Rí niʼnirámáʼ Juan

19 Ikhú Pilato nikuʼma magún kuya̱a̱ Jesús ga̱jma̱a̱ muxpajtii. 2 Soldados nimbujxi̱ tsuwanʼ ga̱jma̱a̱ nigiwa̱nʼ náa edxu̱u̱ ma̱ngaa niguwa̱a̱nʼ mbá xtíin miʼñuu.* 3 Nixuʼmamijná ga̱jma̱a̱ nitháán: “¡Wajtsaaʼ rey ndrígu̱ún judíos!”. Ma̱ngaa nixuba̱a̱ inuu. 4 Pilato nigájnuu mbu̱júu̱ʼ ga̱jma̱a̱ niʼthún xa̱bu̱: “¡Gudxawíínla! Nagájnuʼ ka̱ya̱a̱ rexa̱a̱ xa̱bu̱ bugi̱ mu mbu̱ya̱a̱la rí ikhúúnʼ na̱nguá exkamaa nimbá aʼkhúun”. 5 Grígu tsuwanʼ edxu̱u̱ Jesús nigájnuu ga̱jma̱a̱ kagúwu̱u̱nʼ xtíin miʼñuu. Ikhú Pilato niʼthí: “¡Gu̱ya̱a̱la! ¡Gi̱i̱ xtáa xa̱bu̱!”. 6 Índo̱ ndxajkun bi̱ kuya̱ edxu̱u̱ ga̱jma̱a̱ bi̱ nutañajúúnʼ soldados ndiyáá, nindxa̱ʼwa̱: “¡Giʼdujmaa náa ixi̱! ¡Giʼdujmaa náa ixi̱!”. Ikhú Pilato niʼthún: “Aʼguala kuya̱a̱ gudujmala ikháanʼ, numuu rí ikhúúnʼ na̱nguá exkamaa nimbá aʼkhúun”. 7 Ikhú bi̱ judíos nitháán: “Ikháanʼ kuaʼdááxu mbá xtángoo, ga̱jma̱a̱ náa xtángoo rúʼko̱ naʼthí rí gíʼmaa makhañúu, numuu rí naʼthí rí nindxu̱u̱ a̱ʼdióo Dios”.

8 Índo̱ Pilato niʼdxawuun rí kúwá ruthi ikhú nimíñuu itháan, 9 ikhú nita̱ʼa̱a̱ mbu̱júu̱ʼ náa guʼwá ñajunʼ ga̱jma̱a̱ nirajxu̱u̱ Jesús: “Náá edxa̱ʼ ikháán rá.” Mú Jesús táriʼñuu nditháan. 10 Ikhú Pilato niʼthúu̱n: “Lá tsíyaaʼ gátriʼñuʼ ikhúúnʼ ráʼ. Lá tsétayáá rí ma̱ndoo matañájunʼ rí maniʼñáaʼ midxu̱u̱ʼ o rí matañájunʼ mu miʼdujmáán náa ixi̱ ráʼ.” 11 Jesús niriʼñuu: “Ikháán xándoo maratañájunʼ á mu raʼkháa ñajunʼ rígi̱ ni̱ʼkha̱ rijma̱a̱ matani̱. Ikha jngóo aʼkhá ndrígóo xa̱bu̱ bi̱ nixnájxu̱u̱n náa ikháán nindxu̱u̱ itháan mba̱a̱”.

12 Ga̱jma̱a̱ numuu rígi̱, Pilato ndiyáʼ xóo maniñuuʼ maʼga̱a̱. Mú bi̱ judíos nindxa̱ʼwa̱: “¡Á mu natatsíñááʼ maʼga̱a̱, tsémbájxaaʼ ga̱jma̱a̱ César!* ¡Numuu rí asndu tsáa bi̱ naʼniminaʼ dí nindxu̱u̱ rey tsíyoo gáʼyoo César!”. 13 Índo̱ niʼdxawuun ajngáa rígi̱ Pilato, niríya̱a̱ʼ rexa̱a̱ Jesús ga̱jma̱a̱ ikhaa nigi̱ʼi̱ náa xíliu̱u̱ guʼwá ñajunʼ, náa katriga̱ itsí, náa ajngáa hebreo nagumbiʼyuu Gábbatha. 14 Mbiʼi rúʼko̱ nuniratáá mu marigá Pascua, naʼni xóo mbá las 12 rí wakhaʼ. Ga̱jma̱a̱ niʼthún xa̱bu̱ judíos: “¡Gu̱ya̱a̱la rey ndrígála!”. 15 Mú ikhiin nindxa̱ʼwa̱: “¡Ataxíyáa! ¡Ataxíyáa! ¡Atadujmaa náa ixi̱!”. Ikhú Pilato nirajxu̱u̱n: “Nandala rí maxíyáa rey ndrígála ráʼ.” Ga̱jma̱a̱ ndxajkun bi̱ kuya̱ edxu̱u̱ nitháán: “Ikháanʼ raguáʼdaaxu i̱mba̱a̱ rey i̱ndó má César”. 16 Nda̱wa̱á, nixnájxi̱i̱ Jesús mu miʼdujmaa náa ixi̱.

Ga̱jma̱a̱ ikhiin nindriguíi Jesús. 17 Kagu̱ ixi̱* náa makhañúu, ni̱jkha̱ náa mbaaʼ rí mbiʼyuu Itsu̱ edxu̱u̱ wajinʼ, rí náa ajngáa hebreo nagumbiʼyuu Gólgota. 18 Ikhí nidujmaa náa ixi̱ gajmíi̱n a̱jmi̱i̱n xa̱bu̱, mámbáa nirajkaa náa mámbá níjñúu, ga̱jma̱a̱ Jesús nirajkaa ta̱pha̱. 19 Ma̱ngaa, Pilato niʼnirámáʼ náa mbá xíʼtóo xajpa ga̱jma̱a̱ nigíʼma náa ixi̱ rí nijuiʼdujmaa, rí naʼthí: “Jesús bi̱ na̱ʼkha̱ náa Nazaret, rey ndrígu̱ún judíos”. 20 Mbaʼin judíos niraxnuu rígi̱ numuu rí náa nijuiʼdujmaa Jesús ninindxu̱u̱ náa mijngii xuajen. Ma̱ngaa ajngáa dí nigumaraʼmáʼ ninindxu̱u̱ ajngáa hebreo, latín ga̱jma̱a̱ griego. 21 Mú, ndxajkun bi̱ kuya̱ edxu̱u̱ náa xa̱bu̱ judíos, nitháán Pilato: “Xátanirámáʼ ‹rey ndrígu̱ún judíos›, numuu rí ikhaa niʼthí ‹ni̱ndxu̱ʼ rey ndrígu̱ún judíos›”. 22 Pilato niriʼñúún: “Rí niniraʼmáʼ, kiʼniraʼmáʼ má”.

23 Nda̱wa̱á rí nidujmaa náa ixi̱ Jesús, ikhú soldados ndiya̱ xtíñuu ga̱jma̱a̱ niruiʼta̱a̱ a̱jkhu̱ xuíʼtóo mámbá ndiyáa mámbáa, ma̱ngaa ndiya̱ xtíñuu rí kagíʼ awúu̱n. Mú xtíin rígi̱ kañiiʼ nindxu̱u̱, na̱nguá gíʼdoo xmiúu. 24 Ikha jngóo nitamijná: “Xúrujtulu. Guríyáʼ suerte* mu mbuʼyáá tsáa gáguanúu ga̱jma̱a̱”. Nirígá rígi̱ mu mambanúu rí Kiʼnirámáʼ náa naʼthí: “Niruiʼtamijnáá xtíñúʼ, ga̱jma̱a̱ numuu xtíñúʼ niri̱ya̱ʼ suerte”. Ga̱jma̱a̱ rígi̱ rí nini̱ soldados.

25 Náa mijngii ixi̱ náa nijuiʼdujmaa Jesús ikhí wíji̱ ru̱dúu̱ ga̱jma̱a̱ ndxájuu ru̱dúu̱; ma̱ngaa María a̱ʼgiu̱u̱ Clopas ga̱jma̱a̱ María Magdalena. 26 Índo̱ Jesús ndiʼyoo dí ru̱dúu̱ wíji̱ mijngii ikhí ga̱jma̱a̱ xa̱bi̱i̱ bi̱ itháán nandoo kaʼyoo, ikhú niʼthúu̱n ru̱dúu̱: “¡Ru̱dúʼ, a̱ʼkhu̱ wíji̱ a̱ʼdiáaʼ!”. 27 Nda̱wa̱á niʼthúu̱n xa̱bi̱i̱: “¡A̱ʼkhu̱ wíji̱ rudáaʼ!”. Ga̱jma̱a̱ mbiʼi má rúʼko̱ xa̱bi̱i̱ ni̱jkha̱ kayáa ru̱dúu̱ náa goʼwóo mu mañewu̱u̱n.

28 Nda̱wa̱á dí nirígá rígi̱, Jesús ndiʼyoo má rí nimbánuu má xúgíʼ, ikha jngóo niʼthí: “Nakándawuʼ”. Xúʼko̱ nimbánuu dí Kiʼnirámáʼ. 29 Ga̱jma̱a̱ ikhí rígá mbá rayaʼ náa ga̱jnu̱ʼ vino migaʼ, ikhú nirmajan mugu̱ ga̱jma̱a̱ vino rí migaʼ nirigú náa mbá inuu ixi̱,* ikhú nixuʼdujma náa rawuunʼ. 30 Índo̱ Jesús niʼga̱a̱n vino rí migaʼ, ikhú niʼthí: “¡Nimbánuu má rá!”. Nda̱wa̱á nikruígúu edxu̱u̱ ga̱jma̱a̱ ikhú nigatíyaaʼ xu̱u̱ʼ.*

31 Numuu rí inu mbayáa mbiʼi sábado* ga̱jma̱a̱ tsíñún rí xa̱bu̱ majngríguíin náa ixi̱ rí nijuiʼdujmiin mbiʼi sábado, (numuu rí mbiʼi rúʼko̱ nindxu̱u̱ mba̱a̱), ikha jngóo bi̱ judíos ninda̱ʼa̱a̱ Pilato rí murmi̱ga̱ʼ xtiñúún xa̱bu̱ bi̱ jngríguíin mu xúʼko̱ ma̱ndoo mudriguíin nacha̱. 32 Ikha jngóo, soldados nigún gurmi̱ga̱ʼ xtiñúún xa̱bu̱ bi̱ jngríguíin náa níjñúu. 33 Mú índo̱ ndiyáá rí Jesús nikháñuu má, ikha jngóo túxmi̱ga̱ʼ má xtiyuu. 34 Mú mbáa soldado nixkrua̱ʼa̱ lanza náa itsu̱ tso̱xto̱o̱, ikhú ni̱ʼkha̱ eʼdi ga̱jma̱a̱ iyaʼ. 35 Bi̱ ndiʼyoo niʼthí rígi̱, ga̱jma̱a̱ rí niʼthí nindxu̱u̱ gajkhun, ikhaa má ndaʼyoo rí niʼthí nindxu̱u̱ gajkhun, mu xúʼko̱ ikháanʼ munimbala. 36 Nirígá rígi̱ mu mambanúu rí Kiʼnirámáʼ, náa naʼthí: “Xurmigaʼ nimbá itsu̱u̱”. 37 Ma̱ngaa rígá imbo̱o̱ náa Kiʼnirámáʼ náa naʼthí: “Mbuyáá bi̱ nifraʼa ngayii”.

38 Nda̱wa̱á dí nirígá rígi̱, José bi̱ na̱ʼkha̱ náa Arimatea (bi̱ ma̱ngaa nindxu̱u̱ xa̱bi̱i̱ Jesús, mú tásngájmaminaʼ pa̱jnu rí nindxu̱u̱ numuu rí namíñuu kaʼñún judíos) nirajxu̱u̱ Pilato á mu ma̱ndoo maʼga̱a̱ ka̱yo̱o̱ xuyuuʼ Jesús, ga̱jma̱a̱ Pilato niʼthúu̱n rí ma̱ndoo. Ikha jngóo ni̱ʼkha̱ ga̱jma̱a̱ ni̱jkha̱a̱ kayáa. 39 Ma̱ngaa ni̱ʼkha̱nú Nicodemo, xa̱bu̱ bi̱ ni̱jkha̱ mbruʼun gáʼyoo Jesús timbá aʼphu̱, ni̱ʼkha̱ kayóo mirra rí kandawo̱o̱ʼ áloes* rí naʼni mbá 30* kilo rí ki̱wu̱n. 40 Ikhú nirigúu xuyuuʼ Jesús ga̱jma̱a̱ nimbraʼaa mbá xtíin dí lino ga̱jma̱a̱ nixtajmaa rí ndataun, xó má naguʼwún nuni̱ judíos índo̱ nudíin bi̱ nikháñún. 41 Ga̱jma̱a̱ náa mijngii nijuiʼdujmaa ikhí rígá mbá huerta, ga̱jma̱a̱ náa huerta rúʼko̱ rígá mbá iñá wajinʼ rí nuxi̱ʼ náa nimbáa tájnguáan. 42 Numuu rí mbiʼi rúʼko̱ nindxu̱u̱ mbiʼi rí nuniratamijná bi̱ judíos mu mbayáa sábado, ga̱jma̱a̱ iñá wajinʼ rígá mijngii, ikha jngóo ikhí nidi̱i̱ Jesús.