இப்படிப்பட்ட குதிரைவீரர் மற்றும் அவர்களுடைய சவாரி நம் மனதில் நன்கு பதிந்துவிடுகின்றன. என்றபோதிலும் வெளிப்படுத்துதல் (திருவெளிப்பாடு) புத்தக எழுத்தாளர் கண்ட குதிரைகளையும் அதன் சவாரியாளரையும் கவனிப்பது கிளர்ச்சியூட்டுவதாயிருக்கிறது! அவை மறை பொருளுள்ளவையாகவும் அதே சமயத்தில் அச்சமூட்டுவதாயுமிருக்கிறது. இந்த குதிரைவீரர் திருவெளிப்பாட்டின் குதிரைவீரர் என்று பரவலாக அறியப்பட்டிருக்கின்றனர்.

நான்கு திறமை வாய்ந்த குதிரை வீரர்கள் உங்களை நோக்கி இடிமுழக்க ஓசையுடன் வருவதாக இப்பொழுது கற்பனை செய்து கொள்ளுங்கள். ஒருவன் சுழற்றும் பட்டயத்தையும் கொண்டிருக்கிறான். அவர்களுடைய குதிரைகளின் நிறங்களை கவனியுங்கள், ஒவ்வொன்றும் வித்தியாசமானது. ஒரு குதிரை வெள்ளை, ஒன்று சிவப்பு, ஒன்று கருப்பு மேலும் ஒன்று மங்கின நிறம் (வெளறிய நிறம்). அவை மெய்யாகவே, விநோதமும் புதிருமான ஒரு காட்சியை அளித்தன.

பைபிள் எழுத்தாளன் அப்போஸ்தலனாகிய யோவான் கண்ட விறுவிறுப்பான பதிவை தொடர்ந்து கவனியுங்கள். அவன் சொல்வதாவது: “நான் பார்த்தபோது, இதோ ஒரு வெள்ளைக்குதிரையைக் கண்டேன்; அதின் மேல் ஏறியிருந்தவன் வில்லைப் பிடித்திருந்தான்; அவனுக்கு ஒரு கிரீடங் கொடுக்கப்பட்டது; அவன் ஜெயிக்கிறவனாகவும் ஜெயிப்பவனாகவும் புறப்பட்டான் . . . சிவப்பான வேறொரு குதிரை புறப்பட்டது; அதின் மேல் ஏறியிருந்தவனுக்கு பூமியிலுள்ளவர்கள் ஒருவரையொருவர் கொலை செய்யத்தக்கதாகச் சமாதானத்தைப் பூமியிலிருந்தெடுத்துப் போடும்படியான அதிகாரம் கொடுக்கப்பட்டது; ஒரு பெரிய பட்டயமும் அவனுக்குக் கொடுக்கப்பட்டது. . . . நான் பார்த்தபோது ஒரு கறுப்புக் குதிரையைக் கண்டேன்; அதின்மேல் ஏறியிருந்தவன் ஒரு தராசைத் தன் கையிலே பிடித்திருந்தான். அப்பொழுது ஒரு பணத்துக்கு ஒருபடி கோதுமையென்றும், ஒரு பணத்துக்கு மூன்றுபடி வாற்போதுமையென்றும், உண்டான சத்தத்தைக் கேட்டேன் . . . நான் பார்த்தபோது இதோ மங்கின நிறமுள்ள ஒரு குதிரையைக் கண்டேன்; அதின் மேல் ஏறியிருந்தவனுக்கு மரணம் என்று பெயர்; பாதாளம் அவன் பின் சென்றது. பட்டயத்தினாலும், பஞ்சத்தினாலும், சாவினாலும், பூமியின் துஷ்ட மிருகங்களினாலும், பூமியின் காற்பங்கிலுள்ளவர்களைக் கொலை செய்யும்படியான அதிகாரம் அவைகளுக்கு கொடுக்கப்பட்டது.”—வெளிப்படுத்தின விசேஷம் 6:2-8.

இந்த தரிசனம் முதலில் எழுதப்பட்டதன் காரணமாக, எண்ணிறைந்த வாசகர்களை அதன் அர்த்தம் திகைக்க வைத்திருக்கிறது. இந்த மறைபொருளான குதிரைகளும் அதன் மீது சவாரி செய்பவர்களும் எதை பிரதிநிதித்துவம் செய்கிறார்கள்? அவர்களுடைய சவாரி எப்பொழுது துவங்கியது? அவர்களுடைய சவாரி இன்று நம் வாழ்க்கையின் எந்த விதத்திலாவது நம்மீது பாதிப்பை கொண்டிருக்கிறதா? இந்த குதிரைகளும் அதன் மீது சவாரி செய்பவர்களும் யாரை பிரதிநிதித்துவம் செய்யக்கூடும் மற்றும் அவர்களுடைய சவாரி உண்மையில் எப்பொழுது ஆரம்பித்தது என்பதை பற்றி பல்வேறு வகையான விளக்கங்கள் கொடுக்கப்பட்டிருக்கின்றன.

மிகப்பெரிய வேறுபாடுகளானது இந்த வெள்ளைக்குதிரை மற்றும் அதன் மீது சவாரி செய்பவன் பற்றிய விளக்கங்களில் காணப்படுகின்றன. உதாரணமாக, தி நியு கத்தோலிக் என்சைக்ளோபீடியா ‘அது சுவிசேஷம் அல்லது அதன் ஆதிக்கம் சம்பந்தமான வெற்றியைக் குறிக்கக்கூடும்’ என்று விவரிக்கிறது.

தானியேலும் வெளிப்படுத்தின விசேஷமும் என்ற புத்தகத்தில் உரியா ஸ்மித் என்பவர் பின்வரும் விளக்கத்தை கொடுக்கிறார்: “ஒரு வெள்ளைக்குதிரை . . . முதல் நூற்றாண்டில் சுவிசேஷத்தின் வெற்றிக்கு பொருத்தமானதோர் சின்னம் . . . குதிரையின் வெள்ளைநிறம் அந்த சகாப்தத்தில் விசுவாசத்தின் தூய்மையை குறிக்கிறது.”

தி எக்ஸ்போஸிட்டர் பைபிள் சொல்வதாவது: “முதல் குதிரை சவாரி செய்பவனின் கீழ் அதனுடைய வெற்றிகரமான முன்னேற்றத்தின் ஆரம்ப கட்டங்களில் கிறிஸ்துவைப்பற்றி சொல்லுவதற்கு மாறாக அந்த செயல் நோக்கம் தானே நமக்கு அறிமுகப்படுத்தப்படுகிறது, மற்றும் அத்துடன் எதிர்கால வெற்றி கோலத்தின் வாக்குறுதியும் எடுத்துரைக்கப்படுகிறது. . . . இந்த செயல்நோக்கம் உலகத்திலிருக்கின்றன என்பதை நாம் அறிகிறோம். அதாவது இந்த ராஜ்யம் நம் மத்தியிலிருக்கிறது, மேலும் யார் இதனை எதிர்க்கிறார்களோ அவர்கள் தோல்வியினால் மூழ்க்கடிக்கப்படுவார்கள்,” என்றபோதிலும் கிறிஸ்தவ யூத அஸ்திவாரத்தைச் சேர்ந்த உவுட்ரோ க்ரோல் என்பவர் வெள்ளைக்குதிரை மீது சவாரி செய்பவன் அந்திக் கிறிஸ்து என்று நினைக்கிறான்.

திருவெளிப்பாட்டின் குதிரைவீரர் குறித்த மறைபொருளுக்கு யார் விளக்கம் கூறக்கூடும்? பைபிளில் தானியேல் 2:47-ல் யெகோவா தேவன் “மறைபொருள்களை வெளிப்படுத்துகிறவர்” என்றழைக்கப்பட்டிருக்கிறார். இந்த குதிரை வீரருடைய தரிசனம் உட்பட பைபிளை எழுதுவதற்கு அவர்தாமே பரிசுத்த ஆவியினால் ஏவினபடியால் நமக்கு தேவையான விடையை அவர் அளிக்கக்கூடும். ஆகையால் தகவலுக்காக அவருடைய வெளிப்படுத்தப்பட்டுள்ள வார்த்தையை தேடி ஆராய்வதன் மூலம் பல்வேறு நிறமுள்ள அந்த குதிரைகள் மற்றும் அதன் மீது சவாரி செய்பவர்களைப் பற்றிய அர்த்தத்தை நாம் விடுவிக்க முடியும்.—ஆமோஸ் 3:7; 2 தீமோத்தேயு 3:16; 2 பேதுரு 1:21.

வெளிப்படுத்துதல் அல்லது திருவெளிப்பாட்டிலுள்ள முதல் மூன்று ஆரம்ப வசனங்கள் மறைபொருளை வெளிவிடுவதற்கு உதவக்கூடிய சாவியை நமக்கு கொடுக்கிறது. இந்த தொடர்ச்சியான தரிசனங்கள் எதிர்கால நிகழ்ச்சியுடன் அதாவது இந்த எல்லா காரியங்களையும் அப்போஸ்தலனாகிய யோவான் கண்டு எழுதி வைத்த பொ.ச. 96-ம் ஆண்டிற்கும் அப்பால் எதிர்காலத்தில் நிகழும் நிகழ்ச்சியுடன் சம்பந்தப்பட்டவை என்று அவை காட்டுகின்றன. இது வெளிப்படுத்தின விசேஷம் 1:10-ல் உள்ள அவனுடைய வார்த்தைகளுக்கு ஒத்திருக்கிறது. அதாவது தரிசனத்தில் காணப்பட்ட காரியங்கள் “கர்த்தருடைய நாள்” ஆரம்பித்த பிற்பாடு நிகழ வேண்டியவையாக இருந்தன.—1 கொரிந்தியர் 1:8; 5:5-ஐ ஒப்பிட்டுப் பார்க்கவும்.

இதை மனதில் கொண்டவர்களாய் குதிரைகளையும் அவற்றின் மீது சவாரி செய்பவர்களையும் பற்றி நாம் ஆராய்வோமாக. தொடக்கத்திலேயே வெள்ளைக் குதிரைப்பற்றியும் அவற்றின் மீது சவாரி செய்பவன் பற்றியும் சரியாக விளங்கிக் கொள்வது இன்றியமையாததாக இருக்கிறது. அப்பொழுது மற்ற குதிரை வீரரின் அர்த்தம் அதனிடத்தில் பொருந்தும்.

கொடுக்கப்பட்டுள்ள விளக்கங்களை ஆராய்தல்

முந்தின கட்டுரையில் நாம் கவனித்த ஒரு விளக்கமானது வெள்ளைக்குதிரை மற்றும் அதன் மீது சவாரி செய்பவன் ‘சுவிசேஷ சம்பந்தமான வெற்றியை அல்லது அதன் ஆதிக்கம் சம்பந்தமான வெற்றியை குறிக்கக்கூடும்’ என்பது. ஆனால் இயேசு கிறிஸ்துவைப் பற்றிய அந்த சுவிசேஷம் (நற்செய்தி) மற்றும் அவற்றை சூழ்ந்துள்ள கடவுளுடைய நோக்கங்கள் ஆகியவற்றினிடமாக இந்த உலகம் மாற்றப்படவில்லை. எனவே அதன் ஆதிக்கம் நிச்சயமாகவே வெற்றிகளிப்புடன் சவாரி செய்திடவில்லை. மாறாக அது இந்த நூற்றாண்டில் நொறுங்கிவிழுகின்றன, பல துண்டுகளாக ஆகின்றன.

இந்த வெள்ளைக்குதிரை முதல் நூற்றாண்டில் சுவிசேஷத்தின் வெற்றியையும் மற்றும் விசுவாசத்தின் தூய்மையையும் பிரதிநிதித்துவம் செய்கிறது என்ற விளக்கத்தைப்பற்றியதென்ன? இது, அந்த தரிசனம் எதிர்காலத்தில் வரவிருந்த காரியங்களை பற்றிய தரிசனம் என்ற உண்மையை அலட்சியம் செய்கிறது. நமது பொ.ச. 96-ம் ஆண்டில் பத்மு தீவிலே சிறைக் கைதியாக இருந்த சமயத்தில் யோவான் இதை எழுதினதன் காரணமாக முதல் நூற்றாண்டுடன் சம்பந்தப்பட்ட எந்த ஒரு காரியத்தையும் பிரதிநிதித்துவம் செய்வது கூடாத காரியம்.

மற்றொரு விளக்கம் இந்த வெள்ளைக்குதிரை கிறிஸ்துவை அறிமுகப்படுத்துவதற்கு மாறாக, அந்த செயல்நோக்கத்தை அறிமுகப்படுத்துகிறது. மேலும் அவருடைய அந்த ராஜ்யம் நம் மத்தியில் இருக்கிறது, அதாவது நம்முடைய இருதயத்திலிருக்கிறது. ஆனால் இயேசு கிறிஸ்துவின் மற்றும் கிறிஸ்தவத்தின் அந்த செயல் நோக்கம், வெளிப்படுத்துதல் புத்தகம் எழுதப்பட்ட ஏதோ ஒரு எதிர்காலத்தில் துவங்கவில்லை. மாறாக, இந்த யோவான் எழுதுவதற்கு முன்பே முதல் நூற்றாண்டு கிறிஸ்தவர்கள் மத்தியில் ஏற்கனவே அந்த செயல்நோக்கம் பெருமளவில் செயலாற்றிக் கொண்டிருந்தது.

அதோடுகூட, இயேசு “கடவுளுடைய ராஜ்யம் உங்களுக்குள் இருக்கிறதே” என்று சொன்னபோது அவர் மாய்மாலக்காரரான பரிசேயரிடம் பேசிக்கொண்டிருந்தார். அவர்கள் கேட்ட ஒரு கேள்விக்கு பதிலளிக்கையில் இதை சொன்னார். இயேசு அச்சமயத்தில் அவர் தம்மை உண்மையுடன் பின்பற்றியவர்களிடம் பேசிக்கொண்டில்லை. அவர் அவர்களிடம் ‘கடவுளுடைய ராஜ்யம் அவர்களுக்குள்’ அதாவது அவர்களுடைய இருதயத்தில் இருக்கும் ஒரு காரியம் என்ற கருத்தில் பேசிக்கொண்டில்லை. மாறாக, அவநம்பிக்கையுள்ள பரிசேயர்களிடம் எதிர்கால கடவுளுடைய ராஜ்யத்தின் பிரதிநிதியாக தாம் அந்த சந்தர்ப்பத்தில் அவர்கள் மத்தியில் இருக்கிறார் என்பதை இயேசு சொல்லிக் கொண்டிருந்தார்.—லூக்கா 17:21; ஜெருசலேம் பைபிள் மற்றும் தி நியு இங்கிலிஷ் பைபிள் ஆகியவற்றையும் பாருங்கள்.

வெள்ளைக்குதிரை மீது சவாரி செய்பவர் அந்திக்கிறிஸ்து என்ற கருத்தைப் பற்றியதென்ன? வெள்ளைக்குதிரை வீரனைப் பற்றி சொல்லும்போது, “அவன் ஜெயிக்கிறவனாகவும் ஜெயிப்பவனாகவும் [முழுமையான ஜெயத்தை அடைபவனாகவும், NW] புறப்பட்டான்” என்று சொல்லப்பட்டிருக்கையில், அந்திக்கிறிஸ்து இப்படிப்பட்டதோர் படையெடுப்பை செய்வான் என்று பைபிள் எந்த இடத்திலும் சொல்லவில்லை. (வெளிப்படுத்தின விசேஷம் 6:2) வெள்ளைக்குதிரையின் மீது யார் அமர்ந்து இருக்கிறானோ அவன் முழுமையான ஜெயம் பெறுபவனாக சவாரி செய்வான் என்பது தெளிவாக இருக்கிறது. அவனுடைய ஜெயம் தவறிப்போகாது. அவனுடைய சத்துருக்கள் அனைவரும் அழிக்கப்படுவர்.

பைபிளின் வழிகாட்டும் குறிப்புகள் அடையாளங் கண்டுகொள்ள உதவுகிறது

வெள்ளைக்குதிரை மீது சவாரி செய்பவனை பிழையற்ற விதத்தில் அடையாளங் காணும் குறிப்பு, “மறை பொருள்களை வெளிப்படுத்துகிறவரால்” பிற்பாடு தரிசனங்களின் அதே தொடரில் கொடுக்கப்பட்டிருக்கிறது. வெளிப்படுத்தின விசேஷம் 19:11-16-ல் மறுபடியுமாக ஒரு வெள்ளைக் குதிரை காணப்படுகிறது. இந்த முறை அதன் மீது சவாரி செய்பவனைப்பற்றி தெளிவான அடையாளக்குறி கொடுக்கப்பட்டிருக்கிறது.

இந்த தீர்க்கதரிசன காட்சிகளில் ஒரு வெள்ளைக் குதிரை இருமுறை காணப்பட்ட உண்மையானது அதே குதிரைதான் என்பதை சுட்டிக் காட்டுகிறது. மற்றும் அந்த குதிரை வீரரின் பல்வேறு கடமைகளும் செயல்களும் சித்தரித்துக் காட்டப்பட்டிருக்கிறது. காட்சியின் பிற்பட்ட பகுதியில் குதிரை வீரன் பெயரிடப்பட்டிருக்கிறான். அவர் “உண்மையும் சத்தியமுள்ளவர்” “தேவனுடைய வார்த்தை” மற்றும் “ராஜாதி ராஜா, கர்த்தாதி கர்த்தா” என்றழைக்கப்படுகிறார்.

வெள்ளைக்குதிரை மீது சவாரி செய்பவன் யார் என்பதை குறித்ததில் இந்தச் சிறப்புப் பெயர்கள் எவ்வித சந்தேகத்தையும் விட்டு வைக்கவில்லை. அது ஆண்டவராகிய இயேசு கிறிஸ்துவை தவிர வேறு எவருமில்லை! (வெளிப்படுத்தின விசேஷம் 17:14-ஐ ஒப்பிட்டுப் பார்க்கவும்) ஆனால் அவருடைய வாழ்க்கையின் எந்த காலப்பகுதியில் இது நிகழ்கிறது? வெளிப்படுத்தின விசேஷம் கொடுக்கப்பட்ட அந்த முதல் நூற்றாண்டின் முடிவிற்கு பிற்பட்ட ஒரு காலத்தில் அது இருக்க வேண்டும். கவனிக்க வேண்டிய மற்றொரு காரியம் அவனுக்கு ராஜரீக கிரீடம் கொடுக்கப்பட்டது. எனவே, ஏதோ ஒரு எதிர்காலத்தில் இயேசு கிறிஸ்து ராஜாவாக அல்லது அரசராக ஒரு விசேஷ பாகத்தை ஆரம்பிக்க வேண்டியதாக இருந்தது. மேலும் அந்த ஒரு ஸ்தானத்தில் அவர் ஒரு போர் வீரனாக ஒரு வில்லை பிடித்தவராக, “ஜெயிப்பவனாகவும் முழுமையான ஜெயத்தை அடைவதற்கு” செல்பவனாகவும் சித்தரித்துக் காட்டப்பட்டிருக்கிறார்.

அதோடு, இது எதிர்காலத்தில் நிகழ வேண்டியதாக இருந்தது என்பதை காட்டுவதற்கு பின்வரும் உண்மை இருக்கிறது. இயேசு தம் பூமிக்குரிய வாழ்க்கையை முடித்து மரித்தோரிலிருந்து உயிர்த்தெழுப்பப்பட்டு பரலோகத்துக்கு ஏறிச் சென்றதிலிருந்து இந்த திருவெளிப்பாட்டு தரிசனம் கிடைத்த காலப்பகுதிக்குள்ளாக 60-க்கும் மேற்பட்ட ஆண்டுகள் கடந்துவிட்டிருந்தன. அவர் பரலோகத்துக்கு திரும்பிச் சென்றபோது அந்த குறிப்பிட்ட எதிர்காலம் வரும்வரையாக கடவுளுடைய வலது பாரிசத்தில் உட்காரும்படியாக இயேசு சொல்லப்பட்டார். அப்பொழுது அவருடைய “சத்துருக்கள் அவருக்கு பாதபடியாக்கப்படுவார்கள்.”—எபிரெயர் 10:12, 13.

அந்த குதிரைவீரர் சவாரியை துவங்குகிறார்

எனவே அந்த வெள்ளைக்குதிரை மீது செய்யப்படும் சவாரியானது ஏதோ ஒரு எதிர்காலத்தில், இயேசு கிறிஸ்து கடவுளுடைய ராஜ்யத்தின் பரலோக அரசராக பதவியிலமர்த்தப்படுகையில் துவங்கவேண்டியதாக இருந்தது. அந்த சமயத்தில் கடவுள் அவரை பின்வரும் கட்டளையிட்டு அனுப்புவார்: “நீ உம்முடைய சத்துருக்களின் நடுவே ஆளுகை செய்யும்” (சங்கீதம் 110:2) ஆனால் இது எப்பொழுது நிகழ்ந்தது?

பரலோக அரசராக இயேசு கிறிஸ்து முடிசூட்டப்படும் காரியமானது சங்கீதம் 45:3-7-ல் விவரிக்கப்பட்டிருக்கிறது. பின்பு இந்த சங்கீதத்திலிருந்து எபிரெயர் 1:8, 9-ல் அப்போஸ்தலனாகிய பவுல் மேற்கோள் காட்டி அதிலுள்ள 6-ம் மற்றும் 7-ம் வசனங்களை கடவுளுடைய குமாரனாகிய இயேசு கிறிஸ்துவுக்கு பொருத்திக் காண்பிக்கிறான். யெகோவாவின் சாட்சிகளால் பிரசுரிக்கப்பட்ட விவரமான தகவல்களும் மற்றும் வேதவசன அத்தாட்சிகளும் இயேசு கிறிஸ்துவுக்கு முடிசூட்டுதல் பரலோகத்தில் புறஜாதியாரின் காலங்களின் முடிவில் “தேசங்களுக்கு நியமிக்கப்பட்ட காலங்களின் முடிவில்” 1914-ம் ஆண்டில் நிகழ்ந்ததென்று காட்டுகிறது.—லூக்கா 21:24.

எனவே இந்த குதிரை வீரரின் சவாரியை 1914-ம் ஆண்டிற்கு முன்பாக விவரிக்கக்கூடிய எந்த ஒரு விளக்கமும் சரியானதாக இருக்கமுடியாது. அதோடு, வெள்ளைக் குதிரைமீது சவாரி செய்பவர்தானே முன்சென்றதன் காரணமாக அவரை பின்தொடரும் மற்ற குதிரைகளும் குதிரைவீரரும், அவர் சவாரியை துவங்கின பின்பு உடனடியாகவும் அல்லது சிலகாலம் கழித்தும் நிகழும் காரியங்களை பிரதிநிதித்துவம் செய்கிறது. ஆகையால் இந்த நான்கு குதிரை வீரரின் சவாரி 1914-ன் “முடிவு காலம்” ஆரம்பித்தது முதற்கொண்டும் மற்றும் அதற்கு பிற்பாடும் நிகழவேண்டும். அதுமுதற்கொண்டே இந்த “கடைசி நாட்களின்” அத்தாட்சிகள் காணப்பட்டு வருகின்றன.—தானியேல் 12:4; 2 தீமோத்தேயு 3:1-5, 13.