Timbá i̱yi̱i̱ʼ rí niʼnirámáʼ Juan

5 Asndu tsáá bi̱ naʼnimbo̱o̱ rí Jesús nindxu̱u̱ Cristo, xa̱bu̱ buʼko̱ nindxu̱u̱ a̱ʼdióo Dios. Ga̱jma̱a̱ asndu tsáá bi̱ nandoo kaʼyoo Dios xúʼko̱ má nandoo kaʼñún bi̱ ni̱ndxu̱ún e̱ji̱i̱n ikhaa. 2 Ga̱jma̱a̱ numuu rígi̱ nduʼyáá rí nandulú kuʼñúún e̱ji̱i̱n Dios: Á mu nandulú kuʼyáá Dios ga̱jma̱a̱ nuʼnimbaníí kiʼtáñajunʼ ndrígóo. 3 Rígi̱ rí nandoo gáʼthúu̱n dí maʼndulú kuʼyáá Dios: Rí muʼnimbulú kiʼtáñajunʼ ndrígóo; ga̱jma̱a̱ kiʼtáñajunʼ ndrígóo na̱nguá nindxu̱u̱ mingíjyúuʼ, 4 numuu rí asndu tsáá bi̱ nindxu̱u̱ A̱ʼdióo Dios naʼngo̱o̱ naʼni ga̱jma̱a̱ numbaaʼ. Fe ndrígúlú nindxu̱u̱ dí naʼngo̱o̱ naʼni ga̱jma̱a̱ numbaaʼ.

5 Tsáá gáʼngo̱o̱ gáʼni ga̱jma̱a̱ numbaaʼ rá. Lá raʼkháa bi̱ gíʼdoo fe dí Jesús nindxu̱u̱ A̱ʼdióo Dios ráʼ. 6 Bugi̱ nindxu̱u̱ Jesucristo bi̱ ni̱ʼkha̱ náa majñu̱u̱ʼ iyaʼ ga̱jma̱a̱ eʼdi, raʼkháa i̱ndó náa iyaʼ, ma̱ngaa iyaʼ ga̱jma̱a̱ eʼdi. Espíritu santo* naʼthí ga̱jma̱a̱ numuu rígi̱, numuu dí espíritu naʼthí rí gajkhun. 7 Numuu rí ajtsíin nuthi rí gajkhun ga̱jma̱a̱ numuu rígi̱: 8 Espíritu, iyaʼ ga̱jma̱a̱ eʼdi, ikha̱á má dí ethi mbá nájtsíin.

9 Ikháanʼlu nindrígú dí nithi xa̱bu̱, mú dí naʼthí Dios gíʼdoo itháan numuu. Numuu dí niʼthí ga̱jma̱a̱ numuu A̱ʼdióo. 10 Xa̱bu̱ bi̱ nagiʼdoo fe náa A̱ʼdióo Dios nagiwánʼ ajngáa rígi̱ náa a̱jkiu̱u̱n.* Mú xa̱bu̱ bi̱ ragíʼdoo fe náa Dios naʼni rí Dios mani̱ndxu̱u̱ minduwaaʼ, numuu rí na̱nguá nigiʼdoo fe náa rí Dios niʼthí ga̱jma̱a̱ numuu A̱ʼdióo. 11 Ajngáa rígi̱ dí niʼthí: Dios nixnúlú rí makuwáanʼlu kámuu, mundrígú rígi̱ ga̱jma̱a̱ numuu A̱ʼdióo. 12 Bi̱ xtáa ga̱jma̱a̱ A̱ʼdióo Dios ma̱ndoo maxtáa kámuu; bi̱ na̱nguá xtáa ga̱jma̱a̱ A̱ʼdióo Dios xándoo maxtáa kámuu.

13 Naniraʼmáʼ rígi̱ inala ikháanʼ bi̱ guaʼdáá fe náa mbiʼyuu A̱ʼdióo Dios, gu̱ya̱a̱la rí mundrígúu dí makuwáanʼla kámuu. 14 Ga̱jma̱a̱ numuu rígi̱ dí nakumulú kuʼyáá ikhaa ga̱jma̱a̱ xúgíʼ a̱jkiu̱lú: Dí ma̱ndoo munda̱ʼa̱a̱ asndu káʼnii má dí nambáni̱i̱ ga̱jma̱a̱ dí ikhaa nandoo, ikhaa naʼdxawunlúʼ. 15 Á mu nduʼyáá dí ikhaa naʼdxawunlúʼ índo̱ nunda̱ʼa̱a̱ asndu káʼnii má dí eyulú, nduʼyáá má dí makhánulúʼ numuu dí nunda̱ʼa̱a̱lu ikhaa.

16 Á mu mbáa ndaʼyoo ndxájuu dí xtáa raʼni mbá aʼkhá, mbá aʼkhá dí tséjkha̱ kayáa makhañúu, ganda̱ʼa̱ ga̱jma̱a̱ numuu ndxájuu ga̱jma̱a̱ Dios maniñuuʼ maxtáa. Gi̱i̱ nandoʼ gátha ga̱jma̱a̱ numún bi̱ nuni̱ aʼkhá dí tséjkha̱ kagui̱i̱n makhañún. Mú rígá mbá aʼkhá dí na̱jkha̱ kagui̱i̱n makhañún. Xúnda̱ʼa̱ ga̱jma̱a̱ numún bi̱ nuni̱ aʼkhá rígi̱. 17 Xúgíʼ dí ra̱májánʼ nindxu̱u̱ aʼkhá, mú rígá mbá aʼkhá dí tséjkha̱ kagui̱i̱n xa̱bu̱ makhañún.

18 Nduʼyáá má dí asndu tsáá bi̱ nagumaa náa Dios tséʼni aʼkhá, numuu rí A̱ʼdióo* Dios nañewu̱u̱n ga̱jma̱a̱ Gixa̱a̱* xándoo magutuwiin. 19 Ikháanʼ nduʼyáá rí naguwaʼ náa Dios, mú náa xúgíʼ numbaaʼ rígá tsiakii ndrígóo Gixa̱a̱.* 20 Ga̱jma̱a̱ nduʼyáá rí A̱ʼdióo Dios ni̱ʼkha̱ ga̱jma̱a̱ niʼni makru̱ʼu̱lú* mu muʼgua̱nú muniʼníiʼ bi̱ nindxu̱u̱ gajkuwiin. Ga̱jma̱a̱ numuu Jesucristo bi̱ nindxu̱u̱ A̱ʼdióo, kuwáanʼ mbóó gajmiúlú bi̱ gajkuwiin. Ikhaa nindxu̱u̱ Dios gajkuwiin ga̱jma̱a̱ nindxu̱u̱ bi̱ naxná dí ndaʼya asndu kámuu mbiʼi. 21 E̱ji̱nʼ, gunitsíngumíjnála* náa xándú.