Timbá libro rí niʼnirámáʼ Samuel

16 Nda̱wa̱á Jeobá niʼthúu̱n Samuel: “Ndíjkha dí kaʼníí najmáaʼ má xúʼko̱ ga̱jma̱a̱ numuu Saúl rá. Lá tsétayáá dí ikhúún má nánguá nindoʼ dí mani̱ndxu̱u̱ rey náa Israel xáʼ. Atani̱ majnííʼ aceite náa chi̱ji̱ʼ ga̱jma̱a̱ arajthun kamba̱a̱ mi̱dxu̱ʼ. Nandoʼ dí mi̱dxu̱ʼ náa goʼwóo Jesé xa̱bu̱ Belén, numuu dí ikhúún má niraʼwi̱i̱ mbáa a̱ʼdióo mu mani̱ndxu̱u̱ rey”. 2 Mú Samuel niʼthúu̱n: “Xú káʼnii lá gáʼgá rá. Á mu dí Saúl naʼdxawuun maxíñu̱u̱n”. Jeobá niriʼñuu: “Ayuʼ jcháa mbáa a̱ʼdá xédí ga̱jma̱a̱ arathún xa̱bu̱: ‹Na̱ʼkhá mu maxnajxí mbá tsigijñaʼ gamajkhu náa inuu Jeobá›. 3 Aratháán Jesé maʼga náa maraxnaxí tsigijñaʼ, ga̱jma̱a̱ ikhúún gátha̱a̱nʼ ndiéjunʼ dí gíʼmaa matani̱. Gíʼmaa matraʼwi̱i̱ bi̱ ikhúún gátha̱a̱nʼ”.

4 Samuel niʼni xó má niʼthúu̱n Jeobá. Índo̱ ni̱jkha̱nú náa Belén ga̱jma̱a̱ xa̱bu̱ bi̱ kuya̱ edxu̱u̱ náa xuajin ndiyáá, ra̱ʼkhá tháán nimíñúún dí asndu naguíʼiin ga̱jma̱a̱ nirajxi̱i̱: “Ndiéjunʼ lá erígá rá.” 5 Ikhaa niriʼñúún: “Nda̱a̱ má dí rígá. Na̱ʼkhá mu maxnajxí mbá tsigijñaʼ gamajkhu náa inuu Jeobá. Gu̱ni̱ kaʼwumijnáala ga̱jma̱a̱ gaguwaʼ ga̱jma̱á nindxu̱ʼ náa maxnajxí tsigijñaʼ”. Nda̱wa̱á dí niʼni kaʼwi̱i̱ Jesé gajmíi̱n e̱ji̱i̱n, nigímbíin náa maxnájxi̱ tsigijñaʼ. 6 Índo̱ niguáʼnú, Samuel ndiʼyoo Eliab, ikhú niʼthí: “Phú gajkhun dí bigi̱* nindxu̱u̱ bi̱ Jeobá niraʼwíi”. 7 Mú Jeobá niʼthúu̱n Samuel: “Xáta̱ya̱a̱ dí mbájníí ni xóo rí mba̱yi̱i̱ʼ, numuu dí táraʼwi̱i̱ ikhaa. Dios tséʼyoo xóo rí ndaʼyoo mbáa xa̱bu̱. Xa̱bu̱ ndaʼyoo dí kááʼ mbájníí, mú Jeobá ndaʼyoo dí gíwánʼ náa a̱jkiu̱u̱n”. 8 Ikhú Jesé nindxa̱ʼóo Abinadab ga̱jma̱a̱ ni̱jkha̱ kayáa náa inuu Samuel, mú ikhaa niʼthí: “Bigi̱ ma̱ngaa táraʼwíi Jeobá”. 9 Nda̱wa̱á Jesé ni̱jkha̱ kayáa Samá, mú Samuel niʼthí: “Bigi̱ ma̱ngaa táraʼwíi Jeobá”. 10 Xúʼko̱ kaʼnii niʼni Jesé dí ni̱jkha̱ kagui̱i̱n mbá juwiin e̱ji̱i̱n náa inuu Samuel, mú Samuel niʼthúu̱n Jesé: “Nimbáa dí bugi̱ táraʼwíi Jeobá”.

11 Nda̱wa̱á Samuel nirajxu̱u̱ Jesé: “Lá xúgíinʼ má e̱jña̱a̱ʼ bugi̱ ráʼ.” Ikhaa niriʼñuu: “Ndawa̱a̱ bi̱ itháan chíʼgíiʼ.* Xtáa rañawu̱u̱n mugu̱ náa xanáá”. Samuel niʼthúu̱n Jesé: “Atatsaʼwáá dí ma̱ʼkha̱a̱, numuu dí á mu ikhaa tséʼkha̱a̱ xándoo mutrigáánʼlú muphiʼtsu”. 12 Ikha jngóo, ikhaa nikuʼma dí magún gúyáaʼ ga̱jma̱a̱ niguwáánʼ kuya̱a̱. Nindxu̱u̱ mbáa dxámá bi̱ mitsaanʼ* iduu ga̱jma̱a̱ mitsiʼyáa. Ikhú Jeobá niʼthí: “¡Bigi̱ nindxu̱u̱! Atujxa̱a̱ʼ atraʼwíi numuu dí ikhaa mani̱ndxu̱u̱ rey”. 13 Ikha jngóo Samuel nigujthun chi̱ji̱ʼ dí ga̱jnu̱ʼ aceite ga̱jma̱a̱ nisngátrámáʼ aceite náa edxu̱u̱ David náa inún a̱ngui̱i̱n. Asndu má nákha mbiʼi rúʼko̱, espíritu santo* ndrígóo Jeobá niʼni dí magiʼdoo tsiaki̱i̱ David. Nda̱wa̱á Samuel ni̱jkha̱a̱ náa Ramá.

14 Dí xúgi̱ espíritu santo ndrígóo Jeobá nigájnáa náa Saúl ga̱jma̱a̱ mbá espíritu dí ra̱májánʼ dí na̱ʼkha̱ náa Jeobá naʼni dí mandxa̱ʼwa̱mínáʼ dí ra̱májánʼ. 15 Ga̱jma̱a̱ xa̱bi̱i̱ Saúl nitháán: “Nakujmaa dí espíritu dí na̱ʼkha̱ náa Dios naʼni dí matandxa̱ʼwa̱mínáʼ dí ra̱májánʼ. 16 Mbá péñu, tátá, atandu̱ʼu̱u̱n xa̱bia̱a̱ʼ bi̱ kúwá gi̱i̱ dí mbuyáaʼ mbáa xa̱bu̱ bi̱ najmañuu naʼdu̱u̱ májánʼ arpa. Mu xúʼko̱ mámbá índo̱ espíritu dí ra̱májánʼ dí na̱ʼkha̱ náa Dios gáʼni dí xátandxa̱ʼwa̱mínáʼ májánʼ, ikhaa maʼdu̱u̱ arpa mu xúʼko̱ maraxtaa májánʼ”. 17 Ikha jngóo Saúl niriʼñúún xa̱bi̱i̱: “Májánʼ gáʼni, guʼyáaʼ mbáa xa̱bu̱ bi̱ najmaa naʼdu̱u̱ májánʼ ga̱jma̱a̱ gaguwaʼ kuya̱a̱la, mbá péñu”.

18 Mbáa bi̱ nambáyúu niʼthúu̱n: “Natayáá ráʼ, nda̱yo̱o̱ dí Jesé xa̱bu̱ Belén gíʼdaa mbáa a̱ʼdióo bi̱ najmañuu naʼdu̱u̱ májánʼ, nindxu̱u̱ mbáa dxámá bi̱ tsémíñúu ga̱jma̱a̱ xkujiiʼ. Ma̱ngaa gíʼdoo ku̱ma̱ mu maʼthí ga̱jma̱a̱ ra̱ʼkhá tháán mitsiʼyáa, Jeobá xtáa ga̱jma̱a̱ nindxu̱u̱”. 19 Ikhú Saúl nikuʼmiin bi̱ magún kuñu̱u̱n ajngáa náa Jesé mu muthán: “Ataxúʼmaa a̱ʼdiáaʼ David, bi̱ nañewu̱u̱n mugu̱ mu ma̱ʼkha̱ náa ikhúún”. 20 Jesé nigrígu pan, mbá xtá kulámbra* náa ga̱jnu̱ʼ vino ga̱jma̱a̱ mbáa a̱ʼdá tsújtuunʼ náa tsu̱du̱u̱ búrru, nixnúu David magu gáʼga náa Saúl. 21 Ikha jngóo David ni̱jkha̱ náa xtáa Saúl ga̱jma̱a̱ nigíʼdu̱u̱ niʼni ñajuunʼ. Saúl nindoo kaʼyoo wéñuuʼ ga̱jma̱a̱ David ninindxu̱u̱ bi̱ nigu̱ escudo ndrígóo. 22 Nda̱wa̱á Saúl nikuʼma ajngáa rígi̱ náa Jesé: “Mbá péñu, atatsíñáánʼ dí David mañajunʼ má xúʼko̱ ga̱jma̱á nindxu̱ʼ, numuu dí ikhaa naʼni̱i̱ a̱jkiu̱nʼ”. 23 Mámbá índo̱ espíritu dí ra̱májánʼ dí na̱ʼkha̱ náa Dios naʼni dí mandxaʼwáminaʼ dí ra̱májánʼ Saúl, ikhú David ndayáʼ arpa ga̱jma̱a̱ naʼdu̱u̱. Saúl naʼni̱i̱ a̱jkiu̱u̱n ga̱jma̱a̱ naxtáa májánʼ, ikhú espíritu dí ra̱májánʼ nagájna̱a̱ náa ikhaa.