Muendelee ‘Kujijenga Juu ya Imani Yenu Iliyo Takatifu Zaidi’

1, 2. Ni kazi gani ya ujenzi ambayo unafanya, na sababu gani unapaswa kufikiria sana namna unavyojenga?

TUSEME unafanya kazi ngumu sana ya kujenga nyumba. Kazi hiyo ya ujenzi imekwisha kufanya muda fulani, lakini bado inaendelea. Umekutana na magumu mengi katika kazi hiyo, lakini inakufurahisha. Hata kutokee nini, umeazimia kuendelea na kazi na hautake kulegeza mikono, kwa sababu maisha yako ya sasa na ya wakati ujao yanategemea namna unavyofanya kazi hiyo. Sababu gani tunasema hivyo? Kwa sababu nyumba hiyo tunayozungumuzia ni wewe mwenyewe!

² Mwanafunzi Yuda alikazia jambo la kwamba tunapaswa kujijenga. Wakati aliwashauri Wakristo waendelee kubaki ‘katika upendo wa Mungu,’ katika andiko hilohilo, aliwaonyesha pia jambo linaloweza kuwasaidia wafanye hivyo, ni kusema, walipaswa kuendelea ‘kujijenga juu ya imani yao iliyo takatifu zaidi.’ (Yuda 20, 21) Ni nini unayoweza kufanya ili ujijenge mwenyewe na kufanya imani yako iwe nguvu ili uendelee kubaki katika upendo wa Mungu? Acha tuzungumuzie mambo matatu kuhusu kazi hiyo ya ujenzi wa kiroho ambayo unapaswa kuendelea kufanya.

3-5. (a) Shetani atapenda kukudanganya ili uone kuwa sheria za Yehova ziko namna gani? (b) Tunapaswa kuziona sheria za Mungu namna gani, na jambo hilo linapaswa kutufanya tujisikie namna gani? Toa mufano.

³ Jambo la kwanza ni hili: tunapaswa kuamini kabisa kama sheria za Mungu ni za haki. Katika kitabu hiki, umejifunza sheria mbalimbali za Yehova juu ya mwenendo wetu. Unafikiri sheria hizo ni za haki ao hapana? Shetani atapenda kukudanganya ili uone kwamba sheria na kanuni za Yehova zinakubana sana, zinakukosesha amani. Ameendelea kutumia njia hiyo tangu alipoweza kumudanganya Eva katika Edeni. (Mwanzo 3:1-6) Je, utamuacha pia akudanganye hivyo? Yote itategemea namna unavyoziona sheria za Mungu.

⁴ Tuchukue mufano: Unajitembeza katika bustani nzuri, unaona kama inazunguukwa na ukuta ulio nguvu kabisa ili kuwazuia watu wasiingie humo. Lakini, unapoangalia inje unaona kwamba huko ni mahali penye kupendeza zaidi. Unaweza mara moja kujiuliza kwa nini walitia ukuta huo na kufikiri kama hauna uhuru. Lakini, unapoangalia vizuri huko inje unaona kuna simba mukali anayewinda! Sasa unaona lazima ya ukuta huo: ni kwa kukulinda, sivyo? Je, kuna munyama fulani hatari anayekuwinda wewe sasa? Neno la Mungu linatuonya hivi: ‘Mutunze akili zenu, muwe wenye kulinda. Adui yenu, Ibilisi, anatembea huku na huku kama simba anayenguruma, akitafuta kumumeza mutu.’—1 Petro 5:8.

⁵ Shetani ni mwindaji hatari. Kwa sababu Yehova hapende Shetani atunase, ameweka sheria ili zitulinde tusidanganywe na “hila” ao njia mbalimbali za kudanganya za muovu huyo. (Waefeso 6:11) Kwa hiyo, kila wakati tunapofikiri juu ya sheria za Mungu, tunapaswa kuona kama Baba yetu wa mbinguni ametupatia sheria hizo kwa sababu anatupenda. Tukiona sheria za Mungu kwa njia hiyo, tutaona kama zimetiwa ili tuwe na usalama na furaha pia. Mwanafunzi Yakobo aliandika hivi: “Yeye anayechunguza ndani ya sheria kamilifu iliyo ya uhuru na ambaye hudumu katika hiyo, . . . atakuwa mwenye furaha katika kuitenda.”—Yakobo 1:25.

 6. Namna nzuri kabisa ya kujenga imani katika sheria na kanuni za Mungu ni gani? Toa mufano.

⁶ Kutii amri za Mungu ndio namna nzuri kabisa ya kufanya imani yetu iwe nguvu katika Mupaji-sheria wetu na katika hekima ya sheria zake. Kwa mufano, “sheria ya Kristo” inatia ndani amri ya Yesu ya kufundisha wengine ‘mambo yote ambayo ameamuru.’ (Wagalatia 6:2; Mathayo 28:19, 20) Wakristo pia wanatii amri ya kuendelea kukusanyika pamoja ili kumuabudu Mungu na kutiana moyo. (Waebrania 10:24, 25) Tunashauriwa pia kusali kwa Yehova kwa ukawaida na tumuambie yale yaliyo katika moyo wetu, hiyo pia ni amri ya Mungu. (Mathayo 6:5-8; 1 Wathesalonike 5:17) Tukitii amri hizo, tutafikia kuona wazi kama Mungu alitupatia amri hizo kwa sababu anatupenda. Kuzitii kunatuletea furaha na kutosheka; hakuna mahali tunaweza kupata mambo hayo katika dunia hii yenye kujaa matatizo. Unapoona namna wewe mwenyewe umefaidika kwa kutii sheria za Mungu, je, haujisikie kwamba imani yako inazidi kuwa nguvu?

7, 8. Namna gani Neno la Mungu linatuhakikishia kwamba hatuna sababu ya kuogopa ikiwa tutaendelea kuwa waaminifu kwa Mungu hata kwa miaka mingi?

⁷ Wengine wanafikiri kwamba ni vigumu kabisa kuendelea kutii sheria za Yehova kwa miaka mingi. Wanaogopa kwamba siku fulani wataanguka. Ikiwa wewe pia una mawazo kama hayo, kumbuka maneno haya: ‘Mimi, Yehova, ni Mungu wako, Yeye anayekufundisha ili ujifaidi mwenyewe, Yeye anayekufanya uende katika njia unayopaswa kutembea ndani yake. Laiti ungesikiliza amri zangu! Ndipo amani yako ingekuwa kama muto, na uadilifu wako kama mawimbi ya bahari.’ (Isaya 48:17, 18) Je, umekwisha kuchukua wakati wa kufikiri sana namna maneno hayo yanavyoweza kumusaidia mutu asiogope?

⁸ Katika andiko hilo, Yehova anatukumbusha kwamba ikiwa tunamutii ni kwa faida yetu. Anaahidi kama atatubariki katika njia mbili ikiwa tutatii sheria zake. Baraka ya kwanza: amani yetu itakuwa kama muto, ni kusema, itamuangika kwa utulivu, itajaa, na haitakuwa na mwisho. Baraka ya pili: uadilifu ao haki yetu itakuwa kama mawimbi ya bahari. Ukisimama pembeni ya bahari na kuona namna mawimbi yanainuka na kushuka na kuja kujitupa pembeni, hauna shaka kwamba yataendelea kufanya hivyo kwa ukawaida, milele na milele. Yehova anasema kwamba uadilifu wako, ni kusema, maisha yako ya kufanya yaliyo sawa, yanaweza kuwa hivyo milele na milele. Ukiendelea kujikaza kuwa mwaminifu kwake, yeye hatakuacha hata kidogo! (Zaburi 55:22) Je, ahadi kama hizo zenye kuchangamusha moyo hazikufanye umuaminie sana Yehova na sheria zake?

9, 10. (a) Sababu gani kukomaa kiroho ni muradi muzuri ambao Wakristo wanapaswa kujiwekea? (b) Sababu gani kuona mambo kwa namna ya kiroho kunatusaidia kuwa na furaha?

⁹ Jambo la pili unalopaswa kufanya juu ya ujenzi wako wa kiroho linatajwa katika maneno haya yaliyoongozwa na roho ya Mungu: “Na tusonge mbele kuelekea ukomavu.” (Waebrania 6:1) Kukomaa kiroho ni muradi muzuri ambao Mukristo anapaswa kujiwekea. Kwa sasa hatuwezi kufikia ukamilifu, lakini tunaweza kufikia ukomavu. Pia, Wakristo wanapata furaha nyingi katika utumishi wa Yehova kadiri wanavyoendelea kukomaa. Sababu gani?

¹⁰ Mukristo mwenye kukomaa haone mambo kwa namna ya kimwili. Anaona mambo vile Yehova anavyoyaona. (Yohana 4:23) Mutume Paulo aliandika hivi: ‘Wale wanaopatana na mwili wanakaza akili zao juu ya mambo ya mwili, lakini wale wanaopatana na roho [wanakaza akili zao] juu ya mambo ya roho.’ (Waroma 8:5) Kuona mambo kwa namna ya kimwili kunaleta furaha ndogo tu, kwa sababu mutu anajifikiria tu, anaona mambo kijuujuu, na anavutiwa tu na mambo ya kimwili. Kuona mambo kwa namna ya kiroho kunaleta furaha sana, kwa sababu mutu anamukazia Yehova fikira, yeye ambaye ni “Mungu mwenye furaha.” (1 Timotheo 1:11) Mutu wa kiroho anataka sana kumupendeza Yehova, na hata akiwa katika majaribu yeye ni mwenye furaha. Sababu gani? Majaribu yanamupatia nafasi ya kuonyesha kama yeye ni mushikamanifu, na pia kuonyesha kwamba Shetani ni muongo; mambo hayo yanamufurahisha Baba yetu wa mbinguni.—Methali 27:11; Yakobo 1:2, 3.

11, 12. (a) Mutume Paulo alisema nini juu ya ‘nguvu za ufahamu’ za Mukristo, nalo neno “zimezoezwa” linamaanisha nini? (b) Mwili una lazima ya mazoezi gani ili ukomae vizuri?

¹¹ Kuwa mutu wa kiroho na mwenye kukomaa ni kupitia mazoezi. Fikiria andiko hili: “Chakula kigumu ni cha watu wakomavu, cha wale ambao kwa kutumia, nguvu zao za ufahamu zimezoezwa kutofautisha yaliyo sawa na yaliyo makosa pia.” (Waebrania 5:14) Wakati mutume Paulo alisema kwamba nguvu za ufahamu “zimezoezwa,” alitumia neno la Kigiriki ambalo inaonekana lilitumiwa sana na watu kwenye uwanja wa mazoezi huko Grèce wakati wa mitume, kwa sababu neno hilo linaweza kutafsiriwa ‘kujizoeza kama vile fundi wa michezo ya kuzoeza mwili anavyojizoeza.’ Wazia sasa mambo yanayoombwa kwa mutu huyo.

¹² Wakati mutu anazaliwa, bado mwili wake haujazoea kufanya mambo fulani. Kwa mufano, mutoto muchanga hajue ikiwa mikono ao miguu yake iko wapi. Ndio sababu anakuwa mwenye kutupa-tupa mikono na hata kujiumiza-umiza kwenye uso bila yeye kujua. Lakini, polepole, siku baada ya siku, anapotumia viungo vyake, sehemu za mwili wake zinazoezwa. Mutoto huyo ataanza kutambaa, kisha atatembea, na hata mwishowe atakimbia.a Sasa, tuseme nini juu ya fundi wa michezo ya kuzoeza mwili? Unapomuona mutu huyo anaruka na kujipinda-pinda hewani kwa njia yenye kupendeza na bila kukosea, utashangaa na kuona kama mutu huyo ana ufundi kabisa wa kuendesha mwili wake. Lakini ufundi huo haukujileta wenyewe, iliomba siku nyingi za kufanya mazoezi. Biblia inasema kwamba mazoezi hayo ya mwili ni “yenye faida kidogo.” Kwa hiyo, kuzoeza nguvu zetu za ufahamu wa kiroho kuna faida nyingi zaidi!—1 Timotheo 4:8.

13. Namna gani unaweza kuzoeza nguvu zako za ufahamu?

¹³ Katika kitabu hiki, tumejifunza mambo mengi yatakayokusaidia kuzoeza nguvu zako za ufahamu ili uendelee kubaki mwaminifu kwa Yehova na pia kuwa mutu wa kiroho. Wakati unachukua maamuzi kila siku katika maisha yako, sali na ufikirie sana kanuni za Mungu na sheria zake. Kila mara, mbele ya kuchukua uamuzi fulani, ujiulize hivi: ‘Ni sheria gani ao kanuni gani za Biblia zinazoweza kutumiwa juu ya jambo hili? Namna gani ninaweza kuzitumia? Ni uamuzi gani utakaomupendeza Baba yangu wa mbinguni?’ (Methali 3:5, 6; Yakobo 1:5) Kwa kufanya hivyo kila wakati utazoeza nguvu zako za ufahamu. Mazoezi hayo yatakusaidia kuwa mutu wa kiroho kabisa na yatakusaidia uendelee kuwa hivyo.

14. Ili tukomae kiroho tunapaswa kuwa na hamu ya nini, hata hivyo, tunapaswa kuepuka nini?

¹⁴ Mutu anaweza kufikia ukomavu, hata hivyo atakuwa bado na lazima ya kuendelea kukomaa kiroho. Ili mutu akomae, ni lazima akule chakula. Mutume Paulo alisema hivi: ‘Chakula kigumu ni cha watu waliokomaa.’ Ili kujenga imani yako unapaswa kuendelea kula chakula kigumu cha kiroho. Unapotumia mambo unayojifunza, utaonyesha kwamba una hekima, na Biblia inasema kwamba Hekima ni kitu cha kwanza. Kwa hiyo, tunapaswa kuwa na hamu sana ya kujifunza mafundisho ya kweli ambayo Baba yetu anatutolea. (Methali 4:5-7; 1 Petro 2:2) Hata hivyo, kupata ujuzi na hekima kutoka kwa Mungu hakupaswe kutufanya tuwe na kiburi ao majivuno. Kwa hiyo, tunapaswa kila mara kujichunguza ili kiburi ao uzaifu mwengine wowote usitie mizizi na kuota katika mioyo wetu. Mutume Paulo aliandika hivi: ‘Muendelee kujijaribu kama ninyi muko katika imani, muendelee kuhakikisha ninyi wenyewe jinsi mulivyo.’—2 Wakorintho 13:5.

15. Sababu gani upendo ni wa lazima ili mutu aendelee kukomaa kiroho?

¹⁵ Mutu anaweza kumaliza kujenga nyumba yake, lakini kazi zinaendelea. Itaomba kuichunga vizuri, kuitengeneza tena mahali inapoharibika, na labda itaomba kuongeza tena vyumba, mambo yanapobadilika. Tunapaswa kufanya nini ili kukomaa na kuendelea kuwa watu wa kiroho? Jambo kubwa zaidi ni upendo. Upendo wetu kwa Yehova na kwa ndugu na dada zetu unapaswa kuendelea kukomaa. Ikiwa hatuna upendo, ujuzi wetu na mambo yote tunayofanya yatakuwa ya bure; itakuwa kama kelele isiyo na maana yoyote. (1 Wakorintho 13:1-3) Basi, tukiwa na upendo tunaweza kufikia kuwa Wakristo wenye kukomaa na kuendelea kukomaa kiroho.

16. Shetani anafanya watu wawe na mawazo gani, na Yehova anatupatia chombo gani cha kutulinda?

¹⁶ Acha tuzungumuzie jambo la tatu linalohusu kazi yako ya kujenga. Ili kujenga imani yako na kuwa mwanafunzi wa kweli wa Kristo, unapaswa kuchunga mawazo yako. Shetani ndiye mutawala wa dunia hii, naye ni fundi anayejua kufanya watu wawe na mawazo yasiyofaa, wavunjike moyo, wasitazamie mambo mazuri, wawe na mashaka, wasiwe na tumaini. (Waefeso 2:2) Mawazo kama hayo ni hatari kwa Mukristo, kama vile vidudu wanaokula mbao walivyo hatari kwa nyumba ya mbao. Jambo la kufurahisha ni kwamba Yehova anatupatia chombo fulani cha kutulinda, ni kusema, tumaini.

17. Namna gani Neno la Mungu linaonyesha kwamba tumaini ni jambo la lazima kabisa?

¹⁷ Biblia inataja sehemu mbalimbali za silaha za kiroho ambazo tunapaswa kuvaa ili kupigana na Shetani na ulimwengu wake. Sehemu ya lazima sana ya silaha hizo ni kofia ya chuma, ni kusema, “tumaini la wokovu.” (1 Wathesalonike 5:8) Wakati wa zamani, kila askari alijua kwamba ikiwa anaenda kupigana vita bila kuvaa kofia yake, anaweza kufa huko. Kwa kawaida, kofia hiyo ilikuwa ya chuma na upande wa ndani ulikuwa na kitambaa ao ngozi ili kukinga kichwa cha askari anapotupiwa mishale kwenye kichwa. Kama vile kofia ya chuma inavyolinda kichwa, tumaini pia linaweza kulinda akili yako, ni kusema, mawazo yako.

18, 19. Ni mufano gani Yesu alituwekea wa kuendelea kuwa na tumaini, na namna gani tunaweza kumuiga?

¹⁸ Yesu alituwekea mufano muzuri wa kuendelea kuwa na tumaini. Kumbuka mambo aliyovumilia usiku wa mwisho wa maisha yake hapa duniani. Rafiki yake kabisa alimusaliti kwa sababu ya feza. Rafiki yake mwengine alimukana. Na wale wengine walikimbia wakamuacha. Watu wa inchi yake mwenyewe walimukataa, na wakaomba maaskari wa Roma wamutundike juu ya muti wa mateso na akufe hapo. Tunaweza kusema kama Yesu alipata majaribu makali kuliko majaribu yote tunayoweza kupata. Basi, ni nini iliyomusaidia? Andiko la Waebrania 12:2 linajibu: ‘Kwa ajili ya shangwe iliyowekwa mbele yake, yeye alivumilia muti wa mateso, akaizarau aibu [ao haya], naye ameketi kwenye mukono wa kuume wa kiti cha ufalme cha Mungu.’ Yesu hakusahau hata kidogo furaha iliyowekwa mbele yake.

¹⁹ Ni furaha gani iliyowekwa mbele ya Yesu? Alijua kwamba akivumilia, jina takatifu la Yehova litatakaswa. Na kwamba atatoa ushuhuda mukubwa sana ili kuonyesha Shetani kuwa muongo. Hakuna tumaini lingine ambalo lingeweza kumupatia Yesu furaha kama mambo hayo! Alijua pia kama Yehova atamubariki sana kwa sababu ya uaminifu wake, na kama baada ya muda mufupi atapata pendeleo la kuungana tena na Baba yake. Yesu alitia mawazo yake kwenye tumaini hilo lenye kufurahisha wakati wote wa majaribu. Sisi pia tunapaswa kufanya hivyo. Tuna furaha iliyowekwa pia mbele yetu. Yehova amemupatia kila mumoja wetu pendeleo la kufanya jina lake kubwa litakaswe. Tunaweza kuonyesha Shetani kuwa muongo ikiwa tunakubali kwamba Yehova ana haki ya kuwa Mutawala Mukubwa wa Ulimwengu wote na ikiwa tunabaki katika upendo wa Baba yetu, hata ikiwa tunakutana na majaribu ao vishawishi vya namna gani.

20. Ni nini kinachoweza kukusaidia kuendelea kuwa na tumaini na kuwa na mawazo yanayofaa?

²⁰ Yehova haahidi tu kwamba anawapatia watumishi wake waaminifu zawadi, lakini ana hamu kubwa sana ya kufanya hivyo. (Isaya 30:18; Malaki 3:10) Anafurahi kuwatimizia watumishi wake tamaa zinazofaa za mioyo yao. (Zaburi 37:4) Kwa hiyo, kazia mawazo yako kwenye tumaini lililo mbele yako. Usikubali mawazo yasiyofaa, yaliyopotoka na yasiyo ya kweli ya ulimwengu huu wa Shetani. Ukiona kwamba roho ya ulimwengu inaanza kupenya ao kuingia polepole katika akili na moyo wako, umuombe Yehova kwa bidii ili akupe “amani ya Mungu yenye ubora unaozidi fikira zote.” Amani hiyo itaulinda moyo wako na nguvu zako za akili.—Wafilipi 4:6, 7.

21, 22. (a) Watu wa ‘umati mukubwa’ wana tumaini gani la ajabu? (b) Ni jambo gani katika tumaini la Kikristo linalokuchochea zaidi, na umeazimia kufanya nini?

²¹ Una tumaini nzuri kabisa ambalo unaweza kufikiria! Ikiwa wewe ni wa ‘umati [ao mukutano] mukubwa’ wa watu ambao ‘wataokoka ile ziki kubwa,’ wazia maisha ambayo yanakungojea hivi karibuni. (Ufunuo 7:9, 14) Kisha Shetani na mashetani wake kuondolewa, utapata furaha ambayo kwa sasa hauwezi kuelewa. Ndiyo, kwa kuwa Shetani ameharibu mambo yote, ni vigumu kuwazia maisha yasiyokuwa na matatizo yoyote, sivyo? Wakati matatizo hayo hayatakuwa tena, tutakuwa kabisa wenye furaha na tutafanya kazi ili kuigeuza dunia hii iwe paradiso itakayoongozwa na Yesu na wale 144 000 watakaotawala naye huko mbinguni! Tunangojea kwa hamu sana kuona wakati hakutakuwa tena magonjwa, ulemavu wowote, tutakaribisha watu tuliowapenda walio katika makaburi, na kuishi vile Mungu alivyokusudia tuishi! Tutakapokaribia polepole ukamilifu, zawadi kubwa zaidi itakuwa karibu yetu, zawadi inayotajwa katika andiko la Waroma 8:21—“uhuru wenye utukufu wa watoto wa Mungu.”

²² Yehova anataka ufikie uhuru usio na mipaka ambao hauwezi hata kuwazia. Utii ndio njia itakayokuongoza kwenye uhuru huo. Hauone kwamba inafaa kabisa umutii Yehova kila siku ili upate uhuru huo? Kwa hiyo basi, endelea kujijenga juu ya imani yako iliyo takatifu zaidi, ili uendelee kubaki katika upendo wa Mungu milele na milele!