Rí niʼnirámáʼ Lucas

21 Ikhú índo̱ nikujxi̱i̱ iduu, ndiʼñún xa̱bu̱ bi̱ guáʼdáá rí kúwá rundri̱ya̱ʼ mbújkha̱a̱ náa najti mbújkha̱a̱ dí mitsúʼkháan. 2 Ikhú ndiʼyoo mbáa a̱ʼgú xuáʼa̱, nigruiʼyáʼ a̱jma̱ mbújkha̱a̱ dí rambáa numuu,* 3 ga̱jma̱a̱ niʼthún: “Na̱tala gajkhun rí a̱ʼgú xuáʼa̱ gínáa bugi̱, nigruiʼyáʼ itháan mbújkha̱a̱ ki xóo xúgíinʼ ikhiin. 4 Numuu rí xúgíinʼ ikhiin nixna rí napídu̱ún eni̱, mú a̱ʼgú xuáʼa̱ bugi̱ maski ajndu migínáa, nixná xúgíʼ rí gíʼdoo mu maxtáa ga̱jma̱a̱”.

5 Nda̱wa̱á índo̱ tikhuun kúwá ruthi ga̱jma̱a̱ numuu guʼwá rí nduyamajkuíí Dios, dí xú káʼnii niguma ga̱jma̱a̱ itsí dí mitsaanʼ ga̱jma̱a̱ rí mitsúʼkháan rí najuixnájxi̱ náa Dios, 6 ikhaa niʼthí: “Maʼga̱nú mbiʼi dí ni xáguanúu nimbá itsí dí xúgi̱ ndu̱ya̱a̱la. Xúgíʼ majngudiri̱ga̱a̱”. 7 Ikhú nirajxi̱i̱: “Maestro, nguáná gáʼni xúgíʼ rígi̱ rá. Ga̱jma̱a̱ ndiéjunʼ tsinaʼ gákujmaa dí inu marigá rígi̱ rá.” 8 Ikhaa niriʼñúún: “Guñeumíjna̱. Xúniʼñáánʼ muninduwáanʼla, numuu rí mbaʼin maguwáʼ ga̱jma̱a̱ majmúún mbiʼyuʼ, ma̱ngaa muthi: ‹Ikhúúnʼ ni̱ndxu̱ʼ buʼko̱›, o ‹ni̱jkha̱nú má mbiʼi›. Xáʼgua kidxúúnʼ ikhiin. 9 Ma̱ngaa índo̱ gúdxawíín dí narígá guerra ga̱jma̱a̱ dí xa̱bu̱ natsañu̱únʼ kuyamijná, xámíñálá. Numuu dí xúgíʼ rígi̱ ndayóoʼ marigá ginii, mú xóó tsértumuu mbiʼi”.

10 Ikhú niʼthún: “Xuajen mba̱ʼu̱ magi̱ʼdu̱u̱n gajmiún i̱ʼwáʼ xuajen mba̱ʼu̱, xa̱bu̱ ñajunʼ magi̱ʼdu̱u̱n gajmiún eʼwíinʼ xa̱bu̱ ñajunʼ. 11 Marigá gaʼxma, ma̱ngaa marigá ewiʼ ga̱jma̱a̱ nandii asndu náá. Ga̱jma̱a̱ xa̱bu̱ mamiñún ga̱jma̱a̱ xúgíʼ dí gárígá, ma̱ngaa marigá tsinaʼ mekhuíí.

12 Mú nákha xóó tsérígá xúgíʼ rígi̱, xa̱bu̱ murtuwáanʼla ga̱jma̱a̱ muni̱ gínáanʼla. Muxnajxáanʼla náa guʼwá rí bi̱ judíos nuxnáá gamajkhu Dios, ga̱jma̱a̱ muxuda̱a̱nʼla náa guʼwá e̱jua̱nʼ. Ma̱ngaa ga̱jma̱a̱ numuu mbiʼyuʼ, maʼga kiʼdáanʼ náa inún xa̱bu̱ ñajunʼ ga̱jma̱a̱ náa reyes. 13 Xúʼko̱ ikháanʼ ma̱ndoo mu̱tha̱ ga̱jma̱a̱ numuʼ náa inún ikhiin. 14 Ikha jngóo, maxúndxa̱ʼwa̱míjna̱la wapháá rí mu̱tha̱ mu mumbáyumíjnála, 15 numuu rí ikhúúnʼ ma̱xna̱la̱ ku̱ma̱, ga̱jma̱a̱ ma̱xna̱la̱ ajngáa rí mu̱tala, rí asndu xa̱bu̱ sia̱nʼ maguanún wíí ga̱jma̱a̱ nándáa dí gúthi. 16 Ma̱ngaa asndu ana̱la maxnájxáanʼ, a̱ngia̱la, bi̱ ku̱ñu̱u̱n, ga̱jma̱a̱ bi̱ nambájxala gajmiála. Ga̱jma̱a̱ asndu tikuáanʼ dí ikháanʼ muradiáanʼla. 17 Ga̱jma̱a̱ xúgíinʼ xa̱bu̱ mawiñu̱u̱nʼ kuyala ga̱jma̱a̱ numuu mbiʼyuʼ. 18 Maski ajndu xúgíʼ rígi̱ gúgíʼníínla, mú xándáti̱ga̱ nimbá xtátsúun edxa̱la. 19 Á mu naʼngala asndu índo̱ gártumuu mbiʼi maguma káwáanʼ.

20 Índo̱ gúya̱a̱la rí soldados nuruguama̱ʼa̱a̱n Jerusalén, ikhú gúya̱a̱ rí na̱jkha̱nú mbiʼi mambáa. 21 Ikhú bi̱ kúwá náa Judea gagañútuʼún náa kúbá, bi̱ kúwá náa tapo̱o̱ xuajen Jerusalén, gagajnún ikhí, ga̱jma̱a̱ bi̱ kúwá náa xanáá ni xáta̱ʼa̱án ikhí. 22 Numuu dí mbiʼi rígi̱ mixtanda̱ʼa̱a̱ cuenta, mambanúu xúgíʼ dí kiʼniraʼmáʼ. 23 ¡Phú ngíníi gu̱ʼu̱ bi̱ ga̱khi̱i̱n* ga̱jma̱a̱ bi̱ nuxníxúnʼ e̱ji̱n mbiʼi rúʼko̱! Numuu rí mba̱a̱ ga̱ʼkhu̱ gáʼkha̱ náa tsu̱du̱u̱ ku̱ba̱ʼ rígi̱, ma̱ngaa mba̱a̱ rí gámínuuʼ xuajen rígi̱. 24 Muradíin ga̱jma̱a̱ espada ma̱ngaa maʼga kiʼdiin náa i̱ʼwáʼ xuajen mba̱ʼu̱,* ga̱jma̱a̱ Jerusalén muxujmbi̱ri̱ga̱a̱ gúni̱ i̱ʼwáʼ xuajen asndu índo̱ gárámuuʼ mbiʼi dí kaʼyoo.

25 Ma̱ngaa marigá tsinaʼ náa a̱jkha̱ʼ, náa gu̱nʼ, náa a̱ʼgua̱a̱n, ga̱jma̱a̱ náa tsu̱du̱u̱ ku̱ba̱ʼ, marigá majphú mba̱a̱ ga̱ʼkhu̱ náa xa̱bu̱, rí asndu xúyáá dí muni̱ índo̱ gáwaan dí naʼbajxu̱u̱ gakhi̱i̱ lamáa. 26 Xa̱bu̱ makámindúún ga̱jma̱a̱ gamíi, ma̱ngaa maxmiéjúnʼ ga̱jma̱a̱ numuu xúgíʼ dí gárígá náa tsu̱du̱u̱ ku̱ba̱ʼ, numuu dí maʼbajngaa tsiakii dí rígá mekhuíí. 27 Ikhú mbu̱ya̱a̱ A̱ʼdióo xa̱biya̱ rí na̱ʼkha̱ náa du̱u̱n ga̱jma̱a̱ xúgíʼ tsiakii ndrígóo. 28 Mú, índo̱ gágíʼdu̱u̱ marigá xúgíʼ rígi̱, guguajúnla, guxujxíi edxa̱la, numuu rí nijngiyuu má mbiʼi rí makáwáanʼla”.

29 Ikhú nigíʼ mbá xkri̱da: “Gu̱ya̱a̱ xú káʼnii eʼni ixi̱ higo, ga̱jma̱a̱ xúgíʼ i̱ʼwáʼ ixi̱. 30 Índo̱ narudíinʼ inúu ikháanʼla má ndu̱ya̱a̱ dí nacho̱o̱ má maxnáa ruʼwa. 31 Xúʼko̱ má mangáanʼ, índo̱ gúya̱a̱ xúgíʼ rígi̱, gu̱ya̱a̱ dí Xa̱bu̱ Ñajunʼ ndrígóo Dios* xtáa mijngii. 32 Na̱tala gajkhun rí ka̱ʼníí kuwáanʼla índo̱ gárígá xúgíʼ rígi̱. 33 Mekhu ga̱jma̱a̱ ku̱ba̱ʼ ma̱ndoo mandáti̱ga̱a̱, mú ajngóʼ nditháan xándáti̱ga̱a̱.

34 Mú guñewamíjna̱la má ikháanʼ mu a̱jkia̱la* xáʼni gújkhúʼ, ga̱jma̱a̱ numuu dí nuphiʼtsula wéñuuʼ, nawanla wéñuuʼ o numuu dí naxmiéjuanla ga̱jma̱a̱ numuu rí xóo makuwáanʼ, ga̱jma̱a̱ nda̱a̱ tsu̱ma̱ gákagaa mbiʼi rúʼko̱ gájngawáanʼ 35 xóo mbá tsáʼkhá. Numuu rí ma̱ʼkha̱ náa xúgíinʼ bi̱ kúwá náa tsu̱du̱u̱ ku̱ba̱ʼ. 36 Ikha jngóo, gakuwáanʼla xawii ga̱jma̱a̱ gutajkáan* má xúʼko̱ mu makáwáanʼla náa xúgíʼ rí wíji̱ marigá, mu xúʼko̱ ma̱ndoo muguajún náa inuu A̱ʼdióo xa̱biya̱”.

37 Rí mbiʼi, naʼsngáa náa guʼwá rí nduyamajkuíí Dios, mú rí mbruʼun najkha̱a̱ gáguanúu náa kúbá rí mbiʼyuu Olivos. 38 Ga̱jma̱a̱ miʼcha̱ egún xa̱bu̱ gúdxawíín dí naʼthí náa guʼwá rí nduyamajkuíí Dios.