Fanya Mema na Ushiriki Pamoja na Wengine

¹ Dorkasi “alizidi katika matendo mema na zawadi za rehema.” (Mdo. 9:36, 39) Roho yake ya ukarimu ilifanya apendwe na watu waliomjua na pia Yehova Mungu. Waebrania 13:16 inasema: “Msisahau kutenda mema na kushiriki vitu pamoja na wengine, kwa maana Mungu hupendezwa vema na dhabihu za namna hiyo.” Namna gani tunaweza kufanya mema na kushiriki pamoja na wengine leo?

² Njia moja katika hiyo tunaweza kufaidi wengine ni kwa kushiriki nao ‘vitu vyetu vyenye thamani.’ (Met. 3:9) Michango yetu ya kifedha kwa ajili ya kazi ya ulimwenguni pote inafanya iwezekane kujenga Majumba ya Ufalme, majumba ya Mikusanyiko, na majengo ya tawi ulimwenguni pote. Ukarimu wetu umewezesha mamilioni ya watu kufaidika na elimu ya kitheokrasi na ushirika wa kiroho wenye kujenga.

³ Shiriki Katika Kufariji Wengine: Misiba inapotokea, watu wa Yehova wanakuwa tayari ‘kutenda mema’ kuelekea waamini wenzao na wale wasio shiriki imani yetu. (Gal. 6:10) Baada ya kiwanda kimoja cha kemikali kulipuka Ufaransa, Mume mmoja na muke wake walioishi karibu na kiwanda hicho walisema: “Ndugu zetu Wakristo walifika mara moja ili kusaidia kusafisha nyumba yetu na zile za wengine pia katika jengo hilo. Majirani wetu walishangaa sana kuona kwamba watu wengi walikuja ili kusaidia.” Dada mwingine alisema: “Wazee wa kutaniko walikuja kutusaidia. Walikuja kututia moyo. Kwa kweli, huo ndio msaada tuliohitaji zaidi kuliko msaada wa kimwili.”

⁴ Ijapokuwa kuna njia nyingi ambazo katika hizo tunaweza kufanyia jirani zetu mema, njia yenye faida sana ambayo katika hiyo tunaweza kuwasaidia ni kushiriki nao ujuzi wa kweli wenye thamani, unaotia ndani “tumaini la uzima wa milele” lililoahidiwa na Yehova mwenyewe. (Tito 1:1, 2) Ujumbe wa Biblia unaleta faraja ya kweli kwa wale wanaoomboleza kwa sababu ya hali za ulimwengu na hali yao wenyewe ya dhambi. (Mt. 5:4) Na tufanye mema na kushiriki pamoja na wengine tunapokuwa na uwezo wa kufanya hivyo.—Met. 3:27.