Génesis

2 Xúʼko̱ niwájxi̱ mekhu, ku̱ba̱ʼ ga̱jma̱a̱ xúgíʼ dí rígá ikhí. 2 Índo̱ niʼni juwan mbiʼi, Dios niwájxu̱u̱ má ñajunʼ ndrígóo. Ikha jngóo nigíʼdu̱u̱ ndiyáa jxu̱u̱ʼ índo̱ niʼni juwan mbiʼi náa xúgíʼ ñajunʼ dí nixtáa raʼni. 3 Dios niʼni tsajkurámuuʼ rí juwan mbiʼi, niʼthí rí nindxu̱u̱ mitsúʼkháan, numuu dí mbiʼi rúʼko̱ Dios nigíʼdu̱u̱ ndiyáa jxu̱u̱ʼ náa xúgíʼ rí niʼniwíi* ga̱jma̱a̱ náa xúgíʼ rí nigíminaʼ maʼni.

4 Xígi̱ kaʼnii nigíʼdu̱u̱ nirígá mekhu ga̱jma̱a̱ ku̱ba̱ʼ nákha nigumawíi, mbiʼi rí Jeobá* Dios niʼni mekhu ga̱jma̱a̱ ku̱ba̱ʼ.

5 Mú, xóó nda̱a̱ xtáʼdu̱u̱ iná náa tsu̱du̱u̱ ku̱ba̱ʼ ni má xóó tsékráʼáan i̱ʼwáʼ planta,* numuu dí Jeobá xóó tséʼni maxnúu ruʼwa náa tsu̱du̱u̱ ku̱ba̱ʼ ni má nda̱wa̱a̱ nimbáa tsáa maʼdu. 6 Mú Dios niʼni rí matujxu̱u̱ rujmbaaʼ mu marmu̱juun ku̱ba̱ʼ.

7 Ikhú Jeobá Dios niʼnii xa̱bu̱ ga̱jma̱a̱ yujndo̱o̱ʼ ku̱ba̱ʼ, nindiyuu rakhóo mu mbayá jxu̱u̱ʼ mu ma̱ndoo maxtáa. Ga̱jma̱a̱ xúʼko̱ ni̱jkha̱nú ninindxu̱u̱ mbáa xa̱bu̱ ndaʼya. 8 Jeobá Dios ma̱ngaa nini mújúunʼ mbá jardín* náa Edén, xígií náa nagájnuu a̱jkha̱ʼ* ikhí nixnúu maxtáa xa̱bu̱ bi̱ niʼnii. 9 Ikhú Jeobá Dios niʼni dí marigá mbaʼa enii ixi̱ rí mitsaanʼ* dí gíʼdoo xndúu dí ma̱ndoo miʼtsu. Ma̱ngaa niʼni dí mi̱khi̱i̱* mbá ixi̱ náa ta̱pho̱o̱ jardín dí nigumbiʼyuu ixi̱ rí ndaʼya ga̱jma̱a̱ i̱mba̱ nigumbiʼyuu ixi̱ ku̱ma̱ dí májánʼ ga̱jma̱a̱ dí ra̱májánʼ.

10 Náa Edén nagájnuu mbá mañu dí nagíyóoʼ* jardín ga̱jma̱a̱ ikhí naguiʼtáa mbá a̱jkhu̱ mañu.* 11 Timbá mañu mbiʼyuu Pisón. Mañu rígi̱ na̱jkha̱ náa mbájndi ku̱ba̱ʼ ndrígóo Havilá náa rígá oro. 12 Ra̱ʼkhá tháán májánʼ oro dí rígá náa ku̱ba̱ʼ rúʼko̱. Ikhí ma̱ngaa rígá bedelio ga̱jma̱a̱ ónice. 13 Dí maʼni raga̱jma̱ mañu mbiʼyuu Guihon. Mañu rígi̱ na̱jkha̱ náa mbájndi ku̱ba̱ʼ ndrígóo Cus. 14 Rí maʼni ajtsú mañu mbiʼyuu Hidequel.* Mañu rígi̱ na̱jkha̱ xígií náa Asiria náa nagájnuu a̱jkha̱ʼ. Rí maʼni a̱jkhu̱ mañu mbiʼyuu Éufrates.

15 Jeobá Dios nixnúu maxtáa xa̱bu̱ náa jardín dí rígá náa Edén mu mañejunʼ ga̱jma̱a̱ mañewu̱u̱n. 16 Jeobá Dios ma̱ngaa nixnúu kiʼtáñajunʼ rígi̱ xa̱bu̱: “Ma̱ndoo miʼtsu xúgíʼ xndúu ixi̱ dí rígá náa jardín asndu magiʼmaaʼ. 17 Mú xíʼtsu xndúu ixi̱ ku̱ma̱ dí májánʼ ga̱jma̱a̱ dí ra̱májánʼ, á mu mbóʼ mbiʼi gíʼtsu, mbiʼi rúʼko̱ makhañáaʼ”.

18 Ikhú Jeobá Dios niʼthí mbu̱júu̱: “Raʼkhí* gáʼni dí mbáwíí xa̱biya̱ gáxtáa. Mani̱i̱ mbáa bi̱ mambáyúu mu maʼni kájxi̱i̱”. 19 Jeobá Dios niʼnii xujkhú xáná ga̱jma̱a̱ yu̱jndo̱o̱ʼ ku̱ba̱ʼ, xúʼko̱ má xujkhúʼ bi̱ guáʼdáá xniúúʼ bi̱ nagún rijma̱a̱. Ni̱jkha̱ kagui̱i̱n náa xa̱biya̱ mu mbaʼyoo xóo gáxná mbiʼñún, mámbáa xujkhúʼ ndaʼya, nigumbiʼyuu xó má niʼthí xa̱biya̱. 20 Ikhú xa̱biya̱ nixná mbiʼñún xujkhúʼ kraʼdiin, xujkhúʼ bi̱ nagún rijma̱a̱ ga̱jma̱a̱ xujkhú xáná. Mú ikhaa na̱nguá gíʼdaa mbáa tsáa mambáyúu. 21 Ikha jngóo Jeobá Dios niʼni rí xa̱biya̱ mi̱gu̱ mi̱du̱u̱, índo̱ ikhaa xtáa raʼgu, niriyaʼ mbá itsu̱ tsoxto̱o̱ ga̱jma̱a̱ nda̱wa̱á nirúguáa náa niriyaʼ itsu̱. 22 Jeobá Dios niʼnii mbáa a̱ʼgu̱ ga̱jma̱a̱ itsu̱ tsoxto̱o̱ dí niríyáʼ, ikhú ni̱jkha̱ kayáa náa inuu xa̱biya̱.

23 Ikhú xa̱biya̱ niʼthí:

24 Ikha jngóo dí xa̱biya̱ maniñuuʼ* anu̱u̱ ga̱jma̱a̱ ru̱dúu̱,* maxtáa ga̱jma̱a̱ a̱ʼgiu̱u̱* maguánú mani̱ndxu̱ún mbóó xuwiʼ. 25 Nákha ikhú xa̱biya̱ ga̱jma̱a̱ a̱ʼgiu̱u̱ tsaʼtsin jnguʼún. Maski asndu xúʼko̱, na̱nguá ti̱ñu̱u̱ʼ.