Ragajtsú i̱yi̱i̱ʼ rí niʼnirámáʼ Juan

1 Ikhúúnʼ bi̱ ni̱ndxu̱ʼ xa̱bu̱ nikhi̱i̱,* naniraʼmáʼ rígi̱ náa inaaʼ Gayo bi̱ ra̱ʼkhá tháán eyoʼ ka̱ya̱a̱ʼ.

2 Ndxájuʼ, natájkáan má xúʼko̱ mu xúgíʼ rí gátani̱ magajnúu májánʼ, ga̱jma̱a̱ rí xáʼniaaʼ nandii xó má májánʼ xtaa xúgi̱. 3 Numuu dí ra̱ʼkhá tháán nidxuʼ índo̱ niguwáʼ a̱ngiu̱lú ga̱jma̱a̱ nithi dí ikháán xtaa má xúʼko̱ náa kiʼsngáa rí gajkhun. Ma̱ngaa nuthi rí jngruiga̱a̱ʼ má xúʼko̱ náa kiʼsngáa gajkhun rígi̱. 4 Nda̱a̱ imbo̱o̱ rí naʼni maʼdxuʼ wéñuuʼ rí madxawun dí e̱ji̱nʼ jngruigu̱u̱n má xúʼko̱ náa rí gajkhun.

5 Ndxájuʼ, natasngájma rí xtáa jmbu náa Dios índo̱ natani̱ rí májánʼ ga̱jma̱a̱ numún a̱ngiu̱lú maski ajndu tsétatsiniúnʼ. 6 Ikhiin nithi náa inún xúgíinʼ bi̱ nagimbíi̱n* rí ikháán májánʼ a̱jkia̱a̱nʼ. Mbá péñu, atambáñúún ga̱jma̱a̱ rí gáʼñúunʼ náa gágún, mú atani̱ xóo rí nanigu̱u̱ʼ Dios. 7 Numuu rí ikhiin nigún gútaraʼa ga̱jma̱a̱ numuu mbiʼyuu Dios. Túguaʼti̱i̱n rí xa̱bu̱ bi̱ tséninuwiinʼ Dios muxnún rí nda̱ñúunʼ. 8 Ikháanʼlú ndayóoʼ mumbáñún a̱ngiu̱lú bi̱ xóo ikhiin mu xúʼko̱ mangáánʼ muñambáá majuiʼtá rí gajkhun.

9 Nikuʼnguánʼ mbá i̱yi̱i̱ʼ náa inún bi̱ nagimbíi̱n,* mú Diótrefes bi̱ nanigu̱u̱ʼ mayéʼga edxu̱u̱ náa ikhiin nditháan tséʼyamajkuu rí nuta̱a̱nxu. 10 Ikha jngóo, á mu na̱jkhá, mathu̱u̱n náá numuu rí jngruigo̱o̱ kagu̱u̱ xtujtaa ga̱jma̱á numuxu.* Mú, raʼkháa i̱ndó rúʼko̱, ma̱ngaa tsíyoo gágruiguíin ga̱jma̱a̱ májánʼ a̱ngiu̱lú. Diótrefes tsíniñúnʼ rí a̱ngiu̱lú mundrigúun eʼwíinʼ ga̱jma̱a̱ nandoo maxkawíin náa nagimbíi̱n.*

11 Ndxájuʼ, xátayaridáá dí ra̱májánʼ. Atayaridáá rí májánʼ, numuu rí bi̱ naʼni dí májánʼ na̱ʼkha̱ náa Dios. Mú bi̱ tséʼni rí májánʼ tséʼninuwiinʼ Dios. 12 Xúgíinʼ ikhiin nuthi rí májánʼ eʼni Demetrio ga̱jma̱a̱ rí xóo xtáa nasngájma dí xtáa náa rí gajkhun. Xúʼko̱ má etaxu̱ mangáanʼ, ga̱jma̱a̱ ikháán má natayáá rí ikháanʼ tsénindúwaʼxu.

13 Gúʼdoo wéñuuʼ xóó rí matha̱a̱nʼ, mú nánguá eyoʼ gániraʼmáʼ náa inuu i̱yi̱i̱ʼ rígi̱. 14 Numuu rí nacha̱ má nandoʼ maʼgá gáyaaʼ mu muʼtámíjná.

Tsímáá lá gáraxtaa.*

Bi̱ nambáxulú gajmiúlú nurajxi̱ín. Ma̱ngaa arathún rí narajxi̱i̱n mámbáa bi̱ nambáxulú gajmiúlú.