Raga̱jma̱ i̱yi̱i̱ʼ rí na̱jkha̱ inuu Timoteo

4 Náa inuu Dios ga̱jma̱a̱ Cristo Jesús, bi̱ mundi̱ʼi̱i̱n cuenta bi̱ nduya ga̱jma̱a̱ bi̱ nikháñún, índo̱ ikhaa ga̱jma̱a̱ rí Naʼtáñajunʼ* gákujmaa, natañájuanʼ matani̱ rígi̱: 2 Gaʼcha̱ʼ marataráʼa ajngá rawuunʼ Dios, náa mbiʼi májánʼ ga̱jma̱a̱ náa mbiʼi mingíjyúuʼ, ataxprígú, arathá dí maguma, araxná consejo ga̱jma̱a̱ gaʼngo̱o̱ a̱jkia̱a̱nʼ ma̱ngaa arasngáa májánʼ. 3 Numuu rí maʼga̱nú mbóo mbiʼi rí ikhiin ni xáʼndúún gúdxawíín kiʼsngáa rí májánʼ,* i̱ndó mbuyáʼ muni̱ rí nanigu̱u̱nʼ ikhiin, mbuñiínʼ mbaʼin bi̱ nusngáa bi̱ muthún rí nandún mudxuun. 4 Muniña̱a̱nʼ rudxawíín rí gajkhun ga̱jma̱a̱ muxnatiʼñamijná mudxawíín cuento rí minduwaʼ. 5 Mú ikháán atatsaʼwáminaʼ májánʼ náa xúgíʼ rí natani̱, gaʼnga̱a̱ʼ matraʼníí ga̱ʼkhu̱, aratáraʼa má xúʼko̱ ajngáa rí májánʼ ga̱jma̱a̱ atanimbáníí kájxi̱ ñajuunʼ Dios.

6 Numuu rí xtáá má ragadírámúnʼ xóo vino náa tsigijñaʼ, ga̱jma̱a̱ inu má maguma kríñu̱u̱nʼ. 7 Nixmínaʼ májánʼ, niga̱yúʼ asndu náa má niʼngo̱ʼ, nigúʼdoo má xúʼko̱ fe. 8 Asndu xúgi̱ rígá má rí ikhúúnʼ mada̱a̱ʼla,* rígi̱ nindxu̱u̱ dí mundrigúu bi̱ míjíinʼ, rí Tátá bi̱ na̱nda̱ʼa̱a̱ cuenta xó má kaʼyoo maxnáaʼ rí kaʼyoʼ mbiʼi rúʼko̱, raʼkháa i̱ndó ikhúúnʼ, ma̱ngaa xúgíinʼ bi̱ ra̱ʼkhá tháán niguáʼthi̱i̱n masngájmaminaʼ.

9 Atani̱ mbá tsiakii mu mi̱dxa̱ʼ nacha̱ gátayoʼ. 10 Numuu rí Demas, bi̱ niniñuʼ numuu dí ninigu̱u̱ʼ dí rígá náa numbaaʼ rígi̱* ni̱jkha̱ náa Tesalónica, Crescente ni̱jkha̱ náa Galacia, ga̱jma̱a̱ Tito ni̱jkha̱ náa Dalmacia. 11 I̱ndó Lucas xtáá ga̱jmu̱ʼ. Ayi̱ jcháa Marcos numuu rí ikhaa mambáyuʼ náa ñajuunʼ Dios. 12 Tíquico nikuʼmáa ni̱jkha̱ náa Éfeso. 13 Índo̱ gídxáʼ ayédxaʼ xtíin rí naguʼwúnʼ índo̱ naʼni migúwán, dí niniʼñúuʼ náa Troas náa goʼwóo Carpo, ma̱ngaa adédxaʼ rollos mú itháan dí xtá* mu maniraʼmáʼ ikhí.

14 Alejandro bi̱ nañejuunʼ cobre niʼniuʼ wéñuuʼ dí ra̱májánʼ, Jeobá* má gáʼyoo rí gáʼniuu. 15 Tsumáá gátani̱ ga̱jma̱a̱ʼ mangáán numuu rí ikhaa tándoo gáʼyoo mbá kayuuʼ ajngáa rí niʼtáráʼaʼlu.

16 Náa timbá miʼtsú rí nimbáyuminaʼ náa inún xa̱bu̱ ñajunʼ, nimbáa na̱nguá nimbáyuʼ, xúgíinʼ niniñuʼ, magúʼthu̱u̱n rí xáxtandi̱ʼi̱i̱n cuenta ga̱jma̱a̱ numuu rúʼko̱. 17 Mú, Tátá nixtáa má xúʼko̱ ga̱jma̱á ni̱ndxu̱ʼ ma̱ngaa nixnúʼ tsiakii, mu ga̱jma̱a̱ numuʼ ikhúúnʼ majuiʼtáruʼún xúgíinʼ xa̱bu̱ ajngáa rí májánʼ ga̱jma̱a̱ niguma kríñunʼ náa rawuunʼ león. 18 Tátá má gáʼni kríñunʼ náa xúgíʼ dí ra̱májánʼ ga̱jma̱a̱ maʼni kríñunʼ mu maxtáá náa maʼtáñajunʼ mekhuíí. Náa ikhaa gáʼga gamajkhu asndu kámuu mbiʼi. Xúʼko̱ gáʼni.*

19 Aratháán rí narajxi̱i̱ Prisca ga̱jma̱a̱ Áquila ma̱ngaa bi̱ kúwá náa goʼwóo Onesíforo.

20 Erasto niguanúu náa Corinto ga̱jma̱a̱ Trófimo niniʼñúuʼ náa Mileto numuu rí naʼniuu nandii. 21 Atani̱ mbá tsiakii mu midxa̱ʼnú nákha xóó tséʼni migúwán.

Narajxi̱ín Eubulo ma̱ngaa Pudente, Lino, Claudia ga̱jma̱a̱ xúgíinʼ a̱ngiu̱lú.

22 Gaxtáa Tátá ga̱jma̱á nindxa̱a̱ʼ numuu rí natasngájma dí natani̱ rí májánʼ. Rí májánʼ wéñuuʼ a̱jkiu̱u̱n garigá má xúʼko̱ náa ikháanʼla.