I̱yi̱i̱ʼ rí na̱jkha̱ inún Hebreos

11 Fe nindxu̱u̱ rí xátani̱ a̱jma̱ a̱jkia̱a̱nʼ rí gajkhun mambanúu rí xtaʼti̱i̱n, rí ma̱ta̱ya̱a̱ gajkhun dí rígá maski ajndu tsékujmaa. 2 Ga̱jma̱a̱ numuu fe xa̱bu̱ bi̱ nikúwá nákha wajyúuʼ* niguánú ndiyáá rí Dios nigruiguíin.

3 Ga̱jma̱a̱ numuu fe, nandoo nakru̱ʼu̱lú dí rígá mekhuíí ga̱jma̱a̱ náa tsu̱du̱u̱ ku̱ba̱ʼ,* nitri̱ga̱ xó má kaʼyoo, xó má niʼthí Dios, ikha jngóo xúgíʼ rí nandoo nduʼyáá ni̱jkha̱nú nirígá ga̱jma̱a̱ numuu rí tsékujmaa.

4 Ga̱jma̱a̱ numuu fe, Abel nixnájxi̱ tsigijñaʼ náa Dios rí gíʼdoo itháan numuu ki xóo rí nixnájxi̱ Caín. Ga̱jma̱a̱ numuu fe, Dios niʼthúu̱n rí nindxu̱u̱ mbáa xa̱bu̱ jmbii, numuu rí nigruigú tsigijñaʼ ndrígóo. Maski ajndu nikháñuu, fe ndrígóo xóó naʼthí ga̱jma̱a̱ numuu.

5 Ga̱jma̱a̱ numuu fe, Enoc ni̱jkha̱ kiʼyáa mu xáʼyoo xóo gákháñuu, ga̱jma̱a̱ nimbáa táʼngo̱o̱ gáxkama̱a̱ numuu rí Dios ni̱jkha̱a̱ kayáa. Ga̱jma̱a̱ nákha xóó tséjkha̱ kiʼyáa Dios niʼthúu̱n dí nanigu̱u̱ʼ rí eʼni. 6 Ma̱ngaa á mu na̱nguá kuaʼdáálu fe, xándoo gúʼni̱ rí nanigu̱u̱ʼ Dios, numuu rí bi̱ nakuʼmaminaʼ náa Dios gíʼmaa maʼnimbo̱o̱ rí ikhaa xtáa ga̱jma̱a̱ rí ikhaa maʼni numi̱ín bi̱ nduyáaʼ ga̱jma̱a̱ xúgíʼ a̱jkiu̱ún.

7 Ga̱jma̱a̱ numuu fe, Noé, nda̱wa̱á rí Dios niʼthúu̱n dí marigá mbá rí xóó tserígá, nisngájma rí nimíñuu kaʼyoo Dios ga̱jma̱a̱ niʼni mbá arca mu maʼnikáwíin bi̱ kúwá náa goʼwóo. Ga̱jma̱a̱ numuu fe niʼthí rí xa̱bu̱ bi̱ kúwá náa numbaaʼ mambíin, ga̱jma̱a̱ xúʼko̱ Dios ndiʼyoo rí nindxu̱u̱ mbáa xa̱bu̱ jmbii numuu rí nigiʼdoo fe.

8 Ga̱jma̱a̱ numuu fe, Abrahán niʼnimbo̱o̱ índo̱ nijuatsaʼwáá ga̱jma̱a̱ nigájnuu ni̱jkha̱ náa ku̱ba̱ʼ rí nijuiʼtháán magruigúu. Nigájnuu ni̱jkha̱ maski ajndu tséʼyoo náá ejkha̱. 9 Ga̱jma̱a̱ numuu fe nixtáa xóo xa̱bu̱ na̱ʼkha̱á náa ku̱ba̱ʼ rí nijuiʼtháán makhánáá, nixtáa asndu xóo náa raʼkháa ku̱bo̱o̱ʼ. Nixtáa náa guʼwá xtíin ga̱jma̱a̱ Isaac ma̱ngaa Jacob, bi̱ mundrígúu ikháá má xóo rí magruigúu ikhaa. 10 Numuu rí ikhaa gíʼthu̱u̱n mbá xuajen rí niguma májánʼ, rí bi̱ niríyaʼ awan xóo maguma* ga̱jma̱a̱ bi̱ niʼni nindxu̱u̱ Dios.

11 Ga̱jma̱a̱ numuu fe, Sara nigruigú tsiakii rí magiʼdaa mbáa ada̱, maski ajndu nikhi̱i̱ má, numuu rí ni̱jkha̱nú ndiʼyoo rí bi̱ nikudaminaʼ maʼni rígi̱ gajkhun maʼnimbánuu. 12 Ga̱jma̱a̱ numuu rígi̱ náa mbáwíí xa̱bu̱ bi̱ asndu xóo nikháñuu má nigumiin mbaʼin wéñuuʼ e̱ji̱i̱n, ra̱ʼkhá tháán mbaʼin rí asndu xóo a̱ʼgua̱a̱n bi̱ tri̱gi̱i̱n mekhuíí ga̱jma̱a̱ asndu xóo jui̱ʼi̱ dí rígá náa rawuunʼ lamáa rí xáʼnga̱a̱ʼ gátra̱xnuu.

13 Niguáʼdáá má xúʼko̱ fe xúgíinʼ ikhiin asndu índo̱ nikháñún maski ajndu na̱nguá nindrigúu rí nijuiʼthúún makánún. Mú ndiyáá asndu mitsínguánʼ ma̱ngaa nikúwá gagi ga̱jma̱a̱ numuu rúʼko̱, ma̱ngaa nithi pa̱jnu rí ikhiin ni̱ndxu̱ún xa̱bu̱ bi̱ naguwaáʼ ga̱jma̱a̱ rí nakúwá káaʼ nguáthá mbiʼíí náa ku̱ba̱ʼ. 14 Bi̱ nuthi xúʼko̱ nusngajma kaʼwu rí nduyáʼ ga̱jma̱a̱ xúgíʼ a̱jkiu̱ún náa mbá rí makuwá. 15 Numuu rí á mu nindxa̱ʼwa̱míjna̱ má xúʼko̱ náa rí nigájnún, marigá mbá numuu rí maʼndún matangi̱ín. 16 Ikha jngóo rí xúgi̱, nunimíjna̱ rí muxkamaa mbá rí itháan májánʼ, xóo muʼthá mbá rí kaʼyoo mekhuíí. Ikha jngóo Dios tséti̱yu̱u̱ʼ ga̱jma̱a̱ numún ikhiin ni má rí muthán rí nindxu̱u̱ Dios ndrígu̱ún, numuu rí niʼniratoo mbá xuajen náa makuwá.

17 Ga̱jma̱a̱ numuu fe, Abrahán nijuiʼtháán mbá rí maʼni, ikhaa asndu xóo nixnájxi̱i̱ má Isaac, xúʼko̱ kaʼnii, mbáa xa̱biya̱ bi̱ nigruigú ga̱jma̱a̱ gagi rí nijuiʼtháán makhánáá, nigíʼ rí maxnájxi̱i̱ a̱ʼdióo bi̱ mbáwíí, 18 maski má asndu nijuiʼtháán: “Náa Isaac gáguwáʼ bi̱ mani̱ndxu̱ún ejña̱a̱nʼ”. 19 Mú ikhaa ni̱jkha̱nú ndiʼyoo rí Dios maʼngo̱o̱ asndu makujxi̱i̱* náa majñúnʼ bi̱ nikháñún, Dios niʼni kríyaaʼ mu xákhañuu ga̱jma̱a̱ rúʼko̱ nindxu̱u̱ xóo mbá xkri̱da dí nasngájma rí marigá nda̱wa̱á.

20 Ga̱jma̱a̱ numuu fe, Isaac ma̱ngaa niʼni tsajkurámaaʼ Jacob ga̱jma̱a̱ Esaú ga̱jma̱a̱ numuu dí maʼga̱nú marigá.

21 Ga̱jma̱a̱ numuu fe, Jacob, índo̱ inu makhañúu, niʼni tsajkurámiinʼ mámbíin e̱ji̱i̱n José ga̱jma̱a̱ ndiʼyamajkuu má xúʼko̱ Dios asndu índo̱ nimbáyuminaʼ ga̱jma̱a̱ ragótiu̱u̱.

22 Ga̱jma̱a̱ numuu fe, José niʼthí rí e̱ji̱i̱n Israel magajnáán náa Egipto* ga̱jma̱a̱ niʼtáñajúúnʼ ndiéjunʼ gúni̱ ga̱jma̱a̱ itsu̱u̱ índo̱ inu makhañúu.

23 Ga̱jma̱a̱ numuu fe, anu̱u̱ ga̱jma̱a̱ ru̱dúu̱ Moisés nirkaʼwii mbá ajtsú igu̱nʼ índo̱ nigumaa, numuu rí ndiyáá dí nindxu̱u̱ mbáa ada̱ mitsiʼyáa ga̱jma̱a̱ na̱nguá nimíñúún niʼni kiʼtáñajunʼ ndrígóo rey. 24 Ga̱jma̱a̱ numuu fe, Moisés índo̱ nikhi̱i̱ niʼni gaʼduunʼ rí mani̱ndxu̱u̱ a̱ʼdióo wáxioo faraón. 25 Niraʼwíí rí mamínuuʼ ga̱jma̱a̱ xuajñuu Dios, raʼkháa rí maʼni gagiminaʼ mbá xngaa ga̱jma̱a̱ aʼkhá, 26 numuu rí ikhaa ndiʼyoo rí itháan gíʼdoo numuu rí magajnúu gamajkuu ga̱jma̱a̱ numuu Cristo, ki xóo xúgíʼ dí mitsaanʼ dí rígá náa Egipto, ikhaa nigi̱ʼtu̱u̱n ga̱jma̱a̱ xúgíʼ a̱jkiu̱u̱n rí maguma tsajkurámaaʼ. 27 Ga̱jma̱a̱ numuu fe, niniñuuʼ Egipto rí asndu támiñuu rí nakiʼnáa rey, numuu rí niʼni mbóó a̱jkiu̱u̱n asndu xóo ndiʼyoo bi̱ tsékujmaa. 28 Ga̱jma̱a̱ numuu fe, niʼniriya̱a̱ʼ Pascua ga̱jma̱a̱ nixtájmuu eʼdi náa rawuunʼ ixi̱ xkrugua, mu xúʼko̱ bi̱ naʼni gámbáa nda̱a̱ rí gáʼniún* ejín giʼnuu.

29 Ga̱jma̱a̱ numuu fe, xa̱bu̱ xuajen nikidiin náa ku̱ba̱ʼ mijxooʼ náa lamáa Maña̱ʼ. Mú índo̱ bi̱ egipcios nindúún muni̱ ikháá kayuuʼ lamáa nirnguʼwi̱i̱n.

30 Ga̱jma̱a̱ numuu fe, xa̱bu̱ xuajen nigún tua̱ʼa̱n náa xtátsí ndrígóo Jericó mbá juwan mbiʼi ga̱jma̱a̱ ikhú nijngudiriga̱a̱. 31 Ga̱jma̱a̱ numuu fe, Rahab bi̱ nagujuamínáʼ tákháñúu gajmíi̱n bi̱ túnimbu̱u̱n, numuu rí nigruiguíin ga̱jma̱a̱ májánʼ bi̱ nigún gúyama.

32 Ndiéjunʼ xóó i̱ʼwáʼ gátha rá. Numuu dí mbaʼyoo mbiʼi mu ma̱ta̱ ga̱jma̱a̱ numuu Gedeón, Barac, Sansón, Jefté ga̱jma̱a̱ David, xó má Samuel ga̱jma̱a̱ eʼwíinʼ profetas.* 33 Ga̱jma̱a̱ numuu fe, niʼngu̱u̱n nini̱ gámbíin xa̱bu̱ ñajunʼ,* nini rí jmbu, nindrigúu rí nijuiʼthá makánún, niruguáá rawúúnʼ león, 34 nindijui̱i̱ʼ tsiakii ndrígóo aguʼ, nikáwíin náa inuu espada, índo̱ niʼni guabiinʼ niʼni gújkuíinʼ, niguáʼdáá tsiakii mu muxmíjná ga̱jma̱a̱ nini̱ rí maga̱ñún soldado bi̱ ni̱ndxu̱ún xa̱bu̱ sia̱nʼ. 35 Nikúwá gu̱ʼu̱ bi̱ nindriguíin a̱ngiu̱ún bi̱ nikháñúún índo̱ nitujxiín, mú nikúwá eʼwíinʼ xa̱bekha bi̱ niguma gíníin maski ajndu xúʼko̱ na̱nguá niniña̱a̱nʼ raguájun jmbu náa Dios, mu xúʼko̱ ma̱ndoo maguma káwíin, nini̱ rígi̱ mu xúʼko̱ ma̱ndoo magabi̱ín* rí nindxu̱u̱ itháan májánʼ. 36 Xúʼko̱ kaʼnii, nikúwá tikhuun bi̱ nimíniiʼ índo̱ nitsijmiin ga̱jma̱a̱ nixpajtiin, mú raʼkháa i̱ndó rúʼko̱, asndu nixtuʼwún ga̱jma̱a̱ cadena ma̱ngaa nigún guʼwá e̱jua̱nʼ. 37 Nijuixnún ga̱jma̱a̱ itsí, nindri̱ga̱ tsáʼkhá inún, nirujkuiin, niradíin ga̱jma̱a̱ espada, nijngruigu̱u̱n gi̱i̱ ñuʼún kagúwúnʼ xtún mugu̱ ga̱jma̱a̱ tsujthu̱nʼ, nirígá rí ndiñúunʼ, nimíniiʼ ga̱jma̱a̱ ga̱ʼkhu̱ ma̱ngaa niguma gíníin, 38 xa̱bu̱ bugi̱ ra̱ʼkhá tháán míjíinʼ ninindxu̱ún rí asndu rakáʼñun makuwá náa numbaaʼ rígi̱. Nigún rajnguʼwún náa ku̱ba̱ʼ mijxooʼ,* náa kúbá, náa tsíñu ga̱jma̱a̱ náa iñúʼ ku̱ba̱ʼ.

39 Ga̱jma̱a̱ numuu fe rí niguáʼdáá xúgíinʼ ikhiin, Dios niʼthún dí nanigu̱u̱ʼ rí eni̱, mú na̱nguá nindrigúu rí ikhaa nikudaminaʼ maxnún, 40 numuu rí Dios nindxa̱ʼwa̱mínáʼ maxnúlú mbá rí májánʼ, ikhiin xándoo mani̱ndxu̱ún kájxi̱i̱n á mu ndawáánʼ ikháanʼ.