Zabihu ya Ukombozi Zawadi “Kamilifu” Kutoka kwa Baba

1. Ni mambo gani ya muzuri yenye zabihu ya ukombozi inaweza kutusaidia kupata?

ZABIHU ya ukombozi ya Yesu Kristo inaleta baraka nyingi. Kwa mufano, mupango wa zabihu ya ukombozi unafungua mulango ili watoto wote wa Adamu wenye wanapenda haki wakuwe siku moja katika familia ya Mungu. Baraka ingine ni kwamba tunaweza kuishi milele kwa furaha. Zaidi ya hilo, zabihu ya ukombozi inapatana na mambo yenye kuwa ya maana sana kwa watu wote, mbinguni na duniani.​—Waebrania 1:8, 9.

2. (a) Ni mambo gani ya maana mbinguni na duniani yenye Yesu alitaja katika sala yake? (Ona picha kwenye mwanzo wa habari hii.) (b) Tutazungumuzia nini katika habari hii?

² Miaka mbili hivi mbele ya kifo chake, Yesu alifundisha mitume wake wasali hivi: ‘Baba yetu uliye mbinguni, jina lako na litakaswe. Ufalme wako na ukuje. Mapenzi yako na yatendeke duniani kama ilivyo mbinguni.’ (Mathayo 6:9, 10) Tuzungumuzie basi namna zabihu ya ukombozi inapatana na kutakaswa kwa jina la Yehova, kutawala kwa Ufalme wa Mungu, na kutendeka kwa mapenzi ya Mungu.

3. Jina la Yehova linawakilisha nini? Namna gani Shetani alishambulia jina la Yehova?

³ Kwanza kabisa, Yesu alisali kwa ajili ya kutakaswa kwa jina la Yehova, ao kuonwa kuwa takatifu. Jina la Yehova linamuwakilisha yeye mwenyewe, linaonyesha yeye ni nani. Yeye ndiye mwenye nguvu na mwenye haki zaidi katika ulimwengu wote. Pia, Yesu alimuita ‘Baba Mutakatifu.’ (Yohana 17:11) Kwa sababu Yehova ni mutakatifu, mambo yote yenye anafanya na sheria zote zenye anatoa ni takatifu. Lakini katika shamba la Edeni, Shetani alitumia ujanja ili kutilia mashaka haki ya Mungu ya kuwekea wanadamu kanuni. Alisema mambo ya uongo juu ya Yehova na akashambulia jina la Mungu, ao kumuharibishia sifa.​—Mwanzo 3:1-5.

4. Namna gani Yesu alionyesha kuwa jina la Mungu ni takatifu?

⁴ Lakini Yesu yeye alipenda kabisa jina la Yehova na alifanya yake yote ili kulitakasa. (Yohana 17:25, 26) Namna gani? Kupitia mwenendo na mafundisho yake, Yesu alisaidia wengine waone kama kanuni za Yehova ni zenye kufaa na kama mambo yote yenye anatuomba kufanya ni kwa faida yetu wenyewe. (Soma Zaburi 40:8-10.) Hata wakati Shetani alifanya Yesu ateseke na akufe kifo chenye maumivu, Yesu alibakia mushikamanifu. Yesu alionyesha wazi kama inawezekana mutu mukamilifu amutii Yehova kabisa.

5. Namna gani tunaweza kuonyesha kuwa jina la Yehova ni takatifu?

⁵ Namna gani tunaweza kuonyesha kuwa tunapenda jina la Yehova? Kupitia mwenendo wetu. Yehova anatuomba tukuwe watakatifu. (Soma 1 Petro 1:15, 16.) Hilo linamaanisha kwamba tunapaswa kumuabudu yeye tu na kumutii kwa moyo wetu wote. Hata wakati tunateswa, tunajikaza kuishi kulingana na mambo yenye Yehova anatufundisha. Wakati tunaishi kulingana na kanuni za Yehova, tunaletea jina lake utukufu. (Mathayo 5:14-16) Tunaonyesha wazi kuwa kanuni zake ni za muzuri na kama Shetani ni muongo. Hatukamilike, kwa hiyo tunafanya makosa. Lakini wakati tunafanya makosa, tunatubu na tunajikaza sana kuacha kufanya mambo yenye kuchafua jina la Yehova.​—Zaburi 79:9.

6. Sababu gani Yehova anaweza kutuona kuwa wenye haki hata kama hatukamilike?

⁶ Iwe tuko watiwa-mafuta ao “kondoo wengine,” Yehova anasamehe zambi zetu ikiwa tuko na imani katika zabihu ya ukombozi. Anakubali kuwa waabudu wake wale wenye kujitoa kwake. Anatangaza Wakristo watiwa-mafuta kuwa wenye haki kwa kuwaita watoto wake, na “kondoo wengine” kuwa wenye haki kwa kuwaita marafiki wake. (Yohana 10:16; Waroma 5:1, 2; Yakobo 2:21-25) Kwa hiyo, hata leo, zabihu ya ukombozi inafanya iwezekane tukuwe na urafiki wa muzuri pamoja na Baba yetu na tufanye jina lake litakaswe.

7. Zabihu ya ukombozi inafanya iwezekane kupata baraka gani?

⁷ Katika sala ya mufano, Yesu alisema hivi: ‘Ufalme wako na ukuje.’ Namna gani zabihu ya ukombozi inapatana na Ufalme wa Mungu? Ufalme wa Mungu, ao serikali ya Mungu inafanyizwa na Yesu na watu 144000 wenye kuchaguliwa kati ya wanadamu. Zabihu ya ukombozi inafanya iwezekane kwa wanadamu hao kufufuliwa ili waishi mbinguni. (Ufunuo 5:9, 10; 14:1) Watakuwa wafalme na makuhani na watatawala dunia pamoja na Yesu kwa miaka elfu moja. Wakati huo, Yehova atatumia Ufalme ili kufanya dunia ikuwe paradiso na kusaidia wanadamu wafikie kuwa wakamilifu. Mwishowe, watumishi wa Yehova mbinguni na duniani watakuwa familia moja. (Ufunuo 5:13; 20:6) Yesu ataharibu Shetani na kumaliza mateso yote yenye Shetani ameleta.​—Mwanzo 3:15.

8. (a) Namna gani Yesu alisaidia wanafunzi wake waelewe kama Ufalme wa Mungu ni wa maana? (b) Namna gani leo tunaunga mukono Ufalme?

⁸ Yesu alisaidia wanafunzi wake waelewe kama Ufalme wa Mungu ni wa maana. Namna gani? Kisha tu kubatizwa, Yesu alianza kuhubiri “habari njema ya Ufalme wa Mungu” kila mahali kwenye alienda. (Luka 4:43) Aliambia pia wanafunzi wake wakuwe mashahidi wake ‘mupaka sehemu ya mbali zaidi ya dunia.’ (Matendo 1:6-8) Leo, kupitia kazi ya kuhubiri Ufalme, watu wako na nafasi ya kujifunza juu ya zabihu ya ukombozi na kuwa raia wa Ufalme wa Mungu. Tunaonyesha kama tuko raia washikamanifu wa Ufalme wakati tunasaidia watiwa-mafuta kuhubiri habari njema katika dunia yote.​—Mathayo 24:14; 25:40.

9. Sababu gani tunaweza kuwa hakika kama Yehova atatimiza kusudi lake juu ya wanadamu?

⁹ Kisha, Yesu alisema hivi: “Mapenzi yako na yatendeke.” Alimaanisha nini wakati alisema hivyo? Wakati Yehova anasema kuwa jambo fulani litatendeka, linapaswa kutendeka. (Isaya 55:11) Uasi wa Shetani haungeweza kumuzuia Yehova. Yehova alikuwa na mapenzi gani juu ya dunia? Alipenda dunia ijae watoto wa Adamu na Eva. (Mwanzo 1:28) Ikiwa Adamu na Eva wangekufa bila kuzaa watoto, kusudi la Mungu la kujaza dunia na watoto wao halingetimia. Kwa hiyo, Yehova aliwaruhusu wazae watoto. Zabihu ya ukombozi inapatia wale wote wenye kuwa na imani nafasi ya kuwa wakamilifu na kuishi milele. Yehova anapenda watu na anataka tukuwe na maisha ya muzuri sana yenye alipenda tukuwe nayo.

10. Namna gani zabihu ya ukombozi inaletea faida wanadamu wenye wamekufa?

¹⁰ Tuseme nini juu ya mamiliare ya watu wenye walikufa bila kupata nafasi hata kidogo ya kumujua Yehova? Yehova anapenda watu waishi. Kwa hiyo, atafufua hata wale wenye wamekufa. Zabihu ya ukombozi inafanya iwezekane watu hao waishi tena. Kisha watakuwa na nafasi ya kujifunza juu ya Yehova na kuishi milele. (Matendo 24:15) Yehova ndiye Chanzo cha uzima. Wakati Yehova anapatia tena uzima wale wenye wamekufa, anakuwa Baba yao. (Zaburi 36:9) Katika sala ya mufano, Yesu alisema kama Yehova ni ‘Baba yetu aliye mbinguni.’ (Mathayo 6:9) Yehova amepatia Yesu daraka kubwa la kufufua wale wenye wamekufa. Yesu alisema hivi: “Mimi ndiye ufufuo na uzima.”—Yohana 6:40, 44; 11:25.

11. Mapenzi ya Mungu ni nini juu ya ‘umati mukubwa’?

¹¹ Yesu alisema pia hivi: “Yeyote yule anayefanya mapenzi ya Mungu, huyo ndiye ndugu yangu na dada yangu na mama yangu.” (Marko 3:35) Mapenzi ya Mungu ni kwamba watu kutoka katika mataifa yote na makabila yote na luga zote wakuwe waabudu wake. Wanaitwa ‘umati [mukutano] mukubwa, ambao hakuna mutu aliyeweza kuuhesabu.’ Wako na imani katika zabihu ya ukombozi na wanapenda kumutii Mungu. Wanamusifu na kusema: “Wokovu unatoka kwa Mungu wetu, anayeketi [mwenye kukaa] juu ya kiti cha ufalme, na Mwana-Kondoo.”—Ufunuo 7:9, 10.

12. Sala ya Yesu inatufundisha nini juu ya kusudi la Yehova kuhusu wanadamu?

¹² Sala ya Yesu ya mufano imetufundisha mambo mengi juu ya Yehova na kusudi lake juu ya wanadamu. Kwanza, tunapaswa kujikaza sana kutakasa jina la Yehova na kumutukuza. (Isaya 8:13) Zabihu ya Yesu ya ukombozi yenye inafanya wokovu wetu uwezekane, inatukuza pia jina la Mungu. Hata jina la Yesu mwenyewe linamaanisha “Yehova Ni Wokovu.” Pili, Yehova atatumia Ufalme wake ili kuletea wanadamu wenye kumutii faida zote za zabihu ya ukombozi. Na tatu, tuko hakika kama hakuna kitu chenye kinaweza kuzuia mapenzi ya Yehova kutimia.​—Zaburi 135:6; Isaya 46:9, 10.

13. Sababu gani tunabatizwa?

¹³ Njia kubwa yenye tunatumia ili kuonyesha kama tuko wenye shukrani kwa ajili ya zabihu ya ukombozi, ni kutoa maisha yetu kwa Yehova na kubatizwa. Wakati tunafanya hivyo, tunaonyesha kuwa tuko na imani katika zabihu ya ukombozi na kuwa “sisi ni wa Yehova.” (Waroma 14:8) Wakati tunabatizwa, tunamuomba Yehova atupatie ‘zamiri njema.’ (1 Petro 3:21) Yehova anatujibia kwa kufanya tupate faida za zabihu ya ukombozi. Na tuko hakika kabisa kama atatupatia kila kitu chenye ameahidi.​—Waroma 8:32.

14. Sababu gani Yehova anatupatia amri ya kupenda wengine?

¹⁴ Mambo yote yenye Yehova anafanya yanachochewa na upendo wake. Anapenda watu wenye kumuabudu wamuige na wapendane. (1 Yohana 4:8-11) Wakati tunapenda watu, tunaonyesha wazi kwamba tunapenda kuwa “wana wa Baba [yetu] aliye mbinguni.” (Mathayo 5:43-48) Amri mbili kubwa zaidi ni hizi: ya kwanza, kupenda Yehova, na ya pili, kupenda wengine. (Mathayo 22:37-40) Njia moja ya kuonyesha watu upendo ni kuwafundisha habari njema ya Ufalme wa Mungu. Ikiwa tunatii amri ya Yehova ya kupenda wengine, zaidi sana ndugu na dada zetu, upendo wetu kwake ‘utakamilishwa.’—1 Yohana 4:12, 20.

15. (a) Yehova anatupatia baraka gani leo? (b) Tutapata baraka gani wakati unaokuja?

¹⁵ Yehova anatuhakikishia kwamba kwa sababu tuko na imani katika zabihu ya ukombozi, zambi zetu ‘zinafutwa.’ Anaweza kusamehe zambi zetu kabisa. (Soma Matendo 3:19-21.) Kama vile tumekwisha kuzungumuzia, zabihu ya ukombozi inafanya iwezekane Yehova afanye wanadamu fulani wakuwe watoto wake mbinguni. Watoto hao ni Wakristo watiwa-mafuta. (Waroma 8:15-17) Anaalika wale wenye kuwa kati ya “kondoo wengine” wakuwe katika familia yake duniani. Kisha kuwa wakamilifu, kutakuwa jaribu la mwisho. Ikiwa wanabakia washikamanifu kwa Yehova, atawafanya kuwa watoto wake pia. (Waroma 8:20, 21; Ufunuo 20:7-9) Yehova atapenda watoto wake wote sikuzote. Zabihu ya ukombozi itaendelea kuleta baraka milele. (Waebrania 9:12) Yehova ametupatia zawadi hiyo ya bei sana, na hakuna mutu mwenye anaweza kutunyanganya zawadi hiyo.

16. Namna gani zabihu ya ukombozi inatusaidia tukuwe huru?

¹⁶ Ikiwa tunatubu zambi zetu, hakuna kitu chenye Shetani anaweza kufanya ili kutuzuia tufikie kuwa katika familia ya Yehova. Yesu alikufa “mara moja kwa wakati wote.” Zabihu ya ukombozi imelipwa mara moja kwa wakati wote. (Waebrania 9:24-26) Adamu alituletea kifo, lakini zabihu ya ukombozi ya Yesu itatuletea uzima wa milele. Zabihu ya ukombozi inaweza kutuweka huru kutoka katika ulimwengu wa Shetani na kutufanya tusiogope kifo.​—Waebrania 2:14, 15.

17. Upendo wa Yehova uko na maana gani kwako?

¹⁷ Mungu anatimiza sikuzote ahadi zake. Kama tu vile sheria zenye Yehova aliwekea vitu vya asili hazibadilike, Yehova pia hatabadilika hata siku moja. Hatatudanganya hata siku moja. (Malaki 3:6) Zaidi ya kutupatia zawadi ya uzima, Yehova anatupatia jambo la maana zaidi. Anatupatia upendo wake. “Tumejua na tumeamini upendo ambao Mungu anao kwa habari yetu. Mungu ni upendo.” (1 Yohana 4:16) Ahadi zake zinatimia sikuzote. Hivi karibuni, dunia itakuwa paradiso yenye kupendeza. Watu wote wenye kuishi watamuiga Yehova na watapendana. Kisha watumishi wake wote mbinguni na duniani watasema hivi: ‘Baraka na utukufu na hekima na kutoa shukrani na heshima na uwezo na nguvu zikuwe kwa Mungu wetu milele na milele. Amina.’—Ufunuo 7:12.