² இதை மனதில் கொண்டு, ஏசாயா தீர்க்கதரிசி விவரித்த சூழ்நிலையின் முக்கியத்துவத்தை நாம் புரிந்துகொள்ள முடியும். “இதோ, இருள் பூமியையும், காரிருள் ஜனங்களையும் மூடும்” என்பதாக அவர் சொன்னார். (ஏசாயா 60:2) இங்கு சொல்லப்படும் காரிருள், சொல்லர்த்தமான இருளை அர்த்தப்படுத்தவில்லை என்பது உண்மைதான். என்றோ ஒருநாள் சூரியனும் சந்திரனும் நட்சத்திரங்களும் ஒளிவீசாமல் போய்விடும் என்பதாக ஏசாயா சொல்லவில்லை. (சங்கீதம் 89:36, 37; 136:7-9) மாறாக, அவர் ஆவிக்குரிய இருளைப் பற்றி சொல்லிக் கொண்டிருந்தார். ஆவிக்குரிய இருளோ மரணத்திற்கு ஏதுவானது. நாளாக ஆக, நம்மால் வெளிச்சமின்றி உயிர் வாழ்வது முடியாத காரியம். அதைப் போலவே ஆவிக்குரிய வெளிச்சமின்றி உயிர் வாழ்வதும் முடியவே முடியாத காரியம்.​—⁠லூக்கா 1:78, 79.

3. ஏசாயாவின் வார்த்தைகளைக் கருத்தில் கொண்டு கிறிஸ்தவர்கள் என்ன செய்ய வேண்டும்?

³ இதைக் கருத்தில் கொண்டு, ஏசாயாவின் வார்த்தைகள் பூர்வ யூதாவின் மீது நிறைவேற்றம் அடைந்திருந்தாலும் நம் நாளில் மிகப் பெரிய நிறைவேற்றத்தைக் காண்கின்றன என்பதை கவனிப்பது அவசியம். ஆம், இன்று இந்த உலகத்தை ஆவிக்குரிய இருள் போர்வை போல மூடியிருக்கிறது. ஆகவே இத்தகைய ஆபத்தான நிலையில் ஆவிக்குரிய ஒளி எவ்வளவு மதிப்பு வாய்ந்தது என்பதை சற்று யோசித்துப்பாருங்கள். அதன் காரணமாகவே, ‘உங்கள் வெளிச்சம் மனிதர்கள் முன்பாகப் பிரகாசிக்கக்கடவது’ என்ற இயேசுவின் புத்திமதிக்கு கிறிஸ்தவர்கள் செவிசாய்க்க வேண்டியது அவசியம். (மத்தேயு 5:16) உண்மை கிறிஸ்தவர்கள் தாழ்மையுள்ளவர்களுக்கு ஒளியைப் பிரகாசித்து இருளை நீக்குவதன்மூலம் ஜீவனைப் பெறும் வாய்ப்பை அவர்களுக்கு அளிக்கிறார்கள்.​—⁠யோவான் 8:⁠12.

4. ஏசாயாவின் தீர்க்கதரிசன வார்த்தைகள் முதலாவதாக எப்போது நிறைவேறின, ஆனால் ஏற்கெனவே என்ன நிலைமை அவருடைய நாட்களில் நிலவி வந்தது?

⁴ யூதா பாழ்ப்பட்டு, அதன் ஜனங்கள் பாபிலோனில் நாடுகடத்தப்பட்ட காலத்தில் பூமியை இருள் மூடுவதைப் பற்றிய ஏசாயாவின் வார்த்தைகள் முதன்முதல் நிறைவேற்றமடைந்தன. எனினும், அதற்கும் முன்பாகவே, ஏசாயாவின் நாட்களில் தேசத்தில் பெரும்பாலானோரை ஆவிக்குரிய இருள் போர்வை போல் மூடியிருந்தது. அதுவே தனது தேசத்தாரை பின்வருமாறு அறிவுறுத்த அவரைத் தூண்டியது: “யாக்கோபின் வம்சத்தாரே, கர்த்தரின் [“யெகோவாவின்,” NW] வெளிச்சத்திலே நடப்போம் வாருங்கள்.”​—⁠ஏசாயா 2:⁠5; 5:20.