Daniel

12 Náa tiempo rúʼko̱ matujxu̱u̱ Miguel,* príncipe bi̱ gíʼdoo itháán numuu bi̱ xtáa* rambáyúu xuajñaanʼ.* Marigá mbá tiempo dí ma̱ʼkha̱ gamiéjunʼ mbá dí tárígá nákha nigi̱ʼdu̱u̱ nikúwá xa̱bu̱ asndu tiempo rúʼko̱. Tiempo má rúʼko̱ makríyáaʼ xuajñaanʼ, xúgíinʼ bi̱ kiʼniraʼmáʼ mbiʼñún náa libro. 2 Mbaʼin bi̱ nunuʼ náa awúu̱n ku̱ba̱ʼ mbajuíín, tikhuun mu makuwá asndu kámuu ga̱jma̱a̱ eʼwíinʼ magajnúu gamajkhún asndu kámuu.

3 Bi̱ najmañún maxpíbíinʼ xóo mekhu ga̱jma̱a̱ bi̱ nagún kudiin mbaʼin náa rí jmbu maxpíbíinʼ xóo a̱ʼgua̱a̱n asndu kámuu.

4 Daniel, atiéjxi̱ ngu̱ʼwa̱ ajngáa rígi̱ atrugua̱a̱ ga̱jma̱a̱ atarkaʼwu libro asndu índo̱ gártumuu mbiʼi. Mbaʼin mbuyáʼ ku̱ma̱ rí gajkhun rí mani̱ndxu̱u̱ mba̱a̱”.

5 Ikhúún Daniel, índo̱ niyejxi̱ ga̱jma̱a̱ ndi̱ñu̱u̱n a̱jmi̱i̱n bi̱ wájun ikhí, mbáa wíji̱ náa mbá ridoo mañu ga̱jma̱a̱ i̱mba̱a̱ wíji̱ náa i̱mba̱ ridoo mañu. 6 Mbáa dí ikhaa niʼthúu̱n xa̱biya̱ bi̱ kagíʼ xtíin dí lino bi̱ frígu náa tsu̱du̱u̱ iyaʼ mañu: “Nguáthá mba̱yu̱u̱ʼ xóó eyóoʼ martumuu mbiʼi mu marigá rí mitsaanʼ* rígi̱ rá.” 7 Nda̱wa̱á nidxawuun rí niʼthí xa̱biya̱ bi̱ kagíʼ xtíin dí lino bi̱ frígu náa tsu̱du̱u̱ iyaʼ mañu. Ikhaa nikujxi̱ ñawúunʼ* ga̱jma̱a̱ nixná ajngóo náa bi̱ xtáa asndu kámuu: “Manújngoo mbá tiempo rí nijuiʼthá, tiempo rí nijuiʼthá, ajtsú tsiguʼ tikhu.* Índo̱ gáguma gámbáa tsiaki̱i̱ ndrígóo xuajin rí kaʼwu, xúgíʼ rígi̱ maguma gámbáa”.

8 Ikhúún nidxawuun, mú tákro̱ʼo̱ʼ. Ikha jngóo ni̱tha̱: “Tátá, ndiéjunʼ nindxu̱u̱ dí marigá ga̱jma̱a̱ numuu rígi̱ rá.”

9 Ikhaa niʼthí: “Ayu̱u̱ʼ Daniel, numuu rí ajngáa rígi̱ gíʼmaa dí marigá ngu̱ʼwa̱ ga̱jma̱a̱ magugóo asndu índo̱ gártumuu mbiʼi. 10 Mbaʼin xa̱bu̱ maguma kaʼwíín, ikhiin muni̱ rí jmbu ga̱jma̱a̱ ikhiin makuwá kaʼwu. Xó má xa̱bu̱ ra̱míjíinʼ muni̱ má xúʼko̱ dí ra̱májánʼ ga̱jma̱a̱ nimbáa xa̱bu̱ ra̱májáanʼ xákro̱ʼo̱o̱. I̱ndó makru̱ʼu̱u̱n bi̱ najmañún.

11 Mbiʼi rí xa̱bu̱ gúniña̱a̱nʼ ruxnajxi̱ tsigijñaʼ dí najuixnájxi̱ nángí eʼni ikhú rí xkawiʼ rí naʼni gámbáa marigá ikhí, manújngoo mbá 1,290 mbiʼi.

12 ¡Gagi xtáa bi̱ naʼngo̱o̱ a̱jkiu̱u̱n nagi̱ʼthu̱u̱n ga̱jma̱a̱ na̱jkha̱nú asndu 1,335 mbiʼi!

13 Mú ikháán añajún má xúʼko̱ jmbu asndu índo̱ gártumuu mbiʼi. Mbi̱ya̱a̱ jxa̱a̱ʼ, mú índo̱ gáʼganú mbiʼi marajxu̱u̱nʼ mu matandrígúu rí kaʼyaaʼ”.