Rí niʼnirámáʼ Juan

17 Nda̱wa̱á rí niʼthí rígi̱, Jesús niyejxiraʼan mekhuíí ga̱jma̱a̱ niʼthí: “Anu̱ʼ ni̱jkha̱nú má mbiʼi. Atani̱ mba̱a̱ a̱ʼdiáaʼ mu a̱ʼdiáaʼ maʼni mba̱a̱n, 2 xó má ikháán niraxnáá ñajunʼ dí maʼtáñajúúnʼ xúgíinʼ xa̱bu̱, mu ikhaa maʼni rí makuwá kámuu xúgíinʼ bi̱ ikháán niraxniáá. 3 Rígi̱ eyoo gáʼthúu̱n rí makuwá kámuu mbiʼi: Rí muninuwíínʼ ikháán, mbáwíín ikháán bi̱ nindxa̱a̱ʼ Dios gajkhun, ga̱jma̱a̱ muninuwiinʼ Jesucristo bi̱ ikháán nitaxúngua̱a̱nʼ. 4 Ikhúúnʼ ni̱ni̱ mba̱a̱n náa tsu̱du̱u̱ ku̱ba̱ʼ; ninigájxu̱u̱ ñajunʼ rí ikháán niraxná ngawuʼ. 5 Rí xúgi̱ rá Anu̱ʼ, atatsíñúʼ maxtáá mbu̱júu̱ʼ náa níjniáaʼ ga̱jma̱a̱ magruígúu gamajkhu xóo rí nigúʼdoo nákha xóó tséguma numbaaʼ.

6 Nixnu̱u̱n muniʼnuuʼ* mbiʼyaaʼ xa̱bu̱ bi̱ kúwá náa numbaaʼ. Bi̱ ikháán niraxniúʼ, ndrígiáaʼ ikháán ni̱ndxu̱ún, mú niraxniúʼ ikhúúnʼ, ga̱jma̱a̱ ninimbu̱u̱n ajngáaʼ. 7 Rí xúgi̱, ikhiin niguánú ndiyáá dí xúgíʼ dí niraxnúʼ na̱ʼkha̱ náa ikháán; 8 numuu dí ni̱sngúún ajngáa dí niraxnúʼ ga̱jma̱a̱ ikhiin nindrigú ma̱ngaa niguánú ndiyáá rí ni̱ʼkhá xóo xtiʼkuaaʼ, ga̱jma̱a̱ ninimbu̱ún rí ikháán nitaxúngu̱u̱nʼ. 9 Na̱nda̱ʼa̱ ga̱jma̱a̱ numún ikhiin, tsénda̱ʼa̱ ga̱jma̱a̱ numún bi̱ kúwá náa numbaaʼ, na̱nda̱ʼa̱ ga̱jma̱a̱ numún bi̱ ikháán niraxniúʼ numuu rí ndrígiáaʼ ni̱ndxu̱ún; 10 xúgíʼ rí gúʼdoo ndrígáaʼ má ikháán, ga̱jma̱a̱ xúgíʼ rí ndrígáaʼ ndrígóʼ má mangúún, ga̱jma̱a̱ ikhúúnʼ niguma mbu̱u̱n náa majñúnʼ ikhiin.

11 Ikhúúnʼ nánguá xtáá náa numbaaʼ, mú ikhiin kúwá náa numbaaʼ, ikhúúnʼ na̱jkháaʼ náa ikháán. Anu̱ʼ, ikháán bi̱ kaʼwíín, atiewu̱u̱n ga̱jma̱a̱ numuu mbiʼyaaʼ, rí ikháán niraxnúʼ, mu ikhiin makuwá mbá kambáxu̱u̱n xó má ikháanʼ kuwáánʼ mbá kambáxulú. 12 Índo̱ nixtáá gajmíʼ, ikhúúnʼ niñewu̱u̱n ga̱jma̱a̱ numuu mbiʼyaaʼ, bi̱ ikháán niraxniúʼ, ikhúúnʼ niñewu̱u̱n ga̱jma̱a̱ nimbáa dí ikhiin tándati̱ga̱a̱, i̱ndó mbáwíi bi̱ nindáti̱ga̱a̱ ikhaa buʼko̱ bi̱ maguma gámbáa, mu mambanúu dí naʼthí náa Kiʼnirámáʼ. 13 Mú rí xúgi̱ na̱jkháaʼ náa ikháán ga̱jma̱a̱ na̱tha̱ rígi̱ nákha xóó xtáá náa numbaaʼ mu ikhiin maʼdxúún xóo rí nadxuʼ ikhúúnʼ. 14 Ni̱thu̱u̱n ajngáaʼ, mú xa̱bu̱ numbaaʼ niwiñu̱u̱nʼ kuñún numuu dí raʼkháa náa numbaaʼ ñajúúnʼ, xó má ikhúúnʼ na̱nguá ni̱ndxu̱ʼ náa numbaaʼ.

15 Tsénda̱ʼa̱a̱ʼ rí matrawíin náa numbaaʼ, i̱ndó na̱nda̱ʼa̱a̱ʼ rí matie̱wu̱u̱n náa Gixa̱a̱.* 16 Ikhiin na̱nguá ni̱ndxu̱ún náa numbaaʼ rígi̱, xó má ikhúúnʼ na̱nguá ni̱ndxu̱ʼ náa numbaaʼ rígi̱. 17 Atani̱ kaʼwi̱i̱n ga̱jma̱a̱ rí gajkhun, ajngáaʼ nindxu̱u̱ gajkhun. 18 Xó má ikháán nitaxúngu̱u̱nʼ náa numbaaʼ, mangúún nikuʼmíin náa numbaaʼ. 19 Ikhúúnʼ na̱ni̱ kaʼwumina̱a̱ʼ ga̱jma̱a̱ numún ikhiin, mu mangiin maguma kaʼwi̱i̱n ga̱jma̱a̱ rí gajkhun.

20 Tsénda̱ʼa̱a̱ʼ i̱ndó ga̱jma̱a̱ numún ikhiin, ma̱ngaa na̱nda̱ʼa̱a̱ʼ ga̱jma̱a̱ numún bi̱ gáguaʼdáá fe náa ikhúúnʼ ga̱jma̱a̱ ajngáa rí ikhiin gúthi, 21 mu xúgíinʼ ikhiin mani̱ndxu̱ún mbóó. Xó má ikháán Anu̱ʼ xtaa mbóó ga̱jma̱á ni̱ndxu̱ʼ ga̱jma̱a̱ ikhúúnʼ xtáá mbóó ga̱jma̱á nindxa̱a̱ʼ, ikhiin mangiin makuwá mbóó ga̱jma̱á ni̱ndxu̱lú, mu xúʼko̱ xa̱bu̱ numbaaʼ munimbu̱ún rí ikháán nitaxúngu̱u̱nʼ. 22 Nixnu̱u̱n gamajkhu dí ikháán niraxnúʼ mu mangiin makuwá mbóó xó má ikháanʼlú kuwáánʼ mbóó: 23 Ikhúúnʼ xtáá mbóó gajmíʼ ga̱jma̱a̱ ikháán xtaa mbóó ga̱jma̱á ni̱ndxu̱ʼ mu ikhiin makuwá mbá kambájxu̱u̱n. Xúʼko̱ xa̱bu̱ numbaaʼ mbuyáá rí ikháán nitaxúngu̱u̱nʼ ga̱jma̱a̱ nindaaʼ xtañún ikhiin xó má nindaaʼ xtayoʼ ikhúúnʼ. 24 Anu̱ʼ, nandoʼ rí bi̱ niraxniúʼ makuwá mbóó ga̱jma̱á ni̱ndxu̱ʼ náa ikhúúnʼ gáxtáá, mu mbuyáá gamajkhu rí ikháán niraxnúʼ, numuu rí nindaaʼ xtayoʼ nákha xóó tséguma numbaaʼ. 25 Anu̱ʼ ikháán rí natani̱ dí májánʼ, xa̱bu̱ numbaaʼ xóó tséguánú muni̱ nuwíínʼ, mú ikhúúnʼ naniʼníínʼ ga̱jma̱a̱ ikhiin niguánú ndiyáá rí ikháán nitaxúngu̱u̱nʼ. 26 Ikhúúnʼ nixnu̱u̱n mbuyáá mbiʼyaaʼ ga̱jma̱a̱ maxnu̱u̱n mbuyáá má xúʼko̱, mu xó má nindaaʼ xta̱yo̱ʼ ikhúúnʼ xúʼko̱ má gáʼndaaʼ xtañún mangiin ga̱jma̱a̱ ikhúúnʼ maxtáá mbóó gajmíʼ ikhiin”.