Josué

24 Josué nigímbíin náa Siquem xúgíinʼ bi̱ kúwá náa xuajin majkhaʼ* ndrígóo Israel, xabuanii, bi̱ kuya̱ edxu̱u̱, bi̱ nunimbaníí xkujndu ga̱jma̱a̱ eʼwíinʼ bi̱ guáʼdáá mbá ñajunʼ, ikhiin nixnaximi̱jna̱ náa inuu Dios bi̱ gajkhun. 2 Josué niʼthún xúgíinʼ xa̱bu̱ xuajin: “Rígi̱ dí naʼthí Jeobá Dios ndrígóo Israel: ‹Náa ridoo mañu Éufrates nikúwá wajin xiʼñála nákha wajyúuʼ, mbáa dí ikhaa ninindxu̱u̱ Taré, anu̱u̱* Abrahán ga̱jma̱a̱ anu̱u̱ Nacor, ikhiin nigúʼwún mbuyamajkún eʼwíinʼ dioses.

3 Nda̱wa̱á ni̱jkhá ka̱ya̱a̱ náa i̱mba̱ ridoo mañu Éufrates wajin xiʼñála Abrahán, ni̱ni̱ dí maʼga rajnguʼúun náa mbá xúgíʼ ku̱ba̱ʼ Canaán, ma̱ngaa ni̱ni̱ dí maʼni mbaʼin bi̱ naguwáʼ náa ikhaa. Nixniu̱u̱ Isaac, 4 Isaac nixniu̱u̱ Jacob ga̱jma̱a̱ Esaú. Nda̱wa̱á Esaú ni̱xnu̱u̱ maxtáa náa kúbá Seír, Jacob gajmíi̱n e̱ji̱i̱n niguájtaan náa Egipto. 5 Nda̱wa̱á nikuʼmáanʼ Moisés ga̱jma̱a̱ Aarón, náa Egipto nikuʼnguáʼ gamiéjunʼ, nda̱wa̱á nigúwáanʼla ikhí. 6 Índo̱ nixtáá ragúwíin ana̱la náa Egipto, ga̱jma̱a̱ ikháanʼla nijkhua̱nú náa lamáa, egipcios nigún ruxkúún ana̱la ga̱jma̱a̱ carro dí nuxmijná ga̱jma̱a̱, ma̱ngaa bi̱ trámiinʼ náa wáyú asndu náa lamáa Maña̱ʼ.* 7 Ikháanʼla nigíʼdi̱i̱ nitakáñúʼ, ikhúún Jeobá ni̱ni̱ dí maʼni mikrína náa ta̱pha̱ dí giáa̱nʼ gajmiála egipcios, ga̱jma̱a̱ lamáa niruguamiʼíinʼ, ikhú nikháñún, ikháanʼla ndi̱ya̱a̱ ga̱jma̱a̱ idala xúgíʼ dí ikhúún ni̱ni̱ náa Egipto. Nda̱wa̱á ikháanʼla nikuwáanʼ mba̱yu̱u̱ʼ tsiguʼ náa ku̱ba̱ʼ mijxooʼ.*

8 Ni̱jkhá kaguáanʼla náa mbañúúnʼ amorreos bi̱ kúwá xígií náa i̱mba̱ ridoo* mañu Jordán, ikháanʼ nixmíjná gajmiála, nixnajxíin náa ñawánla mu xúʼko̱ makuwáanʼ náa mbañúúnʼ ga̱jma̱a̱ ni̱ni̱ gámbíin náa ikháanʼla. 9 Ikhú Balac a̱ʼdióo Zipor bi̱ nindxu̱u̱ rey náa Moab, nixmínaʼ gajmíi̱n xa̱bu̱ Israel. Ikhaa nindxa̱ʼóo ma̱ʼkha̱ Balaam a̱ʼdióo Beor mu maʼtátsríguáanʼla. 10 Ikhúún táʼndoʼ gádxawuun Balaam. Ikhaa niʼni tsajkurámáanʼ nángi eʼni, ga̱jma̱a̱ ikhúún ni̱ni̱ káwáanʼla náa ñawúunʼ.

11 Ikhú ikháanʼla nikidáanʼ náa mañu Jordán, nijkhua̱nú náa Jericó. Bi̱ kuya̱ edxu̱u̱ náa Jericó, amorreos, perizitas, cananeos, hititas, guirgaseos, heveos ga̱jma̱a̱ jebuseos nixmijná ga̱jma̱á nindxa̱la, mú ikhúún nixnajxíin náa ñawánla. 12 Ni̱ni̱ dí makáguabiinʼ* dí niʼni magáñún náa ikháanʼla, xó má ni̱ni̱ gajmiála a̱jmi̱i̱n reyes amorreos. Táʼni espada ndrígáaʼ ni má xkamídá. 13 Ni̱xna̱la mbá ku̱ba̱ʼ dí túñajuíínʼla, ga̱jma̱a̱ xuajin dí raʼkháa ikháanʼla ni̱ni̱, kuwáanʼla ikhí. Kuwáanʼla ra̱phu uva ga̱jma̱a̱ olivo dí raʼkháa ikháanʼla ni̱du›.

14 Ikha jngóo, gamiñálá ku̱ya̱a̱ Jeobá, gu̱ni̱ ñajuunʼ ga̱jma̱a̱ mbá a̱jkia̱la kaʼwu ga̱jma̱a̱ gajkhun. Guxidíinʼla dioses bi̱ ndiyamajkhún wajin xiʼñála náa i̱mba̱ ridoo mañu Éufrates ga̱jma̱a̱ náa Egipto, gu̱nila ñajuunʼ Jeobá. 15 Á mu dí raʼkhí eya̱a̱la dí mu̱ni̱ ñajuunʼ Jeobá, guraʼwi̱i̱ xúgi̱ tsáá gúyamajkuíí: Á mu dioses bi̱ ndiyamajkhún wajin xiʼñála bi̱ nikúwá náa ridoo mañu Éufrates o dioses ndrígu̱ún amorreos, bi̱ nikúwá náa mbaaʼ dí kuwáanʼla xúgi̱. Mú ikhúún gajmíʼ bi̱ kúwá náa goʼwóʼ mu̱ni̱xu̱ʼ ñajuunʼ Jeobá”.

16 Ikhú xa̱bu̱ xuajin niriʼña: “Nditháan xáʼkha̱ a̱jkiu̱xu̱ muniʼñááʼ Jeobá ga̱jma̱a̱ munixu̱ʼ ñajúúnʼ eʼwíinʼ dioses. 17 Jeobá nindxu̱u̱ Dios ndrígúxu̱ bi̱ niguwáanʼxu̱ ikháanʼ ga̱jma̱a̱ anu̱xu̱ náa Egipto, náa ku̱ba̱ʼ dí nini̱ndxu̱xu̱ʼ ñumbáá, bi̱ niʼni mbaʼa milagros mba̱ʼu̱ mu mbu̱ya̱a̱xu̱, ga̱jma̱a̱ nixtáa rañewunxu̱ náa mbá xúgíʼ kamba̱a̱ dí nigúwaʼ ragúnʼxu̱, ma̱ngaa náa majñu̱únʼ xa̱bu̱ xuajin dí ninújnguxu. 18 Jeobá nixkawíin xúgíinʼ xa̱bu̱ xuajin, asndu amorreos ma̱ngaa, bi̱ nikúwá náa ku̱ba̱ʼ rígi̱ dí kuwáanʼxu̱ xúgi̱. Ikha jngóo mangáanʼxu̱ mu̱ni̱ ñajuunʼ Jeobá, numuu dí ikhaa nindxu̱u̱ Dios ndrígúxu̱”.

19 Josué niʼthún xúgíinʼ xa̱bu̱ xuajin: “Ikháanʼla tséjmáan gúni̱ ñajuunʼ Jeobá, numuu dí ikhaa nindxu̱u̱ mbáa Dios kaʼwii, mbáa Dios bi̱ na̱nda̱ʼa̱ dí mbiʼyamajkuíí i̱ndó ikhaa. Xáʼni mba̱a̱ a̱jkiu̱u̱n á mu nu̱ni̱ dí raʼkhí ga̱jma̱a̱ á mu nuxuʼdámi̱jna̱ aʼkhá. 20 Á mu nuniʼñáánʼ Jeobá ga̱jma̱a̱ nduyamajkhún dioses bi̱ ragájkhun, ikhaa maʼni dí mumíniiʼ ga̱jma̱a̱ maʼni gámbáanʼla, maski ajndu nákha ginii niʼni dí májánʼ ga̱jma̱a̱ numala”.

21 Mú xa̱bu̱ xuajin nitháán Josué: “¡Xúnixu̱ xúʼko̱, ikháanʼxu̱ mu̱ni̱ ñajuunʼ Jeobá!”. 22 Ikhú Josué niʼthúún xa̱bu̱ xuajin: “Ikháanʼla má nindxa̱la testigos dí mbiʼi xúgi̱, dí nuxuʼdamíjna̱ dí mu̱ni̱ ñajuunʼ Jeobá”. Ikhú ikhiin niriʼña: “Nindxu̱xu̱ testigo”.

23 “Ikha jngóo guxidíinʼla dioses bi̱ ragájkhun bi̱ kúwá náa ikháanʼla, gu̱ni̱ ñajuunʼ Jeobá Dios ndrígóo Israel ga̱jma̱a̱ xúgíʼ a̱jkia̱la”. 24 Ikhú xa̱bu̱ xuajin nitháán Josué: “¡Munixu̱ʼ ñajuunʼ Jeobá Dios ndrígúxu̱ ga̱jma̱a̱ munimbuxu dí naʼthí!”.

25 Mbiʼi rúʼko̱, Josué nimbánuminaʼ gajmíi̱n xa̱bu̱ xuajin, ga̱jma̱a̱ niri̱ya̱ʼ mbá awan xóo mambanúu xtángoo náa Siquem. 26 Ikhú Josué niʼnirámáʼ ajngáa rúʼko̱ náa i̱yi̱i̱ʼ dí nigumarámáʼ Xtángoo ndrígóo Dios, ga̱jma̱a̱ nigíʼ mbá itsí mba̱a̱ náa agoo ixi̱ mba̱a̱ dí wíji̱ náa mijngii nduyamajkuíí Jeobá.

27 Josué niʼthúún xóó xa̱bu̱ xuajin: “Itsí rígi̱ niʼdxawuun xúgíʼ dí Jeobá niʼtála, ga̱jma̱a̱ mani̱ndxu̱u̱ testigo náa ikháanʼla, mu xúʼko̱ xútha dí tséniʼníiʼla Dios”. 28 Xúʼko̱ kaʼnii Josué niʼtángawún xa̱bu̱ xuajin, ikhú mámbáa ni̱jkha̱a̱ náa mbaaʼ dí ndiyáa.

29 Nda̱wa̱á dí nijngoo rígi̱, ikhú Josué a̱ʼdióo Nun, xa̱bi̱i̱ Jeobá nikháñuu índo̱ nigiʼdoo 110 tsiguuʼ. 30 Nidi̱i̱ náa ku̱ba̱ʼ rí ikhaa má nigruigúu náa Timnat-Sérah, dí rígá náa kúbá Efraín, xígií náa norte náa kúbá Gaas. 31 Xa̱bu̱ Israel nini̱ ñajuunʼ Jeobá náa mbá xúgíʼ mbiʼi dí nixtáa Josué, ga̱jma̱a̱ mbá xúgíʼ mbiʼi dí nikúwá xabuanii bi̱ nikúwá nda̱wa̱á dí nikháñuu Josué, bi̱ ndiyáá xúgíʼ dí Jeobá niʼni ga̱jma̱a̱ numún xa̱bu̱ Israel.

32 Itsu̱u̱ José dí israelitas niguwáa̱nʼ kudúún náa Egipto, nidu̱u̱ náa Siquem, náa ku̱ba̱ʼ rí Jacob niʼtsi ga̱jma̱a̱ mbá 100 mbújkha̱a̱ plata náa e̱ji̱i̱n Hamor, anu̱u̱ Siquem, mbaaʼ rígi̱ ni̱jkha̱nú ninindxu̱u̱ mbañúúnʼ e̱ji̱i̱n José.

33 Nikháñúu Eleazar a̱ʼdióo Aarón ma̱ngaa. Nidi̱i̱ náa bíjní ndrígóo a̱ʼdióo Finehás, mbaaʼ dí nigruigúu náa kúbá Efraín.