Timbá i̱yi̱i̱ʼ rí na̱jkha̱ inuu timoteo

6 Bi̱ nindxu̱ún ñumbáá ndayóoʼ rí mbuyamajkún bi̱ nutañajúúnʼ, mu xúʼko̱ xájuiʼthá dí raʼkhí ga̱jma̱a̱ numuu Dios, ni má ga̱jma̱a̱ numuu kisngáa ndrígóo. 2 Á mu bi̱ nutañajúúnʼ nindxu̱ún xa̱bi̱i̱ Jesús, gíʼmaa rí mbuyamajkún itháan numuu rí nindxu̱ún a̱ngiu̱ún, gíʼmaa rí muni̱ itháan májánʼ ñajunʼ ndrígu̱ún, numuu rí bi̱ nambáñún ñajunʼ rí nuni̱ nindxu̱ún xa̱bi̱i̱ Jesús bi̱ nandún kuñún.

Ikháán arasngáa má xúʼko̱ rígi̱ ga̱jma̱a̱ araxná má xúʼko̱ consejo rígi̱. 3 Á mu mbáa xa̱bu̱ naʼsngáa i̱mba̱ kisngáa, ga̱jma̱a̱ tsémbáni̱i̱ ga̱jma̱a̱ kisngáa rí májánʼ* ndrígóo Jesucristo bi̱ nindxu̱u̱ Tátá ndrígúlú, ni má tsémbáni̱i̱ ga̱jma̱a̱ kisngáa xóo mu̱ʼni̱ ñajuunʼ Dios, 4 xa̱bu̱ bugi̱ naʼnimbamínáʼ wéñuuʼ ga̱jma̱a̱ nda̱a̱ dí ekro̱ʼo̱o̱. Nanigu̱u̱ʼ wéñuuʼ maʼni ajngáa, ga̱jma̱a̱ mbaʼ naʼthíí. Rígi̱ naʼni rí maku̱mu̱u̱ tsixígú, rí magi̱ʼdu̱u̱n, mutawéñímijná ga̱jma̱a̱ naʼni rí eʼwíinʼ ní xákumu̱ún kuñúún eʼwíinʼ, 5 nugiʼdu̱u̱n má xúʼko̱ ga̱jma̱a̱ mbá dí ragíʼdoo numuu, naxkajxi̱i̱n muni̱ rígi̱ ga̱jma̱a̱ numuu rí xóo nundxa̱ʼwa̱a̱ edxu̱ún xa̱bu̱ bi̱ guáʼdáá ku̱ma̱ rí mitsaga, bi̱ na̱nguá guáʼdáá rí gajkhun, numuu rí nundxaʼwamíjna̱ rí matani̱ ñajuunʼ Dios nindxu̱u̱ náa ma̱ndoo matandrígú rí maraʼdáá. 6 Gajkhun má rí matani̱ ñajuunʼ Dios na̱ʼkha̱ kagu̱u̱ mbaʼa rí májánʼ á mu mbáa naxtáa gagi ga̱jma̱a̱ rí gíʼdoo. 7 Numuu rí nda̱a̱ dí kuʼyá niguwa̱ʼ náa numbaaʼ rígi̱, ni má nda̱a̱ rí ma̱ndoo mbuʼyá gúʼgua̱áʼ. 8 Á mu kuaʼdáá ganitsu ga̱jma̱a̱ xtíin,* gakuwáanʼ gagi ga̱jma̱a̱ numuu rúʼko̱.

9 Mú, bi̱ nandún muguaʼdáá wéñuuʼ, nuniñami̱jna̱ rí maguma nduwiinʼ mu muni̱ dí ra̱májánʼ ga̱jma̱a̱ najngutíguiin náa tsáʼkhá, ma̱ngaa nagua̱ʼa̱ wéñuuʼ muni̱ dí ra̱májánʼ rí naʼnigachíin rí na̱jkha̱ kagui̱i̱n mambíi̱n. 10 Numuu rí ma’ndaa’ xtayáá wéñuuʼ mbújkha̱a̱ nindxu̱u̱ náa nakumu̱u̱ xúgíʼ enii dí ra̱májánʼ, ga̱jma̱a̱ tikhuun nindún kuyáá wéñuuʼ, ikha jngóo niniña̱a̱ʼ raguáʼdáá fe ga̱jma̱a̱ rúʼko̱ niʼni* rí mumíniiʼ wéñuuʼ.

11 Mú ikháán xa̱bi̱i̱ Dios, atanitsingumínáʼ náa xúgíʼ rígi̱. Rí gíʼmaa matani̱, atayáʼ rí jmbu, atani̱ ñajuunʼ Dios, araʼdáá fe, araʼdáá ngajua, ga̱ʼnga̱a̱ʼ ga̱jma̱a̱ xákiʼnán. 12 Ataxmínaʼ májánʼ ga̱jma̱a̱ numuu fe, arajthun xa̱ʼ rí maraxtaa kámuu mbiʼi náa rí niwatsaʼwaaʼ, ga̱jma̱a̱ náa ikháán nirathá májánʼ náa inún xúgíinʼ bi̱ ndiyáá.

13 Náa inuu Dios bi̱ naxnún xi̱ʼ makuwá xúgíinʼ, ga̱jma̱a̱ náa Cristo Jesús bi̱ támiñuu maʼthí pa̱jnu náa inuu Poncio Pilato, natañájuanʼ 14 rí matanimbaaʼ kiʼtáñajunʼ rígi̱, ma̱ngaa rí maraxtaa kaʼwu má xúʼko̱, mu xúʼko̱ nimbáa xáʼtánúmaaʼ, asndu índo̱ gákujmaa Jesucristo bi̱ nindxu̱u̱ Tátá ndrígúlú, 15 bi̱ xtáa gagi, bi̱ mbáwíí gíʼdoo tsiakii, maʼni rí makujmaa mbiʼi rí kaʼyoo. Ikhaa nindxu̱u̱ Rey náa bi̱ nutañajunʼ xóo reyes, ikhaa nindxu̱u̱ Tátá náa bi̱ nutañajunʼ xóo tátá, 16 ikhaa mbáwíí nindxu̱u̱ bi̱ xákháñúu nditháan, bi̱ xtáa náa nambiʼi aguʼ náa nimbáa xáʼngo̱o̱ gáʼganú, nimbáa xa̱bu̱ numbaaʼ na̱nguá ndiʼyoo, ni má xáʼngo̱o̱ gáʼyoo, náa ikhaa gáʼga gamajkhu ga̱jma̱a̱ tsiakii asndu kámuu mbiʼi. Xúʼko̱ gáʼni.*

17 Araxnún ikha rígi̱ bi̱ guáʼdáá wéñuuʼ rí mbiʼi xúgi̱,* rí xúnimbaʼumíjna̱ ga̱jma̱a̱ rí xákumu̱ún kuyáá rí guáʼdáá rí maʼganú mambáa, dí gakumu̱ún kuyáá Dios bi̱ naxnúlú mbaʼa wéñuuʼ rí mu̱ʼni̱ gagimijnálú ga̱jma̱a̱. 18 Arathún muni̱ rí májánʼ, rí muni̱ itháan ga̱jma̱a̱ numuu Dios, rí maʼndún muxna rí guáʼdáá ga̱jma̱a̱ muxnún eʼwíinʼ, 19 á mu xúʼko̱ eni̱, mundrigúu mbá rí gíʼdoo wéñuuʼ numuu, xóo muʼthá, dí gajkhun rígá mbá dí mundrigúu nda̱wa̱á, mu xúʼko̱ ikhiin maguánú mbuyáá gajkhun rí kuáʼti̱i̱n nindxu̱u̱ rí makuwíin májánʼ nda̱wa̱á.

20 Timoteo, atiewa̱a̱n rí nijuixnángawaaʼ, atanitsínguminaʼ náa ajngáa dí ragíʼdoo numuu rí tséʼyamajkhuu Dios ga̱jma̱a̱ náa ku̱ma̱ rí minduwaʼ, rí tséxnáa ga̱jma̱a̱ rí gajkhun. 21 Tikhuun niniña̱a̱nʼ raguáʼdáá fe numuu rí ninimbaʼumíjna̱ ga̱jma̱a̱ ku̱ma̱ rúʼko̱.

Rí májánʼ wéñuuʼ a̱jkiu̱u̱n Dios garigá náa ikháanʼla.