ஊழியத்தில் நம் திறமைகளை மெருகூட்ட... சந்தர்ப்ப சாட்சி கொடுக்கும் நோக்கத்தோடு பேச்சை ஆரம்பியுங்கள்

ஏன் முக்கியம்? வீட்டுக்கு வீடு ஊழியம் செய்யும்போது நிறைய வீடுகள் பூட்டியிருப்பதைப் பார்க்கிறோம். அந்த வீட்டில் இருக்கும் நபர்களை நாம் பஸ்சில்... ரயிலில்... மருத்துவமனையில்... பள்ளியில்... வேலை செய்யும் இடத்தில்... என வித்தியாசமான இடங்களில் பார்க்கலாம். எல்லோருக்கும் நாம் சத்தியத்தைச் சொல்ல வேண்டும் என்று யெகோவா விரும்புகிறார். (1 தீ. 2:3, 4) சந்தர்ப்ப சாட்சி கொடுக்க வேண்டுமென்றால் நாம்தான் முதலில் பேச்சை ஆரம்பிக்க வேண்டும்.

எப்படிச் செய்வது?

யாரிடம் பேசுவதென்று முதலில் பாருங்கள். அவர் நட்பாக பழகும் ஆள் போல் தெரிகிறாரா? பேச்சு கொடுத்தால் நம்மிடம் பேசுவாரா? பேசுவதற்கு ஏற்ற சூழல் இருக்கிறதா? சில சாட்சிகள் ஒரு நபரிடம் பேசுவதற்கு முன் அவரைப் பார்த்து, அன்பாக புன்னகை செய்கிறார்கள். பதிலுக்கு அந்த நபரும் புன்னகை செய்தால், பேச ஆரம்பிக்கிறார்கள்.
பேச தைரியம் வராவிட்டால், உடனே மனதிற்குள் ஒரு சின்ன ஜெபம் செய்யுங்கள்.—நெ. 2:4; அப். 4:29.
எளிமையாகப் பேச்சை ஆரம்பியுங்கள். சமாரியப் பெண்ணிடம் இயேசு சாட்சி கொடுத்த சமயத்தில், கடவுளுடைய அரசாங்கத்தைப் பற்றி சொல்லி பேச்சை ஆரம்பிக்கவில்லை. (யோவா. 4:7) நாம் எப்படி பேச்சை ஆரம்பிக்கலாம்? “உங்க பிள்ளைங்க ரொம்ப மரியாதையா நடந்துக்குறாங்க. நீங்க நல்லா வளர்த்திருக்கீங்க” என்று அவர்களைப் பாராட்டி பேச்சை ஆரம்பிக்கலாம். “நேத்து செய்தி பாத்தீங்களா?” என்று ஒரு கேள்வி கேட்பதன் மூலமும் பேச்சை ஆரம்பிக்கலாம்.
பேச்சை ஆரம்பித்த பிறகு, நற்செய்தியைச் சொல்ல முயற்சி செய்யுங்கள்; அதே சமயத்தில் அவசரப்படாதீர்கள். பேசிக் கொண்டிருக்கும்போதே அவருடைய ஆர்வத்தைத் தூண்டுகிற விதத்தில் சாட்சி கொடுங்கள். உதாரணத்திற்கு, குடும்ப விஷயங்களைப் பற்றி பேசிக்கொண்டிருந்தால், “பிள்ளைகள வளர்க்குறத பத்தி நல்ல நல்ல ஆலோசனைகள ஒரு புக்குல படிச்சேன்” என்று சொல்லுங்கள். செய்தியில் கேட்ட ஒரு விஷயத்தைப் பற்றி பேசிக்கொண்டிருந்தால், “இதெல்லாம் அப்படியே தலைகீழா மாற போகுதுன்னு நான் படிச்சேன்” என்று சொல்லுங்கள். அதைப் பற்றி அதிகம் தெரிந்துகொள்ள அவர் உங்களிடம் ஏதாவது கேள்வி கேட்கலாம். ஒருவேளை, நீங்கள் சாட்சி கொடுக்க ஆரம்பிப்பதற்கு முன்பே அவர் அந்த இடத்தைவிட்டு போகவேண்டியிருந்தால் சோர்ந்துபோகாதீர்கள்.
சாதுரியமாகவும் கவனமாகவும் இருங்கள். உங்கள் கருத்தை நீங்கள் திணிப்பதாக அவர் நினைத்துவிடக் கூடாது. பைபிளிலிருந்து ஒரு விஷயத்தைச் சொல்வதற்கு முன், அந்த நபருக்கு பைபிளில் ஆர்வம் இருக்கிறதா என்று தெரிந்துகொள்ளுங்கள். அதற்கு, சாதுரியமாக ஒரு கேள்வி கேளுங்கள். ஆர்வமுள்ளவர்களுக்குக் கொடுக்க, துண்டுப்பிரதிகளை அல்லது மற்ற பிரசுரங்களைக் கையில் வைத்திருங்கள்.

இந்த மாதம் முயன்று பாருங்கள்:

ஒரு வாரத்தில் ஒருவரிடமாவது சந்தர்ப்ப சாட்சி கொடுக்க வேண்டும் என்ற நோக்கத்தோடு பேச்சை ஆரம்பியுங்கள்.