Timbá libro ndrígu̱ún Reyes

16 Jehú a̱ʼdióo Hananí nigruigú ajngóo Jeobá rígi̱ dí magíʼnuu Baasá: 2 “Nikujxíín náa yujndaʼ ga̱jma̱a̱ niʼgíinʼ dí mbi̱ya̱ edxu̱u̱ náa xuajñunʼ, mú nitani̱ xó má niʼni Jeroboán ga̱jma̱a̱ nitani̱ rí xa̱bu̱ xuajñunʼ Israel muni̱ aʼkhá, ga̱jma̱a̱ numuu aʼkhá rí nini̱ niʼni rí makásngáñuʼ. 3 Ikha jngóo ma̱ni̱ gámbíin mbá kayuuʼ bi̱ naguwáʼ náa Baasá ga̱jma̱a̱ bi̱ kúwá náa goʼwóo, maniʼñúuʼ goʼwóo xó má niniʼñúuʼ goʼwóo Jeroboán a̱ʼdióo Nebat. 4 Bi̱ naguwáʼ náa Baasá bi̱ gákháñún náa xuajin muphu̱u̱n xu̱wánʼ. Mú bi̱ gákháñún náa xanáá muphu̱u̱n ñu̱ʼu̱ bi̱ jngruigu̱u̱n rijma̱a̱”.

5 Dí naʼthí xóó itháan ga̱jma̱a̱ numuu Baasá, rí niʼni ga̱jma̱a̱ tsiaki̱i̱ rí nigiʼdoo, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel. 6 Ikhú Baasá ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa Tirzá, ikhú a̱ʼdióo bi̱ mbiʼyuu Elá ni̱jkha̱nú ninindxu̱u̱ nuxi̱i̱ʼ rey. 7 Jeobá niʼthúu̱n profeta* Jehú a̱ʼdióo Hananí, rí magíʼnuu Baasá ga̱jma̱a̱ bi̱ kúwá náa goʼwóo ga̱jma̱a̱ numuu xúgíʼ dí raʼkhí dí niʼni náa iduu Jeobá, rí niʼni dí makásngañu̱u̱ʼ ga̱jma̱a̱ numuu rí xóo niʼni, ma̱ngaa rí niʼni ikháá má xóo bi̱ kúwá náa goʼwóo Jeroboán, xó má nixíyáa* ma̱ngaa.

8 Elá a̱ʼdióo Baasá ni̱jkha̱nú ninindxu̱u̱ rey náa mbayuuʼ Israel náa Tirzá, índo̱ naʼni má 26 tsiguʼ dí naʼtáñajunʼ rey Asá náa Judá, Elá niʼtáñajunʼ mbá a̱jma̱ tsiguʼ. 9 Xa̱bi̱i̱ bi̱ mbiʼyuu Zimrí bi̱ naʼtáñajúúnʼ mbá taphi̱i̱n bi̱ nagún kudúún carro dí nuxmijná ga̱jma̱a̱, niríyaʼ awan rí maʼniuu índo̱ ikhaa xtáa rajnga̱a̱, náa Tirzá náa goʼwóo Arzá, bi̱ kayá edxu̱u̱ náa goʼwóo rey dí rígá náa Tirzá. 10 Zimrí nito̱ʼo̱o̱ nixnúu ga̱jma̱a̱ nixíyáa, índo̱ niʼni má 27 tsiguʼ dí naʼtáñajúnʼ rey Asá náa Judá ga̱jma̱a̱ Zimrí ni̱jkha̱nú ninindxu̱u̱ nuxi̱i̱ʼ rey. 11 Índo̱ ni̱jkha̱nú ninindxu̱u̱ rey ga̱jma̱a̱ nigi̱ʼi̱ náa xíliúu* rí maʼtáñajunʼ, nigudíin mbá xúgíinʼ bi̱ kúwá náa goʼwóo Baasá. Tániñuuʼ rí nimbáa xa̱biya̱* maxtáa, tséʼniuu á mu kaʼyoo* o bi̱ nambájxu̱u̱ ga̱jma̱a̱. 12 Xúʼko̱ kaʼnii niʼni Zimrí dí niʼni gámbíin mbá xúgíinʼ, bi̱ kúwá náa goʼwóo Baasá, xó má niʼthí Jeobá dí magíʼnuu Baasá náa profeta Jehú. 13 Nirígá rígi̱ ga̱jma̱a̱ numuu xúgíʼ aʼkhá rí nikudaminaʼ Baasá ga̱jma̱a̱ Elá bi̱ nindxu̱u̱ a̱ʼdióo, índo̱ nini̱ dí israelitas muxudamíjna aʼkhá, índo̱ ndiyamajkhúún xándú bi̱ raguáʼdáá numún, dí niʼni makásngañu̱u̱ʼ Jeobá Dios ndrígóo Israel. 14 Dí naʼthí xóó itháan ga̱jma̱a̱ numuu Elá, ga̱jma̱a̱ xúgíʼ dí niʼni kiʼniraʼmáʼ náa libro náa naʼthí ga̱jma̱a̱ numún reyes bi̱ nikúwá náa Israel.

15 Índo̱ niʼni 27 tsiguʼ dí naʼtáñajunʼ rey Asá náa Judá, Zimrí ni̱jkha̱nú ninindxu̱u̱ rey mbá xmáná* náa Tirzá índo̱ soldado nigún gugíʼiin mu muxmijná gajmiún náa Guibetón, náa mbañún’ filisteos. 16 Soldado bi̱ gríguiin ikhí nidxawíín rí nithi: “Zimrí niríyaʼ awan dí maʼniuu rey ga̱jma̱a̱ nixíyáa”. Ikha jngóo mbiʼi rúʼko̱, mbá xúgíinʼ israelitas náa dí gríguiin nigíiʼ Omrí bi̱ kayá edxu̱u̱ náa soldado mu mani̱ndxu̱u̱ rey. 17 Omrí gajmíi̱n mbá xúgíinʼ israelitas nigájnún náa Guibetón ga̱jma̱a̱ niruguama̱ʼa̱a̱n Tirzá. 18 Índo̱ Zimrí ndiʼyoo rí nitu̱ʼu̱u̱n náa xuajin, ikhú nito̱ʼo̱o̱ náa torre dí wíji̱ jxa̱ʼ náa goʼwóo* rey, ikhí má niguánúu ga̱jma̱a̱ nigídoo agiuuʼ nikha̱a̱ guʼwá ga̱jma̱a̱ xúʼko̱ má nikháñuu. 19 Nirígá xúgíʼ rígi̱ ga̱jma̱a̱ numuu aʼkhá dí ikhaa nikudaminaʼ índo̱ niʼni dí raʼkhí náa iduu Jeobá, ma̱ngaa índo̱ niʼni xó má niʼni Jeroboán ga̱jma̱a̱ índo̱ niʼni dí israelitas muxudamíjna aʼkhá. 20 Dí naʼthí xóó itháan ga̱jma̱a̱ numuu Zimrí ga̱jma̱a̱ rí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel.

21 Ikhú niʼni dí israelitas niruiʼtamíjna a̱jma̱ grupo. Mbá taphi̱i̱n nagún kidxuuʼ Tibní a̱ʼdióo Guinat ga̱jma̱a̱ nandún dí mugíiʼ mu mani̱ndxu̱u̱ rey ga̱jma̱a̱ i̱mbá taphi̱i̱n nagún kidxuuʼ Omrí. 22 Mú bi̱ nagún kidxuuʼ Omrí niʼngu̱u̱n nini̱ gajmiún bi̱ nagún kidxuuʼ Tibní a̱ʼdióo Guinat. Xúʼko̱ niʼni dí nikháñuu Tibní ga̱jma̱a̱ Omrí ni̱jkha̱nú ninindxu̱u̱ rey.

23 Omrí ni̱jkha̱nú ninindxu̱u̱ rey náa Israel índo̱ naʼni má 31 tsiguʼ dí naʼtáñajunʼ rey Asá náa Judá, Omrí niʼtáñajunʼ mbá 12 tsiguʼ. Náa Tirzá niʼtáñajunʼ mbá majun tsiguʼ. 24 Omrí niʼtsi kúbá dí rígá náa Samaria rí kaʼyoo Sémer ga̱jma̱a̱ mbá 68 kilo* plata ga̱jma̱a̱ ikhí niʼni mbá xuajin. Xuajin rúʼko̱ nixná mbiʼyuu Samaria* mu xúʼko̱ maʼni mba̱a̱ Sémer numuu dí ikhaa* ndrígóo kúbá rúʼko̱. 25 Omrí niʼni dí raʼkhí náa iduu Jeobá ga̱jma̱a̱ niʼni dí itháan raʼkhí ki xóo dí nini̱ mbá xúgíinʼ bi̱ nikúwá nákha xóó tséxtáa ikhaa. 26 Niʼni xó má niʼni Jeroboán a̱ʼdióo Nebat, ga̱jma̱a̱ nikudaminaʼ ikháá má aʼkhá rí niʼni dí xa̱bu̱ Israel muxudamíjna aʼkhá índo̱ ndiyamajkhún xándú bi̱ nda̱a̱ rí ejmiin, niʼni dí Jeobá Dios ndrígóo Israel makásngañu̱u̱ʼ. 27 Dí naʼthí xóó itháan ga̱jma̱a̱ numuu Omrí, dí niʼni ga̱jma̱a̱ xóo nixmínaʼ kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel. 28 Ikhú Omrí ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ náa Samaria, ga̱jma̱a̱ a̱ʼdióo bi̱ mbiʼyuu Acab ni̱jkha̱nú ninindxu̱u̱ nuxi̱i̱ʼ rey.

29 Acab a̱ʼdióo Omrí ni̱jkha̱nú ninindxu̱u̱ rey náa Israel, índo̱ naʼni má 38 tsiguʼ dí naʼtáñajunʼ rey Asá náa Judá ga̱jma̱a̱ Acab a̱ʼdióo Omrí ninindxu̱u̱ rey náa Israel, nigidaʼ niʼtáñajunʼ asndu náa Samaria mbá 22 tsiguʼ. 30 Acab a̱ʼdióo Omrí niʼni dí itháan ra̱májánʼ náa iduu Jeobá ki xóo mbá xúgíinʼ bi̱ nikúwá nákha xóó tséxtáa ikhaa. 31 Raʼkháa i̱ndó niʼni aʼkhá rí nikudaminaʼ Jeroboán a̱ʼdióo Nebat, ma̱ngaa ndiyáa Jezabel wáxióo* Etbaal rey ndrígu̱ún sidonios ga̱jma̱a̱ ndiʼyamajkuu Baal ma̱ngaa nismbáti̱go̱o̱ náa inuu. 32 Ma̱ngaa niʼni mbá náa mikarámáʼ tsigijñaʼ náa Baal náa goʼwóo Baal dí niguma náa Samaria. 33 Acab ma̱ngaa niʼni poste rí mitsúʼkháan.* Niʼni i̱ʼwáʼ rí maʼni makásngañu̱u̱ʼ Jeobá Dios ndrígóo Israel, ki xóo mbá xúgíinʼ reyes bi̱ nikúwá náa Israel nákha xóó tséxtáa ikhaa.

34 Nákha mbiʼi rí nixtáa Acab, Hiel xa̱bu̱ bi̱ na̱ʼkha̱ náa Betel niʼni májáanʼ Jericó. Índo̱ nitsiji̱i̱ rajkhúu xuajin, nikháñúu a̱ʼdióo bi̱ giʼnii bi̱ mbiʼyuu Abiram, ga̱jma̱a̱ índo̱ nitsuaʼa̱a̱n xkrugoo nikháñúu a̱ʼdióo bi̱ giʼthaá bi̱ mbiʼyuu Segub xó má ajngáa rí Jeobá niʼthí náa Josué a̱ʼdióo Nun.