Rí na̱jkha̱ inún Romanos

8 Ikha jngóo, bi̱ kúwá náa Cristo Jesús makujmiin rí na̱nguá guáʼdáá aʼkhúún. 2 Numuu rí xtángoo ndrígóo espíritu santo* rí naʼni makuwáánʼlú náa Cristo Jesús niʼni káwáanʼlu náa xtángoo ndrígóo aʼkhá ga̱jma̱a̱ náa rí nakháñulú. 3 Numuu rí ni̱ndxu̱lú xa̱bu̱ aʼkhá, Xtángoo tséʼngo̱o̱ gáʼni rí gíʼmaa maʼni ga̱jma̱a̱ tséʼngo̱o̱ gáʼni káwáanʼ. Mú Dios nikungua̱a̱nʼ A̱ʼdióo xóo mbáa xa̱bu̱ numbaaʼ bi̱ gíʼdoo aʼkhá mu maʼni jngudi̱i̱ aʼkhá, xúʼko̱ niʼni gámbóo aʼkhá dí rígá náa xuwiʼ, 4 mu mambanúu rí na̱nda̱ʼa̱ Xtángoo náa ikháanʼlu, numuu rí nuniʼñámíjná rí espíritu santo maxnúlú ikha, raʼkháa xuwiʼ. 5 Bi̱ kúwá xóo rí nandoo xuwiʼ, nundxa̱ʼwa̱míjna̱ náa i̱ndó rí nandoo xuwiʼ, mú bi̱ kúwá xó má nandoo espíritu santo, nundxa̱ʼwa̱míjna̱ xó má nandoo espíritu santo. 6 Á mu nundxaʼwamíjná náa rí nandoo xuwiʼ maʼga kaguáanʼ makhañúlúʼ, á mu rí nundxaʼwamíjná náa rí nandoo espíritu santo, maʼga kaguáanʼ makuwáánʼlu ga̱jma̱a̱ makuwáánʼ tsímáá gajmiúlú Dios; 7 rí mundxaʼwamíjná náa xuwiʼ naʼni rí muguaʼdáá sia̱nʼ náa Dios, numuu rí xuwiʼ tséʼnimbo̱o̱ xtángoo ndrígóo Dios, asndu ní xáʼnimbo̱o̱ má. 8 Ikha jngóo bi̱ nakúwá xóo rí nandoo xuwiʼ, xándoo gúni rí nanigu̱u̱ʼ Dios.

9 Á mu gajkhun kuaʼdáá espíritu santo ndrígóo Dios, ikháanʼla mu̱ni̱ rí nandoo espíritu santo raʼkháa rí nandoo xuwiʼ. Mú á mu mbáa tséʼni xóo rí niʼni* Cristo, xa̱bu̱ bugi̱ na̱nguá xtáa mbóó ga̱jma̱a̱ ikhaa. 10 Á mu Cristo xtáa mbóó ga̱jma̱á nindxa̱la, xuyala nikháñuu náa aʼkhá ga̱jma̱a̱ espíritu santo naʼni rí makuwáanʼla numuu rí nijuiʼthá rí nindxa̱la xa̱bu̱ jmbii. 11 Á mu espíritu santo dí nikujxi̱i̱* Cristo náa majñúnʼ wajinʼ rígá náa ikháanʼla, Dios bi̱ niʼniga̱bi̱i̱ Cristo Jesús náa majñúnʼ wajinʼ ikhaa maʼni rí mbaʼya xuyala,* numuu rí espíritu santo ndrígóo rígá náa ikháanʼla.

12 Ikha jngóo a̱ngui̱nʼ, xúʼnimbulú rí nagua̱ʼa̱ maʼni xuyulú. 13 Á mu nunimbala rí naʼni xuyala makhañála. Mú á mu nuniʼñáánʼla dí espíritu santo maxíyáa dí ra̱májánʼ dí naʼni xuyala, ikhú makuwa̱a̱nʼ. 14 Numuu rí xúgíinʼ bi̱ nuniñami̱jna̱ maxnún ikha espíritu santo ndrígóo Dios, buʼko̱ ni̱ndxu̱ún e̱ji̱i̱n Dios. 15 Numuu rí espíritu santo ndrígóo Dios na̱nguá eʼni rí manindxu̱lú ñumbáá ga̱jma̱a̱ tséʼni rí mamiñúlú mbu̱júu̱, mú espíritu santo na̱jkha̱ kaguáanʼ manindxu̱lú e̱ji̱i̱n ga̱jma̱a̱ espíritu santo naxkaxáanʼ muʼthálú: “¡Abba,* Anu̱ʼ!”. 16 Espíritu santo ndrígóo Dios naʼthúlú* rí ni̱ndxu̱lú e̱ji̱i̱n Dios. 17 Á mu ni̱ndxu̱lú e̱ji̱i̱n Dios, mundrígúu rí ikhaa maxnúlú xóo rí nigruigúu Cristo, i̱ndó á mu numíniiʼ xó má rí nimínuuʼ Cristo, i̱ndó xúʼko̱ mundrígú gamajkhu xó má rí nigruigú ikhaa.

18 Ikha jngóo, nandxa̱ʼwa̱mínáʼ náa tsínginá dí numíníʼlú xúgi̱ tsémbríguíi ga̱jma̱a̱ rí mundrígúulú nda̱wa̱á. 19 Numuu rí xúgíʼ dí nigumawíi* gíʼthu̱u̱n mbaʼñúún e̱ji̱i̱n Dios índo̱ gákujmiin. 20 Xúgíʼ dí niguma ni̱jkha̱nú ninindxu̱u̱ ndíí, raʼkháa mu xúʼko̱ nindoo ikhaa, numuu rí Dios má nindoo dí xúʼko̱ marigá mu ma̱ndoo marigá rí magiʼthu̱u̱n, 21 rí nigumawíi makríya̱a̱ʼ rí ní xáxtáa xóo ñumbáá náa aʼkhá ga̱jma̱a̱ náa rí nakháñulú, xó má nikáwíin e̱ji̱i̱n Dios xúʼko̱ má gakríya̱a̱ʼ ma̱ngaa. 22 Nduʼyáá rí xúgíʼ dí nigumawíi nagáwíinʼ a̱jkiu̱u̱n ga̱jma̱a̱ namínuuʼ asndu mbiʼi xúgi̱. 23 Raʼkháa i̱ndó ikhaa, ikháanʼlú ma̱ngaa, bi̱ nikhánúlú giniáanʼ dí mundrígúu espíritu santo, maski má xúʼko̱ nagawúnlú asndu náa awúu̱n a̱jkiu̱lú índo̱ kuwáanʼ ruguáʼthi̱i̱n mu magruiguáanʼ, mu manindxu̱lú e̱ji̱i̱n, ikhaa ma̱ndoo maʼni rígi̱ numuu rí Cristo niʼtsiwáánʼlú mu muriʼkuriya̱a̱ʼ ga̱jma̱a̱ xuyulúʼ. 24 Numuu rí niguma káwáanʼlu náa rí kua̱ʼthi̱i̱n rígi̱. Á mu mbá rí kua̱ʼthi̱i̱n nakujmaa má, nánguá má nindxu̱u̱ mbá rí kua̱ʼthi̱i̱n, á mu ndaʼyoo má mbáa xa̱bu̱ dí rígá má dí gíʼthu̱u̱n, lá ndayóoʼ xóó magiʼthu̱u̱n xáʼ. 25 Á mu nuguáʼthi̱i̱n mbá rí xóó tséʼyáá, nuguáʼthi̱i̱n má xúʼko̱ ga̱jma̱a̱ nandulú wéñuuʼ mbuʼyáá.

26 Xúʼko̱ má kayuuʼ espíritu santo ma̱ngaa, nambáyulúʼ índo̱ nakáguabáanʼlú. Numuu rí nguáná tséʼyáá ndiéjunʼ gúnda̱ʼa̱ índo̱ rí nuʼtájkáan,* mú espíritu santo naʼtájkáan ga̱jma̱a̱ numulú índo̱ numbi̱ya̱ʼ ga̱jma̱a̱ tsígriya̱ʼ rí muʼthálu. 27 Dios bi̱ naʼninuuʼ a̱jkiu̱lú ndaʼyoo ndiéjunʼ eyoo gáʼthí espíritu santo, numuu rí ikhaa má na̱nda̱ʼa̱ xó má rí eyoo Dios ga̱jma̱a̱ numún bi̱ kaʼwiin.

28 Nduʼyáá má rí xúgíʼ dí Dios naʼni, nayambáá mu mambáñún bi̱ nandún kuyáá Dios, bi̱ niwatsaʼwúún xó má ikhaa nandoo. 29 Numuu rí ikhaa má ndiʼñún asndu nákha ginii ga̱jma̱a̱ asndu nákha wapháá niraʼwíin mu mani̱ndxu̱ún ikhaa kayúúʼ xóo A̱ʼdióo, mu ikhaa mani̱ndxu̱u̱ a̱ʼdá giʼnii náa xúgíinʼ a̱ngui̱i̱n. 30 Ma̱ngaa bi̱ asndu nákha wapháá niraʼwíin, nindxaʼwún; ga̱jma̱a̱ bi̱ nindxaʼwún niʼthí rí ni̱ndxu̱ún jmbiin. Nda̱wa̱á kayuuʼ bi̱ niʼthí rí ni̱ndxu̱ún jmbiin ndiʼyamajkhún.

31 Ikha jngóo, ndiéjunʼ gúʼthá ga̱jma̱a̱ numuu rígi̱ rá. Á mu Dios xtáa ga̱jma̱a̱ ni̱ndxu̱lú, tsáá gáʼngo̱o̱ gáʼni ga̱jma̱á ni̱ndxu̱lú rá. 32 Rí asndu ikhaa tágáwíinʼ a̱jkiu̱u̱n kaʼyoo A̱ʼdióo dí nixnáa ga̱jma̱a̱ numulúʼ xúgiáanʼ, lá xáxnulú i̱ʼwáʼ rí gúnda̱ʼa̱a̱ xáʼ. 33 Tsáa gákruigi̱i̱n bi̱ Dios má niraʼwíin rá. Dios má naʼthí rí ni̱ndxu̱ún jmbiin. 34 Tsáa gáʼthí rí mugíʼniin xá. Cristo Jesús bi̱ nikháñuu, mú raʼkháa i̱ndó rúʼko̱ ma̱ngaa nitujxi̱i̱,* xtáa náa níjñu mújúunʼ Dios, bi̱ naʼthí ga̱jma̱a̱ numulú.

35 Tsáa gáʼngo̱o̱ gáʼni rí Cristo xándoo kaʼyulú rá. Ga̱ʼkhu̱ ráʼ. Gamiéjunʼ dxe̱ʼ. Dí nunigínáánʼlú xáʼ. Ewiʼ ráʼ. Dí nda̱a̱ xtíñúlúʼ dxe̱ʼ. Gamíi ráʼ. O dí muradiáanʼlu dxe̱ʼ. 36 Xó má eʼthí náa kiʼnirámáʼ: “Ga̱jma̱a̱ numaaʼ ikháán nandún dí muradiáanʼxu má xúʼko̱. Nduyáá rí ni̱ndxu̱xu̱ʼ xóo mugu̱ bi̱ kaʼyoo rí makhañúu”. 37 Mú ga̱jma̱a̱ numuu bi̱ nindoo kaʼyulú, niguma káwáanʼlu náa xúgíʼ rígi̱. 38 Numuu rí nda̱yo̱o̱ gajkhun rí ni makhañúlúʼ, ni rí mbuʼya, ni ángeles, ni xa̱bu̱ ñajunʼ, ni má dí rígá xúgi̱, ni má dí marigá nda̱wa̱á, ni tsiakii, 39 ni rí mitsídánʼ, ni rí mi̱jnu̱ʼ, ni i̱mba̱ rí nigumawíi ma̱ndoo matsíngúlú náa ngajua rí gíʼdáánʼ Dios dí rígá náa Cristo Jesús, Tátá ndrígúlú.