Timbá libro ndrígu̱ún Reyes

14 Nákhá ikhú niʼñuu nandii Abías a̱ʼdióo Jeroboán. 2 Ikhú Jeroboán niʼthúu̱n a̱ʼgiu̱u̱: “Mbá péñu,* ayuʼ, atagúwáanʼ i̱mba̱ xtíin mu xúyáá rí a̱ʼgiu̱u̱ Jeroboán nindxa̱a̱ʼ. Ayuʼ náa Siló, ikhí xtáa profeta* Ahíya, ikhaa niʼthí rí ikhúún mani̱ndxu̱ʼ rey náa xuajin rígi̱. 3 Ayuʼ gáta̱ya̱a̱, adagídxúʼ mbá gu̱wa̱ʼ pan, ma̱ngaa pan dí gíʼdoo tsígáʼ ga̱jma̱a̱ mbá ru̱jtu̱u̱ jyááʼ. Ikhaa gáʼtháanʼ ndiéjunʼ gágíʼnuu dxámá”.

4 A̱ʼgiu̱u̱ Jeroboán niʼni xó má ikhaa niʼthúu̱n, ni̱jkha̱ Siló ga̱jma̱a̱ ni̱jkha̱nú náa goʼwóo Ahíya. Numuu dí nikhi̱i̱, Ahíya nánguá krui̱go̱o̱, mbóó náa ye̱jxi̱.

5 Mú Jeobá niʼthúu̱n Ahíya: “A̱ʼkhu̱ e̱ʼkha̱ a̱ʼgiu̱u̱ Jeroboán gárajxa̱a̱ʼ ga̱jma̱a̱ numuu a̱ʼdióo, numuu dí naʼniuu nandii. Ma̱tha̱a̱nʼ má ikhúún ndiéjunʼ gíʼmaa maratha̱a̱n, i̱mba̱ xtíin kagíʼ gáʼkha̱nú”.

6 Índo̱ niʼdxawuun rajkhúu dí nakuʼmaminaʼ náa riejun, Ahíya niʼthí: “Ata̱ʼa̱a̱ʼ a̱ʼgiu̱u̱ Jeroboán, ndíjkha dí i̱mba̱ xtíin xtagíʼ. Nijuiʼthúnʼ rí ma̱tha̱a̱nʼ mbá ajngáa gakhi̱i̱. 7 Ayu̱u̱ʼ gáratha̱a̱n Jeroboán: ‹Rígi̱ dí naʼthí Jeobá Dios ndrígóo Israel: “Ikhúún niraʼwi̱i̱n náa majñu̱únʼ xa̱bia̱a̱ʼ, mu mbi̱ya̱ edxu̱u̱ náa xuajñunʼ Israel. 8 Nirígúu dí nutañajunʼ náa goʼwóo David ga̱jma̱a̱ nixna̱a̱ʼ ikháán. Mú ikháán tátani̱ xó má niʼni xa̱bi̱ʼ David, bi̱ niʼnimbo̱o̱ xúgíʼ kiʼtáñajunʼ ndrígóʼ, ndiʼyamajkuʼ ga̱jma̱a̱ xúgíʼ a̱jkiu̱u̱n índo̱ niʼni i̱ndó rí májánʼ náa iduʼ. 9 Ikháán itháan xkawiʼ nitani̱ ki xóo xúgíinʼ bi̱ nikúwá nákhá xóó tséraxtaa, nitani̱i̱ imba̱a̱ dios ga̱jma̱a̱ xándú bi̱ nigumiin ga̱jma̱a̱ ajua̱nʼ mu matani̱ rí makásnga̱ñu̱ʼ ga̱jma̱a̱ ikhúún nindxu̱ʼ bi̱ nitatsíñánʼ. 10 ¡Ikha jngóo makuʼmá mbá gamiéjunʼ náa goʼwóo Jeroboán! ¡Ma̱ni̱ gámbíin náa Israel mbá xúgíinʼ xa̱bekha* bi̱ kúwá náa Jeroboán, asndu bi̱ tséjmiin gúmbayúmíjná ga̱jma̱a̱ bi̱ guabiinʼ. Magíjxi̱i̱ mbá kayuuʼ náa bi̱ kúwá náa goʼwóo Jeroboán, xó má naxtagíjxi̱i̱ yuskún xujkhúʼ rí asndu nánguá guanúu nimbá! 11 Bi̱ kúwá náa Jeroboán bi̱ gákháñún náa xuajin muphu̱u̱n xu̱wánʼ, ga̱jma̱a̱ bi̱ gákháñún xanáá muphu̱u̱n ñu̱ʼu̱ bi̱ jngruigu̱u̱n rijma̱a̱. Numuu dí xígi̱ niʼthí Jeobá”›.

12 Dí xúgi̱ rá, ayu̱u̱ʼ guʼwáaʼ, índo̱ gátajngriga̱ náa xuajin, dxámá makhañúu. 13 Xúgíinʼ xa̱bu̱ Israel mumbi̱ya̱ʼ ga̱jma̱a̱ numuu ga̱jma̱a̱ mudi̱i̱. Ikhaa nindxu̱u̱ mbáwíí xígi̱ náa goʼwóo Jeroboán bi̱ mi̱ʼdi̱i̱ náa iñá wajinʼ. Numuu dí mbáwíí ikhaa bi̱ xtáa náa goʼwóo Jeroboán bi̱ Jeobá Dios ndrígóo Israel nixkamaa mbá rí májánʼ náa ikhaa. 14 Jeobá maʼni rí maxtáa imba̱a̱ rey náa Israel bi̱ maʼni gámbíin bi̱ kúwá náa goʼwóo Jeroboán índo̱ gáʼga̱nú mbiʼi, ga̱jma̱a̱ mbiʼi rúʼko̱ ni̱ʼkha̱nú má. 15 Jeobá maʼbatigú Israel, dí mani̱ndxu̱u̱ xóo e̱ʼi̱n* rí naʼbajngaa iyaʼ. Maxmátriya̱a̱ʼ asndu a̱jmu̱u̱ Israel náa ku̱ba̱ʼ májánʼ rí nixnún wajin xiʼñúuʼ ga̱jma̱a̱ maxídíriʼiin asndu náa i̱mba̱ ridoo mañu Éufrates. Numuu rí nini̱ makásngañu̱u̱ʼ Jeobá índo̱ nini̱ poste rí mitsúʼkháan.* 16 Ga̱jma̱a̱ maniñuuʼ Israel numuu aʼkhá rí nikudaminaʼ Jeroboán ga̱jma̱a̱ dí niʼni rí xa̱bu̱ Israel muxuʼdamíjna̱”.

17 Ikhú a̱ʼgiu̱u̱ Jeroboán niguajthun kamba̱a̱ ni̱jkha̱a̱, ni̱jkha̱núu náa Tirzá. Índo̱ ni̱jkha̱núu náa riejuun goʼwóo, nikháñúu dxámá. 18 Nidi̱i̱ ga̱jma̱a̱ mbá xúgíinʼ xa̱bu̱ Israel nimbi̱ya̱ʼ ga̱jma̱a̱ numuu, xó má ajngóo Jeobá dí niʼthí xa̱bi̱i̱ profeta Ahíya.

19 Dí naʼthí xóó itháan ga̱jma̱a̱ numuu Jeroboán, xóo nixmínaʼ ga̱jma̱a̱ xóo niʼtáñajunʼ, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Israel. 20 Mbiʼi dí Jeroboán niʼtáñajunʼ ninindxu̱u̱ 22 tsiguʼ. Nda̱wa̱á ndiyáa jxu̱u̱ʼ gajmíi̱n wajin xiʼñúuʼ, ga̱jma̱a̱ a̱ʼdióo Nadab ni̱jkha̱nú ninindxu̱u̱ nuxi̱i̱ʼ rey.

21 Ma̱ngaa Rehoboam a̱ʼdióo Salomón ni̱jkha̱nú ninindxu̱u̱ rey náa Judá. Rehoboam gíʼdoo 41 tsiguuʼ índo̱ ni̱jkha̱nú ninindxu̱u̱ rey ga̱jma̱a̱ niʼtáñajunʼ mbá 17 tsiguʼ náa Jerusalén, náa xuajin dí Jeobá niraʼwíí náa mbá xúgíʼ xuajin majkhaʼ* dí rígá náa Israel mu marigá mbiʼyuu ikhí. Ru̱dúu̱* Rehoboam mbiʼyuu Naamá, a̱ʼgú ammonita. 22 Xa̱bu̱ Judá nini̱ dí raʼkhí náa iduu Jeobá ga̱jma̱a̱ aʼkhá dí nini̱, niʼni rí makásngañu̱u̱ʼ itháan ki xóo dí nini̱ wajin xiʼñúúnʼ. 23 Ma̱ngaa nini̱ má xúʼko̱ náa rí mitsídánʼ, itsí rí mitsúʼkháan ga̱jma̱a̱ poste rí mitsúʼkháan, náa mbá xúgíʼ bíjní rí tsídánʼ ga̱jma̱a̱ náa agoo ixi̱ mba̱ʼu̱ rí maxaʼ. 24 Ma̱ngaa nikúwá xa̱bu̱ bi̱ nugujuamíjna̱ náa guʼwá rí nduyamajkhún dioses náa xuajin, ma̱ngaa nini̱ mbá xúgíʼ rí mixkawi̱ʼ rí nuni̱ xa̱bu̱ xuajin bi̱ Jeobá nixkawíin náa inún israelitas.

25 Dí maʼni witsu tsiguʼ rí xtáa raʼtáñajunʼ rey Rehoboam, rey Sisac bi̱ na̱ʼkha̱ náa Egipto nitsimuu gáxmína̱ʼ náa Jerusalén. 26 Ni̱jkha̱ kagu̱u̱ xúgíʼ dí gíʼdoo numuu dí rígá náa goʼwóo Jeobá ga̱jma̱a̱ dí gíʼdoo numuu dí rígá náa goʼwóo* rey, ni̱jkha̱ kagu̱u̱ xúgíʼ, asndu xúgíʼ escudo dí oro dí Salomón niʼni. 27 Ikha jngóo rey Rehoboam niʼni escudo dí cobre mu maxtiʼkuwíi ga̱jma̱a̱, nixnájxu̱u̱n dí nuñewa̱a̱n bi̱ kuya̱ edxu̱u̱ náa bi̱ nuyejngoo,* bi̱ nuñewa̱a̱n riejuun goʼwóo rey. 28 Mámbá dí rey na̱ʼkha̱ náa goʼwóo Jeobá, bi̱ nuyejngoo naguwáʼ kudúún escudo ga̱jma̱a̱ nda̱wa̱á natangiín kudúún náa cuarto dí kúwá bi̱ nuyejngoo.

29 Dí naʼthí xóó itháan ga̱jma̱a̱ numuu Rehoboam, xúgíʼ dí niʼni, kiʼniraʼmáʼ náa libro dí naʼthí ga̱jma̱a̱ numún reyes bi̱ nikúwá náa Judá. 30 Nixmínaʼ má xúʼko̱ Rehoboam ga̱jma̱a̱ Jeroboán. 31 Ikhú Rehoboam ndiyáa jxu̱u̱ʼ gajmíi̱n wajin xiʼñúuʼ ga̱jma̱a̱ nijuiʼdi̱i̱ gajmíi̱n wajin xiʼñúuʼ náa Xuajñuu David. Ru̱dúu̱ nigumbiʼyuu Naamá a̱ʼgú ammonita. Ga̱jma̱a̱ a̱ʼdióo bi̱ mbiʼyuu Abiyam* ni̱jkha̱nú ninindxu̱u̱ nuxi̱i̱ʼ rey.