaka makubwa ambayo Yesu Kristo, Mupanda​-farasi nyeupe mwenye ushindi, amepewa, watalazimika kutambua kwamba wamekosea. Hawataponyoka hata kidogo hukumu inayokuja. Wakati huo wengi watalia hivi kwa woga: “Ni nani anaweza kusimama?” (Ufu. 6:15-17) Lakini, sura ya 7 ya kitabu cha Ufunuo inajibu ulizo hilo. Watiwa-mafuta na wale walio na tumaini la kuishi duniani ‘watasimama’ katika maana ya kwamba watakubaliwa na Mungu. Wakati huo, ‘mukutano mukubwa’ wa kondoo wengine utaokoka ziki kubwa.​—Ufu. 7:9, 13-15.

19. Ukiwa kati ya wale walio hakika kwamba mwisho unakaribia, unangojea nini kwa hamu?

¹⁹ Ikiwa tunaendelea kukazia uangalifu namna unabii wa Biblia unavyotimia katika kipindi hiki cha maana, hatutakengeushwa na ulimwengu wa Shetani; lakini tutaelewa vizuri maana ya matukio ya ulimwengu huu. Kristo atakamilisha ushindi wake hivi karibuni kwa kuharibu ulimwengu huu muovu kwenye vita ya Har-magedoni. (Ufu. 19:11, 19-21) Tutafurahi sana wakati mambo hayo yatatimia!​—Ufu. 20:1-3, 6; 21:3, 4.