மாற்கு எழுதியது

13 ஆலயத்தைவிட்டு அவர் புறப்பட்டுப் போய்க்கொண்டிருந்தபோது அவருடைய சீஷர்களில் ஒருவர், “போதகரே, பாருங்கள்! எவ்வளவு அழகான கற்கள், எவ்வளவு அழகான கட்டிடங்கள்!”+ என்று சொன்னார். 2 ஆனால் இயேசு அவரிடம், “பிரமாண்டமான இந்தக் கட்டிடங்களையா பார்க்கிறாய்? ஒரு கல்லின் மேல் ஒரு கல் இல்லாதபடி எல்லாமே நிச்சயமாகத் தரைமட்டமாக்கப்படும்”+ என்று சொன்னார்.

3 பின்பு, ஆலயத்தைப் பார்த்தபடி ஒலிவ மலைமேல் அவர் உட்கார்ந்திருந்தபோது, பேதுருவும் யாக்கோபும் யோவானும் அந்திரேயாவும் தனியாக வந்து, 4 “இதெல்லாம் எப்போது நடக்கும், இதெல்லாம் நிறைவேறப்போகிற* காலத்துக்கு அடையாளம் என்ன, எங்களுக்குச் சொல்லுங்கள்”+ என்று கேட்டார்கள். 5 அதற்கு இயேசு, “உங்களை யாரும் ஏமாற்றிவிடாதபடி எச்சரிக்கையாக இருங்கள்.+ 6 நிறைய பேர் என் பெயரை வைத்துக்கொண்டு வந்து, ‘நான்தான் கிறிஸ்து’ என்று சொல்லி நிறைய பேரை ஏமாற்றுவார்கள். 7 அதுமட்டுமல்ல, போர் முழக்கங்களையும் போர்ச் செய்திகளையும் நீங்கள் கேட்கும்போது, திகிலடையாதீர்கள். இதெல்லாம் நடக்க வேண்டும், ஆனால் முடிவு அப்போதே வராது.+

8 ஜனத்துக்கு எதிராக ஜனமும் நாட்டுக்கு எதிராக நாடும்* சண்டை போடும்.+ அடுத்தடுத்து பல இடங்களில் நிலநடுக்கங்கள் ஏற்படும். பஞ்சங்களும் உண்டாகும்.+ இவையெல்லாம் வேதனைகளுக்கு* ஆரம்பம்.+

9 ஆனால், நீங்கள் எச்சரிக்கையாக இருங்கள். நீங்கள் என்னுடைய சீஷர்களாக இருப்பதால் மக்கள் உங்களை உள்ளூர் நீதிமன்றங்களுக்குக் கொண்டுபோய் நிறுத்துவார்கள்,+ ஜெபக்கூடங்களில் அடிப்பார்கள்,+ ஆளுநர்களுக்கும் ராஜாக்களுக்கும் முன்னால் நிறுத்துவார்கள். அப்போது நீங்கள் அவர்களுக்குச் சாட்சி கொடுக்க முடியும்.+ 10 எல்லா தேசத்தாருக்கும் நல்ல செய்தி முதலாவது பிரசங்கிக்கப்பட வேண்டும்.+ 11 அவர்கள் உங்களை நீதிமன்றத்துக்குக் கொண்டுபோகும்போது, என்ன பேசுவதென்று நினைத்துக் கவலைப்படாதீர்கள்; அந்த நேரத்தில் உங்களுக்கு என்ன அருளப்படுகிறதோ அதையே பேசுங்கள்; ஏனென்றால் பேசுவது நீங்கள் அல்ல, கடவுளுடைய சக்தியே.+ 12 அதோடு, சகோதரனின் சாவுக்கு சகோதரனும், பிள்ளையின் சாவுக்கு அப்பாவும் காரணமாக இருப்பார்கள். பெற்றோருக்கு எதிராகப் பிள்ளைகள் எழும்பி, அவர்களுடைய சாவுக்குக் காரணமாவார்கள்.+ 13 நீங்கள் என் சீஷர்களாக இருப்பதால் எல்லா மக்களும் உங்களை வெறுப்பார்கள்;+ ஆனால், முடிவுவரை சகித்திருப்பவர்தான்+ மீட்புப் பெறுவார்.+

14 இருந்தாலும், பாழாக்கும் அருவருப்பு+ நிற்கக்கூடாத இடத்தில் நிற்பதை நீங்கள் பார்க்கும்போது (வாசிப்பவர் பகுத்தறிவைப் பயன்படுத்தி இதைப் புரிந்துகொள்ளட்டும்), யூதேயாவில் இருப்பவர்கள் மலைகளுக்குத் தப்பியோட வேண்டும்.+ 15 வீட்டு மாடியில் இருப்பவர் கீழே இறங்கிவர வேண்டாம், எதையாவது எடுத்துக்கொண்டு போவதற்காகத் தன் வீட்டுக்குள் போகவும் வேண்டாம். 16 வயலில் இருப்பவர் தன் மேலங்கியை எடுப்பதற்காகத் திரும்பிப் போக வேண்டாம். 17 அந்த நாட்களில் கர்ப்பிணிகளுக்கும் பாலூட்டும் தாய்மார்களுக்கும் ஐயோ ஆபத்து!+ 18 இது குளிர் காலத்தில் நடந்துவிடக் கூடாது என்று ஜெபம் செய்துகொண்டிருங்கள். 19 ஏனென்றால், அந்த நாட்கள் உபத்திரவ+ நாட்களாக இருக்கும். கடவுள் உலகத்தைப் படைத்ததுமுதல் அதுவரை அப்படிப்பட்ட உபத்திரவம் வந்திருக்காது, அதற்குப் பிறகும் வராது.+ 20 சொல்லப்போனால், யெகோவா* அந்த நாட்களைக் குறைக்கவில்லை என்றால், யாருமே தப்பிப்பிழைக்க மாட்டார்கள்; ஆனால், தான் தேர்ந்தெடுத்த மக்களுக்காக அவர் அந்த நாட்களைக் குறைத்திருக்கிறார்.+

21 அதோடு, யாராவது உங்களிடம், ‘இதோ! கிறிஸ்து இங்கே இருக்கிறார்,’ ‘அதோ! அங்கே இருக்கிறார்’ என்று சொன்னால் நம்பாதீர்கள்.+ 22 ஏனென்றால், போலிக் கிறிஸ்துக்களும் போலித் தீர்க்கதரிசிகளும் வருவார்கள்;+ முடிந்தால், தேர்ந்தெடுக்கப்பட்டவர்களையும் வழிவிலக வைப்பதற்காக அடையாளங்களையும் அற்புதங்களையும் செய்வார்கள். 23 அதனால், விழிப்புடன் இருங்கள்;+ எல்லாவற்றையும் உங்களிடம் முன்கூட்டியே சொல்லிவிட்டேன்.

24 ஆனால் அந்த நாட்களில், அந்த உபத்திரவத்துக்குப் பின்பு, சூரியன் இருண்டுவிடும், சந்திரன் ஒளி கொடுக்காது,+ 25 வானத்திலிருந்து நட்சத்திரங்கள் விழும், வான மண்டலங்கள் அசைக்கப்படும். 26 அதன் பின்பு, மனிதகுமாரன்+ மிகுந்த வல்லமையோடும் மகிமையோடும் மேகங்களில் வருவதை அவர்கள் பார்ப்பார்கள்.+ 27 பிறகு, அவர் தேவதூதர்களை அனுப்பி, கடவுளால் தேர்ந்தெடுக்கப்பட்டவர்களைப் பூமியின் ஒரு முனையிலிருந்து வானத்தின் மறுமுனைவரை நான்கு திசைகளிலிருந்தும்* கூட்டிச்சேர்ப்பார்.+

28 அத்தி மர உவமையிலிருந்து இந்தப் பாடத்தைக் கற்றுக்கொள்ளுங்கள்: அதில் இளங்கிளைகள் தோன்றி, இலைகள் துளிர்க்க ஆரம்பித்ததுமே கோடைக் காலம் நெருங்கிவிட்டது என்று தெரிந்துகொள்கிறீர்கள்.+ 29 அப்படியே, இவையெல்லாம் நடப்பதை நீங்கள் பார்க்கும்போது, அவர் கதவுக்குப் பக்கத்திலேயே வந்துவிட்டார் என்று தெரிந்துகொள்ளுங்கள்.+ 30 உண்மையாகவே உங்களுக்குச் சொல்கிறேன், இவையெல்லாம் நடப்பதற்கு முன்பு இந்தத் தலைமுறை ஒருபோதும் ஒழிந்துபோகாது.+ 31 வானமும் பூமியும் ஒழிந்துபோகும்,+ ஆனால் என் வார்த்தைகள் ஒருபோதும் ஒழிந்துபோகாது.+

32 அந்த நாளோ அந்த நேரமோ பரலோகத் தகப்பன் ஒருவரைத் தவிர வேறு யாருக்கும் தெரியாது, பரலோகத்தில் இருக்கிற தேவதூதர்களுக்கும் தெரியாது, மகனுக்கும் தெரியாது.+ 33 இதெல்லாம் எப்போது நடக்குமென்று உங்களுக்குத் தெரியாததால்+ எச்சரிக்கையாக இருங்கள், விழிப்புடன் இருங்கள்.+ 34 ஒருவர் தன் வீட்டைவிட்டுத் தூர தேசத்துக்குப் புறப்பட்டுப் போகும்போது தன் அடிமைகளுக்கு அதிகாரத்தையும் அவனவன் செய்ய வேண்டிய வேலையையும் கொடுத்துவிட்டு,+ விழிப்புடன் இருக்கச் சொல்லி வாயிற்காவலனுக்குக் கட்டளையிடுகிறார்.+ 35 அதனால், விழிப்புடன் இருங்கள்; ஏனென்றால் வீட்டு எஜமான் வரும் நேரம் மாலையா,* நடுராத்திரியா,* சேவல் கூவும் நேரமா,* அல்லது விடியற்காலையா*+ என்பது உங்களுக்குத் தெரியாது.+ 36 அவர் திடீரென்று வரும்போது, நீங்கள் தூங்கிக்கொண்டிருக்காதபடி+ பார்த்துக்கொள்ளுங்கள். 37 உங்களுக்குச் சொல்வதை எல்லாருக்கும் சொல்கிறேன், விழிப்புடன் இருங்கள்”+ என்றார்.