Mungu Anawaheshimu Wanawake na Anawaona Kuwa Watu wa Lazima

YESU alipokuwa duniani, alionyesha kabisa sifa za Baba yake na namna yake ya kutenda. Alisema: ‘Sifanye jambo lolote kwa uamuzi wangu mwenyewe; bali kama vile Baba alivyonifundisha, ndivyo ninavyosema. Sikuzote mimi ninafanya mambo yanayomupendeza.’ (Yohana 8:28, 29; Wakolosai 1:15) Kwa hiyo, kwa kuchunguza namna Yesu alivyowatendea wanawake na maoni yake kuwaelekea, tunaweza kuelewa namna Mungu anavyowaona wanawake na yale ambayo anataka wafanye.

Kufuatana na mambo yanayozungumuziwa katika vitabu vya Injili, watu wengi wanaofasiria Biblia wametambua kama namna Yesu alivyowatendea wanawake ilikuwa tofauti sana na namna walivyotendewa wakati huo. Sababu gani ilikuwa hivyo? Na ulizo la lazima zaidi ni hili: Je, mafundisho ya Yesu yanawasaidia watu leo wabadilishe namna yao ya kuwatendea wanawake?

Namna Gani Yesu Aliwatendea Wanawake?

◼ Yesu hakuwaona wanawake kuwa tu vyombo vya kushawishi. Walimu fulani wa dini ya Kiyahudi walifikiri kama kuwa na uhusiano na wanawake kungeweza kuongoza mutu kwenye tamaa. Kwa sababu wanawake walionwa kuwa kishawishi, hawakuruhusiwa kuzungumuza na wanaume mahali pa watu wengi ao kutembea bila kujifunika kichwa. Lakini Yesu yeye hakuwa na mawazo hayo, aliwashauria wanaume wazuie tamaa zao na wawatendee wanawake kwa heshima kuliko kuwaepuka.​—Mathayo 5:28.

Yesu alisema pia hivi: ‘Mutu yeyote anayemutaliki [bibi yake] na kuoa mwengine anafanya uzinzi zidi yake.’ (Marko 10:11, 12) Kwa kusema hivyo, alipinga mafundisho ya walimu wa Kiyahudi yaliyoenea sana ambayo yaliwaruhusu wanaume kuvunja ndoa zao “kwa kila sababu.” (Mathayo 19:3, 9) Wayahudi wengi hawakujua wazo la kwamba bwana anaweza kufanya uzinzi zidi ya bibi yake. Walimu wao wa dini waliwafundisha kama bwana hawezi kufanya uzinzi hata kidogo zidi ya bibi yake; ni bibi tu ndiye anaweza kukosa uaminifu! Kitabu kimoja kinachofasiria Biblia kinasema kama, “Kwa kufanya bibi na bwana wawe na sheria moja tu kuhusu mwenendo, Yesu aliwainua wanawake na kuwaheshimu.”

Namna mafundisho ya Yesu yanavyosaidia watu leo: Katika kutaniko la Mashahidi wa Yehova, wanawake wanakusanyika kwa uhuru pamoja na wanaume. Lakini, wanaume wanaepuka kufanya muzaha sana na wanawake, kwa sababu wanaume Wakristo wanashauriwa kuwatendea “wanawake wazee kama mama, wanawake vijana kama dada kwa usafi wote wa kiadili.”​—1 Timotheo 5:2.

◼ Yesu aliwafundisha pia wanawake. Tofauti na mawazo yaliyoenea sana ya walimu wa dini ya Kiyahudi ambao hawakupenda wanawake wafundishwe, Yesu yeye aliwafundisha wanawake na aliwatia moyo waeleze mawazo yao. Yesu alimufundisha Maria; kwa kufanya hivyo alionyesha kama mwanamuke hapaswe kushugulikia tu kazi za nyumbani. (Luka 10:38-42) Namna Martha, dada yake na Maria, alivyojibu maulizo ya Yesu kisha kifo cha Lazaro inaonyesha kama yeye pia alifaidika na mafundisho yake.​—Yohana 11:21-27.

Yesu hakuzarau mawazo ya wanawake. Wakati huo, wanawake Wayahudi wengi waliwaza kama ili kupata furaha, inaomba kuwa na mutoto mwanaume mwenye kujulikana sana, kwa mufano nabii. Ndiyo sababu mwanamuke mumoja alimulalamikia Yesu, “Lenye furaha ni tumbo la uzazi lililokuchukua wewe!” Lakini, Yesu alitumia nafasi hiyo ili kumuambia jambo fulani la lazima sana. (Luka 11:27, 28) Yesu alimuonyesha mwanamuke huyo kama mambo ya kiroho ndiyo ya lazima zaidi. Kwa hiyo, Yesu alifundisha kama kazi ya wanawake si kushugulikia tu kazi za nyumbani.​—Yohana 8:32.

Namna mafundisho ya Yesu yanavyosaidia watu leo: Ndugu wanaofundisha kwenye mikutano ya Mashahidi wa Yehova wanafurahia pia maelezo ya wanawake. Wanawaheshimu wanawake wakomavu na wanawaona kuwa “walimu wa yaliyo mema,” kwa sababu wanafundisha kupitia mwenendo wao wanapokuwa na watu wengine na wanapokuwa peke yao. (Tito 2:3) Tena, wanatumainiwa sana kuhusu kuwahubiria watu wote habari njema ya Ufalme wa Mungu.—Zaburi 68:11; soma kisanduku “Je, Mutume Paulo Aliwakataza Wanawake Kusema Katika Kutaniko?” kwenye ukurasa wa 9.

◼ Yesu aliwahangaikia wanawake. Wakati wa zamani, watu walipenda kuzaa watoto wanaume kuliko kuzaa watoto wanawake. Juu ya mawazo hayo, Talmud (kitabu cha dini ya Wayahudi) inasema hivi: “Mwenye furaha ni mutu aliye na watoto wanaume, lakini ole wake yule aliye na watoto wanawake.” Wazazi fulani waliona mutoto mwanamuke kuwa muzigo muzito​—walipaswa kumutafutia bwana wa kumuoa na kumupatia bwana huyo mali, na waliona kama mutoto mwanamuke hangeweza kuwasaidia wanapozeeka.

Yesu alionyesha kama uzima wa mutoto mwanamuke ulikuwa wa lazima sawa na ule wa mutoto mwanaume. Kwa hiyo, alimufufua mutoto mwanamuke wa Yairo na pia mutoto mwanaume wa mujane katika muji wa Naini. (Marko 5:35, 41, 42; Luka 7:11-15) Kisha kumuponyesha mwanamuke aliyesumbuliwa na ‘roho ya uzaifu kwa miaka kumi na munane,’ Yesu alimuita mwanamuke huyo “binti ya Abrahamu,” neno ambalo halikupatikana katika maandishi ya Kiyahudi. (Luka 13:10-16) Kwa kutumia neno hilo la heshima, alionyesha kwamba mwanamuke huyo alikuwa mutu wa lazima kama watu wengine na alitambua kama alikuwa na imani kubwa.​—Luka 19:9; Wagalatia 3:7.

Namna mafundisho ya Yesu yanavyosaidia watu leo: Mezali moja ya huko Asia inasema hivi: “Kumulea mutoto mwanamuke ni kama kumuangia maji juu ya mimea katika bustani ya jirani.” Baba Wakristo wenye upendo hawana mawazo hayo, wanawahangaikia watoto wao wote, iwe wanaume ao wanawake. Wazazi Wakristo wanawasomesha na kuwatunzisha watoto wao wote.

◼ Yesu aliwatumainia wanawake. Kwenye tribinali ya Kiyahudi, ushuhuda wa mwanamuke ulionwa kuwa sawa na ule wa mutumwa. Josèphe, mwanahistoria wa wakati wa mitume, alishauria watu hivi: “Ushuhuda wa wanawake haupaswe kukubaliwa kwa sababu ya hali yao ya kukosa kuchukua mambo kwa uzito na zaidi sana kwa sababu wao ni wanawake.”

Lakini, Yesu yeye aliwachagua wanawake ili watoe ushuhuda juu ya ufufuo wake. (Mathayo 28:1, 8-10) Ijapokuwa wanawake hao waaminifu walijionea namna Yesu alivyouawa na kuzikwa, mitume hawakukubali kwa vyepesi maneno yao. (Mathayo 27:55, 56, 61; Luka 24:10, 11) Lakini, Yesu alipofufuka aliwatokea wanawake kwanza; ili kuonyesha kama wao pia wanastahili kutoa ushahidi kama wanafunzi wengine.​—Matendo 1:8, 14.

Namna mafundisho ya Yesu yanavyosaidia watu leo: Katika makutaniko ya Mashahidi wa Yehova, wanaume walio na madaraka wanawaheshimu wanawake kwa kukubali mawazo yao. Na bwana Wakristo, ‘wanawaheshimu’ bibi zao kwa kusikiliza maoni yao kwa uangalifu.​—1 Petro 3:7; Mwanzo 21:12.

Kanuni za Biblia Zinawasaidia Wanawake Kuwa Wenye Furaha

Wanaume wanapomuiga Kristo, wanawake wanapewa heshima na uhuru ambao Mungu alikusudia wawe nao tangu mwanzoni. (Mwanzo 1:27, 28) Bwana Wakristo hawaunge mukono wazo la kwamba wao ni bora kuliko bibi zao, lakini, wanajiacha waongozwe na kanuni za Biblia, na hilo linafanya bibi zao wawe na furaha.​—Waefeso 5:28, 29.

Yelena alipoanza kujifunza Biblia, alikuwa na huzuni moyoni kwa sababu bwana yake alikuwa anamutesa sana. Alikomalia katika eneo ambamo ilikuwa kawaida wanawake kutendewa vibaya, waliibwa ili kuolewa bila wao kutaka na walipigwa. Yelena anasema hivi: “Mambo niliyojifunza katika Biblia yalinipatia nguvu. Nilielewa kama kuna mutu fulani anayenipenda sana, anayeniona kuwa wa lazima na anayenihangaikia. Pia nilielewa kama ikiwa bwana yangu anajifunza Biblia, anaweza kubadilika na kuanza kunitendea vizuri.” Mwishowe, bwana yake alikubali kujifunza Biblia na kisha akabatizwa na kuwa Shahidi wa Yehova. Yelena anasema kama bwana yake “akakuwa mutu mwenye kujizuia.” Anaendelea kusema hivi: “Tulijifunza kusameheana bila kulazimishwa. Kanuni za Biblia zimenisaidia kabisa kujisikia kuwa mutu wa lazima na kupata ulinzi katika ndoa yangu.”​—Wakolosai 3:13, 18, 19.

Kuna wanawake Wakristo wengi walio na furaha kama Yelena kwa sababu wao na bwana zao wanajikaza kutumia kanuni za Biblia katika ndoa zao. Wanaheshimiwa, wanapata kitulizo na uhuru wanapojiunga na Wakristo wenzao.​—Yohana 13:34, 35.

Wanaume na wanawake Wakristo wanajua kama, wote ‘wametiishwa chini ya ubatili’ kwa sababu wao ni watu wenye zambi na wasio wakamilifu. Lakini, kwa kumukaribia Yehova, Mungu na Baba yao mwenye upendo, wana tumaini la kuwekwa “huru kutoka katika utumwa wa uharibifu” na kuwa na “uhuru wenye utukufu wa watoto wa Mungu.” Hilo ni tumaini nzuri kabisa kwa wanaume na wanawake kwa sababu Mungu anawahangaikia wote!​—Waroma 8:20, 21.

[Sanduku katika ukurasa wa 9]

Je, Mutume Paulo Aliwakataza Wanawake Kusema Katika Kutaniko?

Mutume Paulo aliandika hivi: “Wanawake na wakae kimya katika makutaniko.” (1 Wakorintho 14:34) Paulo alimaanisha nini aliposema hivyo? Je, alimaanisha kama wao hawana akili? Hapana. Mara nyingi, alizungumuzia wanawake fulani waliofundisha vizuri. (2 Timotheo 1:5; Tito 2:3-5) Katika barua aliyowaandikia Wakorintho, Paulo aliwashauria wanawake na pia watu waliokuwa na zawadi ya kusema kwa luga na kutoa unabii “wakae kimya” wakati Mukristo mwengine alikuwa anazungumuza.a (1 Wakorintho 14:26-30, 33) Inaonekana kama Wakristo fulani wanawake walikuwa na shauku sana juu ya imani yao mupya, hivi kwamba walimukatiza musemaji ili kuuliza maulizo. Watu walizoea kufanya hivyo katika sehemu hiyo ya dunia. Ili kuepuka muvurugo huo, Paulo aliwatia moyo wanawake “wawaulize waume zao wenyewe nyumbani.”​—1 Wakorintho 14:35.

[Maelezo ya chini]

[Picha katika ukurasa wa 10]

Yesu alimuheshimu Maria Magdalena kwa kumutuma aende kuwajulisha mitume wake kama amefufuliwa

[Picha katika ukurasa wa 11]

Wanaume wanaofuata kanuni za Biblia wanawaheshimu wanawake na kuwaona kuwa wa lazima