Génesis

12 Jeobá niʼthúu̱n Abrán: “Agajnáaʼ náa xuajñaanʼ atatsíñúnʼ bi̱ xtañún ga̱jma̱a̱ bi̱ kúwá náa goʼwóo ana̱a̱ʼ,* mu mi̱dxu̱ʼ gáraxtaa náa xuajin rí ikhúúnʼ gásngajmáaʼ. 2 Ma̱ni̱ dí mi̱dxu̱ʼnú ma̱nindxa̱a̱ʼ mbá xuajin mba̱a̱, ma̱ni̱ tsajkurámááʼ, ma̱ni̱ mba̱a̱ mbiʼyaaʼ ga̱jma̱a̱ numaaʼ ikháán maguma tsajkurámiinʼ eʼwíinʼ. 3 Ikhúún ma̱ni̱ tsajkurámiinʼ bi̱ gúni̱ tsajkurámááʼ ga̱jma̱a̱ maʼta tsríguíi asndu tsáa bi̱ gáʼta tsríguíín ga̱jma̱a̱ numaaʼ ikháán maguma tsajkurámiinʼ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ”.

4 Ikha jngóo, Abrán niʼnimbánuu rí Jeobá niʼthúu̱n, nigájnuu ni̱jkha̱ ma̱ngaa ni̱jkha̱ ga̱jma̱a̱ Lot. Abrán gíʼdoo 75 tsiguuʼ índo̱ nigájnuu náa Harán. 5 Ikhú nigájnuu ni̱jkha̱ náa ku̱ba̱ʼ ndrígóo Canaán, ni̱jkha̱ ga̱jma̱a̱ Sarái bi̱ nindxu̱u̱ a̱ʼgiu̱u̱ ga̱jma̱a̱ Lot bi̱ nindxu̱u̱ a̱ʼdióo ndxájuu, xó má xúgíʼ rí gíʼdoo ma̱ngaa xúgíinʼ xa̱bu̱ bi̱ numbayíí bi̱ nigui̱i̱n náa Harán. Índo̱ niguánú náa ku̱ba̱ʼ ndrígóo Canaán, 6 Abrán ninújngoo náa xúgíʼ ku̱ba̱ʼ rúʼko̱ asndu ni̱jkha̱nú náa mbaaʼ rí mbiʼyuu Siquem náa mijngii rígá ixi̱ mba̱ʼu̱ ndrígóo Moré. Nákha mbiʼi rúʼko̱, xa̱bu̱ cananeos kúwá náa ku̱ba̱ʼ rúʼko̱. 7 Ikhí Jeobá nisngájmaminaʼ náa inuu Abrán ga̱jma̱a̱ niʼthúu̱n: “Ku̱ba̱ʼ rígi̱ maxnu̱u̱ e̱jña̱a̱ʼ”. Ikhú Abrán niʼni mújúunʼ náa maxnájxi̱ tsigijñaʼ náa inuu Jeobá bi̱ nisngájmaminaʼ náa ikhaa. 8 Nda̱wa̱á nigájnuu ni̱jkha̱ xígií náa nagájnuu a̱jkha̱ʼ* náa kúbá dí rígá náa Betel, nigíʼ guʼwá xtíin ndrígóo náa majñu̱u̱ʼ Betel ga̱jma̱a̱ Hai. Betel gíʼ xígií náa narámaaʼ a̱jkha̱ʼ* mú Hai gíʼ náa nagájnuu a̱jkha̱ʼ. Ikhí niʼni mújúunʼ náa maxnájxi̱ tsigijñaʼ náa inuu Jeobá ga̱jma̱a̱ nigíʼdu̱u̱ nigríga̱a̱* mbiʼyuu Jeobá. 9 Nda̱wa̱á, Abrán nigujxi̱i̱ náa rí xtáa ga̱jma̱a̱ mámbá náa ni̱jkha̱ ragiwa̱nʼ raxtáaʼ mu maʼga̱nú xígií náa Négueb.

10 Mú nigi̱ʼdu̱u̱ nirígá ewiʼ náa xuajin rúʼko̱. Numuu dí ewiʼ ra̱ʼkhá tháán gakhi̱i̱ niʼni, ikha jngóo Abrán ni̱jkha̱ gáxtáa náa Egipto mbá nguáthá tiempo. 11 Índo̱ inu mato̱ʼo̱o̱ náa Egipto, niʼthúu̱n Sarái bi̱ nindxu̱u̱ a̱ʼgiu̱u̱: “Mbá péñu* atadxawunʼ. Nda̱yo̱o̱ dí ra̱ʼkhá tháán mitsiʼñán. 12 Índo̱ xa̱bu̱ egipcios gúyaaʼ, nda̱yo̱o̱ gajkhun dí ikhiin muthi ‹A̱ʼgu̱ bugi̱ nindxu̱u̱ a̱ʼgiu̱u̱›. Ikhú muxiñún mu ikháán xúxiñáán. 13 Mbá péñu arathún dí nindxa̱a̱ʼ giʼtio̱ʼ mu xúʼko̱ muniu̱ʼ dí májánʼ ga̱jma̱a̱ xúxiñúu”.

14 Índo̱ Abrán nito̱ʼo̱o̱ náa Egipto, xa̱bu̱ egipcios ndiyáá dí Sarái ra̱ʼkhá tháán mitsiʼyáa. 15 Ma̱ngaa ndiyáá príncipes ndrígóo faraón ga̱jma̱a̱ nigíʼdi̱i̱ nitháán faraón dí ra̱ʼkhá tháán mitsiʼyáa. Ikha jngóo Sarái nigún kuya̱a̱ náa goʼwóo faraón. 16 Ikhaa niʼniuu rí májánʼ Abrán ga̱jma̱a̱ numuu a̱ʼgiu̱u̱. Abrán nikániáán mugu̱, xedi̱, búrru itsí, búrru e̱ʼgú, camellos, xó má gu̱ʼu̱ ga̱jma̱a̱ xa̱bekha bi̱ mumbayíí. 17 Mú Jeobá nikuʼma gamiéjunʼ náa inuu faraón ma̱ngaa náa bi̱ kúwá náa goʼwóo ga̱jma̱a̱ numuu Sarái a̱ʼgiu̱u̱ Abrán. 18 Ikhú faraón nindxa̱ʼóo Abrán ga̱jma̱a̱ niʼthúu̱n: “Náá numuu rí xígi̱ nitaniuʼ. Ndíjkha dí tárathu̱nʼ dí nindxu̱u̱ a̱ʼgia̱a̱ʼ xá. 19 Náá numuu dí nirathúnʼ, ‹Giʼtio̱ʼ nindxu̱u̱›. Ikhúún niʼgíʼ mba̱ya̱a̱, gi̱i̱ xtáa a̱ʼgia̱a̱ʼ. ¡Ayu̱u̱ʼ ga̱jma̱a̱ʼ!”. 20 Ikhú faraón niʼtáñajúúnʼ xa̱bi̱i̱ dí magún gajmiún Abrán ga̱jma̱a̱ a̱ʼgiu̱u̱ asndu índo̱ gagajnáá náa xuajin ga̱jma̱a̱ xúgíʼ rí guáʼdáá.