Rí niʼnirámáʼ Marcos

7 Fariseos ga̱jma̱a̱ bi̱ nusngáa xtángoo, bi̱ niguwáʼ náa xuajen Jerusalén nigimbíin mbájndi náa Jesús. 2 Ga̱jma̱a̱ ndiñún tikhuun xa̱bi̱i̱ Jesús rí tújñáa* ñawúúnʼ índo̱ kúwá ruphiʼtsu. 3 (Fariseos gajmiún xúgíinʼ judíos tsephiʼtsu á mu tsejñáa ñawúúnʼ asndu náa gúʼxúnʼ numuu rí nuni̱ xóo niguwáʼ rágu̱u̱nʼ runi xa̱bu̱ nákha wajyúuʼ. 4 Índo̱ natangi̱ín náa xuáá, tsephiʼtsu á mu tséjñáa ñawúúnʼ asndu náa gúʼxúnʼ. Ma̱ngaa nuni̱ i̱ʼwáʼ rí niguwáʼ rágu̱u̱nʼ runi xa̱bu̱ nákha wajyúuʼ xóo rí muxumajyaʼ copa, rayaʼ ga̱jma̱a̱ tséxi* rí cobre). 5 Ikha jngóo fariseos ga̱jma̱a̱ bi̱ nusngáa xtángoo nirajxi̱i̱: “Náá numuu rí xa̱bia̱a̱ʼ tsénimbáníí kiʼsngáa rí niguwáʼ rágúu̱nʼ runi xa̱bu̱ bi̱ nikúwá nákha wajyúuʼ, rí tséjñáa ñawúúnʼ índo̱ nuphiʼtsu xá.” 6 Ikhaa niʼthún: “A̱jma̱ inala jáanla, ikha jngóo xúʼko̱ niʼtáriyaʼ profeta* Isaías ga̱jma̱á numala náa kiʼniraʼmáʼ: ‹Xa̱bu̱ xuajen rígi̱, i̱ndó nuthíí rí nduyamajkhuʼ, mú tsíñún gúyoʼ. 7 Nda̱a̱ má ndíjkha̱á rí nduyamajkhuʼ, numuu rí nusngáa kiʼsngáa ndrígu̱ún xa̱bu̱›. 8 Ikháanʼ nuniʼñááʼ runimbánii rí naʼtáñajunʼ Dios ga̱jma̱a̱ namajkuala itháan munimbánii rí niguwáʼ rágu̱u̱nʼ runi xa̱bu̱”.

9 Mú niʼthún xóó: “¡Ra̱ʼkhá tháán ejmáanʼla rí muniʼñááʼ runimbánii rí naʼtáñajunʼ Dios mu mu̱nila xóo eyala ikháanʼ! 10 Mbá xkri̱da, Moisés niʼthí: ‹Atiamajkuíí ana̱a̱ʼ ga̱jma̱a̱ ru̱dáaʼ›, ga̱jma̱a̱ ‹asndu tsáa bi̱ gáʼtatsríguíi* anu̱u̱ o ru̱dúu̱ gíʼmaa makhañúu›. 11 Mú ikháanʼla nu̱ta̱: ‹Asndu tsáa bi̱ gáʼthúu̱n anu̱u̱ o ru̱dúu̱: “Xúgíʼ dí gúʼdoo rí kaʼnii mambáyaaʼ ga̱jma̱a̱”›, nindxu̱u̱ tsigijñaʼ* xóo muʼthá rí kaʼyoo makánáán Dios. 12 Xúʼko̱ ikháanʼla nánguá eniʼñáánʼ maʼni nimbá ga̱jma̱a̱ numuu anu̱u̱ o ru̱dúu̱. 13 Ga̱jma̱a̱ numuu kiʼsngáa rí naguwaʼ runi, nu̱nila rí xágiʼdoo numuu ajngá rawuunʼ Dios. Ma̱ngaa náa i̱ʼwáʼ xúgi̱ kaʼnii má e̱nila”. 14 Ikhú nindu̱ʼu̱u̱n xa̱bu̱ rí muxuʼmamijná náa ikhaa ga̱jma̱a̱ niʼthún: “Gudxawíínla ga̱jma̱a̱ gakrua̱ʼa̱la xúgiáanʼ ikháanʼ rí xtáá ra̱tha̱. 15 Xáʼni gachíi xa̱bu̱ rí na̱ʼkhu̱. I̱ndó rí nagájnuu náa ikhaa, rúʼko̱ rí naʼni gachíi”. 16 *

17 Índo̱ Jesús niniñúúnʼ mbaʼin xa̱bu̱, nito̱ʼo̱o̱ náa mbá guʼwá, ikhú xa̱bi̱i̱ nirajxi̱i̱ ga̱jma̱a̱ numuu xkri̱da. 18 Ikhaa niriʼñúún: “Mangáanʼ tséjmáanʼ gákrua̱ʼa̱la ráʼ. Lá tséya̱a̱ rí xúgíʼ rí na̱ʼkhu̱ xa̱bu̱ tséʼni gachíi ráʼ. 19 Numuu rí tséjngúun náa a̱jkiu̱u̱n.* Najngúun náa awúu̱n ga̱jma̱a̱ naguanáa náa letrina”. Xúʼko̱ niʼthí rí xúgíʼ ganitsu nindxu̱u̱ mikaʼwu. 20 Niʼthí xóó: “Rí nagájnuu náa xa̱bu̱ rúʼko̱ rí naʼni gachíi. 21 Numuu rí náa a̱jkiu̱ún xa̱bu̱ naku̱mu̱u̱ xúgíʼ enii dí ra̱májánʼ, xóo rí mubúúnʼ xkawiʼ kayuuʼ gajmiún eʼwíinʼ,* rí muni̱ kuʼwáʼ, rí muradíin a̱ngiu̱ún, 22 rí muni̱ aʼkhá gajmiún imba̱a̱, rí maʼndún muguaʼdáá wéñuuʼ, muni̱ dí ra̱májánʼ, muni̱ nduwaʼ, muni̱ xúgíʼ enii rí xkawiʼ,* maxígu̱u̱n, mutha wéñúúnʼ eʼwíinʼ, muni̱ mbaʼumíjna̱ ga̱jma̱a̱ rí na̱nguá gíiʼ a̱jkiu̱ún. 23 Xúgíʼ rígi̱ nagájnuu náa a̱jkiu̱u̱n xa̱bu̱ ga̱jma̱a̱ naʼni gachíi”.

24 Nda̱wa̱á rí nigájnuu ikhí, ni̱jkha̱ náa mbayuuʼ Tiro ga̱jma̱a̱ Sidón. Nito̱ʼo̱o̱ náa mbá guʼwá numuu rí táʼndoo mbuyáá rí xtáa ikhí, mú ndiyáá má tsiakii. 25 Ikhí mbáa a̱ʼgu̱ bi̱ wáxioo gíʼdaa giñán xkawi̱i̱ʼ,* índo̱ niʼdxuun rí Jesús xtáa ikhí, ni̱ʼkha̱ ga̱jma̱a̱ nismbáti̱go̱o̱ inuu. 26 A̱ʼgu̱ bugi̱, naʼthí ajngáa griego bi̱ na̱ʼkha̱ náa Fenicia mbaaʼ ndrígóo Siria, niʼtákáñuu rí maxkriya̱a̱ʼ giñán xkawi̱i̱ʼ* náa wáxioo. 27 Ikhú Jesús niʼthúu̱n: “Atatsíñáánʼ magiʼmúún e̱ji̱n ginii, numuu dí raʼkhí gáʼni rí magajta káñunʼ rí na̱ʼphu̱ e̱ji̱n mu mixnún ejín xúwánʼ mu̱phu̱”. 28 Ikhú a̱ʼgu̱ niriʼña̱a̱: “Gajkhun má tátá, mú asndu e̱jín xúwánʼ bi̱ tri̱ʼi̱i̱n náa agoo mesa na̱ʼphu̱ xójóo ganitsu rí najngutígú káʼñúnʼ e̱ji̱n”. 29 Ikhú Jesús niʼthúu̱n: “Ayu̱u̱ʼ tsímáá. Numuu rí niratá rúʼko̱, giñánʼ xkawi̱i̱ʼ* nigájna̱a̱ má náa wáxiaaʼ”. 30 Ikhú ikhaa ni̱jkha̱a̱ goʼwóo ga̱jma̱a̱ ndiʼyoo wáxioo kaʼmáaʼ náa xiawoo ga̱jma̱a̱ nigájna̱a̱ giñán xkawi̱i̱ʼ* náa ikhaa.

31 Ikhú Jesús nigájna̱a̱ náa Tiro ninújnga̱a̱ náa Sidón ma̱ngaa ninújnga̱a̱ náa lamáa ndrígóo Galilea ga̱jma̱a̱ ni̱ʼkha̱núu náa Decápolis.* 32 Ga̱jma̱a̱ niguwáʼ kuya̱a̱ mbáa bi̱ tséʼdxuun ga̱jma̱a̱ tséʼthi májánʼ, nitakáñii rí matámáʼ ñawúunʼ náa ikhaa. 33 Ga̱jma̱a̱ ikhaa niríya̱a̱ʼ kaníí náa nda̱wi̱i̱n xa̱bu̱, nixkajma cháʼwuun ga̱jma̱a̱ nindujtóoʼ e̱ji̱i̱n ñawúunʼ nda̱wa̱á nixkajma raju̱u̱n. 34 Niyejxira̱ʼa̱n mekhuíí ga̱jma̱a̱ nitsíná ikhú niʼthí “Éffatha”, xóo muʼthá, “Gambaʼta̱a̱”. 35 Núkhu nimbaʼta̱a̱ cháʼwuun ga̱jma̱a̱ nigri̱ya̱a̱ʼ kaʼwu ajngóo. 36 Ikhú Jesús nindu̱ʼu̱u̱n xa̱bu̱ rí xútháán nimbáa rígi̱, mú índo̱ ikhaa naʼthúún rí xúthi, ikhiin itháan má ethi. 37 Numuu dí ikhiin ra̱ʼkhá tháán ninigu̱u̱nʼ ikha jngóo nithi: “Mitsaanʼ wéñuuʼ xúgíʼ rí naʼni. ¡Asndu narmbáʼta̱a̱ cháʼwúún bi̱ tsédxawíín ga̱jma̱a̱ narmbáʼta̱a̱ rawúúnʼ chíjma̱a̱!”.