‘விலையுயர்ந்த ஒரு முத்தைக் கண்டுபிடித்தல்’

“பரலோக ராஜ்யமே மனிதர் பிரயாசப்படுகிற இலக்காக உள்ளது, தொடர்ந்து பிரயாசப்படுவோர் அதைப் பற்றிக்கொள்கின்றனர்.”​—⁠மத்தேயு 11:12, NW.

1, 2. (அ) ராஜ்யத்தைப் பற்றிய ஓர் உவமையில் அரிதான என்ன குணத்தை இயேசு குறிப்பிட்டார்? (ஆ) விலையுயர்ந்த ஒரு முத்தைப் பற்றிய உவமையில் இயேசு என்ன சொன்னார்?

உங்களுக்குச் சொந்தமான அனைத்தையும் கொடுத்து அல்லது தியாகம் செய்து பெற்றுக்கொள்கிற அளவுக்கு நீங்கள் உயர்வாக மதிக்கும் ஏதாவது ஒன்று உள்ளதா? பணம், புகழ், பதவி போன்ற ஏதேனுமொரு இலக்கை அடைய கருமமே கண்ணாக இருப்பதைப் பற்றி ஆட்கள் பேசுவது உண்மைதான்; ஆனால், மிகவும் விரும்பத்தக்க ஒன்றை அடைவதற்காக ஒரு நபர் தன்னிடமுள்ள எல்லாவற்றையும் தியாகம் செய்ய முன்வருவது வெகு அரிதே. இப்படிப்பட்ட அரிதான, அதே சமயத்தில் அருமையான குணத்தைப் பற்றி இயேசு குறிப்பிட்டார்; கடவுளுடைய ராஜ்யத்தைப் பற்றிய சிந்திக்கத் தூண்டும் உவமைகள் ஒன்றில் அதைக் குறிப்பிட்டார்.

² இயேசு தம் சீஷர்களோடு தனித்திருக்கும்போது, ‘விலையுயர்ந்த ஒரு முத்தைப்’ பற்றிய அந்த உவமையைச் சொன்னார். அதை அவர் இப்படியாக விளக்கினார்: “பரலோக ராஜ்யம் நல்ல முத்துக்களைத் தேடுகிற [அதாவது, தேடிப் பயணிக்கிற] ஒரு வியாபாரிக்கு ஒப்பாயிருக்கிறது. அவன் விலையுயர்ந்த ஒரு முத்தைக் கண்டு, போய், தனக்குண்டான எல்லாவற்றையும் விற்று, அதைக் கொள்ளுகிறான்.” (மத்தேயு 13:36, 45, 46) தம் சீஷர்கள் இந்த உவமையிலிருந்து என்ன பாடத்தைக் கற்றுக்கொள்ள வேண்டுமென இயேசு விரும்பினார்? இயேசுவின் வார்த்தைகளிலிருந்து நாம் எப்படிப் பயனடையலாம்?

மதிப்புமிக்க முத்துக்கள்

 3.பூர்வ காலங்களில் நல்முத்துக்கள் ஏன் அந்தளவு மதிப்புமிக்கவையாய் இருந்தன?

³ பழங்காலத்திலிருந்தே முத்துக்கள் அலங்காரப் பொருள்களாக உயர்வாய் மதிக்கப்பட்டு வந்திருக்கின்றன. “விலைமதிப்புள்ள எல்லாப் பொருட்களுக்கும் மேலாக முதல் இடத்தைப்” பிடித்திருந்தது முத்துக்களே என ரோம எழுத்தாளரான மூத்த பிளைனி குறிப்பிட்டதாக ஒரு புத்தகம் சொல்கிறது. பொன், வெள்ளி, பற்பல இரத்தினக் கற்கள் ஆகியவற்றைப் போல் அல்லாமல் முத்துக்கள் உயிரினங்களால் உருவாக்கப்படுகின்றன. யாவரும் அறிந்தபடி, சில வகை சிப்பிகள் அவற்றின் உடலுக்குள் சென்று உறுத்துகிற பொருட்களை, உதாரணமாக மண் துகள்களை, பளபளக்கும் முத்துக்களாக உருமாற்ற முடியும். எப்படி? உறுத்துகிற அந்த மண் துகள்களை மூடும் விதத்தில் நேக்கர் என்ற ஒருவித திரவத்தை அவை சுரக்கின்றன; அடுக்கடுக்காகப் படிகிற இந்தத் திரவம் பிற்பாடு முத்துக்களாக உருவாகின்றன. பூர்வ காலங்களில், இஸ்ரவேல் தேசத்திற்கு வெகு தொலைவில் உள்ள கடல்களிலிருந்து, முக்கியமாக செங்கடலிலிருந்தும் பெர்சிய வளைகுடாவிலிருந்தும் இந்தியப் பெருங்கடலிலிருந்துமே நல்முத்துக்கள் எடுக்கப்பட்டன. அதனால்தான் ‘நல்ல முத்துக்களைத் தேடிப் பயணிக்கிற ஒரு வியாபாரியைப்’ பற்றி இயேசு குறிப்பிட்டார். ஆம், மிகவும் விலைமதிப்புள்ள முத்துக்களைக் கண்டுபிடிக்க பெருமுயற்சி தேவை.

 4.பயணிக்கிற வியாபாரியைப் பற்றிய உவமையில் இயேசு எதைச் சுட்டிக்காட்டினார்?

⁴ பண்டைய காலம் தொட்டே நல்முத்துக்கள் அதிக விலை போனாலும், அதன் பண மதிப்பின் முக்கியத்துவத்தைச் சுட்டிக்காட்டுவதற்காக இயேசு இந்த உவமையைச் சொல்லவில்லை. இந்த உவமையில் கடவுளுடைய ராஜ்யத்தை விலையுயர்ந்த ஒரு முத்துக்கு ஒப்பிடுவதோடு அவர் நிறுத்திவிடவில்லை; ‘நல்ல முத்துக்களைத் தேடிப் பயணிக்கிற ஒரு வியாபாரியிடம்’ கவனத்தை ஈர்த்தார், அதோடு ஒரு நல்முத்தைக் கண்டுபிடித்ததும் அந்த வியாபாரி என்ன செய்தார் என்பதனிடமும் கவனத்தை ஈர்த்தார். முத்தைத் தேடிப் பயணித்த வியாபாரி ஒரு சாதாரணக் கடைக்காரரைப் போல் இருக்கவில்லை; முத்தைப் பற்றிய சகல விவரங்களையும் கூர்ந்து கவனிப்பவராக, அல்லது அதற்கே உரிய அழகையும் நுணுக்கங்களையும் அறிந்த கலைஞராக அவர் இருந்தார். முத்தைப் பார்த்த மாத்திரத்தில் அது நிஜமானதா என்பதைக் கண்டுபிடித்து விடும் திறமையுள்ளவராக இருந்தார், ஆகவே தரம் குறைந்த முத்தை அல்லது போலி முத்தை வாங்கி ஏமாறாதிருந்தார்.

5, 6. (அ) இயேசுவின் உவமையில் குறிப்பிடப்பட்ட அந்த வியாபாரியைப் பற்றியதில் கவனிக்க வேண்டிய முக்கிய விஷயம் என்ன? (ஆ) நிலத்தில் புதைத்திருக்கிற பொக்கிஷத்தைப் பற்றிய உவமை பயணிக்கிற வியாபாரியைக் குறித்து எதை வெளிப்படுத்துகிறது?

⁵ இந்த வியாபாரியைப் பற்றியதில் கவனிக்க வேண்டிய மற்றொரு முக்கிய விஷயமும் உள்ளது. ஒரு சாதாரண வியாபாரி, முத்து எத்தனை விலைக்குப் போகும் என்பதை முதலில் கணக்கிடுவார்; அப்போதுதான் எவ்வளவு விலைக்கு அதை வாங்கினால் தனக்கு லாபம் கிடைக்கும் என்பதை அவரால் தீர்மானிக்க முடியும். உடனடியாக விலைபோகும் அளவுக்கு அத்தகைய முத்துக்கு ஜனங்கள் மத்தியில் கிராக்கி இருக்கிறதா என்பதையும் அவர் சிந்தித்துப் பார்ப்பார். வேறு வார்த்தைகளில் சொன்னால், அந்த முத்தைச் சொந்தமாய் வைத்துக் கொள்ள விரும்புவதற்குப் பதிலாக, தான் போட்ட முதலுக்கு உடனடியாக லாபம் கிடைக்க வேண்டும் என்பதிலேயே அவர் குறியாக இருப்பார். ஆனால் இயேசுவின் உவமையில் குறிப்பிடப்பட்ட வியாபாரிக்கு அப்படிப்பட்ட எண்ணம் இருக்கவில்லை. லாபம் சம்பாதிப்பதில் அவர் ஆர்வம் காட்டவில்லை. சொல்லப்போனால், தான் தேடிக்கொண்டிருந்த பொருளைப் பெற்றுக்கொள்வதற்காக, “தனக்குண்டான எல்லாவற்றையும்,” ஒருவேளை சொத்துபத்துகள் எல்லாவற்றையுமே விற்றுவிட அவர் தயாராய் இருந்தார்.

⁶ பெரும்பாலான வியாபாரிகளின் பார்வைக்கு இயேசுவின் உவமையில் குறிப்பிடப்பட்ட அந்த வியாபாரி செய்தது முட்டாள்தனமான ஒரு காரியமாகத் தோன்றலாம். விவரமான ஒரு வியாபாரி, இப்படிப்பட்ட வியாபாரத்தில் துணிந்து இறங்குவதைப் பற்றி யோசித்துக்கூட பார்க்க மாட்டார். ஆனால் இயேசுவின் உவமையில் குறிப்பிடப்பட்ட வியாபாரிக்கு வித்தியாசப்பட்ட மதிப்பீடுகள் இருந்தன. பொருளாதார ஆதாயத்தை அல்ல, ஆனால் ஒப்பற்ற மதிப்புடைய ஒன்றைச் சொந்தமாக்கிக் கொள்வதில் கிடைக்கிற மகிழ்ச்சியையும் திருப்தியையுமே அவர் லாபமாகக் கருதினார். இயேசு சொன்ன இதே போன்ற மற்றொரு உவமையில் இந்தக் குறிப்பு தெளிவுபடுத்தப்படுகிறது. “பரலோக ராஜ்யம் நிலத்தில் புதைத்திருக்கிற பொக்கிஷத்துக்கு ஒப்பாயிருக்கிறது; அதை ஒரு மனுஷன் கண்டு, மறைத்து, அதைப் பற்றிய சந்தோஷத்தினாலே போய், தனக்கு உண்டான எல்லாவற்றையும் விற்று, அந்த நிலத்தைக் கொள்ளுகிறான்” என்று அவர் சொன்னார். (மத்தேயு 13:44) ஆம், அந்தப் பொக்கிஷத்தைக் கண்டுபிடித்து அதைச் சொந்தமாக்கிக் கொள்வதில் கிடைக்கும் மகிழ்ச்சியே தனக்குண்டான எல்லாவற்றையும் விற்றுப்போட அந்த வியாபாரியைத் தூண்டியது. இவரைப் போன்ற ஆட்கள் இன்று இருக்கிறார்களா? இப்படியொரு தியாகம் செய்யுமளவுக்கு மதிப்புடைய பொக்கிஷம் ஏதாவது இருக்கிறதா?

விலைமதிப்பை உணர்ந்தவர்கள்

 7. ராஜ்யத்தின் உயர் மதிப்பை இயேசு நன்கு உணர்ந்திருந்ததை எப்படிக் காட்டினார்?

⁷ இயேசு தம் உவமையில் ‘பரலோக ராஜ்யத்தைப்’ பற்றி சொல்லிக்கொண்டிருந்தார். ராஜ்யத்தின் உயர் மதிப்பை அவர் தாமே உணர்ந்திருந்தார் என்பதில் சந்தேகமில்லை. சுவிசேஷப் பதிவுகள் இதற்கு ஆணித்தரமான ஆதாரங்களை அளிக்கின்றன. பொ.ச. 29-⁠ல் அவர் முழுக்காட்டுதல் பெற்ற பிறகு, “மனந்திரும்புங்கள், பரலோக ராஜ்யம் சமீபித்திருக்கிறது என்று பிரசங்கிக்கத் தொடங்கினார்.” திரளானோருக்கு ராஜ்யத்தைப் பற்றி மூன்றரை ஆண்டுகள் போதித்தார். தேசமெங்கும் சுற்றித் திரிந்து, ‘பட்டணங்கள்தோறும் கிராமங்கள்தோறும் பிரயாணம் பண்ணி, தேவனுடைய ராஜ்யத்திற்குரிய நற்செய்தியைக் கூறிப் பிரசங்கித்தார்.’​—⁠மத்தேயு 4:17; லூக்கா 8:1.

 8. கடவுளுடைய ராஜ்யம் எதையெல்லாம் சாதிக்கும் என்பதைக் காட்ட இயேசு என்னென்ன செய்தார்?

⁸ கடவுளுடைய ராஜ்யம் எதையெல்லாம் சாதிக்கும் என்பதைக்கூட இயேசு காட்டினார். சுகவீனரைச் சுகப்படுத்துவது, பசித்தோருக்கு உணவளிப்பது, இயற்கை சக்திகளை அடக்குவது, மரித்தோரை உயிர்த்தெழுப்புவது எனத் தேசம் முழுவதும் எண்ணற்ற அற்புதங்கள் மூலம் அதைச் செய்து காட்டினார். (மத்தேயு 14:14-21; மாற்கு 4:37-39; லூக்கா 7:11-17) கடைசியாக, கழுமரத்தில் ஒரு தியாகியாகத் தம்முடைய உயிரையே கொடுப்பதன் மூலம் கடவுள் மீதும் அவருடைய ராஜ்யத்தின் மீதுமுள்ள தம் பற்றுறுதியை நிரூபித்துக் காட்டினார். உவமையிலுள்ள அந்த வியாபாரி, ‘விலையுயர்ந்த ஒரு முத்துக்காக’ எல்லாவற்றையும் விற்றுவிட்டதைப் போல இயேசுவும் ராஜ்யத்திற்காகவே வாழ்ந்தார், ராஜ்யத்திற்காகவே உயிர்விட்டார்.​—⁠யோவான் 18:37.

 9. இயேசுவின் முதல் சீஷர்களிடத்தில் என்ன ஓர் அரிய குணம் காணப்பட்டது?

⁹ கடவுளுடைய ராஜ்யத்தை இயேசு தம் வாழ்க்கையில் மையமாக வைத்தது மட்டுமல்லாமல், சில சீஷர்களையும் கூட்டிச் சேர்த்தார். அவர்களும்கூட ராஜ்யத்தின் உயர் மதிப்பை நன்கு உணர்ந்தவர்களாய் இருந்தார்கள். அவர்களில் ஒருவரான அந்திரேயா, முழுக்காட்டுபவரான யோவானின் சீஷனாக ஆரம்பத்தில் இருந்தார். இயேசுவைத் ‘தேவ ஆட்டுக்குட்டி’ என யோவான் குறிப்பிட்டவுடன் அந்திரேயாவும் யோவானின் மற்றொரு சீஷனும் (அநேகமாய் செபெதேயுவின் குமாரன் யோவானாக இருக்கலாம்) அவரிடமாக மனங்கவரப்பட்டு அவரது சீஷரானார்கள். விஷயம் அத்தோடு நின்றுவிடவில்லை. அந்திரேயா உடனடியாகத் தன் சகோதரனான சீமோனிடம் சென்று “மேசியாவைக் கண்டோம்” என்று சொன்னார். அதற்குப் பிறகு சீக்கிரத்திலேயே சீமோனும் (இவர் பிற்பாடு கேபா, அதாவது பேதுரு என அழைக்கப்பட்டார்) பிலிப்புவும் அவருடைய நண்பரான நாத்தான்வேலும் இயேசுவை மேசியாவாக ஏற்றுக்கொண்டார்கள். சொல்லப்போனால், அவரிடம் “நீர் தேவனுடைய குமாரன், நீர் இஸ்ரவேலின் ராஜா” எனச் சொல்லும்படி நாத்தான்வேல் தூண்டப்பட்டார்.​—⁠யோவான் 1:35-49.

செயல்படத் தூண்டப்படுதல்

10. இயேசு தம் சீஷர்களை முதலில் சந்தித்து கொஞ்ச காலத்திற்குப் பிறகு மீண்டும் வந்து அவர்களை அழைத்தபோது அவர்கள் என்ன செய்தார்கள்?

¹⁰ மேசியாவைக் கண்டவுடன் அந்திரேயா, பேதுரு, யோவான் ஆகியோரும் இன்னும் அநேகரும் அடைந்த மகிழ்ச்சியை விலையுயர்ந்த முத்தைக் கண்டுபிடித்த அந்த வியாபாரி அடைந்த மகிழ்ச்சிக்கு ஒப்பிடலாம். அதன் பிறகு அந்தச் சீஷர்கள் என்ன செய்தார்கள்? அதைப் பற்றி சுவிசேஷப் பதிவுகள் அதிகமாகச் சொல்வதில்லை. அவர்களில் பலர் தங்கள் பழைய வாழ்க்கை முறைக்கே திரும்பிவிட்டிருக்கலாம். என்றாலும் சுமார் ஆறிலிருந்து பன்னிரெண்டு மாதத்திற்குப் பிறகு, அந்திரேயா, பேதுரு, யோவான், அவருடைய சகோதரனான யாக்கோபு ஆகியோர் கலிலேயாக் கடலில் மீன் பிடித்துக் கொண்டிருக்கையில் இயேசு மீண்டும் அவர்களைச் சந்தித்தார்.a அவர்களைப் பார்த்து, “என் பின்னே வாருங்கள், உங்களை மனுஷரைப் பிடிக்கிறவர்களாக்குவேன்” என்று சொன்னார். அப்போது அவர்கள் என்ன செய்தார்கள்? “உடனே அவர்கள் வலைகளை விட்டு, அவருக்குப் பின்சென்றார்கள்” எனப் பேதுருவையும் அந்திரேயாவையும் பற்றி மத்தேயுவின் சுவிசேஷப் பதிவு கூறுகிறது. யாக்கோபும் யோவானுமோ தங்கள் ‘படகையும் தங்கள் தகப்பனையும் விட்டு, அவருக்குப் பின்சென்றார்கள்’ என அப்பதிவில் நாம் வாசிக்கிறோம். லூக்காவின் சுவிசேஷம் இன்னும் ஒருபடி மேலாக, அவர்கள் “எல்லாவற்றையும் விட்டு, அவருக்குப் பின்சென்றார்கள்” எனக் குறிப்பிடுகிறது.​—⁠மத்தேயு 4:18-22; லூக்கா 5:1-11.

11. இயேசு அழைத்தவுடன் அவருக்குப் பின்செல்ல சீஷர்களை எது தூண்டியிருக்கும்?

¹¹ ஏதோவொரு உணர்ச்சி வேகத்தில்தான் அந்தச் சீஷர்கள் இயேசுவுக்குப் பின்செல்ல முடிவெடுத்தார்களா? இல்லவே இல்லை! இயேசுவை முதன்முறை சந்தித்ததற்குப் பிறகு பழையபடி அவர்கள் மீன்பிடிக்கும் தொழிலுக்கே திரும்பிவிட்டிருந்த போதிலும், அந்த முதல் சந்தர்ப்பத்தில் அவர்கள் கண்ட, கேட்ட காரியங்கள் அவர்களுடைய இதயத்திலும் மனதிலும் அழியா முத்திரையைப் பதித்துவிட்டிருந்தன. இந்த இடைப்பட்ட காலத்தில், அதாவது சுமார் ஒரு வருட காலத்தில் அந்தக் காரியங்களை அவர்கள் எண்ணிப் பார்ப்பதற்குப் போதுமான சமயம் இருந்தது. இப்போதோ தீர்மானம் எடுப்பதற்கான நேரம் வந்துவிட்டிருந்தது. இயேசு சொன்ன அந்த வியாபாரி விலையுயர்ந்த முத்தைத் தேடிக் கண்டுபிடிக்க அந்தளவு மனம் தூண்டப்பட்டதால் ‘உடனடியாகப் போய்’ அதை வாங்குவதற்குத் தேவையானவற்றை செய்தார், இயேசுவின் சீஷர்களும் அந்த வியாபாரியைப் போலவே இருந்தார்களா? ஆம், சீஷர்கள் கண்ட, கேட்ட காரியங்கள் அவர்களது இருதயத்தைத் தூண்டின. செயல்படுவதற்கான காலம் வந்துவிட்டதை அவர்கள் புரிந்துகொண்டார்கள். ஆகவே, பதிவு சொல்கிறபடி அவர்கள் எந்தத் தயக்கமும் இல்லாமல் எல்லாவற்றையும் விட்டுவிட்டு இயேசுவின் சீஷரானார்கள்.

12, 13. (அ) இயேசுவின் அழைப்புக்கு அநேகர் எப்படிப் பிரதிபலித்தார்கள்? (ஆ) தம்முடைய உண்மையுள்ள சீஷர்களைப் பற்றி இயேசு என்ன சொன்னார், அவருடைய வார்த்தைகள் எதைக் குறிக்கின்றன?

¹² சுவிசேஷங்களில் பிற்பாடு குறிப்பிடப்பட்டுள்ள சிலருக்கும் இந்த உண்மையுள்ள சீஷர்களுக்கும் இடையே எப்பேர்ப்பட்ட வித்தியாசம்! அநேகருக்கு இயேசு சுகமளித்தார், உணவளித்தார், ஆனாலும் அவர்கள் தங்களுடைய அன்றாட வேலைகளில்தான் தொடர்ந்து ஈடுபட்டார்கள். (லூக்கா 17:17, 18; யோவான் 6:26) சீஷராகும்படி இயேசுவால் அழைக்கப்பட்ட இன்னும் சிலரோ சாக்குப்போக்குச் சொல்லி திரும்பிப் போய்விட்டார்கள். (லூக்கா 9:59-62) இவர்களிலிருந்து முற்றிலும் வேறுபட்டிருந்த தம்முடைய உண்மையுள்ள சீஷர்களைப் பற்றி பிற்பாடு இயேசு இவ்வாறு சொன்னார்: “யோவான் ஸ்நானன் கால முதல் இது வரைக்கும் பரலோக ராஜ்யமே மனிதர் பிரயாசப்படுகிற இலக்காக உள்ளது, தொடர்ந்து பிரயாசப்படுவோர் அதைப் பற்றிக்கொள்கின்றனர்.”​—⁠மத்தேயு 11:12, NW.

¹³ ‘பிரயாசம்,’ ‘தொடர்ந்து பிரயாசப்படுதல்’ ஆகிய வார்த்தைகள் எதைக் குறிக்கின்றன? கிரேக்க வினைச் சொல்லிலிருந்து வந்த இவ்வார்த்தைகளைப் பற்றி வைன்ஸ் எக்ஸ்போஸிட்டரி டிக்ஷ்னரி ஆஃப் நியூ டெஸ்டமென்ட் உவர்ட்ஸ் இவ்வாறு கூறுகிறது: “இந்த வினைச்சொல் கடும் முயற்சியை அர்த்தப்படுத்துகிறது.” இந்த வசனத்தைக் குறித்து ஹைன்ரிச் மெயர் என்ற பைபிள் கல்விமான் இவ்வாறு குறிப்பிடுகிறார்: “வரவிருக்கும் மேசியானிய ராஜ்யத்தை அடைவதற்காக தணியா ஆர்வத்துடனும் முழு மூச்சுடனும் முயற்சி செய்து போராடுவதுதான் இவ்விதமாக விவரிக்கப்பட்டுள்ளது. . . . (வெறுமனே அமைதலாகக் காத்திருக்காமல்) அந்தளவு ஆர்வத்தோடும் ஊக்கத்தோடும் ராஜ்யம் சம்பந்தப்பட்டவற்றில் ஈடுபாடு கொள்வதையே வெளிக்காட்டுகிறது.” வெகு சிலராயிருந்த அந்தச் சீஷர்கள் எது உண்மையில் விலைமதிப்புள்ளது என்பதை அந்த வியாபாரியைப் போலவே அறிந்துகொண்டார்கள்; அதனால் ராஜ்யத்திற்காக எல்லாவற்றையும் விட்டுவிட மனமுள்ளவர்களாய் இருந்தார்கள்.​—⁠மத்தேயு 19:27, 28; பிலிப்பியர் 3:8.

தேடும் முயற்சியில் மற்றவர்களும்

14. ராஜ்ய பிரசங்க வேலைக்கு அப்போஸ்தலர்களை இயேசு எப்படித் தயார்படுத்தினார், அதன் பலன் என்ன?

¹⁴ இயேசு தம் ஊழியத்தின்போது, ராஜ்யத்திற்காகப் பிரயாசப்பட பிறருக்குப் பயிற்சி அளித்தார், உதவியும் செய்தார். முதலாவதாக, தம் சீஷர்களில் 12 பேரைத் தேர்ந்தெடுத்து அவர்களை அப்போஸ்தலர்களாக (அவரால் அனுப்பப்பட்டவர்கள் என்று அர்த்தம்) நியமித்தார். ஊழியம் செய்ய வேண்டிய விதத்தின் பேரில் விளக்கமான அறிவுரைகளை இவர்களுக்குக் கொடுத்தார், எதிர்ப்படவிருந்த சவால்களையும் இன்னல்களையும் பற்றிய எச்சரிப்புகளையும் கொடுத்தார். (மத்தேயு 10:1-42; லூக்கா 6:12-16) இப்படிக் கிட்டத்தட்ட இரண்டு ஆண்டுகளுக்கு மேல் அவர்கள் தேசமெங்கும் பயணித்து இயேசுவோடு சேர்ந்து பிரசங்க வேலை செய்தார்கள்; அச்சமயத்தில் அவருடன் நெருங்கிய உறவையும் அனுபவித்து மகிழ்ந்தார்கள். அவர் பேசிய விஷயங்களைக் காதாரக் கேட்டார்கள், அவர் செய்த வல்லமையான செயல்களைக் கண்ணாரக் கண்டார்கள், அவர் வைத்த முன்மாதிரியையும் நேரில் பார்த்தார்கள். (மத்தேயு 13:16, 17) இவை யாவும் அவர்களை அந்தளவு நெகிழ வைத்ததால், உவமையிலுள்ள வியாபாரியைப் போல அவர்கள் ஆர்வத்தோடும் முழு மனதோடும் ராஜ்யத்தைத் தேட ஆரம்பித்தார்கள்.

15. தம்மைப் பின்பற்றியவர்கள் உண்மையில் எதற்காகச் சந்தோஷப்பட வேண்டுமென இயேசு சொன்னார்?

¹⁵ இந்த 12 அப்போஸ்தலர்களை மட்டுமல்ல, இயேசு “வேறே எழுபது பேரை நியமித்து, தாம் போகும் சகல பட்டணங்களுக்கும் இடங்களுக்கும் அவர்களைத் தமக்கு முன்னே இரண்டிரண்டு பேராக அனுப்பினார்.” எதிர்ப்படவிருந்த சோதனைகளையும் இன்னல்களையும் பற்றி அவர்களிடமும்கூட தெரிவித்தார், “தேவனுடைய ராஜ்யம் உங்களுக்குச் சமீபமாய் வந்திருக்கிறது” என்று ஜனங்களுக்குச் சொல்லும்படியும் கட்டளையிட்டார். (லூக்கா 10:1-12) அந்த 70 பேரும் மிகுந்த சந்தோஷத்தோடு திரும்பி வந்து “உம்முடைய நாமத்தினாலே பிசாசுகளும் எங்களுக்குக் கீழ்ப்படிகிறது” என்று அவரிடம் சொன்னார்கள். ஆனால், இதைவிடப் பெரும் சந்தோஷத்தை அவர்கள் அனுபவிப்பார்கள் என்று அவர் சொன்னார், அதைக் கேட்டு ஒருவேளை அவர்கள் ஆச்சரியப்பட்டிருக்கலாம். “ஆவிகள் உங்களுக்குக் கீழ்ப்படிகிறதற்காக நீங்கள் சந்தோஷப்படாமல், உங்கள் நாமங்கள் பரலோகத்தில் எழுதியிருக்கிறதற்காகச் சந்தோஷப்படுங்கள்” என்று அவர்களிடம் சொன்னார்.​—⁠லூக்கா 10:17, 20.

16, 17. (அ) இயேசு தம் உண்மையுள்ள அப்போஸ்தலர்களோடு பூமியில் செலவிட்ட கடைசி இரவில் அவர்களிடம் என்ன சொன்னார்? (ஆ) இயேசுவின் வார்த்தைகள் அப்போஸ்தலர்களுக்கு எத்தகைய சந்தோஷத்தையும் உறுதியையும் அளித்தன?

¹⁶ முடிவாக, பொ.ச. 33, நிசான் 14-⁠ம் தேதியன்று இயேசு தம் அப்போஸ்தலர்களோடு பூமியில் செலவிட்ட கடைசி இரவில், ஓர் ஆசரிப்பை ஆரம்பித்து வைத்தார். கர்த்தருடைய இராப்போஜனம் என அழைக்கப்படும் அதை வருடா வருடம் ஆசரிக்கும்படியும் கட்டளையிட்டார். அந்த இரவுப் பொழுதில் தம்மோடிருந்த 11 சீஷர்களிடம் அவர் இவ்வாறு சொன்னார்: “எனக்கு நேரிட்ட சோதனைகளில் என்னோடேகூட நிலைத்திருந்தவர்கள் நீங்களே. ஆகையால், என் பிதா எனக்கு ஒரு ராஜ்யத்தை ஏற்படுத்தினது போல், நானும் உங்களுக்கு ஏற்படுத்துகிறேன். நீங்கள் என் ராஜ்யத்திலே என் பந்தியில் போஜனபானம் பண்ணி, இஸ்ரவேலின் பன்னிரண்டு கோத்திரங்களையும் நியாயந்தீர்க்கிறவர்களாய்ச் சிங்காசனங்களின்மேல் உட்காருவீர்கள்.”​—⁠லூக்கா 22:19, 20, 28-30.

¹⁷ இயேசு சொன்ன இவ்வார்த்தைகள் அப்போஸ்தலர்களின் இதயத்திற்கு எவ்வளவு சந்தோஷமாகவும் இதமாகவும் இருந்திருக்கும்! கிடைப்பதற்கரிய, கெளரவமான, ஒப்பற்ற சிலாக்கியத்தை அவர்கள் பெற்றார்கள். (மத்தேயு 7:13, 14; 1 பேதுரு 2:9) ராஜ்யத்தைத் தேடுவதில் இயேசுவைப் பின்பற்றுவதற்காக அந்த வியாபாரியைப் போல அவர்கள் சகலத்தையும் விட்டுவிட்டு வந்திருந்தார்கள். ஆகவே, அவர்கள் செய்த தியாகமெல்லாம் வீண்போகவில்லை என்ற உறுதியை அவர்கள் பெற்றார்கள்.

18. அப்போஸ்தலர்கள் 11 பேரைத் தவிர வேறு யாரும்கூட அந்த ராஜ்யத்தின் மூலம் பின்னர் நன்மையடைவார்கள்?

¹⁸ அந்த ராஜ்யத்தின் மூலம் நன்மையடைகிறவர்கள் அந்த இரவில் இயேசுவோடு இருந்த அப்போஸ்தலர்கள் மட்டுமே அல்ல. மகத்தான அந்தப் பரலோக ராஜ்யத்தில் இயேசு கிறிஸ்துவுடன் சேர்ந்து ஆட்சி செய்வதற்கு 1,44,000 பேரை ராஜ்ய உடன்படிக்கைக்கு உட்படுத்த வேண்டுமென்பது யெகோவாவின் சித்தமாக இருந்தது. அவர்களைத் தவிர, ‘ஒருவனும் எண்ணக்கூடாததுமான திரளான கூட்டமாகிய ஜனங்கள், சிங்காசனத்திற்கு முன்பாகவும் ஆட்டுக்குட்டியானவருக்கு முன்பாகவும் நின்றுகொண்டு இரட்சிப்பின் மகிமை சிங்காசனத்தின்மேல் வீற்றிருக்கிற எங்கள் தேவனுக்கும் ஆட்டுக்குட்டியானவருக்கும் உண்டாவதாக’ என்று சொல்வதை தரிசனத்தில் அப்போஸ்தலன் யோவான் கேட்டார். இவர்கள் அந்த ராஜ்யத்தின் பூமிக்குரிய குடிமக்களாவர்.b​—⁠வெளிப்படுத்துதல் 7:9, 10; 14:1, 4.

19, 20. (அ) சகல தேசத்தாருக்கும் என்ன வாய்ப்பு அளிக்கப்பட்டுள்ளது? (ஆ) அடுத்தக் கட்டுரையில் எந்தக் கேள்விக்கான பதில் ஆராயப்படும்?

¹⁹ இயேசு பரலோகத்திற்குச் செல்வதற்குச் சற்று முன்னர் தம்மை உண்மையோடு பின்பற்றியவர்களிடம் இவ்வாறு கட்டளையிட்டார்: “நீங்கள் புறப்பட்டுப் போய், சகல ஜாதிகளையும் சீஷராக்கி, பிதா குமாரன் பரிசுத்த ஆவியின் நாமத்திலே அவர்களுக்கு ஞானஸ்நானங்கொடுத்து, நான் உங்களுக்குக் கட்டளையிட்ட யாவையும் அவர்கள் கைக்கொள்ளும்படி அவர்களுக்கு உபதேசம் பண்ணுங்கள். இதோ, உலகத்தின் முடிவுபரியந்தம் சகல நாட்களிலும் நான் உங்களுடனேகூட இருக்கிறேன்.” (மத்தேயு 28:19, 20) இதன் விளைவாக, சகல தேசத்தாரும் இயேசு கிறிஸ்துவின் சீஷர்களாக ஆவார்கள். அந்த வியாபாரி நல்முத்தைப் பெற அந்தளவு ஆர்வமாக இருந்தது போல இவர்களும், பரலோக வெகுமதியைப் பெறுபவர்களாக இருந்தாலும் சரி, பூமிக்குரிய வெகுமதியைப் பெறுபவர்களாக இருந்தாலும் சரி, கடவுளுடைய ராஜ்யத்திற்கு அதிக முக்கியத்துவம் கொடுப்பார்கள்.

²⁰ ‘இந்த உலகத்தின் முடிவு’ வரை சீஷராக்கும் வேலை தொடரும் என்பதை இயேசுவின் வார்த்தைகள் சுட்டிக்காட்டின. ஆகவே, நம் நாளில், அந்த வியாபாரியைப் போன்றவர்கள், அதாவது கடவுளுடைய ராஜ்யத்திற்கான தேடலில் சகலத்தையும் தியாகம் செய்ய மனமுள்ளவர்கள் இருக்கிறார்களா? இதற்கான பதில் அடுத்தக் கட்டுரையில் ஆராயப்படும்.

[அடிக்குறிப்புகள்]

‘விலையுயர்ந்த முத்தை’ இன்று நாடித்தேடுதல்

‘ராஜ்யத்தினுடைய இந்தச் சுவிசேஷம் பூலோகமெங்கும் . . . சாட்சியாகப் பிரசங்கிக்கப்படும்.’ ​—⁠மத்தேயு 24:14.

1, 2. (அ) கடவுளுடைய ராஜ்யத்தைப் பற்றி இயேசுவின் நாளில் இருந்த யூதர்கள் என்னவெல்லாம் நினைத்துக் கொண்டிருந்தார்கள்? (ஆ) ராஜ்யத்தைப் பற்றி அவர்கள் புரிந்துகொள்வதற்கு இயேசு என்ன செய்தார், அதன் பலன்கள் யாவை?

கடவுளுடைய ராஜ்யம்​—⁠இயேசு பூமிக்கு வந்திருந்த சமயத்தில் யூதருக்குள்ளே மிகுந்த ஆர்வத்திற்குரிய விஷயமாக அது பேசப்பட்டு வந்தது. (மத்தேயு 3:1, 2; 4:23-25; யோவான் 1:49) என்றாலும், அதன் ஆட்சி பரப்பெல்லையையும் அதன் அதிகாரத்தையும் பற்றி ஆரம்பத்தில் பெரும்பாலோர் முழுமையாகப் புரிந்துகொள்ளவில்லை; அது ஒரு பரலோக அரசாங்கமாயிருக்கும் என்பதையும் அவர்கள் புரிந்துகொள்ளவில்லை. (யோவான் 3:1-5) இயேசுவின் சீஷர்களாக ஆனவர்கள்கூட கடவுளுடைய ராஜ்யத்தைப் பற்றியோ கிறிஸ்துவின் உடன் ஆட்சியாளர்களாக ஆவதற்கு செய்ய வேண்டியவற்றைப் பற்றியோ முழுமையாகப் புரிந்துகொள்ளவில்லை.​—⁠மத்தேயு 20:20-22; லூக்கா 19:11; அப்போஸ்தலர் 1:6.

² காலப்போக்கில் இயேசு தம் சீஷர்களுக்குப் பொறுமையாகப் பல பாடங்களைக் கற்றுக்கொடுத்தார். அதில் ஒன்றுதான் முந்தின கட்டுரையில் கவனித்த விலையுயர்ந்த முத்தைப் பற்றிய உவமை. பரலோக ராஜ்யத்தை நாடித்தேடுவதன் முக்கியத்துவத்தை அவர்களுக்கு இப்பாடங்களின் மூலம் புரிய வைத்தார். (மத்தேயு 6:33; 13:45, 46; லூக்கா 13:23, 24) இது அவர்களுடைய மனதில் ஆழப் பதிந்திருந்ததாலேயே சீக்கிரத்தில் ராஜ்யத்தின் நற்செய்தியை ஊக்கமாயும் தைரியமாயும் அறிவிக்க ஆரம்பித்தார்கள்; தொலைதூரப் பகுதிகளில் அவர்கள் பிரசங்கித்தார்கள்; அதற்கான ஏகப்பட்ட அத்தாட்சிகளை அப்போஸ்தலர் புத்தகத்தில் காணலாம்.​—⁠அப்போஸ்தலர் 1:8; கொலோசெயர் 1:23.

 3. நம் நாளைப் பற்றி குறிப்பிடுகையில், ராஜ்யம் சம்பந்தமாக இயேசு என்ன சொன்னார்?

³ அப்படியானால், நம்முடைய நாளைப் பற்றி என்ன? அந்த ராஜ்ய ஆட்சியின் கீழ் பூமிக்குரிய பரதீஸில் கிடைக்கப்போகும் ஆசீர்வாதங்களைப் பற்றி எண்ணற்றோருக்கு அறிவிக்கப்பட்டு வருகிறது. ‘இந்த உலகத்தின் முடிவைப்’ பற்றிய முக்கிய தீர்க்கதரிசனத்தில் இயேசு திட்டவட்டமாக இவ்வாறு அறிவித்தார்: “ராஜ்யத்தினுடைய இந்தச் சுவிசேஷம் [அதாவது, நற்செய்தி] பூலோகமெங்குமுள்ள சகல ஜாதிகளுக்கும் சாட்சியாகப் பிரசங்கிக்கப்படும், அப்போது முடிவு வரும்.” (மத்தேயு 24:3, 14; மாற்கு 13:10) மலை போன்ற தடைகளும் சவால்களும், ஏன், துன்புறுத்தல்களும் வந்தால்கூட இந்த மாபெரும் வேலையைச் செய்து முடிக்க வேண்டுமென்றும் அவர் சொன்னார். இருந்தாலும், “முடிவுபரியந்தம் நிலைநிற்பவனே இரட்சிக்கப்படுவான்” என்ற உறுதியையும் அவர் அளித்தார். (மத்தேயு 24:9-13) இவை எல்லாவற்றிற்கும் இயேசுவின் உவமையில் குறிப்பிட்ட அந்த வியாபாரி காண்பித்த அதே விதமான சுயதியாக மனப்பான்மையையும் கடமையுணர்ச்சியையும் காண்பிக்க வேண்டும். இன்று விசுவாசத்தோடும் ஆர்வத்தோடும் ராஜ்யத்தை நாடித்தேடுகிறவர்கள் இருக்கிறார்களா?

சத்தியத்தைக் கண்டுபிடிப்பதில் சந்தோஷம்

 4. ராஜ்யத்தைப் பற்றிய சத்தியம் இன்று ஜனங்களை என்ன செய்யத் தூண்டுகிறது?

⁴ இயேசுவின் உவமையிலுள்ள அந்த வியாபாரி, தான் தேடிக்கொண்டிருந்த “விலையுயர்ந்த ஒரு முத்தைக்” கண்டுபிடித்ததும் மிகுந்த சந்தோஷமடைந்தார். அந்தச் சந்தோஷமே அவரிடமிருந்த எல்லாவற்றையும் விற்று அந்த முத்தை வாங்க அவரைத் தூண்டியது. (எபிரெயர் 12:1) அவ்வாறே இன்று, கடவுளையும் அவரது ராஜ்யத்தையும் பற்றிய சத்தியம் ஆட்களைக் கவர்ந்திழுக்கிறது, செயல்படத் தூண்டுவிக்கிறது. வளர்ந்து வரும் விசுவாசம் என்ற ஆங்கில புத்தகத்தில் கடவுளுக்கான தன்னுடைய தேடலையும் மனிதருக்கான கடவுளுடைய நோக்கத்தையும் பற்றி, சகோதரர் ஏ. எச். மேக்மில்லன் எழுதிய ஒரு குறிப்பை இது நினைவுபடுத்துகிறது. அவர் இவ்வாறு சொன்னார்: “நான் தேடிக் கண்டுபிடித்திருக்கும் ஒன்றை ஆயிரக்கணக்கான ஜனங்கள் இன்னமும் ஆண்டுதோறும் தேடிக் கண்டுபிடித்துக் கொண்டிருக்கிறார்கள். அவர்கள் உங்களையும் என்னையும் போன்றவர்களே, ஏனென்றால் அவர்கள் பல்வேறு நாட்டவர்கள், இனத்தவர்கள், வித்தியாசப்பட்ட சமுதாய அந்தஸ்துகளில் உள்ளவர்கள்; அவர்களில் எல்லா வயதினரும் இருக்கிறார்கள். சத்தியம் பாரபட்சம் பார்ப்பதில்லை. மாறாக, எல்லா வகையான ஆட்களையும் கவர்ந்திழுக்கிறது.”

 5. என்ன சிறந்த பலன்களை 2004-ஆம் ஊழிய ஆண்டின் அறிக்கை காட்டுகிறது?

⁵ அந்த வார்த்தைகள் உண்மை என்பதை ஒவ்வொரு வருடமும் காண முடிகிறது; கடவுளுடைய ராஜ்யத்தின் நற்செய்தியால் தூண்டப்பட்ட நல்மனம் படைத்த லட்சக்கணக்கானோர் யெகோவாவுக்குத் தங்களை ஒப்புக்கொடுத்து அவருடைய சித்தத்தைச் செய்வதைக் காண முடிகிறது. செப்டம்பர் 2003-⁠ல் தொடங்கி ஆகஸ்ட் 2004-⁠ல் முடிவடைந்த, 2004-ஆம் ஊழிய ஆண்டும் இதற்கு அத்தாட்சி அளிக்கிறது. அந்த 12 மாதங்களில் 2,62,416 பேர் யெகோவாவுக்கு தாங்கள் ஒப்புக்கொடுத்ததைத் தண்ணீர் முழுக்காட்டுதல் மூலம் வெளிக்காட்டினார்கள். 235 நாடுகளில் இது நடைபெற்றது; இந்நாடுகளில் யெகோவாவின் சாட்சிகள் வாரா வாரம் 60,85,387 பைபிள் படிப்புகளை நடத்தி வருகிறார்கள். சமுதாயத்திலுள்ள பல்வேறு வகுப்பைச் சேர்ந்தோரும், பற்பல தேசம், இனம், மொழியைச் சேர்ந்தோரும் கடவுளுடைய வார்த்தையிலுள்ள உயிரளிக்கும் சத்தியத்தைத் தெரிந்துகொள்ள உதவுவதற்காகவே இப்படிப்புகளை நடத்தி வருகிறார்கள்.​—⁠வெளிப்படுத்துதல் 7:9.

 6. கடந்த சில வருடங்களாகக் காணப்படும் சீரான அதிகரிப்புக்குக் காரணம் என்ன?

⁶ இந்தப் பலன்களெல்லாம் எப்படிச் சாத்தியமாகி இருக்கின்றன? சரியான மனச்சாய்வுடையவர்களை யெகோவா தம்மிடமாக இழுத்துக்கொள்கிறார் என்பதில் சந்தேகமில்லை. (யோவான் 6:65; அப்போஸ்தலர் 13:48, NW) என்றாலும், ராஜ்யத்தை நாடித்தேடுவதில் தங்களையே அர்ப்பணித்திருப்பவர்களுடைய ஊக்கமான முயற்சிகளையும் தன்னலமற்ற மனப்பான்மையையும்கூட நாம் துச்சமாக எண்ணிவிட முடியாது. 79-⁠ம் வயதில் சகோதரர் மேக்மில்லன் இவ்வாறு எழுதினார்: “வியாதிப்பட்டு மரிக்கும் மனிதர்களுக்குக் கடவுள் அளித்துள்ள வாக்குறுதிகளைப் பற்றி பைபிளிலிருந்து முதன்முதலில் தெரிந்துகொண்டபோது எனக்குள் ஏற்றப்பட்ட அந்த நம்பிக்கை ஒளி இன்னமும் துளிகூட மங்கவில்லை. சர்வவல்லமையுள்ள யெகோவா தேவனைப் பற்றியும் மனிதகுலத்திற்கான அவருடைய சிறந்த நோக்கங்களைப் பற்றியும் அறிந்துகொள்ள என்னைப் போல ஆசைப்படுகிறவர்களுக்கு உதவுவதற்காக பைபிளிலிருந்து அதிக விஷயத்தைக் கற்றுக்கொள்ள அப்போதே தீர்மானித்தேன்.”

 7. பைபிள் சத்தியத்தைக் கண்டுபிடிப்பவர்களின் சந்தோஷத்தையும் ஆர்வத்தையும் எந்த உதாரணம் படம்பிடித்துக் காட்டுகிறது?

⁷ அத்தகைய ஆர்வத்தை இன்றுள்ள யெகோவாவின் ஊழியர்கள் மத்தியிலும் காண முடிகிறது. உதாரணமாக, ஆஸ்திரியா நாட்டிலுள்ள வியன்னா நகரைச் சேர்ந்த டான்யலா என்ற பெண்ணை எடுத்துக் கொள்ளுங்கள். அவள் இவ்வாறு சொன்னாள்: “சிறு வயதிலிருந்தே கடவுள்தான் என்னுடைய பெஸ்ட் ஃபிரெண்ட். ஆனால் வெறுமனே ‘கடவுள்’ என்று சொல்வதில், எனக்கு எந்த ஒட்டுதலும் ஏற்படாததால் அவருடைய பெயரைத் தெரிந்துகொள்ள வேண்டுமென்று எப்போதுமே ஆசைப்பட்டேன். அதற்காக 17 வயதுவரை காத்திருக்க வேண்டியிருந்தது. அப்போது யெகோவாவின் சாட்சிகள் என்னுடைய வீட்டிற்கு வந்தார்கள். கடவுளைப் பற்றி என்னென்ன தெரிந்துகொள்ள ஆசைப்பட்டேனோ அவை எல்லாவற்றையும் அவர்கள் விளக்கிச் சொன்னார்கள். கடைசியாக, சத்தியத்தைக் கண்டுபிடித்துவிட்டேன், அது எத்தனை அருமையாக இருந்தது! தலைகால் புரியாதளவு சந்தோஷம் ஏற்பட்டதால், எல்லாரிடமும் பிரசங்கிக்க ஆரம்பித்தேன்.” இத்தனை ஆர்வமாக அவள் பேசுவதைக் கண்ட பள்ளித் தோழிகள் அவளைக் கேலி செய்யத் தொடங்கினார்கள். “ஆனால், என்னைப் பொறுத்தவரை இது ஒரு பைபிள் தீர்க்கதரிசனத்தின் நிறைவேற்றமாகவே இருந்தது. ஏனென்றால், இயேசுவுடைய பெயரினிமித்தம் அவரது சீஷர்கள் பகைக்கப்படுவார்கள், துன்புறுத்தப்படுவார்கள் என அவர் சொன்னதை அறிந்திருந்தேன். அதனால் எனக்கு ஒரே சந்தோஷமாயும் ஆச்சரியமாயும் இருந்தது.” டான்யலா சீக்கிரத்திலேயே யெகோவாவுக்குத் தன்னை ஒப்புக்கொடுத்து முழுக்காட்டுதல் பெற்றாள்; அதன் பிறகு மிஷனரி ஊழியம் செய்யும் இலக்கை அடைய முயன்றாள். திருமணத்திற்குப் பிறகு டான்யலாவும் அவரது கணவர் ஹெல்மூட்டும் வியன்னாவிலுள்ள ஆப்பிரிக்கர், சீனர், பிலிப்பீன்ஸ் நாட்டவர், இந்தியர் ஆகியோருக்குப் பிரசங்கிக்க ஆரம்பித்தார்கள். அவர்கள் இருவரும் இப்போது தென்மேற்கு ஆப்பிரிக்காவில் மிஷனரிகளாகச் சேவை செய்கிறார்கள்.

அவர்கள் சோர்ந்துவிடுவதில்லை

 8. பலர், கடவுள் மீதுள்ள அன்பையும் அவருடைய ராஜ்யத்தின் மீதுள்ள பற்றுறுதியையும் வெளிக்காட்டியிருக்கும் ஒரு சிறந்த வழி எது?

⁸ ஆம், இன்று யெகோவாவின் ஜனங்கள் அவர் மீதுள்ள அன்பையும் அவரது ராஜ்யத்தின் மீதுள்ள பற்றுறுதியையும் காட்டுகிற வழிகளில் ஒன்றுதான் மிஷனரி சேவை. இயேசுவின் உவமையிலுள்ள அந்த வியாபாரியைப் போல இந்தச் சேவையில் ஈடுபடுகிறவர்கள் ராஜ்யத்தின் நிமித்தம் தொலைதூர இடங்களுக்குப் பயணிக்க மனமுள்ளவர்களாய் இருக்கிறார்கள். உண்மைதான், இந்த மிஷனரிகள் ராஜ்ய நற்செய்தியைக் கண்டுபிடிப்பதற்காக இவ்வாறு பயணிப்பதில்லை. ஆனால் உலகின் மூலைமுடுக்கில் உள்ளோருக்கெல்லாம் இந்த நற்செய்தியை அறிவிக்கவே செல்கிறார்கள்; இயேசு கிறிஸ்துவின் சீஷர்களாக ஆக அவர்களுக்கு உதவுவதற்காகவே அவ்வாறு செல்கிறார்கள். (மத்தேயு 28:19, 20) பல நாடுகளில் இந்த மிஷனரிகள் பயங்கரமான கஷ்டங்களைச் சகிக்க வேண்டியுள்ளது. என்றாலும் அவர்களுடைய சகிப்புத்தன்மைக்கு அமோக பலன் கிடைத்து வருகிறது.

9, 10. மத்திய ஆப்பிரிக்க குடியரசு போன்ற தொலைதூர இடங்களில் மிஷனரிகள் என்ன ஆர்வமூட்டும் அனுபவங்களைப் பெற்றிருக்கிறார்கள்?

⁹ உதாரணமாக, மத்திய ஆப்பிரிக்க குடியரசை எடுத்துக்கொள்ளுங்கள். அங்குக் கடந்த ஆண்டு கிறிஸ்துவின் மரண நினைவு ஆசரிப்புக்கு 16,184 பேர் வந்திருந்தார்கள், அதாவது அந்த நாட்டிலுள்ள ராஜ்ய பிரஸ்தாபிகளைவிட சுமார் ஏழு மடங்கு அதிகமானோர் வந்திருந்தார்கள். அங்கு பல பகுதிகளில் மின்வசதி இல்லாததால், மக்கள் தங்களுடைய அன்றாட வேலைகளை வெளியே மரத்தடியில் உட்கார்ந்து செய்கிறார்கள். மிஷனரிகளும் அவ்வாறே மரத்தடியில் உட்கார்ந்து பைபிள் படிப்புகளை நடத்துகிறார்கள். வெளியில் வெளிச்சமாகவும் குளுகுளுவெனவும் இருப்பதோடு, மற்றொரு நன்மையும் உண்டு. இங்குள்ளவர்களுக்கு இயல்பாகவே பைபிள் மீது மதிப்பு இருக்கிறது; அதுமட்டுமல்ல, விளையாட்டு நிகழ்ச்சிகளையும் சீதோஷ்ண நிலையையும் பற்றி மற்றக் கலாச்சாரத்தினர் சர்வசகஜமாகப் பேசிக்கொள்வதைப் போல, மதம் சம்பந்தப்பட்ட விஷயங்களைப் பேசும் பழக்கமும் இவர்கள் மத்தியில் இருக்கிறது. எனவே, வெளியில் அமர்ந்து பைபிள் படிப்பு நடத்துகையில் போவோர் வருவோர்கூட பெரும்பாலும் படிப்பில் கலந்துகொள்வார்கள்.

¹⁰ ஒரு மிஷனரி இப்படி வெளியே உட்கார்ந்து பைபிள் படிப்பு நடத்தியபோது, அத்தெருவின் மறுபுறத்தில் வசிக்கும் ஓர் இளைஞர் தன்னை இதுவரை யாரும் வந்து சந்திக்காததால் தன்னுடைய வீட்டிற்கும் வந்து பைபிள் படிப்பு நடத்த வேண்டுமென்று அவரிடம் கேட்டுக்கொண்டார். அதற்கு அந்த மிஷனரி சந்தோஷமாகச் சம்மதித்தார்; இப்போது அந்த இளைஞர் நன்கு முன்னேறி வருகிறார். அந்த நாட்டில் போலீசார் அடிக்கடி யெகோவாவின் சாட்சிகளை வழிமறிப்பார்களாம்; அவர்களிடம் அபராதம் வசூலிப்பதற்கு அல்ல, ஆனால் புது காவற்கோபுரம், விழித்தெழு! இதழ்களை வாங்கிக் கொள்வதற்காக; இல்லையென்றால், அவர்கள் வாசித்து மகிழ்ந்த ஒரு கட்டுரைக்குப் பாராட்டு தெரிவிப்பதற்காக அப்படி வழிமறிப்பார்களாம்.

11. கஷ்டங்கள் மத்தியிலும், நீண்ட கால மிஷனரிகள் தங்களுடைய ஊழியத்தை எப்படிக் கருதுகிறார்கள்?

¹¹ நாற்பது, ஐம்பது ஆண்டுகளுக்கு முன் மிஷனரிகளாகச் சேவை செய்ய ஆரம்பித்தவர்களில் அநேகர் இன்னமும் உண்மையோடு ஊழியம் செய்து வருகிறார்கள். விசுவாசத்திற்கும் விடாமுயற்சிக்கும் இவர்கள் நமக்கு எப்பேர்ப்பட்ட முன்மாதிரி! ஒரு மிஷனரி தம்பதியர் கடந்த 42 வருடங்களாக மூன்று நாடுகளில் சேவை செய்திருக்கிறார்கள். அந்தச் சகோதரர் இவ்வாறு சொல்கிறார்: “கஷ்டங்கள் இருக்கத்தான் செய்தன. உதாரணத்திற்கு, மலேரியா காய்ச்சலிலிருந்து தப்பிக்க 35 வருஷம் போராடினோம். ஆனாலும், மிஷனரி சேவையைத் தேர்ந்தெடுத்ததை நினைத்து ஒருபோதும் நாங்கள் வருத்தப்பட்டதே இல்லை.” அவருடைய மனைவி இவ்வாறு சொல்கிறார்: “நன்றி சொல்ல எங்களுக்கு எப்போதுமே நிறைய விஷயங்கள் இருந்திருக்கின்றன. வெளி ஊழியத்தில் ஈடுபடுவதென்றால் அப்படியொரு சந்தோஷம், பைபிள் படிப்புகளை ஆரம்பிப்பதும் எளிதாக இருந்தது. பைபிள் படிக்கிறவர்கள் கூட்டங்களுக்கு வந்து எல்லாருடனும் ஒட்டி உறவாடுவதைப் பார்க்கும்போது குடும்ப அங்கத்தினர்களெல்லாம் ஒன்றுகூடி மகிழ்வதைப் போல் இருக்கும்.”

அவர்கள் ‘எல்லாவற்றையும் நஷ்டமென்று எண்ணுகிறார்கள்’

12. ராஜ்யத்தின் மதிப்பை உண்மையிலேயே உயர்வாகக் கருதுவதை ஒரு நபர் எப்படிக் காட்டுகிறார்?

¹² உவமையில் சொல்லப்பட்ட அந்த வியாபாரி விலையுயர்ந்த முத்தைக் கண்டுபிடித்ததும் ‘தனக்குண்டான எல்லாவற்றையும் விற்று, அதை [வாங்கிக்] கொண்டார்.’ (மத்தேயு 13:46) மதிப்புள்ள ஒன்றைப் பெறுவதற்காக எல்லாவற்றையும் தியாகம் செய்யத் தயாராய் இருப்பதே ராஜ்யத்தின் மதிப்பை உண்மையிலேயே உயர்வாகக் கருதுபவர்களின் விசேஷ பண்பாகும். கடவுளுடைய ராஜ்யத்தில் கிறிஸ்துவோடு இருக்கப்போகும் அப்போஸ்தலன் பவுல் இவ்வாறு சொன்னார்: “என் ஆண்டவராகிய கிறிஸ்து இயேசுவை அறிகிற அறிவின் மேன்மையினிமித்தம் எல்லாவற்றையும் நஷ்டமென்று எண்ணி வருகிறேன். அவர் நிமித்தம் எல்லாவற்றையும் நஷ்டமாக இழந்தேன், அவற்றைக் குப்பையாக எண்ணி வருகிறேன். நான் கிறிஸ்துவை லாபமாகக் கருதுவதற்கு . . . இப்படி எண்ணி வருகிறேன்.”​—⁠பிலிப்பியர் 3:8, திருத்திய மொழிபெயர்ப்பு.

13. செக் குடியரசிலிருந்த ஒருவர் ராஜ்யத்தின் மீது தனக்கிருந்த அன்பை எப்படிக் காட்டினார்?

¹³ அதேவிதமாக, இன்று அந்த ராஜ்ய ஆசீர்வாதங்களைப் பெற அநேகர் தங்கள் வாழ்க்கையில் பெரும் மாற்றங்களைச் செய்யத் தயாராய் இருக்கிறார்கள். உதாரணமாக, 2003, அக்டோபர் மாதம் செக் குடியரசிலுள்ள ஒரு பள்ளி தலைமை ஆசிரியருக்கு நித்திய ஜீவனுக்கு வழிநடத்துகிற அறிவு என்ற ஒரு பைபிள் பிரசுரம் கிடைத்தது. 60 வயதான அவர் அதைப் படித்த பிறகு, அப்பகுதியிலுள்ள யெகோவாவின் சாட்சிகளிடம் தொடர்புகொண்டார்; பைபிள் படிப்பும் ஆரம்பிக்கப்பட்டது. அவர் ஆன்மீக ரீதியில் நன்கு முன்னேறினார், எல்லாக் கூட்டங்களுக்கும் வரத் தொடங்கினார். என்றாலும், ஒரு மேயராகவும் பிற்பாடு சட்டமன்ற உறுப்பினராகவும் ஆவதற்கு அவர் திட்டமிட்டிருந்தது என்ன ஆனது? இப்போது அவர் வேறொன்றைச் செய்யத் தீர்மானித்தார், அதாவது ஒரு ராஜ்ய பிரசங்கிப்பாளராக ஆக வேண்டுமெனத் தீர்மானித்தார். “என் பள்ளி மாணவர்களிடம் ஏகப்பட்ட பைபிள் பிரசுரங்களைக் கொடுக்க முடிந்தது” என அவர் சொன்னார். அவர் தன்னை யெகோவாவுக்கு ஒப்புக்கொடுத்து 2004, ஜூலை மாதத்தில் நடைபெற்ற மாநாட்டில் முழுக்காட்டுதல் பெற்றார்.

14. (அ) ராஜ்ய நற்செய்தி லட்சக்கணக்கானோரை என்ன செய்யத் தூண்டியிருக்கிறது? (ஆ) சிந்தையைத் தூண்டும் என்ன கேள்விகளை நாம் எல்லாரும் கேட்டுக்கொள்ளலாம்?

¹⁴ இதேவிதமாக, உலகம் முழுவதிலும் உள்ள லட்சக்கணக்கானோர் ராஜ்ய நற்செய்தியை ஏற்றுக்கொண்டிருக்கிறார்கள். அவர்கள் பொல்லாத ஜனங்களைவிட்டு விலகி, பழைய சுபாவத்தை மாற்றிக்கொண்டு, பழைய சகவாசங்களுக்கு எல்லாம் முழுக்குப் போட்டுவிட்டு, உலகப்பிரகாரமான நாட்டங்களை விட்டொதுக்கி இருக்கிறார்கள். (யோவான் 15:19; எபேசியர் 4:22-24; யாக்கோபு 4:4; 1 யோவான் 2:15-17) அவர்கள் ஏன் இந்த மாற்றங்களையெல்லாம் செய்கிறார்கள்? ஏனென்றால் இன்றைய உலகம் அளிக்கிற எதையும்விட கடவுளுடைய ராஜ்ய ஆசீர்வாதங்களை அவர்கள் மிக மிக உயர்வாய்க் கருதுகிறார்கள். ராஜ்ய நற்செய்தியைப் பற்றி நீங்களும் அப்படித்தான் கருதுகிறீர்களா? இந்த நற்செய்தி உங்களுடைய வாழ்க்கை முறை, மதிப்பீடுகள், லட்சியங்கள் ஆகியவற்றை யெகோவாவின் எதிர்பார்ப்புக்கு இசைய மாற்றியமைக்க உங்களைத் தூண்டுகிறதா? அவ்வாறு மாற்றங்களைச் செய்யும்போது இப்போதும் எப்போதும் அபரிமிதமான ஆசீர்வாதங்களை நீங்கள் பெறுவீர்கள்.

அறுவடை முடிவுக்கு வருகிறது

15. கடைசி நாட்களில் கடவுளுடைய மக்கள் என்ன செய்வார்களென தீர்க்கதரிசனம் உரைக்கப்பட்டது?

¹⁵ சங்கீதக்காரன் இவ்வாறு எழுதினார்: “உமது படைக்கு நீர் தலைமை தாங்கும் நாளிலே உம்முடைய ஜனங்கள் தங்களையே மனமுவந்து அளிப்பார்கள்.” அப்படித் தங்களை அளிப்பவர்களில் ‘பனித்துளிகளுக்குச் சமமான இளம் ஆண்களின் கூட்டமும்’ ‘நற்செய்தியைப் பிரசித்தப்படுத்துகிற பெண்களின் ஒரு பெரிய சேனையும்’ இருக்கிறது. (சங்கீதம் 68:11, NW; 110:3, NW) இந்தக் கடைசி நாட்களில், ஆண்கள் பெண்கள், சிறியோர் பெரியோர் என யெகோவாவுடைய மக்கள் அனைவரும் ஊக்கத்தோடும் சுய தியாக மனப்பான்மையோடும் செயல்பட்டிருப்பதால் என்ன பலன் கிடைத்திருக்கிறது?

16. ராஜ்யத்தைப் பற்றி மற்றவர்கள் கற்றுக்கொள்வதற்கு கடவுளுடைய ஊழியர்கள் எப்படி உதவி வருகிறார்கள் என்பதற்கு ஓர் உதாரணம் கொடுங்கள்.

¹⁶ இந்தியாவிலுள்ள 20 லட்சத்திற்கும் அதிகமான காதுகேளாதோருக்கு, ராஜ்யத்தைப் பற்றி எப்படிக் கற்றுக்கொடுப்பது என அங்குள்ள ஒரு பயனியர் சகோதரி, அதாவது ஒரு முழுநேர ராஜ்ய பிரசங்கிப்பாளர் யோசித்தார். (ஏசாயா 35:5) உடனே ஓர் இன்ஸ்டிட்யூட்டில் சேர்ந்து சைகை மொழியைக் கற்றுக்கொள்ளத் தீர்மானித்தார். அங்கு வந்த காதுகேளாதோர் பலரிடம் ராஜ்யத்தைப் பற்றிப் “பேசினார்,” அதன் பலனாக பைபிள் படிப்பு தொகுதிகள் ஆரம்பிக்கப்பட்டன. சில வாரங்களிலேயே, ராஜ்ய மன்றத்தில் நடைபெறும் கூட்டங்களுக்கு 12 பேருக்கும் அதிகமானோர் வர ஆரம்பித்தார்கள். பிற்பாடு, ஒரு திருமண வரவேற்பு நிகழ்ச்சியில் அந்தப் பயனியர் சகோதரி, கொல்கத்தாவிலிருந்து வந்திருந்த காதுகேளாத ஓர் இளைஞரைச் சந்தித்தார்; அவருக்கு ஏகப்பட்ட கேள்விகள் இருந்தன, யெகோவாவைப் பற்றி அதிகம் தெரிந்துகொள்வதில் மிகுந்த ஆர்வம் காட்டினார். இதில் ஒரு பிரச்சினை இருந்தது. அந்த இளைஞர் பள்ளி படிப்பிற்காக, சுமார் 1,600 கிலோமீட்டர் தொலைவிலுள்ள கொல்கத்தாவுக்கே திரும்பிச் செல்ல வேண்டியிருந்தது; அங்கு சைகை மொழி தெரிந்த யெகோவாவின் சாட்சிகள் யாருமே கிடையாது. ஆகவே பைபிள் படிப்பு தடைபடாதிருக்க, பெங்களூரிலுள்ள பள்ளியிலேயே அவர் படிக்க விரும்பினார்; அதற்காக தன் அப்பாவிடம் ரொம்பவும் கெஞ்சிக் கூத்தாடி அனுமதி பெற்றார். பிறகு ஆன்மீக ரீதியில் அவர் நன்கு முன்னேறினார், சுமார் ஒரு வருடத்திற்குப் பிறகு யெகோவாவுக்குத் தன்னை ஒப்புக்கொடுத்தார். பிற்பாடு, தன்னுடைய பாலிய நண்பனுக்கும் காதுகேளாத இன்னும் பலருக்கும் பைபிள் படிப்பு நடத்தினார். பயனியர்கள் சைகை மொழியைக் கற்றுக்கொண்டு காதுகேளாதோருக்கு உதவுவதற்காக இந்தியக் கிளை அலுவலகம் தற்போது ஏற்பாடு செய்து வருகிறது.

17. பக்கங்கள் 19-22-⁠ல் உள்ள 2004-ஆம் ஊழிய ஆண்டு அறிக்கையில் உங்களுக்கு உற்சாகமூட்டுவதாய் இருப்பவற்றைக் குறிப்பிடுங்கள்.

¹⁷ இப்பத்திரிகையின் 19-22 பக்கங்களில் 2004-ஆம் ஊழிய ஆண்டுக்கான யெகோவாவின் சாட்சிகளுடைய ஊழிய அறிக்கையை நீங்கள் காணலாம். அதை ஆராய சற்று நேரம் செலவிடுங்கள். இன்று உலகம் முழுவதுமுள்ள யெகோவாவின் மக்கள், ‘விலையுயர்ந்த முத்தை’ நாடித்தேடுவதில் ஒரே குறியாக இருக்கிறார்கள் என்பதற்கான அத்தாட்சிகளை நீங்களே பாருங்கள்.

‘முதலாவது ராஜ்யத்தைத் தேடிக்கொண்டே இருங்கள்’

18. பயணிக்கிற வியாபாரியைப் பற்றிய உவமையில் எதை இயேசு குறிப்பிடவில்லை, ஏன்?

¹⁸ மீண்டும் இயேசுவின் உவமையில் குறிப்பிடப்பட்ட அந்த வியாபாரியை எடுத்துக்கொள்வோம். அவர் தன்னிடமிருந்த எல்லாவற்றையும் விற்றுவிட்டதால் இனி தன் வாழ்க்கையை எப்படி ஓட்டப்போகிறார் என்பதைப் பற்றி இயேசு எதுவுமே குறிப்பிடாததைக் கவனியுங்கள். சிலர் நியாயமாகவே இப்படிக் கேட்கலாம்: ‘இப்போது அந்த வியாபாரியிடம்தான் ஒன்றுமே இல்லையே, பிறகு அவர் எப்படி உணவு, உடை, உறைவிடம் ஆகிய தேவைகளையெல்லாம் கவனித்துக்கொள்வார்? அந்த விலையுயர்ந்த முத்தை வெறுமனே வைத்திருப்பதால் அவருக்கென்ன லாபம்?’ உலகப்பிரகாரமான கண்ணோட்டத்தில் அவை யாவும் நியாயமான கேள்விகளே. ஆனால், “முதலாவது தேவனுடைய ராஜ்யத்தையும் அவருடைய நீதியையும் தேடுங்கள், அப்பொழுது இவைகளெல்லாம் உங்களுக்குக்கூடக் கொடுக்கப்படும்” என்று இயேசு தம் சீஷர்களிடம் சொல்லியிருந்தார் அல்லவா? (மத்தேயு 6:31-33) கடவுள் மீது உள்ளப்பூர்வமான பக்தியையும் அவருடைய ராஜ்யத்திடம் வைராக்கியத்தையும் வெளிக்காட்டுவது அவசியம் என்பதே இந்த உவமையின் முக்கிய கருத்தாகும். இதில் நமக்கு ஏதாவது பாடம் இருக்கிறதா?

19. ‘விலையுயர்ந்த முத்தைப்’ பற்றிய இயேசுவின் உவமையிலிருந்து நாம் என்ன முக்கிய பாடத்தைக் கற்றுக்கொள்கிறோம்?

¹⁹ அருமையான நற்செய்தியைப் பற்றி நமக்கு இப்போதுதான் தெரிய வந்திருந்தாலும் சரி, அநேக வருடங்களாகவே ராஜ்யத்தை நாடித்தேடி, அதன் ஆசீர்வாதங்களைப் பற்றி மற்றவர்களுக்கு அறிவித்து வந்திருந்தாலும் சரி, முழுக்க முழுக்க நம்முடைய கவனத்தை எப்போதும் ராஜ்யத்தின் மீதே ஒருமுகப்படுத்த வேண்டும். நாம் வாழ்வது கடினமான காலம்தான், என்றாலும், அந்த வியாபாரி கண்டுபிடித்த முத்தைப் போன்ற நிஜமான, நிகரற்ற ஒன்றையே நாம் நாடித்தேடுகிறோம் என்பதற்கு நம்மிடம் மறுக்க முடியாத காரணங்கள் இருக்கின்றன. நாம் இந்த ‘உலகத்தின் முடிவில்’ வாழ்கிறோம் என்பதற்கு உலகச் சம்பவங்களும் நிறைவேறிய பைபிள் தீர்க்கதரிசனங்களும் நம்பகமான ஆதாரத்தை அளிக்கின்றன. (மத்தேயு 24:3) பயணிக்கிற அந்த வியாபாரியைப் போல நாமும் கடவுளுடைய ராஜ்யத்திடம் உள்ளப்பூர்வமான வைராக்கியத்தைக் வெளிக்காட்டுவோமாக, நற்செய்தியைப் பிரசங்கிக்கிற சிலாக்கியத்திற்காக மகிழ்ந்து களிகூருவோமாக.​—⁠சங்கீதம் 9:1, 2.