Rí na̱jkha̱ inún Filipenses

2 Á mu naʼngo̱o̱, guxnamíjnala tsiakii numuu rí nindxa̱la xa̱bi̱i̱ Cristo, á mu naʼngo̱o̱ gu̱ni̱ rí maʼni̱i̱ a̱jkia̱la ga̱jma̱a̱ ngajua, á mu naʼngo̱o̱ gakuwáanʼla mbá kambájxala, gusngajmá rí nandala kuyamíjna̱, ga̱jma̱a̱ gagáwíinʼ a̱jkia̱la kuyamíjna̱, 2 á mu xúʼko̱ e̱ni̱, mu̱ni̱ rí maxtáá gagi, gusngajmá rí ikháá má ku̱ma̱ kuáʼdáá ga̱jma̱a̱ ikháá má ngajua, ma̱ngaa rí kuwáanʼla mbá kambájxala ga̱jma̱a̱ rí mbrígu̱ú endxa̱ʼwa̱míjna̱la. 3 Xúni̱ nimbá rí maʼni magiʼdala,* ni má xúndxa̱ʼwa̱míjna̱ i̱ndó ga̱jma̱a̱ numala ikháanʼ, ganindxa̱la xa̱bu̱ guabaaʼ, gundxa̱ʼwa̱míjna̱ rí eʼwíinʼ guáʼdáá itháan numún ki xóo ikháanʼ, 4 xúʼyáʼ i̱ndó rí ndayála ikháanʼ, guʼyáʼ rí ndañúunʼ eʼwíinʼ ma̱ngaa.

5 Gundxa̱ʼwa̱míjna̱ ikháá xó má nindxa̱ʼwáminaʼ Cristo Jesús, 6 maski má ninindxu̱u̱ xóo Dios, mú na̱nguá nindxaʼwáminaʼ rí maríya kaʼyuuʼ rí gíʼdoo Dios, ni má rí maʼnimbríguminaʼ ga̱jma̱a̱. 7 Táʼni rúʼko̱, rí phú niʼni niniñuuʼ xúgíʼ rí gíʼdoo, ni̱jkha̱nú ninindxu̱u̱ ñumbáá ga̱jma̱a̱ ninindxu̱u̱ xóo mbáa xa̱bu̱ numbaaʼ. 8 Ma̱ngaa índo̱ ni̱ʼkha̱ xóo xa̱bu̱ numbaaʼ niʼniguabaminaʼ ga̱jma̱a̱ niʼnimbo̱o̱ asndu índo̱ nikháñúu, xúʼko̱ kaʼnii, nikháñúu náa mbá ixi̱.* 9 Ikhaa numuu rígi̱ rí Dios niʼni rí magiʼdoo itháán numuu, nixnúu mbá ñajunʼ rí itháan gíʼdoo numuu rí nimbáa nda̱wa̱a̱ tsáa gíʼdoo, 10 mu ga̱jma̱a̱ mbiʼyuu Jesús xúgíinʼ musmbati̱gu̱u̱n, bi̱ kúwá mekhuíí, bi̱ kúwá náa ku̱ba̱ʼ ga̱jma̱a̱ náa agoo ku̱ba̱ʼ, 11 ga̱jma̱a̱ xúgíinʼ xa̱bu̱ maguánú mbuyáá pa̱jnu rí Jesucristo nindxu̱u̱ Tátá, mu xúʼko̱ Dios bi̱ nindxu̱u̱ Anu̱lú magruigú gamajkhu.

12 Ikha jngóo a̱ngui̱nʼ bi̱ nandoʼ ka̱ya̱la, xó má rí niguwaʼ runimbala, raʼkháa i̱ndó rí nixtáá ga̱jma̱á nindxa̱la, itháan xúgi̱ rí nánguá xtáá ga̱jma̱á nindxa̱la, gu̱ni̱ tsiakimijnala má xúʼko̱ rí mbuyamajkuíí ga̱jma̱a̱ rí munimbala kuya̱a̱ má xúʼko̱ mu muxkamaa rí makáwáanʼla. 13 Numuu rí Dios nindxu̱u̱ bi̱ naxnála tsiakii mu mu̱ni̱ rí ikhaa nanigu̱u̱ʼ, ma̱ngaa naxnála rí maʼndala mu̱ni̱ ga̱jma̱a̱ tsiakii mu munimbánííla. 14 Gunimbánííla mbá xúgíʼ, xúxiéʼkhá ni má xágiʼdala, 15 mu xáguaʼdáá aʼkhála ga̱jma̱a̱ numuu nimbá, xóo e̱ji̱i̱n Dios bi̱ nda̱a̱ aʼkhúún náa majñúnʼ xa̱bu̱ ra̱míjíinʼ ga̱jma̱a̱ bi̱ tséni̱ rí jmbu, náa ikháanʼla naxpíbiáanʼ xóo aguʼ rí nambiʼi náa numbaaʼ, 16 ga̱jma̱a̱ gurajthun má xúʼko̱ xa̱ʼ ajngá rawuunʼ Dios rí naʼni makuwáanʼla. Mu xúʼko̱ marigá mbá numuu rí maʼdxuʼ náa mbiʼi ndrígóo Cristo índo̱ mba̱yo̱o̱ rí tágayúʼ xúʼkhi̱ínʼ, rí tánindxu̱u̱ ndíí rí niñejunʼ gakhi̱i̱ wéñuuʼ. 17 Maski má ni̱ndxu̱ʼ vino dí nagadírámuuʼ náa tsigijñaʼ ndrígala rí nuxnajxí, rí nindxu̱u̱ ñajunʼ dí nu̱nila náa inuu Dios, numuu rí fe ndrígala nixkajxáanʼ mu̱ni̱, ga̱jma̱a̱ numuu rígi̱, nadxuʼ ka̱ya̱la. 18 Xúʼko̱ má mangáanʼ, gíʼmaa rí maʼdxala ku̱yo̱ʼ.

19 Rí xúgi̱, gúʼthu̱u̱n náa Tátá Jesús rí makuʼmáa Timoteo náa ikháanʼla, mu xúʼko̱ mba̱ya̱a̱ tsiakii índo̱ gádxun xóo kuwáanʼla. 20 Numuu rí na̱nguá gúʼdaa i̱mba̱a̱ bi̱ naʼni xóo ikhaa, bi̱ gajkhun naxmiéjuunʼ kaʼyala. 21 Numuu rí eʼwíinʼ i̱ndó nduyáʼ rí nandún ikhiin, raʼkháa rí nandoo Jesucristo. 22 Ikháanʼ má ndu̱ya̱a̱ májánʼ rí nisngájma xóo nindxu̱u̱, numuu rí niñejunʼ gakhi̱i̱ wéñuuʼ ga̱jma̱á nindxu̱ʼ mu miʼtáraʼa ajngáa rí májánʼ, xóo eʼni mbáa ada̱ ga̱jma̱a̱ anu̱u̱. 23 Magu̱ʼthu̱u̱nʼ rí ikhaa nindxu̱u̱ bi̱ makuʼmaa náa ikháanʼ índo̱ gáyóo ndiéjunʼ gágíʼnuʼ. 24 Ma̱ngaa gúʼthu̱u̱n náa Tátá rí nacha̱ má maxtáá ga̱jma̱á nindxa̱la.

25 Mú rí xúgi̱ nda̱yo̱o̱ rí ndayóoʼ makuʼmáa Epafrodito, bi̱ nindxu̱u̱ dxájuʼ, bi̱ nañejunʼ ga̱jmu̱ʼ, bi̱ mbóó ni̱ndxu̱ʼ ga̱jmu̱ʼ soldado ndrígio̱o̱ Cristo, bi̱ ikháanʼla má nixuʼmáa mu mambáyúʼ náa rí gáʼyóʼ. 26 Ikhaa ra̱ʼkhá tháán eyoo mbaʼyala ga̱jma̱a̱ xtáa ngíná numuu rí ikháanʼ nidxawíín rí naʼniuu nandii. 27 Gajkhun má rí ikhaa niʼniuu nandii asndu nigíʼ makhañúu, mú Dios nigáwíinʼ a̱jkiu̱u̱n kaʼyoo raʼkháa i̱ndó ikhaa, asndu ga̱jma̱a̱ numuʼ mangúún, mu xúʼko̱ xárígá mbaʼa rí maʼniuʼ maxtáá ngíná. 28 Ikha jngóo nakuʼnguáanʼ nacha̱ náa ikháanʼla, mu índo̱ gúya̱a̱la maʼdxala mbu̱júu̱ʼ ga̱jma̱a̱ ikhúúnʼ maʼni̱i̱ a̱jkiu̱nʼ. 29 Ikha jngóo gundríguíila ga̱jma̱a̱ gagi xó má eni̱i̱ mbáa xa̱bi̱i̱ Tátá. Guyamajkhún má xúʼko̱ xa̱bu̱ bi̱ xóo ikhaa. 30 Numuu rí asndu itháán makhañúu ga̱jma̱a̱ numuu ñajunʼ ndrígóo Cristo, ma̱ngaa asndu nigíʼ makhañúu mu mambáyúʼ náa dí ikháanʼ na̱nguá xóo mu̱ni̱, numuu rí nda̱wa̱ánʼla gi̱i̱.