I̱yi̱i̱ʼ rí na̱jkha̱ inún Hebreos

10 Numuu rí Xtángoo nindxu̱u̱ mbá ndájkua̱ rí májánʼ dí wíji̱ ma̱ʼkha̱, mú raʼkháa rí gajkhun xóo phú nindxu̱u̱, rígi̱ tséʼngo̱o̱ gáʼni rí ni xaguaʼdáá aʼkhá bi̱ nixuʼmamijná náa Dios mu muxnajxi̱ tsigijñaʼ mámbá tsiguʼ. 2 Á mu tsigijñaʼ naʼngo̱o̱ naʼni rí ni xaguaʼdáá aʼkhá, ni xáʼyóoʼ má rí majuixnájxi̱ itháan tsigijñaʼ, numuu rí bi̱ nuni̱ ñajunʼ rí mitsúʼkháan ga̱jma̱a̱ numuu rí niguma kaʼwi̱ín káaʼ mbóó nuthu asndu kámuu ni xáguáʼdáá itháan aʼkhúún. 3 Mú raʼkháa xúʼko̱ nindxu̱u̱, tsigijñaʼ rí najuixnájxi̱ naʼni rí mámbá tsiguʼ marmáʼáan a̱jkiu̱ún eʼni aʼkhúún, 4 numuu rí xáʼngo̱o̱ rí eʼdiún xede̱ ga̱jma̱a̱ tsujthu̱nʼ maʼni jngudi̱i̱ aʼkhá.

5 Ikha jngóo, índo̱ ikhaa nato̱ʼo̱o̱ náa numbaaʼ, naʼthí: “‹Na̱nguá nindaaʼ tsigijñaʼ ni má regalos, mú nitaniratáá mbá xuwiʼ náa ikhúúnʼ. 6 Na̱nguá nitandrígú tsigijñaʼ dí nakarámáʼ, ni má tsigijñaʼ ga̱jma̱a̱ numuu aʼkhá›. 7 Ikhú ni̱tha̱: ‹Atayáá, ni̱ʼkhá (náa rollo* kiʼnirámáʼ ga̱jma̱a̱ numuʼ) mu ma̱ni̱ rí nandaaʼ, Dios ndrígóʼ›”. 8 Ginii naʼthí: “Na̱nguá nindaaʼ ni má na̱nguá nitandrígú tsigijñaʼ, ni má regalos, ni má tsigijñaʼ dí nakarámáʼ, ni má tsigijñaʼ ga̱jma̱a̱ numuu aʼkhá”, tsigijñaʼ rí najuixnájxi̱ xó má naʼthí náa Xtángoo. 9 Ga̱jma̱a̱ nda̱wa̱á naʼthí: “Atayáá, ni̱ʼkhá mu ma̱ni̱ rí nandaaʼ”. Ikhaa naʼni jngudi̱i̱ rí timbá, mu magíiʼ rí maʼni a̱jma̱. 10 Numuu rí xúʼko̱ nindoo ikhaa, ikháanʼ niguma kaʼwáanʼlú ga̱jma̱a̱ xuyuuʼ Jesucristo, rí nijuixnájxi̱ káaʼ mbóó miʼtsú asndu kámuu.

11 Ma̱ngaa xúgíinʼ ndxajkun, nagún mámbá mbiʼi mu muni̱ ñajunʼ ndrígu̱ún rí nindxu̱u̱ mikaʼwu mu muxnajxi̱ mbaʼa nuthu ikháá má tsigijñaʼ, rí nditháan xáʼngo̱o̱ gáʼni jngudi̱i̱ mbá kayuuʼ aʼkhá. 12 Mú xa̱bu̱ bugi̱ nixnájxi̱ káaʼ mbóó tsigijñaʼ asndu kámuu ga̱jma̱a̱ numuu aʼkhá ma̱ngaa nigi̱ʼi̱ náa níjñu mújúunʼ Dios, 13 asndu nákha ikhú xtáa ragi̱ʼtu̱u̱n rí Dios magruigi̱i̱n xa̱bu̱ bi̱ sia̱nʼ náa agoo rajkúu. 14 Numuu rí ga̱jma̱a̱ mbóó tsigijñaʼ rí nixnájxi̱, niʼni rí ní xaguaʼdáá aʼkhá asndu kámuu bi̱ kúwá raguma kaʼwi̱ín. 15 Ma̱ngaa espíritu santo* nasngájmulú ga̱jma̱a̱ numuu rúʼko̱, numuu rí ginii niʼthí: 16 “Rí mambanúʼ gajmíʼ ikhiin nda̱wa̱á rí mbiʼi rúʼko̱, eʼthí Jeobá,* ikhaa nindxu̱u̱ rígi̱. Xtángoo ndrígóʼ magíwánʼ náa a̱jkiu̱ún* ga̱jma̱a̱ maniraʼmáʼ náa ku̱ma̱ʼ ndrígu̱ún”. 17 Nda̱wa̱á naʼthí: “Ní xármáʼáanʼ a̱jkiu̱nʼ itháan eʼni aʼkhá ndrígu̱ún, ni má náa dí ra̱májánʼ* nini̱”. 18 Índo̱ bugi̱ niguma mba̱a̱ a̱jkiu̱ún kuñún, nánguá má eyóoʼ mbá tsigijñaʼ ga̱jma̱a̱ numuu aʼkhá.

19 Ikha jngóo, a̱ngui̱nʼ, xúgi̱ rí nánguá emíñulú majmulú kamba̱a̱ rí na̱jkha̱ mu matu̱ʼu̱lú náa rí mikaʼwu ga̱jma̱a̱ numuu eʼdiuu Jesús 20 mbá kamba̱a̱ nuxi̱ʼ, rí na̱jkha̱ kaguáánʼ makuwáánʼ, dí ikhaa nirmbáʼtoo* mu ikháanʼ manújngulú náa krajngaa cortina xóo muʼthá, xuyuuʼ, 21 numuu rí guaʼdaa mbáa ndxajkun bi̱ phú mba̱a̱, bi̱ nañewu̱u̱n goʼwóo Dios, 22 guxuʼmámíjnálú náa Dios ga̱jma̱a̱ xúgíʼ a̱jkiu̱lú, ga̱jma̱a̱ mbá fe kájxi̱, numuu rí a̱jkiu̱lú niguma kaʼwi̱i̱ ga̱jma̱a̱ rí xúgi̱ kuaʼdáá mbá ku̱ma̱ kaʼwu ga̱jma̱a̱ xuyulúʼ ndiʼwu̱u̱ ga̱jma̱a̱ iyaʼ rí mikaʼwu. 23 Guʼtá má xúʼko̱ pa̱jnu rí kua̱ʼthi̱i̱n, xúʼni̱ a̱jma̱ a̱jkiu̱lú, numuu rí bi̱ nikudaminaʼ maʼni rígi̱ nindxu̱u̱ jmbii. 24 Gaxmiéjunlú kuʼñúún eʼwíinʼ,* mu maxkajxáanʼlu musngajmá ngajua ga̱jma̱a̱ mu̱ʼni̱ rí májánʼ, 25 ma̱ngaa xúʼniñáánʼ ragimbáánʼlú xó má naguʼwún nuni̱ tikhuun. Guxnámíjnálu tsiakii, itháan xúgi̱ rí mbiʼi na̱ʼkha̱ rajngiyuu.

26 Numuu rí á mu nda̱wa̱á rí nindrigú ku̱ma̱ kájxi̱ rí gajkhun ga̱jma̱a̱ nu̱ʼni̱ kiejuunʼ aʼkhá, nánguá eguanúu i̱mba̱ tsigijñaʼ rí maʼni káwáánʼ náa aʼkhá. 27 I̱ndó naguáʼthi̱i̱n mbiʼi rí muxnajxi̱i̱ cuenta dí nindxu̱u̱ gamíi ga̱jma̱a̱ nuguáʼthi̱i̱n rí nakásngañu̱u̱ʼ Dios rí nakha xóo aguʼ, rí maʼni gámbíin bi̱ tsíñún gúyáá. 28 Asndu tsáá bi̱ nanújngurámuuʼ Xtángoo ndrígóo Moisés, á mu kúwá a̱jmi̱i̱n o ajtsíin bi̱ ndiyáá nánguá egáwíinʼ a̱jkiu̱ún rí muxiyáa. 29 Lá na̱nguá eku̱mala rí ndayóoʼ mamínuuʼ itháán, bi̱ gákujmbiri̱ga̱a̱ A̱ʼdióo Dios, bi̱ támajkuu kaʼyoo eʼdi rí nimbánuu rí niguma kaʼwi̱i̱ ga̱jma̱a̱, niʼni gawúunʼ ma̱ngaa támajkuu kaʼyoo espíritu santo dí rígá náa rí májánʼ wéñuuʼ a̱jkiu̱u̱n Dios ráʼ. 30 Numuu rí nuʼniʼníiʼ bi̱ niʼthí: “Ikhúúnʼ kaʼyoʼ rí ma̱ni̱ gíníin ga̱jma̱a̱ ma̱ni̱ numi̱ín náa rí nini̱”. Ga̱jma̱a̱ niʼthí xóó: “Jeobá* mandi̱ʼi̱i̱n cuenta xa̱bu̱ xuajñuu”. 31 Phú gamíi nindxu̱u̱ rí Dios bi̱ ndaʼya maʼni rí mumíniiʼlú.

32 Garmáʼáan a̱jkia̱la má xúʼko̱ eʼni mbiʼi rí ninújngoo, nda̱wa̱á rí nindrígúla rí gajkhun,* niʼnga̱la náa xúgíʼ rí nimíniiʼ. 33 Nguáná nindrigáanʼla náa inún xa̱bu̱,* nitha wéñala ga̱jma̱a̱ nini̱ gínáanʼla, ma̱ngaa nguáná nikuwáanʼ gajmiála bi̱ niraʼníí ga̱ʼkhu̱ rígi̱. 34 Numuu rí ikháanʼ nisngajmála rí nagáwíinʼ a̱jkia̱la kuñu̱u̱n bi̱ kúwá náa guʼwá e̱jua̱nʼ ga̱jma̱a̱ nikuwáanʼ gagi índo̱ nigajtakaʼyálá rí kuaʼdáá, numuu rí ndu̱ya̱a̱la rí kuaʼdáá rí itháán májánʼ rí ndajyúuʼ asndu kámuu.

35 Ikha jngóo xámiñala,* numuu dí rígá rí májánʼ mundrígúula. 36 Ikháanʼ ndayóoʼ rí maʼngala, numuu rí nda̱wa̱á rí ni̱nila dí nandoo Dios, mundrígúu rí ikhaa nikudaminaʼ maxnála. 37 Numuu rí, “nánguá má mba̱yu̱u̱ʼ tígo̱o̱”, “xájyúuʼ má gáʼkanú bi̱ na̱ʼkha̱”. 38 “Mú xa̱bi̱ʼ bi̱ jmbii maxtáa ga̱jma̱a̱ numuu fe ndrígóo”, ga̱jma̱a̱, “á mu najkha̱a̱ skidiʼ, ni xánigu̱ʼ gáʼni”. 39 Mú ikháanʼ na̱nguá ni̱ndxu̱lú bi̱ nagúun skidiʼ ga̱jma̱a̱ naguma gámbíin, ni̱ndxu̱lú bi̱ nakúwi̱i̱n má xúʼko̱ ga̱jma̱a̱ numuu fe rí guáʼdáá.