Jueces

8 Ikhú xa̱bekha bi̱ naguwáʼ náa Efraín nitháán Gedeón: “Dí nitaniu̱xu, náá numuu dí táratuxu índo̱ nidxu̱ʼ gátaxmína̱ʼ gajmiáanʼ xa̱bu̱ Madián rá.” Ra̱ʼkhá tháán nindxa̱ʼwa̱jmaa. 2 Mú ikhaa niʼthúún: “Ndiéjunʼ lá ni̱ni̱ wéñuuʼ ikhúún ki xóo dí ni̱ni̱ ikháanʼla rá. Lá raʼkháa itháan májánʼ dí napídu̱únʼ dí nagujxi̱i̱ Efraín ki xóo mbá xúgíʼ uva dí nagujxi̱i̱ Abí-Ézer ráʼ. 3 Dios nixnájxi̱i̱ Oreb ga̱jma̱a̱ Zeeb príncipes Madián náa ñawánla. Ndiéjunʼ lá ni̱ni̱ wéñuuʼ ikhúún ki xóo ikháanʼla rá.” Índo̱ niʼthúún xígi̱ ikhú niniña̱a̱nʼ rakiʼníin.

4 Gedeón ni̱jkha̱nú náa Jordán ga̱jma̱a̱ nikidaa, maski ajndu ikhaa gajmíi̱n bi̱ mbá 300 xa̱bekha niʼni néʼngu̱u̱n, mú nigún ruxkúún má xúʼko̱ xa̱bu̱ sia̱nʼ. 5 Ikha jngóo nindu̱ʼu̱u̱n xa̱bu̱ Sucot: “Mbá péñu,* guxnu̱u̱n rí mu̱phu̱ xa̱bekha bi̱ na̱ʼkhá gajmíʼ, numuu rí néʼngu̱u̱n ga̱jma̱a̱ na̱jkuáxu̱ ruxkáá Zébah ga̱jma̱a̱ Zalmuná, reyes bi̱ kúwá náa Madián”. 6 Mú príncipes bi̱ kúwá náa Sucot nitháán: “Ndíjkha rí muxnu̱u̱n pan mu̱phu̱ soldadiaaʼ rá. Lá niguámbaaʼ má nitartuwiin* Zébah ga̱jma̱a̱ Zalmuná ráʼ.” 7 Ikhú Gedeón niʼthúún: “Dí xúʼko̱ etha̱la, maxkuʼtuwíi xuyala ga̱jma̱a̱ tsuwanʼ dí rígá náa ku̱ba̱ʼ mijxooʼ* índo̱ Jeobá gáxnájxi̱i̱ Zébah ga̱jma̱a̱ Zalmuná náa ñawúnʼ”. 8 Ikhú nitsimuu náa xuajin Penuel ga̱jma̱a̱ xúʼko̱ má nindu̱ʼu̱u̱n xa̱bu̱ bi̱ kúwá ikhí, xó má nitháán xa̱bu̱ Sucot xúʼko̱ má nitháán xa̱bu̱ xuajin rúʼko̱ ma̱ngaa. 9 Ikha jngóo xúʼko̱ má niʼthúún xa̱bu̱ xuajin Penuel ma̱ngaa: “Índo̱ gátangu̱ún dí niʼngo̱ʼ nixmínaʼ,* ma̱ni̱ gájxi̱i̱ torre rígi̱”.

10 Zébah ga̱jma̱a̱ Zalmuná kúwá náa xuajin Carcor gajmiún soldádiu̱ún, naʼni mbá 15,000 xa̱bekha. I̱ndó má bigi̱ bi̱ xóó naguanún náa soldado bi̱ naguwáʼ xígií náa nagájnuu a̱jkha̱ʼ. Numuu dí nikháñún má mbá 120,000 soldado ga̱jma̱a̱ espada. 11 Gedeón ni̱jkha̱ ratsimuu má xúʼko̱ náa kamba̱a̱ rí nagún xa̱bu̱ bi̱ najnguʼúún, xígií náa nagájnuu a̱jkha̱ʼ* náa Nóbah ga̱jma̱a̱ náa Jogbehá. Nixmínaʼ gajmíi̱n xa̱bu̱ sia̱nʼ náa gíi̱nʼ índo̱ ikhiin na̱nguá kúwá xawii. 12 Zébah ga̱jma̱a̱ Zalmuná, a̱jmi̱i̱n reyes Madián nigájnún ragáñúún. Mú ikhaa ni̱jkha̱ raxkhúún ga̱jma̱a̱ niʼngo̱o̱ niguguiin. Rígi̱ niʼni dí mamiñún mbá xúgíinʼ soldado bi̱ sia̱nʼ.

13 Nda̱wa̱á Gedeón a̱ʼdióo Joás nitanga̱a̱ náa ni̱jkha̱ gáxmína̱ʼ, ni̱ʼkha̱a̱ náa kamba̱a̱ dí natsimuu náa Heres. 14 Kamba̱a̱ nigutuwiin mbáa dxámá bi̱ na̱ʼkha̱ náa Sucot ga̱jma̱a̱ nirajxu̱u̱. Dxámá niʼnirámáʼ mbiʼñún mbá xúgíinʼ príncipes ga̱jma̱a̱ xabuanii bi̱ kúwá náa Sucot. Mbá 77 xa̱bekha dí mbá xúgíinʼ. 15 Ikhú Gedeón ni̱jkha̱ gáʼñúún xa̱bu̱ Sucot, ga̱jma̱a̱ niʼthúún: “Gi̱i̱ xtáa Zébah ga̱jma̱a̱ Zalmuná, xa̱bekha bi̱ ikháanʼla nitsijmún ga̱jma̱a̱ numún, ikháanʼla nithu̱nʼ: ‹Náá numuu rí muxnu̱u̱n pan mu̱phu̱ xa̱bia̱a̱ʼ bi̱ néʼngu̱u̱n rá. Lá niguámbáaʼ má nitartuwiin* Zébah ga̱jma̱a̱ Zalmuná rá.›” 16 Ikhú niguajtuun xabuanii bi̱ kúwá náa xuajin, ga̱jma̱a̱ nijmuu tsuwanʼ dí rígá náa ku̱ba̱ʼ mijxooʼ mu magíiʼ a̱jkiu̱ún xa̱bu̱ Sucot. 17 Ma̱ngaa, niʼni gájxi̱i̱ torre náa Penuel, ga̱jma̱a̱ nigudíin xa̱bekha bi̱ kúwá náa xuajin rúʼko̱.

18 Ikhaa nirajxu̱u̱ Zébah ga̱jma̱a̱ Zalmuná: “Xú káʼnii nindxu̱ún xa̱bekha bi̱ ikháanʼla niradíin náa kúbá Tabor.” Ikhiin nitháán: “Xóo ikháán kaʼnii, mámbáa rí ikhiin nakujmaa dí nindxu̱u̱ a̱ʼdióo mbáa rey”. 19 Ikhaa niʼthúún: “Nindxu̱ún a̱ngui̱nʼ. Nindxu̱ún e̱ji̱i̱n ru̱dúʼ,* na̱tala ga̱jma̱a̱ numuu mbiʼyuu Jeobá dí xágúdiáanʼla má xúgi̱ á mu túradíinla ikhiin”. 20 Ikhú niʼtáñajuunʼ Jéter, a̱ʼdióo bi̱ giʼnii: “¡Aradíin!”. Mú ikhaa táriya̱ʼ espádóo, nimíñuu numuu dí kaʼníí chíʼgíiʼ.* 21 Ikha jngóo Zébah ga̱jma̱a̱ Zalmuná nitháán Gedeón: “Á mu gajkhun xa̱biya̱* nindxa̱a̱ʼ, aradiáanʼxu̱ má ikháán”. Ikhú Gedeón nixíyáa Zébah ga̱jma̱a̱ Zalmuná, ma̱ngaa nigruigú ajua̱nʼ dí tuáʼán náa aphúún camello dí nindxu̱u̱ xóo mbá xíʼtáa gu̱nʼ.

22 Nda̱wa̱á israelitas nitháán Gedeón: “Aratáñájunxu ikháán, xó má a̱ʼdiáaʼ ga̱jma̱a̱ a̱ʼdá xíñáaʼ, numuu dí nitani̱ káwáanʼxu náa ñawúúnʼ xa̱bu̱ Madián”. 23 Mú Gedeón niʼthúún: “Xátañájuanla ikhúún, ni má a̱ʼdióʼ. Jeobá gáʼtáñájuanla”. 24 Gedeón niʼthúún xóó: “Rígá rí nandoʼ manda̱ʼa̱la, mámbáa dí ikháanʼ, gáxnuʼ xábí dí natra̱ʼa̱ náa rakhún dí niguanáa”. (Numuu dí ismaelitas nindxu̱ún bi̱ táʼngu̱u̱n, ikhiin guáʼdáá xábí dí natra̱ʼa̱ rakhún dí nindxu̱u̱ oro). 25 Ikhiin niriʼñáán: “Aan, muxna̱a̱ʼxu má”. Ikhú nirtiga̱ mbá xtíin wajpa, ikhí mámbáa ni̱jkha̱ gárajkuáa xábí dí natra̱ʼa̱ náa rakhún dí niguanáa. 26 Xábí dí nundra̱ʼa̱ rakhún rí nindxu̱u̱ oro dí ninda̱ʼa̱, rí ki̱wu̱n naʼni mbá 1,700 siclos.* Mú tágixnuu ajua̱nʼ dí nindxu̱u̱ xóo mbá xíʼtáa gu̱nʼ, xábí ga̱jma̱a̱ xtíin mugu̱ dí miʼñuu dí nugíʼ reyes bi̱ kúwá náa Madián. Ma̱ngaa ajua̱nʼ dí nuraʼngu̱u̱n camello.

27 Gedeón nijmuu oro rúʼko̱ mu maʼni efod.* Nda̱wa̱á ni̱jkha̱ kayóo náa xuajin Ofrá, ikhí mbá xúgíinʼ israelitas nigi̱ʼdi̱i̱ ndiyamajkuíí* efod. Rígi̱ ninindxu̱u̱ mbá tsáʼkhá náa Gedeón ga̱jma̱a̱ bi̱ kúwá náa goʼwóo.

28 Xúʼko̱ kaʼnii niʼni dí madianitas niguánú nini̱ ñajúúnʼ israelitas ga̱jma̱a̱ ikhiin nánguá nitangiín muni miñún. Ikhú nikúwá tsímáá* israelitas bi̱ nikúwá náa mbaaʼ rúʼko̱ mbá 40 tsiguʼ, mbiʼi rí nixtáa Gedeón.

29 Jerubaal* a̱ʼdióo Joás nitanga̱a̱ náa goʼwóo ga̱jma̱a̱ niguanúu má ikhí.

30 Gedeón nigiʼdiin mbá 70 e̱ji̱i̱n, numuu dí mbaʼin gu̱ʼu̱ nigui̱i̱n. 31 A̱ʼgú ñawuun* bi̱ nigiʼdaa náa Siquem ma̱ngaa nigiʼdaa mbáa ada̱, nixná mbiʼyuu Abimélec. 32 Nikátsejmbo̱o̱ Gedeón a̱ʼdióo Joás, nijnguáaʼla náa nijuiʼdi̱i̱ anu̱u̱,* náa Ofrá náa mbañúúnʼ abí-ezrítas.

33 Índo̱ Gedeón nikháñúu, ikhú israelitas nitangiín ndiyamajkhún Baal. Ga̱jma̱a̱ niraʼwi̱i̱ mbuyamajkuíí dios Baal-Berit. 34 Israelitas nimbumún kuyáá Jeobá Dios ndrígu̱ún bi̱ niʼni káwíin náa ñawúúnʼ xa̱bu̱ sia̱nʼ bi̱ kúwá náa mbájndi kúwíin. 35 Ni má túniu̱u̱n rí májánʼ* bi̱ kúwá náa goʼwóo Jerubaal, xóo muʼthá, Gedeón. Maski ajndu ikhaa niʼni dí májánʼ ga̱jma̱a̱ numún israelitas.