Rí niʼnirámáʼ Juan

11 Náa mbá xuajen chíʼgíiʼ rí mbiʼyuu Betania, ikhí xtáa mbáa xa̱bu̱ bi̱ mbiʼyuu Lázaro ga̱jma̱a̱ naʼniuu nandii. Ikhí ma̱ngaa xtáa María ga̱jma̱a̱ ndxájuu* bi̱ mbiʼyuu Marta. 2 Bugi̱ nindxu̱u̱ María bi̱ nixtrámuuʼ aceite náa rajkhúu Jesús* ga̱jma̱a̱ niʼnigujndo̱o̱ʼ ga̱jma̱a̱ xtátsúun edxu̱u̱. Ga̱jma̱a̱ Lázaro bi̱ naʼniuu nandii, nindxu̱u̱ giʼtio̱o̱. 3 Ikhú a̱ngui̱i̱n wa̱ʼxa̱ʼ nixuʼma ajngáa náa Jesús, nitháán: “Tátá, mígia̱a̱ʼ bi̱ nandaaʼ xtayáá naʼniuu nandii”. 4 Índo̱ Jesús niʼdxawuun rígi̱, ikhú niʼthí: “Nandii rígi̱ na̱nguá nindxu̱u̱ mu makhañúu, nindxu̱u̱ mu maguma̱ mba̱a̱ Dios ga̱jma̱a̱ mu A̱ʼdióo Dios maguma mba̱a̱ ga̱jma̱a̱ numuu nandii rígi̱”.

5 Jesús nandoo kaʼyoo Marta, María ga̱jma̱a̱ Lázaro. 6 Índo̱ niʼdxawuun rí naʼniuu nandii Lázaro, ikhaa xóó niguanúu imbá gíjma̱ mbiʼi náa má xtáa. 7 Nda̱wa̱á niʼthún xa̱bi̱i̱: “Guʼgua̱ mbu̱júu̱ʼ náa Judea”. 8 Mú xa̱bi̱i̱ nitháán: “Maestro,* xíkhoo nindúún muxnaaʼ ga̱jma̱a̱ itsí náa Judea, nandaaʼ mi̱dxu̱ʼ mbu̱júu̱ʼ ikhí ráʼ.” 9 Jesús niʼthún: “Lá ragájkhun dí mbá mbiʼi gíʼdoo 12 hora ráʼ. Bi̱ jngruigo̱o̱ náa rígá aguʼ xájngrádaaʼ ga̱jma̱a̱ nimbá, numuu rí ndaʼyoo aguʼ ndrígóo numbaaʼ rígi̱. 10 Mú bi̱ na̱jkha̱ mbruʼun najngrádaaʼ numuu rí nda̱a̱ aguʼ náa ikhaa”.

11 Nda̱wa̱á rí niʼthí rígi̱, ikhú niʼthí xóó: “Migiulu Lázaro niʼgu má, mú ikhúúnʼ na̱jkhá ñuʼún mu maxkajui̱i̱”. 12 Ikhú xa̱bi̱i̱ nitháán: “Tátá, á mu naʼgu, maʼni̱i̱ má a̱jkiu̱u̱n”. 13 Mú rí phú gajkhun, Jesús nindoo gáʼthí dí Lázaro nikháñuu má. Mú ikhiin nikumu̱ún rí xtáa raʼthí ga̱jma̱a̱ numuu rí naʼgu, o rí ndayáa jxu̱u̱ʼ. 14 Ikhú Jesús niʼthún mbájmbu: “Lázaro nikháñuu, 15 nadxuʼ ga̱jma̱a̱ numala numuu rí ikhúúnʼ na̱nguá nixtáá ikhí, mu xúʼko̱ ikháanʼ munimbala ku̱yo̱ʼ. Guʼgua̱ gúʼyáá”. 16 Ikhú Tomás bi̱ nutháán Cuateʼ, niʼthún eʼwíinʼ xa̱bi̱i̱ Jesús: “Guʼgua̱ gajmiúlú mu makhañúlúʼ mangáánʼ”.

17 Índo̱ Jesús ni̱jkha̱nú, naʼni má a̱jkhu̱ e̱jkha̱ʼ dí Lázaro kraʼaa náa iñá wajinʼ. 18 Mijngii má gíʼ Betania náa Jerusalén, naʼni xóo ajtsú kilómetros* rí mi̱dxu̱ʼ ga̱jma̱a̱ rajkuáaʼ. 19 Mbaʼin judíos niguwáʼ gúyáá Marta ga̱ jma̱a̱ María mu muni̱i̱ a̱jkiu̱ún numuu rí nikháñuu giʼtiún. 20 Índo̱ Marta niʼdxawun rí Jesús xtáa ra̱ʼkha̱, ikhú ni̱jkha̱ gátsijnuu; mú María niguanúu guʼwáá. 21 Ikhú Marta niʼthúu̱n Jesús: “Tátá, á mu niraxtaa gi̱i̱, tákháñuu giʼtio̱ʼ. 22 Maski ajndu xúgi̱ nirígá, mú nda̱yo̱o̱ rí xúgíʼ rí gántanda̱ʼa̱a̱ Dios, Dios maxnáaʼ”. 23 Jesús niʼthúu̱n: “Giʼtia̱a̱ʼ magabi̱i̱ʼ”.* 24 Marta niriʼñuu: “Ikhúúnʼ nda̱yo̱o̱ rí magabi̱i̱,* índo̱ gágabiín xa̱bu̱ náa iwáá mbiʼi”. 25 Ikhú Jesús niʼthúu̱n: “Ikhúúnʼ ni̱ndxu̱ʼ bi̱ naʼnigabiín* xa̱bu̱ ga̱jma̱a̱ na̱ni̱ rí mbuya. Bi̱ gágiʼdoo fe náa ikhúúnʼ, maski má makhañúu, mata̱nga̱a̱ maxtáa; 26 ga̱jma̱a̱ á mu bi̱ xtáa ndaʼya nagiʼdoo fe náa ikhúúnʼ xákhañuu nditháan. Lá natatsimbaaʼ ikháán rígi̱ ráʼ.” 27 Ikhaa niʼthúu̱n: “Xúʼko̱ Tátá, ikhúúnʼ nanimbo̱ʼ rí ikháán nindxa̱a̱ʼ Cristo, A̱ʼdióo Dios, bi̱ kaʼyoo ma̱ʼkha̱ náa numbaaʼ”. 28 Nda̱wa̱á rí niʼthí rígi̱, ni̱jkha̱ gándxaʼwáriya̱a̱ʼ ngu̱ʼwa̱á ndxájuu María ga̱jma̱a̱ niʼthúu̱n: “Maestro xtáa gi̱i̱, nandxaʼwáaʼ mi̱dxu̱ʼ”. 29 Índo̱ María niʼdxuun rígi̱, mbá nacha̱ nitu̱jxu̱u̱ ga̱jma̱a̱ ni̱jkha̱ gáʼyoo.

30 Jesús táto̱ʼo̱o̱ náa xuajen, niguanúu má náa ni̱jkha̱ gátsijnuu Marta. 31 Índo̱ judíos bi̱ kúwá gajmiún María runi̱i̱ a̱jkiu̱u̱n náa goʼwóo ndiyáá rí nitu̱jxu̱u̱ mbá nacha̱ ga̱jma̱a̱ nigájnuu, ikhiin nigún kidxuuʼ numuu rí nikumu̱ún rí na̱jkha̱ gámbi̱ya̱ʼ náa iñá wajinʼ. 32 Índo̱ María ni̱jkha̱nú náa xtáa Jesús, ga̱jma̱a̱ índo̱ ndiʼyoo ikhú nismbáti̱go̱o̱ ga̱jma̱a̱ niʼthúu̱n: “Tátá, á mu niraxtaa gi̱i̱ giʼtioʼ tákháñuu”. 33 Índo̱ Jesús ndiʼyoo rí ikhaa nambi̱ya̱ʼ gajmíi̱n judíos bi̱ na̱ʼkha̱ gajmíi̱n, ikhú ikhaa nigáwiinʼ wéñuuʼ a̱jkiu̱u̱n ga̱jma̱a̱ nixtáa gíná. 34 Ikhú nirajxu̱u̱n: “Náá nidi̱i̱la xá.” Ikhiin niriʼñáán: “Ayi̱ mu ma̱ta̱ya̱a̱ Tátá”. 35 Ikhú Jesús nimbi̱ya̱ʼ ma̱ngaa. 36 Índo̱ Judíos ndiyáá rígi̱, ikhú nithi: “¡Ra̱ʼkhá tháán nindoo kaʼyoo!”. 37 Mú tikhuun nithi: “Á mu xa̱bu̱ bugi̱ nijmaa nirmbáʼta̱a̱ idún bi̱ tsíkruigu̱u̱n, ndíjkha rí tájmaa gáʼni nimbá mu xákhañuu Lázaro xá.”

38 Nda̱wa̱á rí Jesús nigáwiinʼ a̱jkiu̱u̱n mbu̱júu̱ʼ, ni̱jkha̱ náa iñá wajinʼ. Rí nindxu̱u̱ mbá iñúunʼ itsí, ma̱ngaa kúgoo ga̱jma̱a̱ mbá itsí mba̱a̱. 39 Ikhú Jesús niʼthí: “Guyéjxingala itsí”. Mú Marta, ndxájuu bi̱ nikháñuu niʼthí: “Tátá, niʼni ndajtsíinʼ má xúgi̱, numuu rí niʼni má a̱jkhu̱ mbiʼi”. 40 Jesús nirajxu̱u̱: “Lá raʼkháa nitha̱nʼ rí á mu natanimbaaʼ ma̱ta̱ya̱a̱ tsiakii ndrígóo Dios ráʼ.” 41 Ikhú niyejxingaa itsí. Ga̱jma̱a̱ Jesús niyejxiraʼan mekhuíí ga̱jma̱a̱ niʼthí: “Anu̱ʼ, naxna̱a̱ núma̱aʼ numuu rí natadxawunʼ. 42 Ikhúúnʼ nda̱yo̱o̱ rí ikháán natadxawunʼ má xúʼko̱, mú na̱tha̱ rígi̱ mu xa̱bu̱ bi̱ kúwá gi̱i̱, munimbu̱u̱n rí ikháán nitaxúngu̱u̱nʼ”. 43 Ga̱jma̱a̱ nda̱wa̱á rí niʼthí rígi̱, ikhú gakhi̱i̱ niʼthí: “¡Lázaro, agajnáaʼ!”. 44 Ikhú bi̱ nikháñuu nigájnáa. Kambróʼoo xtíin rajkhúu ga̱jma̱a̱ ñawúunʼ ma̱ngaa náa inuu kambróʼoo mbá xtíin. Jesús niʼthún: “Gumbríya̱a̱ʼla xtíin ga̱jma̱a̱ guniʼñáánʼ maʼga̱a̱”.

45 Índo̱ judíos bi̱ niguwáʼ gúyáá María, ndiyáá rí niʼni Jesús ikhú niguáʼdáá fe náa ikhaa. 46 Mú tikhuun nigúun gúthún fariseos rí ndiyáá niʼni Jesús. 47 Ikha jngóo ndxajkun bi̱ kuya̱ edxu̱u̱ ga̱jma̱a̱ fariseos nigimbíin náa nawi̱i̱n xa̱bu̱ ede̱* ga̱jma̱a̱ nithi: “Ndiéjunʼ gúʼni rá. Numuu rí xa̱bu̱ bugi̱ ra̱ʼkhá tháán mbaʼa milagros rí naʼni. 48 Á mu nuniʼñááʼ maʼni má xúʼko̱ rígi̱, ikhú xúgíinʼ xa̱bu̱ maguáʼdáá fe náa ikhaa ga̱jma̱a̱ xa̱bu̱ romanos maguwáʼ murigú kaʼyulú náa nduʼyamajkuíí Dios ga̱jma̱a̱ xuajñulú”. 49 Ikhú mbáa rí ikhiin, bi̱ mbiʼyuu Caifás, ndxajkun bi̱ phú kayá edxu̱u̱ tsiguʼ rúʼko̱, niʼthún: “Ikháanʼ nda̱a̱ kayuuʼ dí eya̱a̱la. 50 Lá tséya̱a̱ rí itháan májánʼ rí makhañúu mbáa xa̱bu̱ ga̱jma̱a̱ numuu xuajñulú ki xóo xúgíinʼ xa̱bu̱ mambíin ráʼ.” 51 Rí niʼthí táʼkha̱ náa edxu̱u̱ ikhaa, numuu rí ikhaa nindxu̱u̱ ndxajkun bi̱ phú kayá edxu̱u̱ tsiguʼ rúʼko̱, ikha jngóo niʼtáriyaʼ rí Jesús makhañúu ga̱jma̱a̱ numuu xuajen. 52 Ga̱jma̱a̱ raʼkháa i̱ndó numuu xuajen, ma̱ngaa mu magímbíin xúgíinʼ e̱ji̱i̱n Dios bi̱ kúwá asndu náá, mu makuwíin mbóó. 53 Ikha jngóo asndu mbiʼi rúʼko̱ niri̱ya̱ʼ awan mu muxiyáa.

54 Ikha jngóo Jesús niniñuuʼ rajngruigo̱o̱ pa̱jnu náa majñúnʼ judíos, ga̱jma̱a̱ nigájnuu ni̱jkha̱ náa mbá xuajen rí mbiʼyuu Efraín, rí gíʼ mijngii náa ku̱ba̱ʼ mijxooʼ, ikhí niguanúu gajmíi̱n xa̱bi̱i̱. 55 Najngiyuu má rí muniriya̱a̱ʼ ndxa̱a̱ Pascua xa̱bu̱ judíos, ga̱jma̱a̱ mbaʼin xa̱bu̱ bi̱ kúwá náa xuajen rúʼko̱ nitsimún náa Jerusalén nákha xóó tserígá Pascua mu muni̱ kaʼwumijnáa xó má naʼthí náa xtángoo. 56 Ga̱jma̱a̱ nigíʼdi̱i̱ ndiyáaʼ Jesús náa guʼwá rí nduyamajkuíí Dios ga̱jma̱a̱ nitamijná: “Dí eta̱la ikháanʼ. Lá xáʼkha̱ náa ndxa̱a̱ xáʼ.” 57 Mú ndxajkun bi̱ kuya̱ edxu̱u̱ ga̱jma̱a̱ fariseos nitañajúúnʼ xa̱bu̱, rí á mu mbáa ndaʼyoo náa xtáa Jesús, maʼthúún, mu xúʼko̱ murtuwiin.