Timbá libro ndrígu̱ún Reyes

9 Índo̱ Salomón niguámbóo niʼni goʼwóo Jeobá, goʼwóo* rey ga̱jma̱a̱ xúgíʼ rí nindoo maʼni, 2 Jeobá nisngájmaminaʼ rí maʼni a̱jma̱ nuthu náa Salomón, ikháá má xóo nisngájmaminaʼ náa Gabaón. 3 Jeobá niʼthúu̱n: “Nidxawuun rí niratájkáan ga̱jma̱a̱ rí nitanda̱ʼa̱ náa ikhúún. Ni̱ni̱ kaʼwi̱i̱ guʼwá rígi̱ rí nitani̱ mu mbiʼyuʼ marigá asndu kámuu ikhí, iduʼ ga̱jma̱a̱ a̱jkiu̱nʼ marigá asndu kámuu ikhí. 4 Ga̱jma̱a̱ á mu najngrui̱ga̱a̱ʼ náa kambo̱ʼ xó má niʼni ana̱a̱ʼ* David ga̱jma̱a̱ mbá a̱jkia̱a̱nʼ kaʼwu ga̱jma̱a̱ májánʼ, ma̱ngaa natani̱ xúgíʼ rí natañájuanʼ, natatsimba̱a̱ʼ kiʼtáñajunʼ ga̱jma̱a̱ xtángoo ndrígóʼ, 5 ikhúún ma̱ni̱ rí xília̱a̱ʼ* dí maratañájunʼ náa Israel marigá kámuu, xó má nikuʼdáminaʼ náa ana̱a̱ʼ David índo̱ ni̱thu̱u̱n ‹Maxtáa má xúʼko̱ mbáa bi̱ na̱ʼkha̱ náa ikháán bi̱ magi̱ʼi̱ náa xílí rí nutañajunʼ náa Israel›. 6 Mú á mu ikháanʼla ga̱jma̱a̱ e̱jña̱la nuniʼñáánʼ ruyamajkhuʼ ga̱jma̱a̱ tsénimbáníí kiʼtáñajunʼ ndrígóʼ dí ni̱xna̱la, nduyamajkhún eʼwíinʼ dioses ga̱jma̱a̱ nusmbatígala̱ inún, 7 ikhú ma̱ni̱ gámbáa Israel náa ku̱ba̱ʼ rí ni̱xnu̱u̱ ga̱jma̱a̱ mayejxíngaa náa inuʼ guʼwá rí ni̱ni̱ kaʼwi̱i̱ náa marigá mbiʼyuʼ, Israel maʼga̱nú mani̱ndxu̱u̱ mbá rí xámájkhún kuyáá,* ga̱jma̱a̱ mutsijmaa xa̱bu̱ bi̱ kúwíin náa xúgíʼ xuajin. 8 Ga̱jma̱a̱ guʼwá rígi̱, i̱ndó idiuuʼ gáwanáa. Xúgíinʼ bi̱ gánújngún ikhí maʼniún tsiánguá índo̱ gúyejxi̱i̱, mujuiyú ga̱jma̱a̱ murajxi̱: ‹Náá numuu rí Jeobá niʼniuu xígi̱ kaʼnii ku̱ba̱ʼ ga̱jma̱a̱ guʼwá rígi̱ rá.› 9 Ikhú muthi: ‹Numuu rí niniña̱a̱nʼ Jeobá Dios ndrígu̱ún bi̱ niguwíin wajin xiʼñúúnʼ náa ku̱ba̱ʼ ndrígóo Egipto. Nigún kidxúúnʼ eʼwíinʼ dioses, nismbati̱gu̱u̱n náa inún ga̱jma̱a̱ ndiyamajkhún. Ikha jngóo Jeobá ni̱ʼkha̱ kagu̱u̱ xúgíʼ gamiéjunʼ rígi̱ náa ikhiin›”.

10 Mbá 20 tsiguʼ ndijyúuʼ Salomón mu maʼni a̱jma̱ guʼwá, goʼwóo Jeobá ga̱jma̱a̱ goʼwóo rey, 11 rey Salomón nixnúu Hiram, rey bi̱ xtáa náa Tiro, mbá 20 xuajin, náa ku̱ba̱ʼ dí rígá náa Galilea. Numuu dí Hiram nimbáyúu nixnúu ixi̱ cedro, enebro ga̱jma̱a̱ mbá xúgíʼ oro dí ikhaa nindoo. 12 Ikha jngóo Hiram nigájnuu náa Tiro, mu maʼga̱ gáʼyoo xuajin dí Salomón nixnúu, mú tánigu̱u̱ʼ.* 13 Niʼthúu̱n: “Náá gájmuʼ xuajin dí xígi̱ kaʼnii niraxnúʼ ndxájuʼ”. Ikha jngóo Cabul* nuxná mbiʼíí ku̱ba̱ʼ rúʼko̱ asndu rí mbiʼi xúgi̱. 14 Hiram nikuʼma náa inuu rey mbá 4,104 kilo* oro.

15 Gi̱i̱ tima mbiʼñún bi̱ rey Salomón nigímbiin mu muñejunʼ gakhi̱i̱, mu xúʼko̱ muni̱ goʼwóo Jeobá, goʼwóo ikhaa, náa Bíjní* ga̱jma̱a̱ xtájtsí ndrígóo Jerusalén, náa Hazor, Meguidó ga̱jma̱a̱ náa Guézer. 16 (Rey faraón bi̱ xtáa náa Egipto, nitsimuu ga̱jma̱a̱ nito̱ʼo̱o̱ náa xuajin Guézer. Nitsikhá ga̱jma̱a̱ nigudíin xa̱bu̱ cananeos bi̱ kúwá ikhí. Xuajin rígi̱ nixnúu xóo regalo wáxióo* índo̱ ninújunʼ bi̱ ndiyáa Salomón). 17 Salomón niʼni májáanʼ xuajin Guézer, Bet-Horón Baja, 18 Baalat, Tamar, náa ku̱ba̱ʼ mijxooʼ* dí rígá náa xuajin, 19 xúʼko̱ má náa xúgíʼ xuajin náa nagujxi̱i̱ dí gíʼdoo Salomón, náa xuajin dí rígá cárriu̱u̱, náa xuajin rí kúwíin xa̱bu̱ bi̱ nudrúwíin wáyú ga̱jma̱a̱ xúgíʼ rí nindoo maʼni Salomón náa Jerusalén, náa Líbano ga̱jma̱a̱ náa xúgíʼ xuajin dí ikhaa naʼtáñajunʼ. 20 Mú xúgíinʼ xa̱bu̱ bi̱ niguanún xóo amorreos, hititas, perizitas, heveos, jebuseos bi̱ na̱nguá nindxu̱ún xa̱bu̱ Israel, 21 Salomón nigruaʼmáʼ mbiʼñún bi̱ naguwáʼ náa ikhiin bi̱ xóó naguanún náa xuajin, bi̱ israelitas táʼngu̱u̱n gúni̱ gámbíin, mu xúʼko̱ muñajunʼ gakhi̱i̱, mani̱ndxu̱ún ñumbáá ga̱jma̱a̱ xúʼko̱ kúwíin asndu rí mbiʼi xúgi̱. 22 Mú Salomón táʼni dí israelitas mani̱ndxu̱ún ñumbáá, numuu rí ikhiin nindxu̱ún soldádiu̱u̱, xa̱bi̱i̱, príncipes, bi̱ kuya̱ edxu̱u̱ ga̱jma̱a̱ bi̱ kuya̱ edxu̱u̱ náa bi̱ nagún kudúún carro, ma̱ngaa nudrúwíin wáyú. 23 Kúwá mbá 550 bi̱ kuya̱ edxu̱u̱ náa bi̱ nuxna ikha náa ñajunʼ ndrígóo Salomón, ma̱ngaa bi̱ nuthúún xa̱bu̱ xóo muñajunʼ.

24 Wáxióo faraón nigájna̱a̱ náa Xuajñuu David mu maʼga̱a̱ náa goʼwóo rí Salomón niʼni. Ikhú Salomón niʼni Bíjní.

25 Salomón naxnájxi̱ ajtsú nuthu rí mbá tsiguʼ, tsigijñaʼ dí nakarámáʼ ga̱jma̱a̱ tsigijñaʼ dí tsímáá,* náa niʼni dí majuixnájxi̱ náa inuu Jeobá ma̱ngaa narkúní náa nakarámáʼ tsigijñaʼ dí gíʼ náa inuu Jeobá, xúʼko̱ kaʼnii niwájxu̱u̱ guʼwá.

26 Rey Salomón ma̱ngaa niʼni mbaʼa barcos náa Ezión-Guéber dí rígá náa Elot, náa rawuunʼ lamáa Maña̱ʼ,* náa ku̱ba̱ʼ ndrígóo Edom. 27 Hiram nikuʼmiin xa̱bi̱i̱ ga̱jma̱a̱ bi̱ naguʼwún nagún náa barco, mu magún kudúún barco mu muñajunʼ gajmiún xa̱bi̱i̱ Salomón. 28 Nigún náa Ofir ga̱jma̱a̱ ikhí niguwáa̱nʼ kudúún mbá 14,364 kilo* oro ga̱jma̱a̱ nixnajxi̱i̱ rey Salomón.