Rí niʼnirámáʼ Juan

9 Índo̱ xtáa ranújngoo ndiʼyoo mbáa xa̱bu̱ bi̱ tsíkruigo̱o̱ asndu nákha nigumaa. 2 Ikhú xa̱bi̱i̱ nirajxi̱i̱: “Maestro,* tsáa niʼni aʼkhá ikha jngóo tsíkruigo̱o̱ nigumaa xa̱bu̱ bugi̱: Ikhaa xáʼ o anu̱u̱ ga̱jma̱a̱ ru̱dúu̱ dxe̱ʼ.” 3 Ikhú Jesús niriʼñúún: “Na̱nguá niʼni aʼkhá ikhaa ni má ru̱dúu̱ ni má anu̱u̱, nirígá rígi̱ mu xúʼko̱ makujmaa kaʼwu rí Dios gáʼni ga̱jma̱a̱ numuu. 4 Ndayóoʼ mu̱ʼni̱ ñajuunʼ bi̱ nikungu̱u̱nʼ nákhi xóó mbiʼíí. Numuu rí na̱ʼkha̱ mbruʼun, náa nímba̱a̱ xándoo mañajunʼ. 5 Índo̱ ikhúúnʼ xóó xtáá náa numbaaʼ, ikhúúnʼ ni̱ndxu̱ʼ agiuuʼ numbaaʼ”. 6 Nda̱wa̱á dí niʼthí rígi̱, ikhú nindujtáʼ náa ku̱ba̱ʼ ga̱jma̱a̱ nirmajan ga̱jma̱a̱ iya ndawuu. Nda̱wa̱á nigíʼmuu náa iduu xa̱bu̱, 7 ikhú niʼthúu̱n: “Ayuʼ gátrajñárígúu idaaʼ náa tanque ndrígóo Siloam” (rí nandoo gáʼthúu̱n “kixúngua̱a̱nʼ”). Ikha jngóo xa̱bu̱ ni̱jkha̱, ga̱jma̱a̱ niʼjñárígúu iduu, índo̱ nitanga̱a̱ nandoo nayejxi̱.

8 Ikhú xa̱bu̱ bi̱ xtáa mijngii gajmíi̱n ma̱ngaa bi̱ nduyáá rí nanda̱ʼa̱mínúʼ nithi: “Xa̱bu̱ bugi̱ nindxu̱u̱ bi̱ nanda̱ʼa̱mínúʼ án”. 9 Tikhuun nuthi: “Ikhaa nindxu̱u̱”. Eʼwíinʼ nuthi: “Raʼkháa, mú xúʼko̱ kiejxu̱u̱”. Mú ikhaa má niʼthí: “Ikhúúnʼ ni̱ndxu̱ʼ”. 10 Ikha jngóo nirajxi̱i̱: “Xú káʼnii nimbaʼta̱a̱ idaaʼ rá.” 11 Ikhaa niʼthún: “Xa̱bu̱ bi̱ mbiʼyuu Jesús nirmajan ku̱ba̱ʼ, nigíʼmuu iduʼ ga̱jma̱a̱ niʼthúnʼ: ‹Ayuʼ gátrajñárígúu idaaʼ náa Siloam›. Ikhú ni̱jkhá ga̱jma̱a̱ nijña̱a̱, xúʼko̱ nindoo niyejxi̱”. 12 Ikhú nirajxi̱i̱: “Náá xtáa xa̱bu̱ buʼko̱ rá.” Ikhú niʼthí: “Na̱nguá e̱yo̱o̱”.

13 Ikhú nigún kuya̱a̱ náa fariseos xa̱bu̱ bi̱ tsíkruigo̱o̱ nákha ginii. 14 Nindxu̱u̱ mbiʼi sábado* índo̱ Jesús nirmbáʼta̱a̱ iduu xa̱bu̱ ga̱jma̱a̱ ku̱ba̱ʼ dí nirmajan ga̱jma̱a̱ iya ndawuuʼ. 15 Ikhú fariseos mangiin nigíʼdi̱i̱ nirajxi̱i̱ xú káʼnii nindoo nimbaʼta̱a̱ iduu. Ikhú ikhaa niʼthún: “Nigíʼmuu ku̱ba̱ʼ rí nirmajan ga̱jma̱a̱ iya ndawuuʼ náa iduʼ, ikhú nijñarígúu ikha jngóo rí xúgi̱ nandoo nayejxi̱”. 16 Ikhú tikhuun fariseos nithi: “Xa̱bu̱ bugi̱ tséʼkha̱ náa Dios, numuu rí tséʼyamajkhuu sábado”. Eʼwíinʼ nuthi: “Mú, á mu xúʼko̱, xú káʼnii gándoo mbáa xa̱bu̱ aʼkhá maʼni milagro xóo rígi̱ rá.” Tsémbánún rí nuthi. 17 Ikhú nitangi̱i̱n nitháán bi̱ nimbaʼta̱a̱ iduu: “Ikháán nindxa̱a̱ʼ bi̱ nimbáʼta̱a̱ idaaʼ, tsáá nindxu̱u̱ ratá ikháán”. Ikhú xa̱bu̱ niʼthí: “Nindxu̱u̱ mbáa profeta”.*

18 Mú judíos tsénimbu̱ún rí ikhaa kúgoo iduu nákha ginii ga̱jma̱a̱ rí xúgi̱ nandoo nayejxi̱, asndu índo̱ nindxa̱ʼwa̱a̱ anu̱u̱ ga̱jma̱a̱ ru̱dúu̱. 19 Ikhú nirajxu̱u̱n: “Lá bugi̱ nindxu̱u̱ a̱ʼdiála bi̱ tsíkruigo̱o̱ nigumaa ráʼ. Mú, xú káʼnii dí xúgi̱ nandoo nayejxi̱ xá.” 20 Ikhú anu̱u̱ ga̱jma̱a̱ ru̱dúu̱ nithi: “Ndu̱ya̱a̱xu rí bugi̱ nindxu̱u̱ a̱ʼdiúxu bi̱ tsíkruigo̱o̱ nigumaa. 21 Na̱nguá eya̱a̱xu náá numuu rí xúgi̱ nandoo nayejxi̱, ga̱jma̱a̱ tséya̱a̱xu tsáá nirmbáʼta̱a̱ iduu. Gura̱jxi̱i̱la ikhaa, nikhi̱i̱ má, ga̱jma̱a̱ ikhaa má gáʼtala”. 22 Anu̱u̱ ga̱jma̱a̱ ru̱dúu̱ niriʼña xúgi̱ kaʼnii numuu rí nimíñúún kuñún judíos, numuu rí ikhiin nimbánún má rí muxkriya̱a̱ʼ náa guʼwá rí nuxnáá gamajkhu Dios* asndu tsáa bi̱ gáʼthí rí Jesús nindxu̱u̱ Cristo. 23 Ikha jngóo anu̱u̱ ga̱jma̱a̱ ru̱dúu̱ nithi “nikhi̱i̱ má. Gura̱jxi̱i̱la ikhaa”.

24 Ikhú nindxa̱ʼwa̱a̱ mbu̱júu̱ rí maʼni a̱jma̱ nuthu xa̱bu̱ bi̱ nimbaʼta̱a̱ iduu ga̱jma̱a̱ nitháán: “Atani mba̱a̱ Dios. Ikháanʼ ndu̱ya̱a̱xu rí xa̱bu̱ buʼko̱ nindxu̱u̱ xa̱bu̱ aʼkhá”. 25 Ikhaa niriʼñúún: “Tséyóo á mu nindxu̱u̱ xa̱bu̱ aʼkhá. I̱ndó nda̱yo̱o̱ rí nákha ginii tsíkruigo̱ʼ mú rí xúgi̱ nandoo nayejxi̱”. 26 Ikhú nirajxi̱i̱: “Ndiéjunʼ niʼniaaʼ. Xú káʼnii nirmbáʼta̱a̱ idaaʼ”. 27 Ikhaa niriʼñúún: “Nita̱la má, mú ikháanʼ tsénimbala. Náá numuu rí nandala ma̱tala mbu̱júu̱ʼ rá. Lá nandala rí mani̱ndxa̱la xa̱bi̱i̱ mangáanʼ xáʼ.” 28 Índo̱ nidxawíín rígi̱, ikhú nitha wéñiiʼ: “Ikháán nindxa̱a̱ʼ xa̱bi̱i̱ xa̱bu̱ buʼko̱, mú ikháanʼ ni̱ndxu̱xu̱ʼ xa̱bi̱i̱ Moisés. 29 Ndu̱ya̱a̱xu rí Dios niʼtámíjná ga̱jma̱a̱ Moisés, mú xa̱bu̱ bugi̱ na̱nguá eya̱a̱xu náa ni̱ʼkha̱”. 30 Ikhú xa̱bu̱ bi̱ nimbaʼta̱a̱ iduu niʼthí: “Naʼniuʼ tsiánguá rí ikháanʼ tséya̱a̱la náá ni̱ʼkha̱ xa̱bu̱ bugi̱ bi̱ nirmbáʼta̱a̱ iduʼ. 31 Nduʼyáá má rí Dios tséʼdxawún xa̱bu̱ aʼkhá, mú bi̱ namíñuu kaʼyoo Dios ga̱jma̱a̱ naʼni rí nandoo, buʼko̱ bi̱ naʼdxawuun. 32 Náa xúgíʼ rí ni̱ʼkha̱ rarígá, na̱nguá niʼdxawíín á mu nixtáa mbáa bi̱ nirmbáʼta̱a̱ iduu mbáa bi̱ tsíkruigo̱o̱ asndu nákhi nigumaa. 33 Á mu xa̱bu̱ bugi̱ tséʼkha̱ náa Dios, nda̱a̱ rí gájmaa maʼni”. 34 Ikhú nitháán: “Ikháán rí nigumáán ga̱jma̱a̱ mbaʼa wéñuuʼ aʼkhá, lá nandaaʼ marasngúxu ráʼ.” Ikhú nixkriya̱a̱ʼ.

35 Jesús niʼdxawun rí nixkriya̱a̱ʼ, ga̱jma̱a̱ índo̱ nixkamaa nirajxu̱u̱: “Xtaʼdáá fe náa A̱ʼdióo xa̱biya̱ ráʼ.” 36 Ikhú niriʼñuu: “Tátá, arathúnʼ tsáa nindxu̱u̱, mu xúʼko̱ magúʼdoo fe náa ikhaa”. 37 Ikhú Jesús niʼthúu̱n: “Ikháán nitayáá má. Ikhaa bi̱ xtaa raratamíjná ga̱jma̱a̱ʼ”. 38 Ikhú ikhaa niʼthí: “Tátá, gúʼdoo fe náa ikhaa”. Ga̱jma̱a̱ ikhú nismbáti̱go̱o̱ náa inuu. 39 Jesús niʼthúu̱n: “Ni̱ʼkhá náa numbaaʼ, mu ga̱jma̱a̱ rí gáni mambaʼta̱a̱ idún bi̱ tsíkruigu̱u̱n ga̱jma̱a̱ bi̱ nakruigu̱u̱n ni xúyejxi ga̱jma̱a̱ xúgi̱ kaʼnii gáxtaʼwíin bi̱ mumíniiʼ”. 40 Fariseos bi̱ tri̱gi̱i̱n ikhí gajmíi̱n nidxawíín rígi̱ ga̱jma̱a̱ nitháán: “Lá naku̱ma̱a̱ʼ rí tsíkrui̱gu̱xu mangáanʼ ráʼ.” 41 Jesús niriʼñúún: “Á mu tsíkrui̱gala, xáguaʼdáá aʼkhála. Mú xó má e̱ta̱la̱ ‹ikháanʼ nakrui̱gu̱xu›, ikha jngóo maguaʼdáá má xúʼko̱ aʼkhála”.