தீமோத்தேயுவின் தாயும் அநேகமாய் அவனுடைய பாட்டி லோவிசாளும், சிறுவயது முதற்கொண்டு தீமோத்தேயுவின் மனதைக் கவர்ந்து அவன் உள்ளத்தில் பதிவது தங்கள் சொந்த எண்ணங்களாயிராதபடி நிச்சயப்படுத்திக்கொண்டார்கள்; அதற்கு மாறாக, யெகோவாவின் போதகங்களே அவனை இரட்சிப்புக்கு ஞானமுள்ளவனாக்குமென அவர்கள் அறிந்திருந்தார்கள். கிறிஸ்தவ அப்போஸ்தலனாகிய பவுல் தீமோத்தேயுவுக்கு எழுதின கடிதத்தில் பின்வருமாறு சொல்லுகிறான்: “நீ கற்று நிச்சயித்துக்கொண்டவைகளில் நிலைத்திரு; அவைகளை இன்னாரிடத்தில் கற்றாய் என்று நீ அறிந்திருக்கிறதுமல்லாமல், கிறிஸ்து இயேசுவைப்பற்றும் விசுவாசத்தினாலே உன்னை இரட்சிப்புக்கேற்ற ஞானமுள்ளவனாக்கத்தக்க பரிசுத்த வேத எழுத்துக்களை, நீ சிறுவயது முதல் அறிந்தவனென்றும் உனக்குத் தெரியும்.”—2 தீமோத்தேயு 3:14, 15.

சந்தேகமில்லாமல், தீமோத்தேயு தன் தாயும் பாட்டியும் எத்தகைய ஆட்களெனவும் கூர்ந்து கவனித்தான்—அவர்கள் உண்மையில் ஆவிக்குரிய ஆட்கள். தன்னல நோக்கங்களுக்காக அவர்கள் அவனை வஞ்சிக்கவோ சத்தியத்தைப் புரட்டவோ மாட்டார்கள்; அவர்கள் பாசாங்குக்காரருமல்ல. ஆகையால் தீமோத்தேயுவுக்குத் தான் கற்றக் காரியங்களைப்பற்றிச் சந்தேகமில்லை. முதியவனானபோது சுறுசுறுப்பாய் உழைத்த அவனுடைய கிறிஸ்தவ வாழ்க்கை அவனுடைய உண்மையுள்ள தாயின் இருதயத்தை மகிழச் செய்ததென்பதில் சந்தேகமில்லை.