Rí na̱jkha̱ inún Romanos

11 Ikha jngóo ikhúúnʼ narajxi̱: Lá Dios nánguá nindoo gáʼyoo xuajñuu ráʼ. ¡Na̱nguá! Numuu rí ikhúúnʼ mangúún ni̱ndxu̱ʼ israelita, ni̱ʼkhá náa e̱ji̱i̱n Abrahán, náa xuajen chíʼgíiʼ* ndrígóo Benjamín. 2 Dios táʼni wájíinʼ xa̱bu̱ xuajñuu bi̱ ndiʼñún ginii. Lá na̱nguá e̱ya̱a̱ rí eʼthí náa Kiʼniraʼmáʼ ga̱jma̱a̱ numuu Elías rí nixiéʼkhá náa Dios ga̱jma̱a̱ numuu Israel ráʼ. 3 “Jeobá,* niradíin profetas* ndrígáaʼ ga̱jma̱a̱ nini̱ gámbáa náa nakarámáʼ tsigijñaʼ; i̱ndó naguanúʼ ikhúúnʼ ga̱jma̱a̱ rí xúgi̱ nduñúnʼ muxiñún mangúún”. 4 Mú, ndiéjunʼ rí niʼthí Dios rá. “Xóó naguanún i̱mbá 7,000 xa̱bu̱ bi̱ xóó tsésmbati̱gu̱u̱n náa inuu Baal”. 5 Xúʼko̱ má rí mbiʼi xúgi̱ ma̱ngaa, kúwá mbá nguáti̱i̱n xa̱bu̱ bi̱ niwaxtaʼwíin ga̱jma̱a̱ numuu rí májánʼ wéñuuʼ a̱jkiu̱u̱n Dios maski ajndu rakáʼñún. 6 Rígi̱ nandoo gáʼthúu̱n rí ikhiin niwaxtaʼwíin ga̱jma̱a̱ numuu rí májánʼ wéñuuʼ a̱jkiu̱u̱n Dios maski ajndu rakáʼñún, raʼkháa ga̱jma̱a̱ numuu mbá rí nini̱. Á mu niwaxtaʼwíin ga̱jma̱a̱ numuu mbá rí nini̱ ní xánindxu̱u̱ ga̱jma̱a̱ numuu rí májánʼ wéñuuʼ a̱jkiu̱u̱n Dios.

7 Rí ndiyáʼ wéñuuʼ xa̱bu̱ Israel na̱nguá niʼngu̱u̱n gúxkamaa, mú bi̱ waxtaʼwíin nixkamaa. Eʼwíinʼ niʼni gújkhúʼ a̱jkiu̱ún, 8 xó má naʼthí náa kiʼnirámáʼ: “Rí asndu mbiʼi xúgi̱ Dios niʼni rí náa a̱jkiu̱ún munuʼ midu̱u̱n, niʼni rí idún xayejxi̱ ga̱jma̱a̱ rí cháʼwúún xáʼdxuun”. 9 David ma̱ngaa naʼthí: “Rí mesa ndrígu̱ún gáguajta̱a̱ maʼni̱i̱ mbá jñuu, mbá tsáʼkhá, mbá rí majngrádiinʼ, ga̱jma̱a̱ mbá rí maʼni mumíniiʼ ikhiin. 10 Gaʼni rí agiuuʼ idún mawiʼyúuʼ mu xúyejxi̱. Ga̱jma̱a̱ atani̱ rí muguánduti̱ga̱ má xúʼko̱”.

11 Ikha jngóo ikhúúnʼ narajxi̱: Lá ikhiin nijngrádiinʼ ga̱jma̱a̱ nijnguti̱gi̱i̱n dí asndu xándoo gátujxi̱ín xáʼ. ¡Na̱nguá! Numuu rí ikhiin túnimbaníí xtángoo, ikha jngóo xa̱bu̱ bi̱ kúwá náa i̱ʼwáʼ xuajen makáwíin, nirígá rígi̱ mu ikhiin makiʼníin. 12 Á mu ga̱jma̱a̱ numuu rí ikhiin tsénimbáníí xtángoo naʼni rí maguma tsajkurámiinʼ xa̱bu̱ numbaaʼ, á mu ga̱jma̱a̱ numuu rí ikhiin naʼni itháán nguéjmi̱i̱n naʼni rí maguma tsajkurámiinʼ itháán xa̱bu̱ numbaaʼ, ¡itháán mba̱a̱ gáguma tsajkurámiinʼ índo̱ gájxi̱i̱n xúgíinʼ!

13 Rí xúgi̱ na̱tala ikháanʼ bi̱ nindxa̱la xa̱bu̱ numbaaʼ. Ga̱jma̱a̱ numuu dí ikhúúnʼ ni̱ndxu̱ʼ apóstol bi̱ waxúʼmaa maʼga náa xa̱bu̱ numbaaʼ naxnu̱u̱ gamajkhu ñajunʼ ndrígóo Dios rí na̱ni̱ 14 mu mba̱yo̱o̱ á mu maʼngo̱ʼ ma̱ni̱ rí makiʼníin xa̱bu̱ xuajñunʼ* ga̱jma̱a̱ xúʼko̱ makáwíin tikhuun. 15 Á mu ga̱jma̱a̱ numuu rí Dios nánguá nigruiguíin bi̱ judíos niʼni dí xa̱bu̱ numbaaʼ ma̱ndoo mambajxíinʼ gajmiún ikhaa, mú ndiéjunʼ gárígá á mu tikhuun dí ikhiin gágruiguíin xá. Lá raʼkháa rígi̱ gáʼni rí matangi̱ín makuwá mbu̱júu̱ xáʼ. 16 Á mu mbá ta̱pha̱ xúwáʼ* rí najuixnájxi̱ ginii nindxu̱u̱ kaʼwu xúʼko̱ má nindxu̱u̱ xúgíʼ xúwáʼ, á mu ajmu̱u̱ ixi̱ nindxu̱u̱ kaʼwu xúʼko̱ má nindxu̱u̱ xúgíʼ ñawúunʼ ixi̱.

17 Á mu tikhuu ñawúunʼ ixi̱ olivo rí kidu niturígú ga̱jma̱a̱ i̱ʼwáʼ niguanúu, ikháán dí nindxa̱a̱ʼ olivo xáná nigiʼmáá ikhí ga̱jma̱a̱ nambáyaaʼ ajmu̱u̱ ixi̱ olivo náa nigiʼmáá, 18 xátanimbamínáʼ náa i̱ʼwáʼ ñawúunʼ ixi̱. Numuu rí á mu natanimbamínáʼ náa i̱ʼwáʼ ñawúunʼ ixi̱ garmáʼáan a̱jkia̱a̱nʼ rí ikháán na̱nguá etambáyíí ajmu̱u̱ ixi̱, ajmu̱u̱ ixi̱ nambáyaaʼ ikháán. 19 Á mu naratá: “Tikhuu ñawúunʼ ixi̱ niturígú mu ikhúúnʼ ma̱ndoo magiʼmúú ikhí”. 20 ¡Gajkhun má! Ikhiin nituríguíin numuu rí na̱nguá niguáʼdáá fe, mú ikháán xtiejún numuu dí niraʼdáá fe. Ikha jngóo xátanimbamínáʼ, gamiñáaʼ. 21 Numuu rí Dios táʼni mba̱a̱ a̱jkiu̱u̱n kaʼyoo rí phú ñawúunʼ ixi̱, xúʼko̱ má xáʼni mba̱a̱ a̱jkiu̱u̱n kaʼyaaʼ mangáán. 22 Ikha jngóo atatsaʼwáminaʼ má xúʼko̱ náa májáanʼ a̱jkiu̱u̱n Dios ga̱jma̱a̱ náa gakhi̱i̱ a̱jkiu̱u̱n. Numuu rí ikhaa gakhi̱i̱ a̱jkiu̱u̱n ga̱jma̱a̱ numún bi̱ nituríguíin, mú májáanʼ a̱jkiu̱u̱n ga̱jma̱á nindxa̱a̱ʼ ikháán i̱ndó á mu naraxtaa má xúʼko̱ náa rí májáanʼ a̱jkiu̱u̱n, numuu rí á mu na̱nguá, ikháán mangáán muturíguíín. 23 Á mu ikhiin natangi̱i̱n naguáʼdáá fe ma̱ndoo matimi̱i̱n mbu̱júu̱ náa ixu̱u̱ olivo, numuu rí Dios ma̱ndoo magumi̱i̱n mbu̱júu̱. 24 Ikháán dí nindxa̱a̱ʼ ñawúunʼ ixi̱ olivo xáná nindoo nigiʼmáá náa ñawúunʼ ixi̱ olivo rí kidu náa dí rakáʼyaaʼ, ¡itháan ramáskaa magiʼma̱a̱ ñawúunʼ ixi̱ rí niturígú náa ixu̱u̱!

25 A̱ngui̱nʼ, nandoʼ mbuya̱a̱ rí Dios gíʼdoo mbá dí rígá ngu̱ʼwa̱ rí nindxu̱u̱ mitsúʼkháan, mu xúʼko̱ ikháanʼ xákumala rí najmañala wéñuuʼ, rígi̱ nindxu̱u̱ dí rígá ngu̱ʼwa̱: Tikhuun xa̱bu̱ Israel niʼni gújkhúʼ a̱jkiu̱ún, maʼni má xúʼko̱ gújkhúʼ a̱jkiu̱ún asndu índo̱ gátu̱ʼu̱u̱n xúgíinʼ bi̱ nixtaʼwíin náa i̱ʼwáʼ xuajen, 26 xúʼko̱ xúgíinʼ xa̱bu̱ Israel makáwíin. Xó má naʼthí náa kiʼnirámáʼ: “Bi̱ maʼnikáwíin ma̱ʼkha̱ náa Sion ga̱jma̱a̱ marígúu náa Jacob xúgíʼ xkawiʼ rí naguma. 27 Rígi̱ rí nambánuʼ gajmíʼ ikhiin índo̱ gáni gámbáa aʼkhúún”. 28 Gajkhun má ga̱jma̱a̱ numuu ajngáa rí májánʼ ikhiin ni̱ndxu̱ún xa̱bu̱ sia̱nʼ náa Dios mu mambáyala ikháanʼ; mú ga̱jma̱a̱ numuu wajin xiʼñúúnʼ Dios nandoo kaʼñún. 29 Numuu rí Dios tsétanga̱a̱ a̱jkiu̱u̱n ga̱jma̱a̱ numuu rí naxnúu mbáa, ni má índo̱ nandxa̱ʼóo mbáa. 30 Nákha wájyúuʼ ikháanʼ túnimbala kuya̱a̱ Dios, mú xúgi̱ ikhaa nigáwíinʼ a̱jkiu̱u̱n kaʼyala numuu rí ikhiin túnimbu̱u̱n. 31 Xúʼko̱ má mangiin xúgi̱ na̱nguá enimbu̱ún kuyáá ga̱jma̱a̱ rígi̱ niʼni rí Dios magáwíinʼ a̱jkiu̱u̱n kaʼyala ikháanʼ, mu xúʼko̱ magáwíinʼ a̱jkiu̱u̱n kaʼñún mangiin. 32 Numuu rí Dios niniñúúnʼ asndu xóo matri̱ʼi̱i̱n náa guʼwá e̱jua̱nʼ numuu rí túnimbu̱ún, mu xúʼko̱ ikhaa masngájma rí nagáwi̱i̱nʼ a̱jkiu̱u̱n kaʼñúún xúgíinʼ.

33 ¡Rí naʼni tsajkurámáanʼlu, rí najmañuu ga̱jma̱a̱ ku̱ma̱ ndrígóo Dios nindxu̱u̱ mba̱a̱ wéñuuʼ! ¡Rí naraʼwíí maʼni nimbáa tséʼngo̱o̱ gákro̱ʼo̱o̱ ga̱jma̱a̱ kambo̱o̱ nimbáa xáʼngo̱o̱ gáʼya! 34 Numuu rí “tsáá ni̱jkha̱nú nininuuʼ rí xóo endxa̱ʼóo edxu̱u̱ Jeobá* rá. O tsáá nindxu̱u̱ bi̱ naxnúu consejo ikhaa xá.” 35 O “lá xtáa mbáa bi̱ rígá dí nixnúu Dios ginii mu Dios marigá mbá rí mata̱nga̱a̱ maxnáa ráʼ.” 36 Numuu dí xúgíʼ dí rígá na̱ʼkha̱ náa ikhaa, ikhaa niʼniwíi numuu rí ikhaa nindoo. Náa ikhaa gáʼga gamajkhu asndu kámuu mbiʼi. Xúʼko̱ gáʼni.*