Raga̱jma̱ i̱yi̱i̱ʼ rí na̱jkha̱ inún Corintios

1 Ikhúúnʼ Pablo bi̱ nijuaxtíya̱a̱ʼ mu mani̱ndxu̱u̱ apóstol ndrígóo Cristo Jesús numuu rí xúʼko̱ nindoo Dios ga̱jma̱a̱ ndxájulú Timoteo nunirámáʼxu i̱yi̱i̱ʼ rígi̱ mu maʼga náa inún a̱ngiu̱lú* bi̱ nuni̱ ñajuunʼ Dios bi̱ nagimbíi̱n* náa Corinto ga̱jma̱a̱ xúgíinʼ a̱ngiu̱lú* bi̱ kúwi̱i̱n náa Acaya:

2 Garigá rí májánʼ wéñuuʼ a̱jkiu̱u̱n Dios* náa ikháanʼ ga̱jma̱a̱ rí tsímáá ndrígóo Anu̱lú Dios ma̱ngaa ndrígóo Tátá Jesucristo.

3 Gaguma mba̱a̱ Dios ga̱jma̱a̱ Anu̱u̱ Tátá ndrígúlú Jesucristo, Anu̱lú bi̱ nagáwiinʼ a̱jkiu̱u̱n kaʼyulú ga̱jma̱a̱ Dios bi̱ naʼni̱i̱ a̱jkiu̱lú náa xúgíʼ. 4 Ikhaa naʼni̱i̱ a̱jkiu̱lú náa xúgíʼ gamiéjunʼ mu xúʼko̱ ikháanʼ muʼni̱i̱ a̱jkiu̱ún bi̱ numíniiʼ dí muxnún tsiakii dí nikhánulú náa Dios. 5 Xó má numíniiʼ wéñuuʼ ga̱jma̱a̱ numuu Cristo, xúʼko̱ má nundrígú mba̱a̱ tsiakii ga̱jma̱a̱ numuu Cristo. 6 Á mu rí xúgi̱ ikháanʼxu numíniiʼ ga̱jma̱a̱ numuu gamiéjunʼ mu maʼni̱i̱ a̱jkia̱la ga̱jma̱a̱ makáwáanʼla, á mu ikháanʼ nundrígúxu rí maʼni̱i̱ a̱jkiu̱xu mu maʼni̱i̱ a̱jkia̱la mangáanʼ. Rí maʼni̱i̱ a̱jkia̱la rígi̱ gámbáyala mu maʼngala náa ikháá má gamiéjunʼ xóo ikháanʼxu. 7 Ikháanʼ naku̱mu̱xu ku̱ya̱la, numuu rí ndu̱ya̱a̱xu dí kuaʼdáála ikháá má gamiéjunʼ xó má ikháanʼxu, xúʼko̱ má mundrígú ikháá rí maʼni̱i̱ a̱jkia̱la, xó má ikháanʼxu.

8 A̱ngui̱nʼ, nanduxu mbu̱ya̱a̱la ga̱ʼkhu̱ mba̱a̱ dí niraʼnííxu náa mbayuuʼ Asia. Ra̱ʼkhá tháán nimíniiʼxu rí asndu niku̱mu̱xu dí nándáa tsiakii ndrígúxu̱ ma̱ngaa nimíñúxu rí makhañúxu. 9 Niku̱mu̱xu asndu xóo rí gítháán makhañúxu. Nirígá rígi̱ mu xáku̱mu̱xu kuyamíjna̱ ikháanʼ, maku̱mu̱xu kuya̱a̱ Dios bi̱ nakujxi̱ín* bi̱ nikháñúún. 10 Ikhaa niʼni káwáanʼxu náa dí inu makhañúxu ga̱jma̱a̱ maʼni káwáanʼxu mbu̱júu̱ʼ. Naku̱mu̱xu kuya̱a̱ dí ikhaa má gáʼni káwáanʼxu má xúʼko̱. 11 Ikháanʼla mangáanʼ ma̱ndoo mumbáyuxu rí mutajkáan ga̱jma̱á numuxu. Numuu rí nixtambáyuxu dí nitajkáan* mbaʼin, xúʼko̱ ikhiin ma̱ndoo muxna̱a̱ núma̱aʼ ga̱jma̱á numuxu.

12 Nadxuxu ga̱jma̱a̱ numuu rígi̱: Rí ku̱ma̱ ndrígúxu̱ na̱nguá eʼni gawúnxu náa numbaaʼ, mú itháan náa ikháanʼla, nini̱xu dí mikaʼwu ga̱jma̱a̱ dí gajkhun dí na̱ʼkha̱ náa Dios, nusngajmáxu rí kuáʼdáá dí májánʼ wéñuuʼ a̱jkiu̱u̱n Dios maski ajndu rakáʼyuxu, raʼkháa xóo ekumu̱ún xa̱bu̱. 13 Numuu dí na̱nguá kúwáanʼ runiraʼmáʼxu nimbá dí ikháanʼla xájmañala gúraxnuu* ga̱jma̱a̱ rí ma’ni gakhi̱i̱ mikruaʼala. Ma̱ngaa nda̱yo̱o̱ májánʼ dí mikruaʼala káxi̱ rígi̱,* 14 xó má ni̱jkua̱nú nikrua̱ʼa̱la dí ikháanʼla nadxala ga̱jma̱á numuxu, xúʼko̱ má ikháanʼxu maʼdxuxu ga̱jma̱á numala náa mbiʼi dí gáʼkha̱a̱ Jesús, Tátá ndrígúlú.

15 Ga̱jma̱a̱ numuu rígi̱ rí nindoʼ maʼgá gáyala gináanʼ ikháanʼ, mu xúʼko̱ maʼdxala rí maʼni raga̱jma̱ aʼphu̱.* 16 Nindxa̱ʼwa̱mínáʼ rí maʼgá gáyala índo̱ gáʼgá kamba̱a̱ dí na̱jkha̱ náa Macedonia ga̱jma̱a̱ índo̱ gátanga̱án Macedonia, mu xúʼko̱ ikháanʼla muʼgua ga̱jma̱á ni̱ndxu̱ʼ mbá chíʼmbaʼ kamba̱a̱ rí na̱jkha̱ náa Judea. 17 Índo̱ niraʼwíí ma̱ni̱ rígi̱ táni mbaʼ maníí. Lá nandxa̱ʼwa̱mínáʼ i̱ndó ga̱jma̱a̱ numuʼ índo̱ naríyaʼ awan, ikha jngóo na̱tha̱, “xúʼko̱” ga̱jma̱a̱ nda̱wa̱á “na̱nguá” ráʼ. 18 Xó má ma̱ndoo maku̱mu̱lú kuʼyáá Dios, xúʼko̱ má mangáanʼxu tútala dí xúʼko̱ mú nda̱wa̱á na̱nguá. 19 Silvano,* Timoteo ga̱jma̱a̱ ikhúúnʼ, nitaráʼala ga̱jma̱a̱ numuu Jesucristo bi̱ nindxu̱u̱ A̱ʼdióo Dios. Ikhaa na̱nguá niʼthí rí xúʼko̱ ga̱jma̱a̱ nda̱wa̱á na̱nguá. Dí naʼthí xúʼko̱, xúʼko̱ má nindxu̱u̱. 20 Numuu rí tséʼniuu nguáthá dí nakudaminaʼ maʼnimbánuu Dios, rígi̱ ni̱jkha̱nú ninindxu̱u̱ xúʼko̱ ga̱jma̱a̱ numuu ikhaa. Ikha jngóo, numuu ikhaa nuʼthá xúʼko̱ gáʼni* náa Dios, xúʼko̱ ikhaa naguma mba̱a̱ ga̱jma̱a̱ numulú ikháanʼ. 21 Mú Dios bi̱ niraʼwáanʼlu naʼthí rí ikháanʼla ga̱jma̱a̱ ikháanʼxu kaʼyulú náa Cristo. 22 Ikhaa ma̱ngaa nigíʼma sello ndrígóo náa ikháanʼlu ga̱jma̱a̱ nigíwánʼ espíritu náa awúu̱n a̱jkiu̱lú xóo mbá tsinaʼ dí marigá nda̱wa̱á.*

23 Na̱tala rí ndaʼyoo Dios rí xóó tséjkhá náa Corinto mu xákuwáanʼla ngíná. 24 Na̱nguá e̱tha̱ rí ikháanʼxu etañajuínʼxu fe ndrígála, numuu rí ikháanʼla naguajún jmbu ga̱jma̱a̱ numuu fe ndrígála, ikháanʼ ni̱ndxu̱xu̱ʼ bi̱ numbáyala mu xúʼko̱ makuwáanʼla tsímáá.