Rí niʼnirámáʼ Juan

10 “Na̱tala gajkhun rí bi̱ tséto̱ʼo̱o̱ náa xkrugoo gúlu̱ún mugu̱ ga̱jma̱a̱ ndayáʼ i̱mba̱ ni̱ʼkhá náa mato̱ʼo̱o̱, ikhaa buʼko̱ nindxu̱u̱ kuʼwáʼ. 2 Mú bi̱ nato̱ʼo̱o̱ náa xkrugua ikhaa buʼko̱ nindxu̱u̱ báxtúu ndrígu̱ún mugu̱. 3 Bi̱ nañewu̱u̱n xkrugua nambáʼtoo mato̱ʼo̱o̱ báxtúu ikhú mugu̱ nudxawíín aʼwóo. Ikhaa nandxaʼwún ga̱jma̱a̱ mbiʼñún ikhú naguwíin rexa̱a̱. 4 Nda̱wa̱á rí naguwíin xúgíinʼ mugiu̱u̱, ikhú na̱jkha̱ ginii. Ga̱jma̱a̱ mugiu̱u̱ nagún kidxuuʼ numuu rí nuniʼnuuʼ aʼwóo. 5 Nditháan xágún náa kidxuuʼ mbáa bi̱ tséniʼniiʼ, ikhiin matsínguunʼ náa ikhaa numuu rí tséniʼnuuʼ aʼwóo”. 6 Jesús nijmuu xkri̱da rígi̱ mu maʼthúún, mú ikhiin na̱nguá nikru̱ʼu̱u̱n ndiéjunʼ nindoo gáʼthí.

7 Ikha jngóo mbu̱júu̱ʼ Jesús niʼthún: “Na̱tala gajkhun rí ikhúúnʼ ni̱ndxu̱ʼ xkrugua náa mata̱ʼa̱án mugu̱. 8 Xúgíinʼ bi̱ niguwáʼ rágúunʼ rajmún mbiʼyuʼ mu mu̱ni̱ nduwaʼ ikhiin buʼko̱ ni̱ndxu̱ún kuʼwáʼ, mú mugu̱ na̱nguá nidxawíín aʼwún. 9 Ikhúúnʼ ni̱ndxu̱ʼ xkrugua; bi̱ gáto̱ʼo̱o̱ náa ikhúúnʼ makríyaaʼ; ma̱ndoo mato̱ʼo̱o̱ ga̱jma̱a̱ magajnáa, ma̱ngaa maxkamaa rajxa̱. 10 Kuʼwáʼ i̱ndó na̱ʼkha̱ gáʼni kúwáʼ, ga̱jma̱a̱ naʼni gámbóo. Mú ikhúúnʼ ni̱ʼkhá mu maxnala rí makuwáanʼ kámuu mbiʼi. 11 Ikhúúnʼ ni̱ndxu̱ʼ báxtúu májáanʼ, mbáa báxtúu májáanʼ naxnájximinaʼ makhañúu ga̱jma̱a̱ numún mugiu̱u̱. 12 Bi̱ nañajunʼ, bi̱ raʼkháa mugiu̱u̱ ni má na̱nguá nindxu̱u̱ báxtúu, índo̱ ndaʼyoo na̱ʼkha̱ lobo,* ikhú naniñúúnʼ mugu̱ ga̱jma̱a̱ nagáyúu. Ikhú lobo naguguiin ga̱jma̱a̱ naxkadíin mugu̱. 13 Ñumbáá bugi̱ nagáyúu numuu rí tsixmiéjuunʼ kaʼñún mugu̱, i̱ndó má naxmiéjuunʼ mada̱ʼ mbújkha̱a̱. 14 Ikhúúnʼ ni̱ndxu̱ʼ báxtúu májáanʼ. Naniʼnúunʼ mugiu̱ʼ ga̱jma̱a̱ mugiu̱ʼ nuniʼnúnʼ, 15 Anu̱ʼ naninúnʼ ikhúúnʼ ga̱jma̱a̱ ikhúúnʼ naniʼníiʼ Anu̱ʼ, ma̱ngaa naxnajxíminaʼ makhañúʼ ga̱jma̱a̱ numún mugiu̱ʼ.

16 Ga̱jma̱a̱ gúʼdiin eʼwíinʼ mugu̱ bi̱ na̱nguá kúwá náa gúláa rígi̱; ikhiin mangiin ma̱ʼkhá kagu̱u̱n ga̱jma̱a̱ mudxawíín aʼwóʼ. Muwi̱i̱n mugu̱ ga̱jma̱a̱ imbawíí báxtúu gáʼni. 17 Anu̱ʼ nandoo kaʼyoʼ ga̱jma̱a̱ numuu rígi̱: Numuu rí ikhúúnʼ naxnajxí vida ndrígóʼ ga̱jma̱a̱ nda̱wa̱á magruígúu mbu̱júu̱ʼ. 18 Nimbáa tsérígú káyúʼ numuu rí ikhúúnʼ má eyoʼ maxnaxíminaʼ. Ma̱ndoo maxnajxí ga̱jma̱a̱ ma̱ndoo magruígúu mbu̱júu̱ʼ. Ikhaa rúʼko̱ rí nikuʼmún ma̱ni̱ Anu̱ʼ”.

19 Ga̱jma̱a̱ numuu ajngáa rígi̱, judíos niruiʼtamíjna̱ mbu̱júu̱ʼ. 20 Mbaʼin rí ikhiin nithi: “Gíʼdaa xa̱bu̱ wéñiiʼ ga̱jma̱a̱ nakágu̱u̱nʼ. Náá numuu rí xóó nudxawíín rí naʼthí xá.” 21 Eʼwíinʼ nithi: “Xándoo gáʼthí ajngáa rígi̱ mbáa xa̱bu̱ bi̱ gíʼdaa giñán xkawi̱i̱ʼ.* Lá ragájkhun rí mbáa xa̱bu̱ wéñiiʼ xándoo mambáʼta̱a̱ idún xa̱bu̱ bi̱ tsíkruigu̱u̱n ráʼ.”

22 Gu̱nʼ rí naʼni migúwán mbiʼi rúʼko̱ nuni̱ Ndxo̱o̱ guʼwá rí nduyamajkuíí Dios* náa xuajen Jerusalén, 23 ga̱jma̱a̱ Jesús xtáa náa guʼwá rí nduyamajkuíí Dios, xtáa ra̱jkha̱ náa kamba̱a̱ rí mbiʼyuu corredor ndrígóo Salomón. 24 Ikhú judíos niruguama̱ʼa̱a̱n mbájndi ga̱jma̱a̱ nitháán: “Asndu nguáná gáratuxu rí gajkhun. Á mu ikháán nindxa̱a̱ʼ Cristo, aratúxu mbájmbu”. 25 Ikhú Jesús niriʼñúún: “Ni̱tha̱la má, mú ikháanʼ tsénimbala. Ñajunʼ rí na̱ni̱ ga̱jma̱a̱ mbiʼyuu Anu̱ʼ nasngájma dí ikhúúnʼ ni̱ndxu̱ʼ. 26 Mú ikháanʼ tsénimbala numuu dí rañájuanla mugiu̱ʼ. 27 Mugiu̱ʼ nudxawíín aʼwóʼ, ikhúúnʼ naniʼnúunʼ ga̱jma̱a̱ ikhiin naguwáʼ ki̱dxu̱ʼ. 28 Ikhúúnʼ ma̱ni̱ rí makuwá kámuu mbiʼi; nimbá miʼtsú xámbíin ga̱jma̱a̱ nimbáa xáguwíin káʼyúʼ náa ñawúnʼ. 29 Mugu̱ bi̱ nixniúʼ Anu̱ʼ guáʼdáá itháán numún ki xóo i̱ʼwáʼ, ga̱jma̱a̱ nimbáa xándoo maguwíin mugu̱ náa ñawúunʼ Anu̱ʼ. 30 Ikhúúnʼ ga̱jmu̱ʼ Anu̱ʼ mbóó ni̱ndxu̱xu̱ʼ”.*

31 Judíos nirajxi̱ mbu̱júu̱ʼ itsí mu muxnáá. 32 Ikhú Jesús niʼthún: “Mbaʼa ñajunʼ májánʼ nisngajmála dí na̱ʼkha̱ náa Anu̱ʼ. Náá biʼyaa dí xúgíʼ rúʼko̱ nandala muxnu̱ʼ ga̱jma̱a̱ itsí rá”. 33 Judíos niriʼñáán: “Xúxna̱ʼxu ga̱jma̱a̱ itsí numuu rí nitani̱ mbá ñajunʼ májánʼ, muxna̱ʼxu numuu dí ikháán naratá wéñiiʼ Dios, numuu rí ikháán maski ajndu nindxa̱a̱ʼ mbáa xa̱bu̱ numbaaʼ, nataniminaʼ rí nindxa̱a̱ʼ xóo mbáa dios”. 34 Jesús niriʼñúún: “Lá raʼkháa kiʼnirámáʼ náa Xtángoo ndrígála ‹ikhúúnʼ nitha̱: “Ikháanʼ ñajuanla dioses ráʼ.”› 35 Á mu ikhaa nixná mbiʼñún dioses xa̱bu̱ bi̱ nindrigú ajngá rawuunʼ (ga̱jma̱a̱ náa Kiʼnirámáʼ xándoo magumagudi̱i̱), 36 ikhúúnʼ, dí Anu̱ʼ niʼni kaʼwu̱u̱n ga̱jma̱a̱ nikuʼmún náa numbaaʼ, nuthu̱nʼ dí ‹na̱tha̱ wéñuuʼ› Dios numuu rí na̱tha̱ dí ‹ni̱ndxu̱ʼ A̱ʼdióo Dios› ráʼ. 37 Á mu na̱nguá eni̱ ñajuunʼ Anu̱ʼ, xúnimbala ku̱yo̱ʼ. 38 Á mu na̱ni̱ maski ajndu xúnimbala ku̱yo̱ʼ ikhúúnʼ, gunimbala ga̱jma̱a̱ ñajunʼ dí na̱ni̱. Xúʼko̱ muguánú mbuya̱a̱ rí Anu̱ʼ xtáa mbóó ga̱jma̱á ni̱ndxu̱ʼ ga̱jma̱a̱ ikhúúnʼ xtáá mbóó ga̱jmu̱ʼ ikhaa”. 39 Ga̱jma̱a̱ nigíʼ murtuwiin mbu̱júu̱ʼ, mú ikhaa niʼni kríyaminaʼ.

40 Ni̱jkha̱ mbu̱júu̱ʼ náa i̱mba̱ ridoo mañu Jordán, náa Juan nikumíinʼ iyááʼ xa̱bu̱ nákha ginii, ga̱jma̱a̱ ikhí niguanúu. 41 Mbaʼin xa̱bu̱ nigún gúyáá ga̱jma̱a̱ nithi: “Juan táʼni nimbá milagro, mú xúgíʼ rí niʼthí Juan ga̱jma̱a̱ numuu xa̱bu̱ bugi̱ nindxu̱u̱ gajkhun”. 42 Ikhú mbaʼin xa̱bu̱ niguáʼdáá fe náa Jesús.