Rí na̱jkha̱ inún gálatas

3 Gálatas bi̱ tsíndxa̱ʼwa̱a̱ májánʼ e̱dxa̱laʼ, tsáá niʼni nduwáanʼla ikháanʼ rí asndu nijuiʼsngála májánʼ xóo nidujmaa Jesucristo náa ixi̱ rá. 2 I̱ndó nandoʼ marajxala* rígi̱: Lá ikháanʼla nindrígu espíritu santo* numuu rí nunimbánííla xtángoo o ga̱jma̱a̱ numuu fe rí niguaʼdáála náa nidxawíínla ráʼ. 3 Dí phú gajkhun rí tséndxa̱ʼwa̱a̱ májánʼ e̱dxa̱laʼ ráʼ. Nda̱wa̱á rí nigíʼdi̱i̱la nijkua náa nixnála ikha espíritu santo, mú rí xúgi̱ nakumalaʼ ku̱ya̱a̱ ikha ndrígu̱ún xa̱bu̱ú ráʼ. 4 Lá ninindxu̱u̱ ndíí rí nimíniiʼla wéñuuʼ ráʼ. Ikhúúnʼ nda̱yo̱o̱ rí na̱nguá ninindxu̱u̱ ndíí. 5 Bi̱ naxnála espíritu santo ga̱jma̱a̱ bi̱ naʼni milagros náa ikháanʼla, lá naʼni ga̱jma̱a̱ numuu rí nunimbánííla xtángoo o ga̱jma̱a̱ numuu rí guaʼdáála fe náa rí nidxawíínla ráʼ. 6 Rúʼko̱ rí nigíʼnuu Abrahán: “Nigiʼdoo fe náa Jeobá* ga̱jma̱a̱ nijmaʼniiʼ rí nindxu̱u̱ mbáa xa̱bu̱ jmbii”.

7 Ikháanʼ má ndu̱ya̱a̱la, bi̱ naguáʼdáá fe ni̱ndxu̱ún e̱ji̱i̱n Abrahán. 8 Náa mbá rí Kiʼniraʼmáʼ, Dios wapháá má niʼthí rí xa̱bu̱ numbaaʼ maguánú mani̱ndxu̱ún jmbiin ga̱jma̱a̱ numuu fe ndrígu̱ún, wapháá má niʼthúu̱n Abrahán ajngáa rí májánʼ rígi̱: “Ga̱jma̱a̱ numaaʼ ikháán maguma tsajkurámiinʼ xúgíinʼ xa̱bu̱ xuajen”. 9 Ikha jngóo, bi̱ naguáʼdáá fe naguma tsajkurámiinʼ mbóó gajmiún Abrahán, bi̱ nigiʼdoo fe.

10 Xúgíinʼ bi̱ nakumu̱ún kuyáá rí ndayóoʼ munimbáníí xtángoo nijuiʼtá tsríguíin, numuu rí xúʼko̱ kiʼnirámáʼ: “Gajuiʼthá tsríguíi bi̱ tségíʼ maʼnimbánuu xúgíʼ rí naʼthí náa rollo ndrígóo Xtángoo”. 11 Nakujmaa rí nimbáa tséjmaʼniiʼ rí nindxu̱u̱ jmbii náa Dios numuu rí naʼnimbánuu xtángoo, numuu rí xóo kiʼnirámáʼ “xa̱bu̱ jmbii maxtáa ga̱jma̱a̱ numuu fe ndrígóo”. 12 Náa Xtángoo tsénda̱ʼa̱ rí mbáa xa̱bu̱ magiʼdoo fe, numuu rí kiʼnirámáʼ “xa̱bu̱ bi̱ naʼni rígi̱ maxtáa numuu rí naʼnimbánuu”. 13 Cristo bi̱ niʼtsiwáanʼlú ga̱jma̱a̱ niʼni káwáánʼlú rí nijuiʼtá tsríguáanʼlú náa Xtángoo, ni̱jkha̱nú nimínuuʼ ga̱jma̱a̱ numulú, numuu rí kiʼnirámáʼ: “Kiʼthá tsríguíi asndu tsáá bi̱ gáfrajkaa náa ixi̱”. 14 Nirígá rígi̱ dí niguma tsajkurámaaʼ Abrahán mu maʼganú náa xúgíinʼ xa̱bu̱ numbaaʼ ga̱jma̱a̱ numuu Cristo Jesús, mu ga̱jma̱a̱ fe dí kuaʼdáá makhánulúʼ espíritu santo rí nijuiʼthá mundrígú.

15 A̱ngui̱nʼ, maʼgíʼ mbá xkri̱da dí narígá mámbá mbiʼi: Índo̱ rígá mbá rí nambánúún, maski má xa̱bu̱ú bi̱ naʼthí rí maʼnimbánuu, nimbáa xándoo rí maʼni jngudi̱i̱ ni maʼnirámáaʼ itháan. 16 Rí nijuiʼthá mambanúu náa Abrahán ga̱jma̱a̱ bi̱ gáʼkha̱ náa ikhaa. Tséʼthi ga̱jma̱a̱ “bi̱ maguwáʼ náa ikháán”, asndu xóo naʼthí rí mbaʼin, mú naʼthí “bi̱ ma̱ʼkha̱ náa ikháán”, naʼthí rí nindxu̱u̱ mbáwíí, ikhaa nindxu̱u̱ Cristo. 17 Ma̱ngaa na̱tala rígi̱: Xtángoo rí nijuixná 430 tsiguʼ nda̱wa̱á, na̱nguá niʼni rí xágiʼdoo numuu rí Dios nikudaminaʼ maʼni, ikha jngóo tágudi̱i̱ rí nimbánúún. 18 Á mu rí náa xtángoo na̱ʼkha̱ rí makhánulúʼ rí Dios maxnúlúʼ ní xánindxu̱u̱ náa rí ikhaa nikudaminaʼ maʼnimbánuu. Mú ga̱jma̱a̱ numuu rí májánʼ a̱jkiu̱u̱n Dios, nixnúu rígi̱ Abrahán náa mbá rí nikudaminaʼ maʼnimbánuu.

19 Ikha jngóo, náá numuu nijuixná Xtángoo rá. Nijuixná mu masngájma dí ra̱májánʼ dí nuni̱ xa̱bu̱ asndu índo̱ gáʼkha̱nú bi̱ nijuiʼthá ma̱ʼkha̱, bi̱ nijuiʼthá ga̱jma̱a̱ numuu náa rí nimbánúún, ga̱jma̱a̱ Dios nixnúún xtángoo ángeles ikhiin nithi náa majñu̱u̱ʼ bi̱ nayambáá náa rí nambánún.* 20 Nda̱wa̱a̱ mbáa bi̱ nayambáá náa rí nambánún índo̱ xtáa mbáwíí xa̱bu̱, ga̱jma̱a̱ Dios nindxu̱u̱ mbáwíí. 21 Lá Xtángoo naguijithu̱u̱n rí nakudaminaʼ maʼni Dios ráʼ. ¡Na̱nguá! Numuu rí á mu nijuixná mbá xtángoo rí maʼni mu makuwáánʼ, ga̱jma̱a̱ numuu xtángoo maʼni rí manindxu̱lú mbáa xa̱bu̱ jmbii. 22 Rí Kiʼniraʼmáʼ nixnájxi̱ xúgíʼ náa aʼkhá mu maʼtáñajuunʼ, mu xúʼko̱ bi̱ nusngajma fe makánún rí nimbánúún ga̱jma̱a̱ numuu fe rí nisngajmá náa Jesucristo.

23 Nákha xóo tséʼkha̱nú fe, nikuwáanʼ náa majñu̱u̱ʼ xtángoo, rí nijgawanʼlú ga̱jma̱a̱ niʼtáñajunlú, nikuwáanʼlú ruguaʼthi̱i̱n fe dí inu má makujmaa. 24 Ikha jngóo Xtángoo ni̱jkha̱nú ninindxu̱u̱ bi̱ niñe̱wu̱nlú* ga̱jma̱a̱ nixná ikhulú asndu náa Cristo, mu xúʼko̱ majmaʼniáanʼlú rí ni̱ndxu̱lú xa̱bu̱ jmbii ga̱jma̱a̱ fe rí kuaʼdáálú. 25 Xúgi̱ rí fe ni̱ʼkha̱nú nánguá kuwáánʼ náa majñu̱u̱ʼ bi̱ nañewu̱nlú.

26 Xúgiáanʼ ikháanʼla nindxa̱la e̱ji̱i̱n Dios ga̱jma̱a̱ numuu fe rí kuaʼdáá náa Cristo Jesús. 27 Numuu rí xúgiáanʼ ikháanʼla bi̱ nijuatsuwáanʼla náa Cristo, nini̱ndxa̱la xóo Cristo.* 28 Nda̱wa̱a̱ judío ni má griego, nda̱wa̱a̱ ñumbáá ni má xa̱bu̱ bi̱ na̱nguá nindxu̱u̱ ñumbáá, nda̱wa̱a̱ xa̱biya̱ ni má a̱ʼgu̱, numuu rí xúgiáanʼ ikháanʼla nindxa̱la mbóó jnduʼ náa Cristo Jesús. 29 Á mu ikháanʼ kaʼyala náa Cristo, nindxa̱la bi̱ naguwáʼ náa Abrahán, ga̱jma̱a̱ kaʼyala mundrígúu rí Dios nikudaminaʼ maxná.