Tuna Habari za Maana Sana za Kuwapasha Wengine

¹ Neno la Mungu lina mafundisho mengi ya maana sana ambayo tunapendezwa nayo. (Zab. 12:6; 119:11, 14) Wakati fulani, Yesu alitumia mifano yenye kueleza mambo mbalimbali kuhusiana na Ufalme, na kisha aliuliza wanafunzi wake hivi: “Je, mmeelewa maana ya mambo haya yote?” Waliposema kwamba wameelewa maana, Yesu alisema hivi: “Ikiwa ni hivyo, kila mfundishaji wa watu wote, anapofundishwa kuhusiana na ufalme wa mbinguni, ni kama mtu, mwenye nyumba, ambaye hutoa katika hazina yake vitu vipya na vya zamani.”—Mt. 13:1-52.

² Kweli za Biblia tulizojifunza kwa mara ya kwanza zinaweza kuonwa kuwa vitu vya zamani. Kwa kuendelea kuongeza ujuzi wetu kupitia funzo letu la pekee la mambo mazito ya Neno la Mungu, tunajua kweli zingine za Biblia, ambazo zinalinganishwa na vitu vipya. (1 Kor. 2:7) Pia, kupitia “mtumwa mwaminifu na mwenye busara,” tunafikia kuelewa habari mpya.—Mt. 24:45.

³ Tunaona habari hizo za kiroho kuwa za maana sana, iwe ni za zamani ao mpya. Hilo linatuchochea kufuatia mazoezi ili tujue kufundisha Neno la Mungu, wakati tunapowatolea wengine bila uchoyo kweli za maana sana ambazo tumejifunza.

⁴ Tujifunze Kutoka kwa Yesu: Ili kuonyesha jinsi alivyopendezwa na mambo ya kiroho, Yesu alijikaza sana kuwapelekea wengine habari hizo. Hata alipokuwa amechoka, Yesu hakukosa kuwatolea wengine habari za maana kutoka katika “ghala.”—Yoh. 4:6-14.

⁵ Upendo wa Yesu kwa wale ambao hawakumjua Mungu na makusudi yake, ulimchochea kuwatolea kweli za Neno la Mungu ambazo ni habari za maana sana zenye kuleta uzima. (Zab. 72:13) Aliwasikilia huruma wale waliotaka kujifunza kumhusu Mungu na makusudi yake, na hilo lilimchochea “kuwafundisha mambo mengi.”—Marko 6:34.

⁶ Tufuate Mfano wa Yesu: Ikiwa, kama Yesu, tunaona habari za kiroho tulizo nazo kuwa za maana sana, tutapenda sana kuwapasha watu habari za maana zinazopatikana katika Biblia. (Met. 2:1-5) Ijapokuwa nyakati nyingine tunaweza kuwa wenye kuchoka, tutajikaza kufundisha kweli za Biblia kwa uchangamfu. (Marko 6:34) Kupendezwa sana na habari za maana tulizo nazo, kutatuchochea tujitolee kabisa katika kazi ya kuhubiri, kwa kutafuta siku zote kuhubiri kwa kadiri tuwezayo.