APOCALIPSIS

1 Mbá guasngájma* rí Dios nixnúu Jesucristo mu maxnún mbuyáá ñumbáá ndrígióo dí inu má marigá. Jesucristo nikuʼmaa ángel ndrígióo ga̱jma̱a̱ nijmuu xtiʼkhuu mu masngájmuu rígi̱ Juan, bi̱ nindxu̱u̱ ñumbáá ndrígióo Dios,* 2 bi̱ niʼthí ga̱jma̱a̱ numuu ajngáa rí Dios nixná, ma̱ngaa dí nixná Jesucristo, xúʼko̱, ga̱jma̱a̱ xúgíʼ rí ndiʼyoo. 3 Gagi xtáa xa̱bu̱ bi̱ naguxnuu ga̱jma̱a̱ aʼwá gakhi̱i̱ rí kiʼnirámáʼ náa kiʼtáriya̱ʼ rígi̱, ma̱ngaa gagi kúwíi̱n xa̱bu̱ bi̱ gúdxawíín ga̱jma̱a̱ gúnimbu̱ún rí kiʼnirámáʼ, numuu rí mbiʼi rí nijuaxtaʼwíí gíʼ má mijngii.

4 I̱yi̱i̱ʼ rígi̱ nakuʼma Juan náa mbá juwan congregación* dí rígá náa mbayuuʼ Asia:

Garigá má xúʼko̱ rí tsímáá ga̱jma̱a̱ rí májánʼ wéñuuʼ a̱jkiu̱u̱n “bi̱ ninindxu̱u̱, bi̱ nindxu̱u̱ ga̱jma̱a̱ bi̱ na̱ʼkha̱”, ga̱jma̱a̱ ndrígu̱ún bi̱ mbá juwiin espíritu bi̱ kúwá náa inuu xíliu̱u̱* 5 ma̱ngaa ndrígióo Jesucristo bi̱ nindxu̱u̱ Testigo Jmbii, bi̱ nigabi̱i̱ ginii náa majñu̱únʼ bi̱ nikháñún ga̱jma̱a̱ bi̱ naʼtáñajúúnʼ reyes bi̱ kúwá náa tsu̱du̱u̱ ku̱ba̱ʼ.

Bi̱ nandoo kaʼyulú ma̱ngaa niʼnikáwáánʼ náa aʼkhá ndrígúlú ga̱jma̱a̱ eʼdiuu, 6 ikhaa niʼni rí muʼtáñajunʼ ga̱jma̱a̱ rí manindxu̱lú ndxajkun náa Dios ndrígióo ga̱jma̱a̱ Anu̱u̱, náa ikhaa gáʼga gamajkhu ga̱jma̱a̱ tsiakii asndu kámuu. Xúʼko̱ gáʼni.*

7 ¡Guya̱a̱la! Maʼkha̱a̱ náa du̱u̱n ga̱jma̱a̱ xúgíinʼ mbuyáá, asndu bi̱ nisraʼangayii, ga̱jma̱a̱ numuu ikhaa xúgíinʼ xuajen majkhaʼ* dí rígá náa tsu̱du̱u̱ ku̱ba̱ʼ mumbi̱ya̱ʼ gínún. Rígi̱ gajkhun marigá, xúʼko̱ gáʼni.*

8 “Ikhúúnʼ ñajunʼ Alfa ga̱jma̱a̱ Omega,* eʼthí Jeobá* Dios, bi̱ ninindxu̱u̱, bi̱ nindxu̱u̱ ga̱jma̱a̱ bi̱ na̱ʼkha̱, bi̱ gíʼdoo xúgíʼ tsiakii”.

9 Ikhúúnʼ Juan, bi̱ nindxu̱ʼ ndxájuala, ma̱ngaa nixtáá mbóó ga̱jma̱á nindxa̱la índo̱ nimíniiʼla,* niʼngulú mbóó ga̱jma̱a̱ makuwáanʼlú mbóó ruʼtáñajunʼ gajmiúlú Jesús. Nixtáá náa isla rí mbiʼyuu Patmos numuu rí ni̱tha̱ ga̱jma̱a̱ numuu Dios ma̱ngaa numuu rí nitaráʼa ga̱jma̱a̱ numuu Jesús. 10 Ga̱jma̱a̱ numuu espíritu santo* nijkhánú nixtáá náa mbiʼi ndrígóo Tátá, náa kidxuʼ nidxawuun mbá aʼwá gakhi̱i̱, xóo aʼwóo mbá trompeta, 11 rí niʼthúnʼ: “Atanirámáʼ náa mbá rollo dí natayáá ga̱jma̱a̱ ataxúʼmá náa mbá juwan congregación:* Náa Éfeso, Esmirna, Pérgamo, Tiatira, Sardis, Filadelfia ga̱jma̱a̱ Laodicea”.

12 Nitangu̱ún gáyejxi̱ mu mba̱yo̱o̱ tsáa eʼthúnʼ, índo̱ nigutangu̱ún ndi̱yo̱o̱ mbá juwan candelabro* rí ki̱ʼni̱ ga̱jma̱a̱ oro. 13 Náa majñu̱u̱nʼ candelabro ndi̱yo̱o̱ mbáa xóo a̱ʼdióo xa̱biya̱, bi̱ kagúwúunʼ mbá xtíin rí najkha̱nú asndu náa rajkhúu, ma̱ngaa xtíin dí ka̱ʼwa̱n tso̱xto̱o̱ ki̱ʼni̱ ga̱jma̱a̱ oro. 14 Ma̱ngaa xtátsu̱u̱n edxu̱u̱ nindxu̱u̱ miʼxídiʼ, xóo mugu̱ dí miʼxá, iduu nindxu̱u̱ xóo ri̱ʼyu̱u̱ aguʼ. 15 Rajkhúu nindxu̱u̱ xóo cobre dí nagumakaʼwi̱i̱ índo̱ naxpíbiʼ náa awúun horno, ga̱jma̱a̱ aʼwóo nindxu̱u̱ xóo aʼwóo iyaʼ rí naʼndatígú. 16 Náa ñawún mújúunʼ trámiinʼ mbá juwiin aʼgua̱a̱n ga̱jma̱a̱ náa rawuunʼ nagájnúu mbá espada rí mbaʼ rí a̱jma̱ inuu ga̱jma̱a̱ mixíníʼ, inuu nindxu̱u̱ xóo a̱jkha̱ʼ rí nambiʼi gakhi̱i̱ wéñuuʼ. 17 Índo̱ ndi̱yo̱o̱ nixpátrigu̱u̱n náa inuu rajkhúu asndu xóo nikháñuʼ.

Ga̱jma̱a̱ ikhaa nixkrámúnʼ ga̱jma̱a̱ ñawún mújúunʼ ma̱ngaa niʼthúnʼ: “Xámiñanʼ, ikhúúnʼ nindxu̱ʼ bi̱ ginii ga̱jma̱a̱ bi̱ iwáá kayuuʼ, 18 ma̱ngaa bi̱ xtáa. Nikháñunʼ mú rí xúgi̱ xtáá asndu kámuu mbiʼi. Gúʼdoʼ llave ndrígóo xkrugua náa rí nakháñun ga̱jma̱a̱ Iñá wajinʼ.* 19 Ikha jngóo atanirámáʼ rí nitayáá, rí xtáa rarígá xúgi̱ ga̱jma̱a̱ dí marigá nda̱wa̱á dí rígi̱. 20 Rígi̱ nindxu̱u̱ ngu̱ʼwa̱ rí mitsúʼkháan ndrígu̱ún bi̱ mbá juwiin a̱ʼgua̱a̱n bi̱ nitañún náa ñawún mújúnʼ ga̱jma̱a̱ mbá juwan candelabro rí ki̱ʼni̱ ga̱jma̱a̱ oro: Bi̱ mbá juwiin a̱ʼgua̱a̱n nandoo gáʼthúu̱n ángeles bi̱ kúwá náa mbá juwan congregación ga̱jma̱a̱ mbá juwan candelabro nandoo gáʼthúu̱n mbá juwan congregación.

2 Atani̱rámáʼ rígi̱ náa inuu ángel bi̱ xtáa náa congregación* ndrígóo Éfeso: Rígi̱ rí naʼthí bi̱ trámiinʼ mbá juwiin a̱ʼgua̱a̱n náa ñawún mújúunʼ ga̱jma̱a̱ bi̱ na̱jkha̱ náa majñu̱u̱ʼ mbá juwan candelabro* rí ki̱ʼni̱ ga̱jma̱a̱ oro: 2 ‹Naniʼnúuʼ rí natani̱, ñajunʼ gakhii ga̱jma̱a̱ rí naʼnga̱a̱ʼ ma̱ngaa nda̱yo̱o̱ rí tséʼngo̱o̱ a̱jkia̱a̱nʼ eni̱ xa̱bu̱ ra̱míjíinʼ ga̱jma̱a̱ nitayáʼ ma̱ta̱ya̱a̱ á mu gajkhun ni̱ndxu̱ún apóstoles bi̱ nuthíí rí ni̱ndxu̱ún mú nitayáá rí na̱nguá, nidxuaʼnú nitayáá rí minduwiinʼ. 3 Naʼnga̱a̱ʼ má xúʼko̱, ga̱jma̱a̱ numuu mbiʼyuʼ natraʼníí mbaʼa ga̱ʼkhu̱, tsékanájkaaʼ. 4 Mú nda̱yo̱o̱ mbá rí tsénigu̱ʼ tani̱: Nindátiga̱a̱’ ngajua rí xtaʼdáá nákhá ginii.

5 Ikha jngóo garmáʼáan a̱jkia̱a̱nʼ asndu náá nikiéʼkháanʼ, gatanga̱a̱ a̱jkia̱a̱nʼ ga̱jma̱a̱ atani̱ xó má natani̱ nákhá ginii. Á mu na̱nguá, ma̱ʼkhá gárígúu candelabro ndrígáaʼ náa wíji̱, xárígúu á mu natanga̱a̱ a̱jkia̱a̱nʼ. 6 Mú nda̱yo̱o̱ mbá dí nanigu̱ʼ tani̱: Rí nawiya̱a̱ʼ xtayáá xúgíʼ dí nuni̱ bi̱ nagún kidxuuʼ Nicolás, rí ikhúúnʼ ma̱ngaa nawi̱yu̱ʼ ka̱yo̱o̱. 7 Bi̱ gíʼdoo cháʼwuun, gaxnátiʼñaminaʼ maʼdxawuun rí espíritu naʼthúún bi̱ nagimbíi̱n: Bi̱ gáʼngo̱o̱, ma̱xnu̱u̱ mikhu xndúu ixi̱ dí naxná rí ndaʼya dí juáʼan náa ku̱ba̱ʼ mitsaanʼ ndrígóo Dios›.

8 Ataniraʼmáʼ rígi̱ náa inuu ángel bi̱ xtáa náa congregación ndrígóo Esmirna: Rígi̱ rí naʼthí ikhaa, bi̱ ginii ga̱jma̱a̱ bi̱ iwáá kayuuʼ, bi̱ nikháñuu mú nitanga̱a̱ nixtáa mbu̱júu̱ʼ: 9 ‹Nda̱yo̱o̱ rí natamíníiʼ* ga̱jma̱a̱ numuu rí migínáán maski ajndu xtaʼdáá ma̱ngaa nda̱yo̱o̱ rí nuta wéñaaʼ bi̱ nuthíí rí ni̱ndxu̱ún judíos mú na̱nguá ni̱ndxu̱ún, ikhiin ni̱ndxu̱ún mbá guáthi̱i̱n* bi̱ nagún kidxuuʼ Gixa̱a̱.* 10 Xámiñaaʼ náa rí matamíniiʼ, atayáá rí Gixa̱a̱ makudáanʼla má xúʼko̱ tikuáanʼ rí ikháanʼla náa guʼwá e̱jua̱nʼ, mu xúʼko̱ musngajmá rí naʼngala kájxi̱ ga̱jma̱a̱ mumíniiʼ* mbá gu̱wa̱ʼ mbiʼi. Araxtaa má xúʼko̱ jmbu asndu índo̱ gákáñáanʼ ga̱jma̱a̱ ikhúún maxna̱a̱ʼ rí maraxtaa kámuu mbiʼi. 11 Bi̱ gíʼdoo cháʼwuun, gaxnátiʼñaminaʼ maʼdxawuun rí espíritu naʼthúún bi̱ nagimbíi̱n: Bi̱ gáʼngo̱o̱ ni xátanga̱a̱ makhañúu rí maʼni a̱jma̱ aʼphu̱›.

12 Ataniraʼmáʼ rígi̱ náa inuu ángel bi̱ xtáa náa congregación ndrígóo Pérgamo: Rígi̱ rí naʼthí bi̱ kayá mbá espada mbaʼ rí a̱jma̱ inuu ga̱jma̱a̱ mixíníʼ. 13 ‹Nda̱yo̱o̱ náa xtaa: Ikhí náa gíʼ xíliúu Gixa̱a̱.* Maski ajndu xúʼko̱ nariejún jmbu má xúʼko̱ náa ikhúúnʼ.* Ma̱ngaa tátani̱ gáʼdu̱u̱n fe rí xtaʼdáá náa ikhúúnʼ mbiʼi rí nixtáa Antipas, testigo ndrígióʼ bi̱ jmbii, bi̱ nixiyáa náa níjniala ikháanʼ náa xtáa Gixa̱a̱.*

14 Mú nda̱yo̱o̱ tikhuu rí tsénigu̱ʼ tani̱: Rí xtaʼdiin bi̱ tséniña̱a̱ʼ kiʼsngáa ndrígóo Balaam, bi̱ niʼsngóo Balac mu magrui̱ga̱ tsáʼkhá náa e̱ji̱i̱n Israel rí mu̱phu̱ xuwiʼ rí niwaxnájxi̱ náa inún xándú ma̱ngaa rí mubúúnʼ xkawiʼ kayuuʼ gajmiún eʼwíinʼ.* 15 Xúʼko̱ má mangáán, xtaʼdiin bi̱ tséniña̱a̱ʼ kiʼsngáa ndrígu̱ún mbá guáthi̱i̱n bi̱ nagún kidxuuʼ Nicolás. 16 Ikha jngóo gatanga̱a̱ a̱jkia̱a̱nʼ. Á mu tsétani̱, ma̱ʼkhá má nacha̱, ga̱jma̱a̱ maxmínaʼ gajmíʼ ikhiin ga̱jma̱a̱ espada mbaʼ dí nagájnúu náa rawunʼ.

17 Bi̱ gíʼdoo cháʼwuun, gaxnátiʼñaminaʼ maʼdxawuun dí espíritu naʼthúún bi̱ nagimbíi̱n: Bi̱ gáʼngo̱o̱ maxnu̱u̱ maná dí rígá ngu̱ʼwa̱ ma̱ngaa mbá itsí chíʼgíiʼ dí miʼxá. Ikhí kiʼnirámáʼ mbá mbiʼyuu nuxi̱ʼ rí nimbáa tséninuuʼ, i̱ndó naninuuʼ bi̱ nagruigú›.

18 Atanirámáʼ náa inuu ángel bi̱ xtáa náa congregación ndrígóo Tiatira: Rígi̱ rí naʼthí A̱ʼdióo Dios, bi̱ gíʼdoo iduu xóo ri̱ʼyu̱u̱ aguʼ, ga̱jma̱a̱ rajkhúu xóo cobre rí nigumakaʼwi̱i̱: 19 ‹Naniʼnúuʼ rí natani̱, ngajua ndrígáaʼ, fe ndrígáaʼ, ñajunʼ rí natani̱ ma̱ngaa rí naʼnga̱a̱ʼ ga̱jma̱a̱ rí nitani̱ xíkhoo kayuuʼ nindxu̱u̱ itháan ki xóo nákha ginii.

20 Mú nda̱yo̱o̱ mbá rí tsénigu̱ʼ tani̱: Rí naʼngo̱o̱ a̱jkia̱a̱nʼ eʼni a̱ʼgu̱ buʼko̱, Jezabel, bi̱ naʼthíí rí nindxu̱u̱ profetisa, ga̱jma̱a̱ naʼninduwiinʼ ñumbáá ndrígióʼ ga̱jma̱a̱ kiʼsngáa ndrígóo mu mubúúnʼ xkawiʼ kayuuʼ gajmiún eʼwíinʼ* ma̱ngaa mu mu̱phu̱ xuwiʼ rí nijuixnájxi̱ náa inún xándú. 21 Ni̱xnu̱u̱ mbiʼi mu matanga̱a̱ a̱jkiu̱u̱n, mú ikhaa tsíyoo gátanga̱a̱ a̱jkiu̱u̱n náa rí nabooʼ xkawiʼ kayuuʼ gajmíi̱n eʼwíinʼ.* 22 Atayáá, ma̱ni̱ rí mambatámuuʼ náa xiawoo ga̱jma̱a̱ nandii, mangiin bi̱ nuni̱ aʼkhá gajmiún ikhaa ma̱ni̱ rí mumíniiʼ* wéñuuʼ. I̱ndó á mu natanga̱a̱ a̱jkiu̱ún náa rí ikhaa nixkajxi̱i̱n muni̱, xúmíniiʼ. 23 E̱ji̱i̱n ikhaa magúdiin ga̱jma̱a̱ mbá nandii mbiiʼ, xúgíinʼ bi̱ nagimbíi̱n mbuyáá rí ikhúúnʼ nda̱yo̱o̱ ku̱ma̱ rí itháan mi̱jnu̱ʼ* ga̱jma̱a̱ a̱jkiu̱ún. Ma̱ni̱ numa̱a̱ mámbáa rí ikháanʼla xó má rí niʼni.

24 Mú bi̱ xóó kuwáanʼla náa Tiatira, xúgíinʼ bi̱ tsénimbu̱ún kiʼsngáa rígi̱, bi̱ na̱nguá niniʼnuuʼ “kiʼsngáa minduwaʼ ndrígóo Gixa̱a̱”,* nathala: “Dí tséxnala imbo̱o̱ʼ rí munimbáníí. 25 Mú gurajthuun má xúʼko̱ rí kuaʼdáá, asndu índo̱ ikhúúnʼ gáʼkháa̱ʼ. 26 Bi̱ gáʼngo̱o̱ ga̱jma̱a̱ bi̱ gáwi̱ji̱ náa kambo̱ʼ asndu náa iwáá mbiʼi, maxnu̱u̱ maʼtáñajúúnʼ xa̱bu̱ numbaaʼ, 27 xó má ikhúúnʼ nigruígú rí matañájunʼ náa Anu̱ʼ. Ikhaa mañewu̱u̱n xa̱bu̱ ga̱jma̱a̱ xkuíyá rí ajua̱nʼ ga̱jma̱a̱ majmiguiin xóo rayaʼ ku̱ba̱ʼ. 28 Ma̱ngaa maxniu̱u̱ a̱ʼgua̱a̱n najtsi. 29 Bi̱ gíʼdoo cháʼwuun, gaxnátiʼñaminaʼ maʼdxawuun rí espíritu naʼthúún bi̱ nagimbíi̱n”›.

3 Ataniraʼmáʼ rígi̱ náa inuu ángel bi̱ xtáa náa congregación ndrígóo Sardis: Bi̱ gíʼdoo mbá juwan espíritu ndrígóo Dios ga̱jma̱a̱ mbá juwiin a̱ʼgua̱a̱n: ‹Naniʼnuuʼ dí natani ga̱jma̱a̱ nda̱yo̱o̱ rí najmaʼnííʼ* dí xtaa nataya, mú rí xúgi̱ nikháñaaʼ má. 2 Araxtaa xawii ga̱jma̱a̱ araxnáá tsiakii dí xóó naguanúu dí inu má makhañúu, numuu dí na̱nguá ndi̱yo̱o̱ dí ñajunʼ ndrígáaʼ ni̱jkha̱nú ninindxu̱u̱ kájxi̱ náa inuu Dios ndrígióʼ. 3 Ikha jngóo, garmáʼáan a̱jkia̱a̱nʼ má xúʼko̱ dí nitadxawíín ga̱jma̱a̱ dí nitadrigú. Atanimbáníí má xúʼko̱ ga̱jma̱a̱ gatanga̱a̱ a̱jkia̱a̱nʼ. Mú, á mu tsejuiín ma̱ʼkhá xóo mbáa kuʼwáʼ ga̱jma̱a̱ xáta̱ya̱a̱ náá hora gáʼkhá.

4 Mú náa Sardis xtaʼdiin tikhunʼ* bi̱ túni gachíí xtíñún, maguwúnʼ xtíin miʼxá mu magún ga̱jma̱á ni̱ndxu̱ʼ numuu rí kaʼñún má. 5 Bi̱ gáʼngo̱o̱, magíʼ xtíin miʼxá ga̱jma̱a̱ nditháan xáni jngudi̱i̱ mbiʼyuu náa libro rí ndaʼya,* maniʼnuuʼ mbiʼyuu náa inuu Anu̱ʼ ga̱jma̱a̱ náa inún ángeles. 6 Bi̱ gíʼdoo cháʼwuun, gaxnátiʼñaminaʼ maʼdxuun dí espíritu naʼthúún bi̱ nagimbíi̱n›.*

7 Ataniraʼmáʼ rígi̱ náa inuu ángel bi̱ xtáa náa congregación ndrígóo Filadelfia: Rígi̱ dí naʼthí bi̱ kaʼwii, bi̱ nindxu̱u̱ gajkuwiin, bi̱ gíʼdoo llave ndrígóo David, bi̱ nambáʼtoo náa nimbáa xándoo marugua̱a̱ ga̱jma̱a̱ marugua̱a̱ náa nimbáa xájmaa mambáʼtoo: 8 ‹Naniʼnuuʼ dí natani̱. (Atayáá, nimbáʼtoo xkrugua náa ikháán, náa nimbáa xándoo marugua̱a̱). Maski ajndu na̱nguá xtaʼdáá wéñuuʼ tsiakii, nitanimbaaʼ ajngóʼ ga̱jma̱a̱ nitasngájma dí niriejún jmbu.* 9 Atayáá, ma̱ni̱ rí mbá nguáthi̱i̱n bi̱ nagún kidxuuʼ Gixa̱a̱,* bi̱ nuthi rí ni̱ndxu̱ún judíos mú na̱nguá ni̱ndxu̱ún, ikhiin nuninduwaʼ, maguwáʼ ga̱jma̱a̱ musmbati̱gu̱u̱n* náa rajkuáaʼ, ma̱ngaa ma̱ni̱ mbuyáá rí ikhúúnʼ nindoʼ ka̱ya̱a̱ʼ. 10 Numuu rí nitatsimbaaʼ ajngóʼ ga̱jma̱a̱ rí xóo niʼngo̱ʼ, ikhúúnʼ ma̱ngaa mañe̱wa̱a̱nʼ mbiʼi rí gáyóo xóo ni̱ndxu̱ún xa̱bu̱ numbaaʼ, rígi̱ ma̱ʼkha̱ náa xúgíʼ tsu̱du̱u̱ ku̱ba̱ʼ. 11 Xájyúuʼ má ma̱ʼkhá. Ikha jngóo arajtuun jxáʼ má xúʼko̱ rí xtaʼdáá mu nimbáa xáriyaʼ kaʼyáaʼ dí matada̱a̱ʼ.*

12 Bi̱ gáʼngo̱o̱ ma̱ni̱ rí mani̱ndxu̱u̱ rajkhúu goʼwóo Dios ndrígióʼ ga̱jma̱a̱ nditháan xágájna̱a̱ ikhí. Maniraʼmáʼ náa ikhaa mbiʼyuu Dios ndrígióʼ, ga̱jma̱a̱ mbiʼyuu xuajñuu Dios ndrígióʼ Jerusalén dí nuxi̱ʼ dí nagajtaa mekhuíí náa xtáa Dios ndrígióʼ, ma̱ngaa mbiʼyuʼ rí nuxi̱ʼ. 13 Bi̱ gíʼdoo cháʼwuun, gaxnátiʼñaminaʼ maʼdxuun rí espíritu naʼthúún bi̱ nagimbíi̱n›.

14 Ataniraʼmáʼ rígi̱ náa inuu ángel bi̱ xtáa náa congregación ndrígóo Laodicea: Rígi̱ rí naʼthí bi̱ xúʼko̱ gáʼni,* bi̱ nindxu̱u̱ testigo jmbii ga̱jma̱a̱ gajkuwiin, bi̱ Dios niʼnii ginii: 15 ‹Naniʼnuuʼ rí natani̱ ga̱jma̱a̱ nda̱yo̱o̱ rí na̱nguá miguéʼtsíín ni má mijkhán. Ra̱ʼkhá tháán májánʼ gáʼni á mu miguéʼtsíín o mijkhán. 16 Numuu rí wáá kayúúʼ mijkhán, ni na̱nguá má mijkhán wéñuuʼ ni na̱nguá má miguéʼtsíín wéñuuʼ, ikha jngóo majxiriña̱a̱nʼ náa rawunʼ. 17 Ikháán narathá, “gúʼdoo wéñuuʼ, mbaʼa rí niʼngo̱ʼ nidaaʼ ga̱jma̱a̱ nándáa má rí eyóʼ”, mú na̱nguá tayáá rí nándáa numaaʼ, rí xóo nindxa̱a̱ʼ naʼni rí magáwíinʼ a̱jkiu̱ún kuyaaʼ, rí migínáán ga̱jma̱a̱ tsíkruiga̱a̱ʼ ma̱ngaa rí mitsaʼtsáánʼ. 18 Ikha jngóo natañájuaanʼ dí maratsi̱ náa ikhúún oro dí nigumakaʼwi̱i̱ náa aguʼ mu xúʼko̱ maraʼdáá ma̱ngaa xtíin miʼxá rí mataʼgíʼ mu xúʼko̱ xátriyaʼ majkuaaʼ rí mitsaʼtsánʼ, pomada mu matani̱i̱ idaaʼ mu xúʼko̱ ma̱ndoo matiejxi̱.

19 Ikhúún naxprígún ga̱jma̱a̱ naxnu̱u̱n xkuíyá bi̱ nandoʼ ka̱ñu̱u̱n. Ikha jngóo atani̱ tsiakimínáʼ ga̱jma̱a̱ atanga̱a̱ a̱jkia̱a̱nʼ. 20 Atayáá, guáju̱n náa xkrugua rataráʼa. Á mu mbáa naʼdxawuun aʼwóʼ ga̱jma̱a̱ narmbáʼtoo xkrugua, mato̱ʼo̱ʼ ga̱jmu̱ʼ náa goʼwóo mu makuíʼtsú ga̱jmu̱ʼ wakíʼ.* 21 Bi̱ gáʼngo̱o̱, maxnu̱u̱ rí magi̱ʼi̱ʼ ga̱jma̱á nindxu̱ʼ náa xíliúʼ, xó má ikhúúnʼ niʼngo̱ʼ ga̱jma̱a̱ niʼgúnʼ ga̱jmu̱ʼ Anu̱ʼ náa xíliúu.* 22 Bi̱ gíʼdoo cháʼwuun, gaxnátíʼñaminaʼ maʼdxuun rí espíritu naʼthúún bi̱ nagimbíi̱n›”.

4 Nda̱wa̱á ndi̱yo̱o̱ mbá xkrugua kambaʼta náa mekhuíí ga̱jma̱a̱ timbá aʼwá rí nidxuun, nindxu̱u̱ xóo aʼwóo mbá trompeta. Rí niʼthúnʼ: “Atsimaaʼ gi̱i̱, mu masngajmáa’ xúgíʼ dí gíʼ marigá”. 2 Nda̱wa̱á espíritu santo* ni̱ʼkha̱ náa ikhúúnʼ. Ga̱jma̱a̱ ndi̱yo̱o̱ mbá xílí* náa mekhuíí ma̱ngaa xtáa tsáa gíʼ ikhí. 3 Bi̱ gíʼ ikhí nambiʼii xóo itsí jaspe ga̱jma̱a̱ sardio,* ma̱ngaa náa mbájndi xíliu̱u̱ nakujmaa mbáa takua̱ya̱ʼ rí nindxu̱u̱ xóo itsí esmeralda.

4 Náa mbájndi xíliu̱u̱ rígá i̱mbá 24 xílí ga̱jma̱a̱ ikhí ndi̱yo̱o̱ rí tri̱gi̱i̱n mbá 24 bi̱ kuya̱ edxu̱u̱. Bi̱ kugíʼ xtíin miʼxá ga̱jma̱a̱ náa edxu̱ún grígu mbá corona rí ki̱ʼni̱ ga̱jma̱a̱ oro. 5 Náa xílí nagájnuu rí naxpíbínʼ, aʼwá ga̱jma̱a̱ a̱jkhu̱u̱n,* ma̱ngaa ikhí rígá mbá juwan lámparas rí nakamuu náa inuu xílí. Rígi̱ nandoo gáʼthúu̱n mbá juwan espíritu ndrígóo Dios. 6 Náa inuu xílí nakujmaa dí rígá mbá lamáa dí ki̱ʼni̱ ga̱jma̱a̱ vidrio rí naxpíbínʼ ga̱jma̱a̱ nakuta̱ʼa̱.

Náa mijngii xílí ga̱jma̱a̱ náa rawuunʼ tri̱gi̱i̱n mbá a̱jkhui̱i̱n querubines* bi̱ guáʼdáá mbaʼa wéñuuʼ idún náa tsu̱du̱ún ma̱ngaa náa inún. 7 Timbáa querubín kiejxu̱u̱ xóo mbáa león, bi̱ raga̱jmi̱i̱n querubín kiejxu̱u̱ xóo mbáa xede̱, bi̱ maʼni ragajtsíin querubín inuu nindxu̱u̱ xóo inuu mbáa xa̱bu̱ ga̱jma̱a̱ bi̱ maʼni a̱jkhui̱i̱n querubín nakujmaa xóo mbáa bi̱yú bi̱ na̱jkha̱ rijma̱a̱. 8 Náa mbá a̱jkhui̱i̱n querubines mámbáa gíʼdoo mbá majun xpíjpiúu ga̱jma̱a̱ agoo ma̱ngaa náa tsu̱du̱u̱ xpíjpiúún tima mbaʼa idún. Ma̱ngaa nángi eʼni, mbiʼíí mbruʼun, nuthi: “Kaʼwii, kaʼwii, kaʼwii nindxu̱u̱ Jeobá* Dios, bi̱ gíʼdoo xúgíʼ tsiakii, bi̱ ninindxu̱u̱, bi̱ nindxu̱u̱ ga̱jma̱a̱ bi̱ na̱ʼkha̱”.

9 Mámbá rí querubines nuni̱ mba̱a̱, nuxnáá gamajkhu ga̱jma̱a̱ nuxna̱a̱ núma̱aʼ bi̱ gíʼ náa xílí, bi̱ xtáa asndu kámuu mbiʼi, 10 bi̱ mbá 24 bi̱ kuya̱ edxu̱u̱ nusmbati̱gu̱u̱n náa inuu bi̱ gíʼ náa xílí ga̱jma̱a̱ nduyamajkuíí bi̱ xtáa asndu kámuu mbiʼi. Nustiga̱ coronas ndrígu̱ún náa inuu xílí ga̱jma̱a̱ nuthi: 11 “Jeobá* Dios ndrígúxu̱, ikháán kaʼyaaʼ matandrígú gamajkhu, dí maguma mba̱a̱n ga̱jma̱a̱ matrigú tsiakii, numuu rí ikháán nitaniwíi xúgíʼ dí rígá, ma̱ngaa dí nindaaʼ marigá ni̱jkha̱nú nirígá ga̱jma̱a̱ nigumawíi”.

5 Náa ñawún mújúunʼ bi̱ gíʼ náa xílí* ndi̱yo̱o̱ mbá rollo dí kiʼnirámáʼ náa mbá nájma̱ níʼkhóo. Kaxtoʼoo májánʼ ga̱jma̱a̱ mbá juwan sello. 2 Ga̱jma̱a̱ ndi̱yo̱o̱ mbáa ángel bi̱ gíʼdoo tsiakii bi̱ niʼthí gakhi̱i̱: “Tsáá kaʼyoo mambáʼtoo rollo ga̱jma̱a̱ sello rí kaxtoʼoo ga̱jma̱a̱ rá.” 3 Nimbáa, ni má bi̱ xtáa mekhuíí, náa tsu̱du̱u̱ ku̱ba̱ʼ, ni má bi̱ xtáa náa agoo ku̱ba̱ʼ, majmaa mambáʼtoo rollo ga̱jma̱a̱ mbaʼyoo rí kiʼnirámáʼ ikhí. 4 Nigíʼdu̱u̱ nimbi̱ya̱ʼ gínúʼ, numuu rí nda̱wa̱a̱ nimbáa bi̱ kaʼyoo mambáʼtoo rollo mu mbaʼyoo rí kiʼnirámáʼ ikhí. 5 Mú mbáa bi̱ kayá edxu̱u̱ niʼthúnʼ: “Nixátambi̱ya̱ʼ itháan, atayáá, León bi̱ na̱ʼkha̱ náa xuajen chíʼgíiʼ ndrígóo Judá, bi̱ na̱ʼkha̱ náa David, niʼngo̱o̱ nidaaʼ. Ikhaa majmaa mambáʼtoo rollo ga̱jma̱a̱ mbá juwan sello rí kaxtoʼoo ga̱jma̱a̱”.

6 Náa inuu xílí ga̱jma̱a̱ náa inún mbá a̱jkhui̱i̱n querubines* ga̱jma̱a̱ náa majñu̱únʼ bi̱ kuya̱ edxu̱u̱, ndi̱yo̱o̱ wíji̱ mbáa a̱ʼdá múgú bi̱ xóo nijuixnájxi̱i̱ kaʼnii. Gíʼdoo mbá juwan chi̱jyu̱u̱ʼ ga̱jma̱a̱ mbá juwan iduu. (Iduu nandoo gáʼthúu̱n mbá juwan espíritu ndrígóo Dios rí nijuaxúʼma náa xúgíʼ tsu̱du̱u̱ ku̱ba̱ʼ). 7 Ikhú mbá nacha̱ A̱ʼdá múgú nikuʼmaminaʼ ga̱jma̱a̱ niguajthun rollo dí rígá náa ñawún mújúunʼ bi̱ gíʼ náa xílí. 8 Índo̱ niguajthun rollo, ikhú a̱jkhui̱i̱n querubines ga̱jma̱a̱ mbá 24 bi̱ kuya̱ edxu̱u̱ nismbati̱gu̱u̱n náa inuu A̱ʼdá múgú. Mámbáa kayá arpa ga̱jma̱a̱ xua̱a̱ dí oro rí kajnííʼ rí ndataun.* (Rí ndataun nandoo gáʼthúu̱n rí nutajkháan bi̱ kaxtaʼwíin).* 9 Ga̱jma̱a̱ nuni̱ mbá ajmúú nuxi̱ʼ rí naʼthí: “Kaʼyaaʼ matambáʼtáá rollo ga̱jma̱a̱ sello ndrígóo numuu rí nijuixnájxi̱i̱n ma̱ngaa ga̱jma̱a̱ eʼdiaaʼ niratsi̱i̱n xa̱bu̱ bi̱ kúwá náa xúgíʼ xuajen majkhaʼ,* bi̱ nuthi mixtiʼkhu ajngáa, xúgíinʼ enii xa̱bu̱ ga̱jma̱a̱ bi̱ kúwá náa xuajen mba̱ʼu̱ mu muni̱ ñajuunʼ Dios. 10 Ikháán nitani̱ rí mutañajunʼ ga̱jma̱a̱ rí mani̱ndxu̱ún ndxajkun mu muni̱ ñajuunʼ Dios ndrígúlú. Ga̱jma̱a̱ ikhiin mutañajunʼ náa tsu̱du̱u̱ ku̱ba̱ʼ”.

11 Náa gíʼ xílí, náa wájun querubines ga̱jma̱a̱ náa tri̱gi̱i̱n bi̱ kuya̱ edxu̱u̱, ndi̱yo̱o̱ dí kúwá mbájndi ángeles náa rawuunʼ ga̱jma̱a̱ nidxawun aʼwún mbaʼin wéñuuʼ. Naʼni itháan dí diez mil rí diez mil ga̱jma̱a̱ itháan rí miles rí miles, 12 nuthi ga̱jma̱a̱ aʼwá gakhi̱i̱: “A̱ʼdá múgú bi̱ nijuixnájxi̱i̱ kaʼyoo magruigú tsiakii, ku̱ma̱, rí magiʼdoo, maguma mba̱a̱, magruigú gamajkhu ga̱jma̱a̱ maguma tsajkurámaaʼ”.

13 Ga̱jma̱a̱ nidxawuun xúgíʼ dí nigumawíi dí rígá mekhuíí, dí rígá náa tsu̱du̱u̱ ku̱ba̱ʼ ga̱jma̱a̱ náa agoo ku̱ba̱ʼ, ma̱ngaa náa lamáa, xúgíʼ dí rígá ikhí nithi: “Bi̱ gíʼ náa xílí ga̱jma̱a̱ A̱ʼdá múgú, gaguma tsajkurámiinʼ, gaguma mbaʼu̱u̱n, gundrigú gamajkhu ga̱jma̱a̱ tsiakii asndu kámuu mbiʼi”. 14 Bi̱ a̱jkhui̱i̱n querubines nithi: “¡Xúʼko̱ gáʼni!”.* Ga̱jma̱a̱ bi̱ kuya̱ edxu̱u̱ nismbati̱gu̱u̱n ga̱jma̱a̱ ndiyamajkhún.

6 Ndi̱yo̱o̱ A̱ʼdá múgú nimbáʼtoo mbóó rí mbá juwan sello ga̱jma̱a̱ nidxawuun aʼwóo mbáa bi̱ mbá a̱jkhui̱i̱n querubines* ga̱jma̱a̱ mbá aʼwá xóo aʼwóo a̱jkhu̱u̱n: “¡Aye̱!”. 2 Ikhú ndi̱yo̱o̱ mbáa wáyú miʼxáa. Ga̱jma̱a̱ bi̱ kríguíi kayá mbá xkamídá. Nijuixnáá mbá corona ga̱jma̱a̱ nigájnuu gáxmínaʼ mu maʼngo̱o̱ madaaʼ.

3 Índo̱ A̱ʼdá múgú nimbáʼtoo dí raga̱jma̱ sello, nidxawuun niʼthí bi̱ maʼni ragajmi̱i̱n querubín: “¡Aye̱!”. 4 Ikhú nigájnúu imba̱a̱ wáyú maña̱a̱ʼ xóo aguʼ. Bi̱ kríguíi nikhánáá marígúu rí tsímáá náa tsu̱du̱u̱ ku̱ba̱ʼ, mu xúʼko̱ bi̱ kúwá ikhí muradímíjná kaníkhi̱ín, ma̱ngaa nijuixnáá mbá espada rí mbaʼ.

5 Índo̱ A̱ʼdá múgú nimbáʼtoo rí maʼni ragajtsú sello, ikhú nidxawuun niʼthí bi̱ ragajtsíin querubín: “¡Aye̱!”. Ikhú ndi̱yo̱o̱ mbáa wáyú skuniiʼ. Ga̱jma̱a̱ bi̱ kríguíi kayá mbá balanza.* 6 Náa majñu̱únʼ mbá a̱jkhui̱i̱n querubines nidxawuun mbá aʼwá rí niʼthí: “Mbá litro* trigo maʼni numuu mbá denario,* ga̱jma̱a̱ ajtsú litro cebada maʼni numuu mbá denario, xátaniguéñaaʼ aceite ndrígóo oliva ga̱jma̱a̱ vino”.

7 Índo̱ A̱ʼdá múgú nimbáʼtoo rí maʼni ragajkhu̱ sello, ikhú nidxawuun aʼwóo bi̱ maʼni ragajkui̱i̱n querubín niʼthí: “¡Aye̱!”. 8 Ikhú ndi̱yo̱o̱ mbáa wáyú miʼxájtíiʼ. Bi̱ kríguíi mbiʼyuu Wajinʼ ga̱jma̱a̱ Iñá wajinʼ* na̱jkha̱ kidxuuʼ. Nikhánún rí mutañajunʼ náa itháan rí maʼni mbá ta̱pha̱* ku̱ba̱ʼ mu muradíin bi̱ kúwá ikhí ga̱jma̱a̱ mbá espada rí mbaʼ, ewiʼ, nandii mbi̱ʼ ga̱jma̱a̱ xujkhú xáná bi̱ kúwá náa tsu̱du̱u̱ ku̱ba̱ʼ.

9 Índo̱ A̱ʼdá múgú nimbáʼtoo rí maʼni witsu sello, ndi̱yo̱o̱ náa agoo rí nakarámáʼ tsigijñaʼ eʼdiún* bi̱ niradíin numuu rí niguájun jmbu náa ajngá rawuunʼ Dios ma̱ngaa ga̱jma̱a̱ numuu rí nithi. 10 Ikhiin nindxaʼwa̱ ga̱jma̱a̱ aʼwá gakhi̱i̱: “Tátá, ikháán bi̱ nindxa̱a̱ʼ itháan mba̱a̱, kaʼwíín ga̱jma̱a̱ gajkuwíín, nguáná gátanda̱ʼa̱a̱ cuenta náa bi̱ nduya bi̱ kúwá náa tsu̱du̱u̱ ku̱ba̱ʼ ma̱ngaa matrumiin eʼdiuxu rá.” 11 Xúgíinʼ ikhiin nikhánún mbá xtíin miʼxá mbi̱jua̱ ma̱ngaa nijuiʼthúún rí mbuya̱a̱ xu̱únʼ mbá chíʼgíiʼ asndu índo̱ gájxi̱ número ndrígu̱ún a̱ngiu̱ún bi̱ nindxu̱ún ñumbáá, mangiin a̱ngiu̱ún bi̱ inu má muradíin xó má niradíin ikhiin.

12 Ma̱ngaa ndi̱yo̱o̱ A̱ʼdá múgú nambáʼtoo rí maʼni majun sello. Ikhú niʼxma gakhi̱i̱ wéñuuʼ, ga̱jma̱a̱ a̱jkha̱ʼ niʼni mikrínáa xóo xtíin skuniʼ,* ma̱ngaa kañiʼ gu̱nʼ niʼni maña̱a̱nʼ xóo eʼdi, 13 ga̱jma̱a̱ a̱ʼgua̱a̱n nijngutíguíin náa tsu̱du̱u̱ ku̱ba̱ʼ xóo índo̱ najngutígú higo maxaʼ náa ixu̱u̱ índo̱ naxnúu giñánʼ gakhi̱i̱. 14 Mekhu nimbúximina̱a̱ʼ xóo mbá rollo, ma̱ngaa xúgíʼ kúbá ga̱jma̱a̱ islas* nigijxingoo náa tri̱ga̱. 15 Ikhú reyes bi̱ kúwá náa ku̱ba̱ʼ, bi̱ guáʼdáá numún, bi̱ nutañajúúnʼ soldado, bi̱ guáʼdáá, bi̱ guáʼdáá tsiakii ga̱jma̱a̱ xúgíinʼ ñumbáá mangíin bi̱ rañájúúnʼ ñumbáá, nirkaʼwumijná náa iñáʼ, ma̱ngaa náa iñúuʼ itsí dí rígá náa kúbá. 16 Nángí eʼníí ethán kúbá ga̱jma̱a̱ itsí: “Atiewunxu ga̱jma̱a̱ atarkaʼwáanʼxu náa inuu bi̱ gíʼ náa xílí,* ma̱ngaa náa rí nakiʼnáa A̱ʼdá múgú, 17 numuu rí nijkha̱nú mbiʼi rí ikhiin nikiʼníin ga̱jma̱a̱ tsáá gáʼngo̱o̱ gáwi̱ji̱ náa inún xá.”

7 Nda̱wa̱á dí rígi̱ ndi̱ñu̱u̱n a̱jkhui̱i̱n ángeles guájun náa a̱jkhu̱ níʼkhóo ku̱ba̱ʼ. Kúwá rurikháá giñánʼ dí na̱ʼkha̱ náa a̱jkhu̱ níʼkhóo ku̱ba̱ʼ, mu xáxnúu giñánʼ náa tsu̱du̱u̱ ku̱ba̱ʼ ni má náa lamáa ni má náa nimbá ixi̱. 2 Ma̱ngaa ndi̱yo̱o̱ i̱mba̱a̱ ángel bi̱ na̱ʼkha̱ ratsimuu náa nagájnuu a̱jkha̱ʼ,* kayá mbá sello ndrígóo Dios ndaʼya, niʼthún ga̱jma̱a̱ aʼwá gakhi̱i̱ a̱jkhui̱i̱n ángeles bi̱ nikhánún awan rí munigínáa ku̱ba̱ʼ ga̱jma̱a̱ lamáa. 3 Niʼthún: “¡Xúnigawíínʼ ku̱ba̱ʼ ni má lamáa ni má ixi̱, asndu índo̱ gúdramalú sello náa xkídúnʼ ñumbáá ndrígóo Dios ndrígúlú!”.

4 Nidxawuun rí bi̱ nindrigú sello: Ni̱ndxu̱ún mbá 144,000 bi̱ naguwáʼ náa xúgíʼ xuajen majkhaʼ ndrígu̱ún e̱ji̱i̱n Israel.

9 Nda̱wa̱á dí rígi̱ ndiñu̱u̱n mbaʼin xa̱bu̱ rí asndu nimbáa xáʼngo̱o̱ gáguxnii. Bi̱ naguwáʼ náa xuajen mba̱ʼu̱, xuajen majkhaʼ, xúgíinʼ enii xa̱bu̱, ga̱jma̱a̱ bi̱ nuthi mixtiʼkhu ajngáa bi̱ guájun náa inuu xílí ga̱jma̱a̱ náa inuu A̱ʼdá múgú. Kugíʼ xtíin miʼxá mbi̱jua̱, ma̱ngaa kuda ida náa ñawúúnʼ. 10 Nundxa̱ʼwa̱ ga̱jma̱a̱ aʼwá gakhi̱i̱: “¡Rí nikáwáánʼlú, gíʼmáánʼ náa Dios ndrígúlú bi̱ gíʼ náa xílí* ga̱jma̱a̱ náa A̱ʼdá múgú!”.

11 Xúgíinʼ ángeles bi̱ guájun náa mbájndi rawuunʼ xílí ga̱jma̱a̱ náa kúwá bi̱ kuya̱ edxu̱u̱ ma̱ngaa náa a̱jkhui̱i̱n querubines* nismbati̱gu̱u̱n náa inuu xílí ga̱jma̱a̱ ndiyamajkuíí Dios. 12 Nithi: “¡Xúʼko̱ gáʼni!* Dios ndrígúlú gíʼdoo ku̱ma̱ ga̱jma̱a̱ tsiakii, ikhaa kaʼyoo magruigú gamajkhu ga̱jma̱a̱ maguma mba̱a̱, xúgíinʼ gíʼmaa muni̱ mba̱a̱, muxna̱a̱ núma̱aʼ asndu kámuu mbiʼi. Xúʼko̱ gáʼni”.*

13 Ikhú mbáa bi̱ kayá edxu̱u̱ nirajxu̱ʼ: “Tsíin ni̱ndxu̱ún bi̱ nagún bi̱ kugíʼ xtíin miʼxá mbi̱jua̱ ga̱jma̱a̱ náá eguwáʼ xá.” 14 Ikha jngóo mbá nacha̱ niriʼña̱a̱: “Tátá, ikháán nindxa̱a̱ʼ bi̱ natayáá”. Ikhú ikhaa niʼthúnʼ: “Ikhiin ni̱ndxu̱ún bi̱ nagájnaán náa majphú mba̱a̱ ga̱ʼkhu̱ ma̱ngaa nijña̱a̱ xtíñún rí mbi̱jua̱, rí asndu niʼni̱i̱ miʼxá ga̱jma̱a̱ eʼdiuu A̱ʼdá múgú. 15 Ikha jngóo guájun náa inuu xílí ndrígóo Dios ga̱jma̱a̱ nuni̱ ñajuunʼ mitsúʼkháan mbiʼíí mbruʼun náa goʼwóo, ga̱jma̱a̱ bi̱ gíʼ náa xílí maxtri̱ga̱ guʼwá xtíin náa ikhiin.* 16 Ni xáxkidxu̱u̱n, ni xátangi̱i̱n makándawúnʼ, ni má a̱jkha̱ʼ xáʼni gíníin, ni má nimbá rí mijkha xáʼni gíníin. 17 Numuu rí A̱ʼdá múgú bi̱ wíji̱ náa inuu xílí mañewu̱u̱n ga̱jma̱a̱ maʼga kagui̱i̱n náa iduu iyaʼ rí ndaʼya. Ga̱jma̱a̱ Dios makúdíi mbá kayuuʼ iyooʼ idún”.

8 Índo̱ A̱ʼdá múgú nimbáʼtoo rí maʼni juwan sello, ikhú niʼni wíí mbá media hora náa mekhuíí. 2 Ikhú ndi̱ñu̱u̱n mbá juwiin ángeles bi̱ guájun náa inuu Dios ga̱jma̱a̱ ikhiin nijuixnún mbá juwan trompeta.

3 Niʼkha̱nú i̱mba̱a̱ ángel kayá mbá daan* náa gíwánʼ xámbúʼ dí niguma ga̱jma̱a̱ oro, mu matsikhá rí ndataun, ga̱jma̱a̱ niguanúu náa mijngii rí nakarámáʼ tsigijñaʼ. Nijuixnáá mba̱a̱ wéñuuʼ rí ndataun mu matsikhá, ga̱jma̱a̱ rí nutajkháan mbá xúgíinʼ bi̱ kaxtaʼwíin* náa nakarámáʼ tsigijñaʼ rí ki̱ʼni̱ ga̱jma̱a̱ oro rí gíʼ náa inuu xílí.* 4 Gúniúu rí ndataun dí natsiká ángel dí kayá náa ñawúunʼ ga̱jma̱a̱ rí nutajkáan bi̱ kaxtaʼwíin nitsimuu mbóó náa Dios. 5 Ikhú mbá nacha̱ ángel niguajthun daan, niʼnimajtíí xámbúʼ* rí kajti náa nakarámáʼ tsigijñaʼ ga̱jma̱a̱ nisngutígú náa tsu̱du̱u̱ ku̱ba̱ʼ. Ikhú nindxa̱ʼwa̱ a̱jkhu̱u̱n, niwáán aʼwá, nixpíbiʼ ma̱ngaa niʼxma. 6 Ikhú bi̱ mbá juwiin ángeles bi̱ kuda trompeta niniratamijná mudi̱i̱.

7 Bi̱ timbáa niʼdu̱u̱ trompeta. Ikhú nixnúu eʼtsí ga̱jma̱a̱ aguʼ rí kandawo̱o̱ʼ eʼdi ga̱jma̱a̱ rígi̱ nijngutígú náa tsu̱du̱u̱ ku̱ba̱ʼ. Ga̱jma̱a̱ mbá chíʼgíiʼ rí mbá tapha̱* ku̱ba̱ʼ nikha, mbá chíʼgíiʼ rí mbá tapha̱ ixi̱ dí rígá nikha̱a̱ ga̱jma̱a̱ xúgíʼ iná maxaʼ nikha̱a̱.

8 Bi̱ ragajmi̱i̱n ángel niʼdu̱u̱ trompeta. Ikhú nikujmaa rí xóo kaʼnii kúbá mba̱a̱ rí nakha nijuiʼdama̱ʼa̱n náa lamáa. Ga̱jma̱a̱ mbá chíʼgíiʼ rí mbá tapha̱ lamáa nigutajxi̱i̱ eʼdi, 9 mbá nguéjmi̱i̱n xujkhúʼ bi̱ kúwá náa lamáa nikháñún ga̱jma̱a̱ mbá nguéjma̱ barcos niguma gámbáa.

10 Bi̱ ragajtsíin ángel niʼdu̱u̱ trompeta. Ikhú náa mekhuíí nixpátríguíi mbáa a̱ʼgua̱a̱n mba̱a̱, nakhaa xóo mbá aguʼ.* Nixpátríguíi náa mbá chíʼgíiʼ mañu ga̱jma̱a̱ náa rígá iduu iyaʼ. 11 Ajenjo* mbiʼyuu a̱ʼgua̱a̱n buʼko̱. Mbá chíʼgíiʼ rí mbá tapha̱ iyaʼ nigutajxi̱i̱ ajenjo. Mbaʼin wéñuuʼ xa̱bu̱ nikháñún ga̱jma̱a̱ numuu iyaʼ, numuu rí niʼni̱i̱ miʼkhu̱u̱n.

12 Bi̱ maʼni ragajkui̱i̱n ángel niʼdu̱u̱ trompeta. Ikhú nigumagawíínʼ mbá chíʼgíiʼ rí mbá tapha̱ a̱jkha̱ʼ, mbá chíʼgíiʼ rí mbá tapha̱ gu̱nʼ ga̱jma̱a̱ mbá nguéjmi̱i̱n a̱ʼgua̱a̱n. Xúʼko̱ má mbá chíʼgíiʼ rí mbá tapha̱ rí ikhiin maʼni kríniin ga̱jma̱a̱ mbá chíʼgíiʼ rí mbá tapha̱ mbiʼi xámbiʼi, xúʼko̱ má gárígá rí mbruʼun ma̱ngaa.

13 Niyejxi̱ ga̱jma̱a̱ nidxawuun niʼthí mbáa bi̱yú bi̱ na̱jkha̱ náa tapho̱o̱ mekhu ga̱jma̱a̱ mbá aʼwá gakhi̱i̱: “¡Ay! ¡Ay! ¡Ay lá ga̱jma̱a̱ numún xa̱bu̱ bi̱ kúwá náa tsu̱du̱u̱ ku̱ba̱ʼ índo̱ gáwáán trompeta rí xóó naguanúu rí kúwá má xawii mudi̱i̱ bi̱ ajtsíin ángeles!”.

9 Bi̱ maʼni witsiin ángeles ni̱ʼdu̱u̱ trompeta. Ikhú ndi̱yo̱o̱ mbáa a̱ʼgua̱a̱n bi̱ nijpátríguíi mekhuíí náa tsu̱du̱u̱ ku̱ba̱ʼ, nijuixnájxi̱i̱ llave ndrígóo iñá mbiʼ. 2 A̱ʼgua̱a̱n bugi̱ nirmbáʼtoo iñá mbiʼ ga̱jma̱a̱ náa iñáʼ nigájnuu gúní, gúní rígi̱ nindxu̱u̱ xóo gúniúu mbá horno mba̱a̱. A̱jkha̱ʼ ga̱jma̱a̱ giñánʼ niʼni mikríniin ga̱jma̱a̱ gúní rí nagájnuu náa iñáʼ. 3 Náa gúní nigájnún tsíʼbu ga̱jma̱a̱ nigún náa ku̱ba̱ʼ, ma̱ngaa nikhánún ikháá má tsiakii rí kuáʼdáá xi̱yúʼ bi̱ kúwá náa ku̱ba̱ʼ. 4 Nijuiʼtáñajúúnʼ rí xúnigínáa ra̱jxa̱ dí rígá náa tsu̱du̱u̱ ku̱ba̱ʼ, ni má nimbá iná maxaʼ, ni má nimbá ixi̱, i̱ndó xa̱bu̱ bi̱ na̱nguá guáʼdáá sello ndrígóo Dios náa xkídúnʼ.

5 Túniñu̱u̱nʼ tsíʼbu rí muradíin xa̱bu̱, i̱ndó muni̱ rí mumíniiʼ mbá witsu igu̱nʼ. Rí xóo na̱ʼkhu̱ rí nuni̱ mumíniiʼ nindxu̱u̱ xóo índo̱ mbáa xi̱yúʼ naʼkhu̱u̱ mbáa xa̱bu̱. 6 Mbiʼi rúʼko̱ xa̱bu̱ mbuyáʼ rí makhañún, mú xúxkamaa, maʼndún makhañún mú xákháñún.

7 Tsíʼbu bugi̱ ni̱ndxu̱ún xóo wáyú bi̱ kúwá xawii magún gúxmijná. Náa edxu̱ún katrámáʼ xóo corona dí oro, inún nindxu̱u̱ xóo inún xa̱bu̱ numbaaʼ. 8 Tátsiu̱ún nindxu̱u̱ xóo tátsiu̱u̱n mbáa a̱ʼgu̱ ga̱jma̱a̱ iñúnʼ nindxu̱u̱ xóo iñuuʼ mbáa león, 9 kugíʼ ajua̱nʼ rí nañewu̱u̱n tsu̱xtu̱ún dí nindxu̱u̱ xóo ajua̱nʼ dí hierro. Ga̱jma̱a̱ aʼwóo xpíjpiúún nindxu̱u̱ xóo aʼwóo carro rí nuxmajtaa wáyú bi̱ nagún ragáñúún muxmijná. 10 Ma̱ngaa náa tsiñúúnʼ guáʼdáá xmba̱wu̱únʼ, xóo xmba̱wu̱únʼ xi̱yúʼ ga̱jma̱a̱ náa tsiñúúnʼ guáʼdáá tsiakii rí munigawúúnʼ xa̱bu̱ mbá witsu igu̱nʼ. 11 Ikhiin guáʼdaa mbáa rey: Ángel ndrígóo iñá mbiʼ. Náa hebreo mbiʼyuu Abadón,* ga̱jma̱a̱ náa griego mbiʼyuu Apolión.*

12 Timbá ay ninújngoo má. ¡Gudxawíínla! Na̱ʼkha̱ i̱mbá gi̱jma̱ nda̱wa̱á rí majngoo rígi̱.

13 Bi̱ maʼni majuiin ángel ni̱ʼdu̱u̱ trompeta. Ikhú nidxawuun mbá aʼwá rí nagájnuu náa chi̱jyu̱u̱ʼ náa rí nakarámáʼ tsigijñaʼ rí ki̱ʼni̱ ga̱jma̱a̱ oro dí gíʼ náa inuu Dios. 14 Niʼthúu̱n bi̱ maʼni majuiin ángel bi̱ kayá trompeta: “Atrajkuíinʼ a̱jkhui̱i̱n ángeles bi̱ kaxtuʼwún náa mijngii mañu mba̱a̱ ndrígóo Éufrates”. 15 Ga̱jma̱a̱ a̱jkhui̱i̱n ángeles bugi̱, bi̱ nigumarathiin mu majmiin hora rúʼko̱, mbiʼi, gu̱nʼ ga̱jma̱a̱ tsiguʼ, nixtajkhúnʼ mu muradíin mbá nguéjmi̱i̱n xa̱bu̱.

16 Rí xóo mbaʼin soldado bi̱ kandrámiúnʼ wáyú, ni̱ndxu̱ún 20,000 nuthu rí 10,000,* ikhúúnʼ nidxawuun dí xúʼko̱ mbaʼin. 17 Wáyú ga̱jma̱a̱ bi̱ kadrámiúnʼ bi̱ ndi̱ñu̱u̱n náa niwasngájmuʼ* xígi̱ kaʼniún: Ajua̱nʼ rí nañewu̱u̱n tsu̱xtu̱ún rí kugíʼ nindxu̱u̱ maña̱ʼ xóo aguʼ, azul ga̱jma̱a̱ mu̱jmu̱ʼ xóo azufre,* edxu̱ún wáyú nindxu̱u̱ xóo edxu̱ún león ga̱jma̱a̱ náa rawúúnʼ nagájnuu aguʼ, gúní ga̱jma̱a̱ azufre. 18 Mbá nguéjmi̱i̱n xa̱bu̱ nikháñún ga̱jma̱a̱ tsingíná rígi̱: Aguʼ, gúní ga̱jma̱a̱ azufre rí nagájnuu náa rawúúnʼ wáyú. 19 Numuu rí awan rí nikhánún wáyú rígá náa rawúúnʼ ga̱jma̱a̱ náa tsiñúúnʼ, numuu rí tsiñúúnʼ nindxu̱u̱ xóo a̱bu̱nʼ rí gíʼdoo edxu̱u̱ ga̱jma̱a̱ tsiñúúnʼ nuni̱ dí mumíníinʼ xa̱bu̱.

20 Mú eʼwíinʼ xa̱bu̱ bi̱ tákháñún ga̱jma̱a̱ tsingíná rígi̱ na̱nguá nitanga̱a̱ a̱jkiu̱ún náa rí nini̱ ga̱jma̱a̱ ñawúúnʼ. Túniña̱a̱nʼ ruyamajkhún xa̱bu̱ wéñiiʼ ni má xándú bi̱ ki̱ʼni̱i̱ ga̱jma̱a̱ oro, plata, cobre, itsí ga̱jma̱a̱ ixi̱, bi̱ tséjmíin gúyejxi̱, ni má tsédxawíín ni má tséjmiin gágún. 21 Tátanga̱a̱ a̱jkiu̱ún ga̱jma̱a̱ numuu dí nuradíin a̱ngiu̱ún ni má ga̱jma̱a̱ numuu rí nuni̱ xawan ni má rí nubúúnʼ xkawiʼ kayuuʼ gajmiún eʼwíinʼ* ni má ga̱jma̱a̱ numuu rí nuni̱ kuʼwáʼ.

10 Ndi̱yo̱o̱ i̱mba̱a̱ ángel bi̱ gíʼdoo tsiakii bi̱ nagajtaa mekhuíí kambráʼaa du̱u̱n ga̱jma̱a̱ grígu mbáa takuaya̱ʼ náa edxu̱u̱. Inuu nindxu̱u̱ xóo a̱jkha̱ʼ ga̱jma̱a̱ rajkhúu xóo ri̱ʼyu̱u̱ aguʼ. 2 Náa ñawúunʼ kayá mbá rollo chíʼgíiʼ rí nijuaxtámbriyaʼ. Nitsuaʼan rajkhú mújúunʼ náa lamáa ga̱jma̱a̱ rajkhú xtiyu̱u̱ʼ nitsiji náa ku̱ba̱ʼ. 3 Ikhú nindxaʼwá gakhi̱i̱, xóo índo̱ nandxaʼwá mbáa león. Índo̱ nindxaʼwá ikhú niwáán aʼwá dí nithi bi̱ mbá juwiin a̱jkhu̱u̱n.

4 Inu má maniraʼmáʼ índo̱ nithi bi̱ mbá juwiin a̱jkhu̱u̱n, mú ikhú nidxawuun mbá aʼwá rí niwáán asndu náa mekhuíí, rí niʼthí: “Atiéjxi̱i̱ ngu̱ʼwa̱* rí nithi bi̱ mbá juwiin a̱jkhu̱u̱n ga̱jma̱a̱ xátaniraʼmáʼ”. 5 Ángel bi̱ ndi̱yo̱o̱ rí juáʼan mbá rajkhúu náa lamáa ga̱jma̱a̱ i̱mba̱ rajkhúu wíji̱ náa ku̱ba̱ʼ nikujxi̱ ñawún mújúunʼ náa mekhuíí 6 ma̱ngaa nixná ajngóo náa bi̱ xtáa asndu kámuu mbiʼi, bi̱ niʼni mekhu ga̱jma̱a̱ xúgíʼ dí rígá ikhí, ku̱ba̱ʼ ga̱jma̱a̱ xúgíʼ dí rígá ikhí, ma̱ngaa lamáa ga̱jma̱a̱ xúgíʼ dí rígá ikhí, niʼthí: “Naxájyuuʼ itháan. 7 Índo̱ bi̱ maʼni juwiin ángel gáʼcho̱o̱ maʼdu̱u̱ trompeta, mambanúu ngu̱ʼwa̱ rí mitsúʼkháan dí Dios niʼtáriya̱ʼ xóo ajngáa májánʼ náa ñumbáá ndrígóo bi̱ ni̱ndxu̱ún profetas”.*

8 Nidxawuun mbu̱júu̱ʼ aʼwá rí niwáán asndu mekhuíí, rí niʼthúnʼ: “Ayuʼ gíyá rollo rí kambaʼta rí kayá ángel bi̱ mbá rajkhúu juáʼan náa lamáa ga̱jma̱a̱ i̱mba̱ rajkhúu wíji̱ náa ku̱ba̱ʼ”. 9 Ikhú ni̱jkhá náa wíji̱ ángel ga̱jma̱a̱ nindo̱ʼo̱o̱ rí maxnúʼ rollo dí chíʼgíiʼ. Ga̱jma̱a̱ ikhaa niriʼñuʼ: “Ayá rollo ga̱jma̱a̱ atsu. Maʼni miʼkhu̱u̱n náa awáanʼ, mú náa rawáanʼ ma̱ta̱ya̱a̱ taun xóo jyááʼ”. 10 Ikhú ndi̱ya̱ rollo chíʼgíiʼ dí kayá ángel ga̱jma̱a̱ nikhu. Náa rawunʼ ndi̱yo̱o̱ taun xóo jyááʼ, mú nda̱wa̱á rí nikhu niʼni miʼkhu̱u̱n náa awúnʼ. 11 Nda̱wa̱á nithu̱nʼ: “Ndayóoʼ dí marataríya̱ʼ mbu̱júu̱ʼ ga̱jma̱a̱ numún xa̱bu̱, xuajen mba̱ʼu̱, bi̱ nuthi mixtiʼkhu ajngáa ma̱ngaa ga̱jma̱a̱ numún mbaʼin reyes”.

11 Ga̱jma̱a̱ nijuixnúʼ mbá xkuíyá rí naxtagiéwuun ga̱jma̱a̱, ma̱ngaa niʼthúnʼ: “Atujxa̱a̱ʼ ga̱jma̱a̱ atagiéwan goʼwóo Dios, náa nakarámáʼ tsigijñaʼ ga̱jma̱a̱ atraxnii bi̱ kúwá runi̱ ñajuunʼ ikhí. 2 Mú anújngaá’ náa rexoo goʼwóo Dios ga̱jma̱a̱ xátagiéwan, numuu rí nijuaxnájxu̱u̱n xa̱bu̱ numbaaʼ bi̱ muxujmbirigu̱u̱n xuajen kaʼwu mbá 42 gu̱nʼ. 3 Ma̱ni̱ rí a̱jmi̱i̱n testigos ndrígióʼ bi̱ kugíʼ xtíin rí mi̱du̱,* mutariya̱ʼ mbá 1,260 mbiʼi”. 4 A̱jmi̱i̱n testigos bugi̱ nandoo gáʼthúu̱n a̱jma̱ olivos ga̱jma̱a̱ a̱jma̱ candelabro,* bi̱ kuájun náa inuu Tátá ndrígóo ku̱ba̱ʼ.

5 Á mu mbáa nandoo maʼnigawúúnʼ, náa rawúúnʼ ikhiin nagájnuu aguʼ rí natsikhíin xa̱bu̱ sia̱nʼ ndrígu̱ún. Xígi̱ kaʼnii gákháñún bi̱ nandún munigawúúnʼ. 6 Ikhiin guáʼdáá tsiakii mu muruguáá mekhu ga̱jma̱a̱ muni̱ rí xáxnuu ruʼwa mbiʼi rí gútariya̱ʼ. Ma̱ngaa guáʼdáá tsiakii mu muni̱ rí iyaʼ magutajxi̱i̱ eʼdi ga̱jma̱a̱ muni̱ gínáa ku̱ba̱ʼ ga̱jma̱a̱ mbaʼa enii tsingíná, asndu nguáthá má nuthu gáʼndún.

7 Índo̱ gámbúun rutariya̱ʼ, xujkhú xkawi̱i̱ʼ bi̱ nagájnuu náa iñá mbiʼ maxmínaʼ gajmíi̱n ikhiin, maʼngo̱o̱ ga̱jma̱a̱ magudíin. 8 Makuíji̱i̱n náa kamba̱a̱ ma̱ja̱nʼ ndrígóo xuajen mba̱a̱, xuajen rí nandoo gáʼthúu̱n Sodoma ga̱jma̱a̱ Egipto, náa ma̱ngaa Tátá ndrígu̱ún nijuiʼdujmaa náa ixi̱. 9 Mbaʼin wéñuuʼ xa̱bu̱ bi̱ naguwáʼ náa xuajen majkhaʼ, bi̱ nuthi mixtiʼkhu ajngáa ga̱jma̱a̱ náa xuajen mba̱ʼu̱, mbuñún wajñu̱únʼ mbá ajtsú mbiʼi tikhu ga̱jma̱a̱ xúniñu̱u̱nʼ rí majuiʼdi̱ín. 10 Bi̱ kúwá náa ku̱ba̱ʼ, maʼdxún ga̱jma̱a̱ numuu rí nikháñún, ma̱ngaa muxnamijná regalos, numuu rí a̱jmi̱i̱n profetas* bugi̱ nini̱ mumíniiʼ bi̱ kúwá náa ku̱ba̱ʼ.

11 Nda̱wa̱á rí ajtsú mbiʼi tikhu, nito̱ʼo̱o̱ náa ikhiin xi̱ʼ ndaʼya dí na̱ʼkha̱ náa Dios ga̱jma̱a̱ ikhú nitujxi̱ín. Bi̱ ndiñúún nimíñúún wéñuuʼ. 12 Ikhú ikhiin nidxawíín mbá aʼwá gakhi̱i̱ rí niwáán mekhuíí ga̱jma̱a̱ niʼthún: “Gatsimala gi̱i̱”. Ikhú nitsimún mekhuíí náa mbá du̱u̱n, ma̱ngaa xa̱bu̱ sia̱nʼ ndrígu̱ún ndiñún. 13 Ikhú má* niʼxma gakhi̱i̱ wéñuuʼ, itháan rí mbá ta̱pha̱ xuajen niguámbáa, nikháñún mbá 7,000 xa̱bu̱ ga̱jma̱a̱ numuu dí niʼxma, eʼwíinʼ nimíñúún wéñuuʼ ga̱jma̱a̱ nixnáá gamajkhu Dios bi̱ xtáa mekhuíí.

14 Dí raga̱jma̱ ay ninújngoo má. ¡Gudxawíínla! Dí ragajtsú na̱ʼkha̱ má nacha̱.

15 Bi̱ maʼni juwiin ángel niʼdu̱u̱ trompeta. Ikhú niwáán aʼwá gakhi̱i̱ mekhuíí rí nithi: “Xa̱bu̱ Ñajunʼ* ndrígóo Dios ndrígúlú ga̱jma̱a̱ Cristo ndrígóo nigíʼdu̱u̱ má niʼtáñajunʼ náa tsu̱du̱u̱ ku̱ba̱ʼ ga̱jma̱a̱ maʼtáñajunʼ asndu kámuu mbiʼi”.

16 Bi̱ mbá 24 bi̱ kuya̱ edxu̱u̱ bi̱ tri̱gi̱i̱n náa xíliu̱ún náa inuu Dios nismbati̱gu̱u̱n ga̱jma̱a̱ nini̱ mba̱a̱ Dios. 17 Nithi: “Nuxna̱a̱ʼxu númáaʼ Jeobá* Dios, bi̱ gíʼdoo xúgíʼ tsiakii, bi̱ ninindxa̱a̱ʼ ga̱jma̱a̱ nindxa̱a̱ʼ, numuu rí nitasngájma tsiakii ndrígáaʼ ga̱jma̱a̱ nitagíʼdi̱i̱ má niratáñajunʼ. 18 Mú xa̱bu̱ numbaaʼ nikiʼníin ga̱jma̱a̱ ikháán nikásngaña̱a̱nʼ, ikhú nirámuuʼ mbiʼi rí niwaxtaʼwíí mu matandi̱ʼi̱i̱n cuenta bi̱ nikháñún, ma̱ngaa rí mataninumi̱ín ñumbáá ndrígáaʼ bi̱ ni̱ndxu̱ún profetas, xó má bi̱ kaxtaʼwíin* ma̱ngaa bi̱ namíñúún kuyáá mbiʼyaaʼ, xó má bi̱ majkhiinʼ ga̱jma̱a̱ bi̱ wanii, ma̱ngaa rí matani̱ gámbíin bi̱ kúwá runigámbáa ku̱ba̱ʼ”.

19 Nimbaʼtoo guʼwá ndrígóo Dios dí rígá mekhuíí, ikhú nikujmaa e̱jna̱ rí nimbánuu. Nixpíbinʼ, niwán aʼwá, nijmidá a̱jkhu̱u̱n, niʼxma ga̱jma̱a̱ nixnúu gakhi̱i̱ wéñuuʼ eʼtsí.

12 Ikhú ndi̱yo̱o̱ náa mekhuíí mbá seña: Ndi̱yo̱o̱ mbáa a̱ʼgu̱ bi̱ kagíʼ mbá xtíin naxpíbiʼ xóo a̱jkha̱ʼ, náa agoo rajkúu gíʼ gu̱nʼ ga̱jma̱a̱ náa edxu̱u̱ grígu mbá corona rí timii mbá 12 a̱ʼgua̱a̱n. 2 A̱ʼgu̱ bugi̱ kaguewáan mbáa ada̱ ga̱jma̱a̱ nandxa̱ʼwa̱ wéñuuʼ numuu rí naxnúu ga̱ʼkhu̱, namínúuʼ wéñuuʼ numuu rí magiʼdaa ada̱.

3 Náa mekhuíí nikujmaa i̱mba̱ seña: Nikujmaa xóo mbáa a̱bu̱nʼ mba̱a̱* maña̱ʼ xóo aguʼ, gíʼdoo mbá juwan edxu̱u̱ ga̱jma̱a̱ mbá gu̱wa̱ʼ chi̱jyu̱u̱ʼ, náa edxu̱u̱ trámáʼ mbá juwan corona,* 4 tsíyuuʼ nixmátríguiin mbá nguéjmi̱i̱n dí mbá taphi̱i̱n a̱ʼgua̱a̱n bi̱ kúwá mekhuíí ga̱jma̱a̱ nisngutíguiin náa ku̱ba̱ʼ. Ikhú a̱bu̱nʼ mba̱a̱* niguanúu náa inuu a̱ʼgu̱ bi̱ nacho̱o̱ magiʼdaa a̱ʼdióo, xtáa xawii mu mikhu̱u̱ a̱ʼdióo índo̱ gáxtáa.

5 Ikhaa nigiʼdaa mbáa ada̱, mbáa dxámá, bi̱ mañewu̱u̱n xa̱bu̱ ga̱jma̱a̱ xkuíyá rí ajua̱nʼ. Ikhú nigajtakáyííʼ a̱ʼdióo ga̱jma̱a̱ ni̱jkha̱ kiʼyáa náa Dios ma̱ngaa náa xíliu̱u̱.* 6 Ga̱jma̱a̱ a̱ʼgu̱ nigáyúu ni̱jkha̱ náa ku̱ba̱ʼ mijxooʼ,* náa Dios niʼni mújúunʼ mbá náa maxtáa ga̱jma̱a̱ náa muxniʼtsíí mbá 1,260 mbiʼi.

7 Ikhú nirígá mbá guerra náa mekhuíí. Miguel* gajmíi̱n ángeles ndrígio̱o̱ nixmijná gajmiún a̱bu̱nʼ mba̱a̱.* Xúʼko̱ má a̱bu̱nʼ mba̱a̱ gajmíi̱n ángeles ndrígio̱o̱ nixmijná, 8 mú na̱nguá niʼngu̱u̱n gúni gajmiún* ga̱jma̱a̱ nánguá niguanúu náa makuwá ikhiin mekhuíí. 9 Ikha jngóo nidatiguíi mbayííʼ a̱bu̱nʼ mba̱a̱,* bi̱ nindxu̱u̱ a̱bu̱nʼ wayuu, bi̱ nuxna mbiʼíí Gixa̱a̱,* bi̱ xtáa raʼni nduwiinʼ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ. Ikhaa nidatiguíi náa tsu̱du̱u̱ ku̱ba̱ʼ gajmíi̱n ángeles ndrígóo. 10 Ikhú nidxuun mbá aʼwá gakhi̱i̱ náa mekhuíí rí naʼthí:

“¡Dios ndrígúlú niʼni káwíin xa̱bu̱ numbaaʼ ga̱jma̱a̱ nikujmaa tsiakii ndrígóo, Xa̱bu̱ Ñajunʼ* ndrígóo nigíʼdu̱u̱ niʼtáñajunʼ ga̱jma̱a̱ Cristo ndrígóo nigíʼdu̱u̱ niʼtáñajunʼ! Numuu rí niʼngo̱o̱ niʼni gajmíi̱n bi̱ mbiʼíí mbruʼun nuxrui̱gi̱i̱n a̱ngiu̱lú náa inuu Dios ndrígúlú. 11 Ikhiin niʼngu̱u̱n nini̱ gajmiún, núma̱aʼ má ga̱jma̱a̱ numuu eʼdiuu A̱ʼdá múgú, ma̱ngaa ga̱jma̱a̱ numuu ajngáa dí nitaraʼa,* ikhiin támíñún rí makhañún, ni má táxmiéjúúnʼ ga̱jma̱a̱ numuu rí makuwá.* 12 Ikhaa numuu rígi̱, ¡gaʼdxala, mekhu ga̱jma̱a̱ bi̱ kúwá ikhí! Mú ¡gínáaʼla ku̱ba̱ʼ ga̱jma̱a̱ lamáa! Numuu rí Gixa̱a̱ nigajtaa náa ikháanʼla, nakiʼnáa wéñuuʼ numuu rí ndaʼyoo rí i̱mbá chíʼgíiʼ mbiʼi guanúu maxtáa”.

13 Índo̱ a̱bu̱nʼ mba̱a̱* ndiʼyoo rí nixkri̱guii náa ku̱ba̱ʼ, ikhú ni̱jkha̱ raxkoo a̱ʼgu̱ bi̱ nigiʼdaa a̱ʼdióo dxámá. 14 Mú a̱ʼgu̱ nikhánáá xpíjpiúu xóo xpíjpiúu mbáa bi̱yú mba̱a̱ mu maʼga asndu náa ku̱ba̱ʼ mijxooʼ, náa maxtáa, náa makanáá rí mi̱khu̱ mu xáxtáa inuu a̱bu̱nʼ mbá ajtsú tsiguʼ tikhu.*

15 Náa rawuunʼ a̱bu̱nʼ nigájnuu iya’ rí ni̱jkha̱ kidxuuʼ a̱ʼgu̱ mu xúʼko̱ mañu marguʼwi̱i̱. 16 Mú ku̱ba̱ʼ ni̱ʼkha̱ mu mambáyúu a̱ʼgu̱. Ku̱ba̱ʼ nikuajan rawuunʼ ga̱jma̱a̱ niʼga̱a̱n iya mañu rí nigájnuu náa rawuunʼ a̱bu̱nʼ mba̱a̱.* 17 Ikha jngóo a̱bu̱nʼ mba̱a̱* nikiʼnáa kaʼyoo a̱ʼgu̱ ga̱jma̱a̱ ni̱jkha̱ gáxminaʼ gajmíi̱n e̱ji̱i̱n* bi̱ xóó naguanún. Bugi̱ ni̱ndxu̱ún bi̱ nunimbáníí kiʼtáñajunʼ ndrígóo Dios ga̱jma̱a̱ guáʼdáá ñajunʼ rí mutaraʼa ga̱jma̱a̱ numuu Jesús.

13 A̱bu̱nʼ mba̱a̱* niwiji̱ náa rawuunʼ lamáa.

Ikhú ndi̱yo̱o̱ mbáa xujkhú xkawi̱i̱ʼ bi̱ nagájnuu náa lamáa. Gíʼdoo gu̱wa̱ʼ chi̱jyu̱u̱ʼ ma̱ngaa mbá juwan edxu̱u̱. Náa chi̱jyu̱u̱ʼ rígá mbá gu̱wa̱ʼ corona,* ma̱ngaa náa edxu̱u̱ tima mbiʼñún bi̱ nutawéñííʼ Dios. 2 Xujkhú xkawi̱i̱ʼ bi̱ ndi̱yo̱o̱ nindxu̱u̱ xóo indiiʼ mixtíi, mú rajkhúu nindxu̱u̱ xóo rajkhúu oso, ma̱ngaa rawuunʼ nindxu̱u̱ xóo rawuunʼ mbáa león. Ikhú a̱bu̱nʼ mba̱a̱* nixnúu tsiakii xujkhú xkawi̱i̱ʼ, ma̱ngaa xíliu̱u̱* ga̱jma̱a̱ nixnúu rí maʼtáñajunʼ.

3 Ndi̱yo̱o̱ rí náa mbá edxu̱u̱ nikujmaa rí nigawúunʼ wéñuuʼ, mú rí nigawúunʼ rúʼko̱ ni̱jkha̱nú niʼni̱i̱ má. Ga̱jma̱a̱ xúgíinʼ xa̱bu̱ numbaaʼ niguanún tsiánguá índo̱ nigún kidxuuʼ xujkhú xkawi̱i̱ʼ. 4 Ndiyamajkuíí a̱bu̱nʼ mba̱a̱,* numuu rí ikhaa nixnúu maʼtáñajunʼ xujkhú xkawi̱i̱ʼ, ga̱jma̱a̱ ndiyamajkuíí xujkhú xkawi̱i̱ʼ índo̱ nithi: “Tsáá nindxu̱u̱ xóo xujkhú xkawi̱i̱ʼ rá. Tsáá gáʼngo̱o̱ gáxminaʼ ga̱jma̱a̱ xá.” 5 Nikhánáá rawuunʼ mu maʼthí ajngáa rí maʼnimbamínáʼ ga̱jma̱a̱ rí maʼtáwéñuuʼ Dios, ma̱ngaa nikhánáá tsiakii mu maʼni rí nandoo mbá 42 gu̱nʼ. 6 Nda̱wa̱á nimbáʼtoo rawuunʼ mu maʼtáwéñuuʼ Dios, mu maʼtáwéñuuʼ mbiʼyuu, ma̱ngaa náa xtáa ga̱jma̱a̱ xúʼko̱ má bi̱ kúwá mekhuíí. 7 Kitsíñánʼ mu maxmínaʼ gajmíi̱n bi̱ kaxtaʼwíin* ga̱jma̱a̱ mu maʼngo̱o̱, ma̱ngaa nikhánáá maʼtáñajunʼ náa xuajen majkhaʼ,* náa xúgíinʼ enii xa̱bu̱, náa xúgíʼ ajngáa ga̱jma̱a̱ náa xuajen mba̱ʼu̱. 8 Ga̱jma̱a̱ xúgíinʼ bi̱ kúwá náa tsu̱du̱u̱ ku̱ba̱ʼ mbuyamajkuíí. Asndu nákha nigi̱ʼi̱ numbaaʼ tágumaraʼmáʼ mbiʼyuu nimbáa rí ikhiin náa libro rí ndaʼya* ndrígóo A̱ʼdá múgú bi̱ nijuixnájxi̱i̱.

9 Á mu mbáa gíʼdoo cháʼwuun, gaxnátíʼñaminaʼ maʼdxawuun. 10 Á mu mbáa ndayóoʼ maxtugua̱a̱, gaxtugua̱a̱ má. Á mu mbáa naxíya̱a̱ imba̱a̱ ga̱jma̱a̱ espada,* ma̱ngaa makhañúu ga̱jma̱a̱ espada. Ikha jngóo bi̱ kaxtaʼwíin ndayóoʼ rí maʼngu̱u̱n ga̱jma̱a̱ muguaʼdáá fe.

11 Ikhú ndi̱yo̱o̱ imba̱a̱ xujkhú xkawi̱i̱ʼ bi̱ nagájnuu náa ku̱ba̱ʼ. Gíʼdoo a̱jma̱ chi̱jyu̱u̱ʼ, xóo chi̱jyu̱u̱ʼ mbáa a̱ʼdá múgú, mú nigíʼdu̱u̱ niʼthí xóo mbáa a̱bu̱nʼ mba̱a̱.* 12 Ga̱jma̱a̱ najmuu ikháá má tsiakii xó má rí gíʼdoo timbáa xujkhú xkawi̱i̱ʼ náa inuu ikhaa. Naʼni rí ku̱ba̱ʼ ga̱jma̱a̱ bi̱ kúwá mbuyamajkuíí timbáa xujkhú xkawi̱i̱ʼ, bi̱ niʼni̱i̱ a̱jkiu̱u̱n náa nigawúunʼ wéñuuʼ. 13 Ga̱jma̱a̱ naʼni milagro mba̱ʼu̱, asndu naʼni magajtaa aguʼ náa mekhuíí asndu náa tsu̱du̱u̱ ku̱ba̱ʼ náa inún xa̱bu̱ numbaaʼ.

14 Naʼninduwiinʼ bi̱ kúwá náa ku̱ba̱ʼ ga̱jma̱a̱ milagro rí niniña̱a̱nʼ maʼni náa inuu timbáa xujkhú xkawi̱i̱ʼ ikhú má xtáa raʼthúún bi̱ kúwá náa tsu̱du̱u̱ ku̱ba̱ʼ rí muni̱ mbá xtiʼkhuu xujkhú xkawi̱i̱ʼ, bi̱ nigawúunʼ ga̱jma̱a̱ espada, mú niʼni̱i̱ a̱jkiu̱u̱n. 15 Ga̱jma̱a̱ niniña̱a̱nʼ rí maxnúu xi̱ʼ rí ndaʼya xtiʼkhuu xujkhú xkawi̱i̱ʼ, mu xtiʼkhuu xujkhú xkawi̱i̱ʼ maʼthí ma̱ngaa mu magudíin xúgíinʼ bi̱ nunigaʼduunʼ mbuyamajkuíí xtiʼkhuu xujkhú xkawi̱i̱ʼ.

16 Xúgíinʼ bi̱ majkhiinʼ ga̱jma̱a̱ bi̱ wanii, bi̱ guáʼdáá, bi̱ migíniin, bi̱ ni̱ndxu̱ún ñumbáá ga̱jma̱a̱ bi̱ na̱nguá ni̱ndxu̱ún ñumbáá, natsudiin rí makhánún tsinaʼ náa ñawún mújúúnʼ ga̱jma̱a̱ náa xkidúnʼ, 17 mu nimbáa xándoo ma̱ʼtsi̱ ni má magujua̱, i̱ndó bi̱ gíʼdoo tsinaʼ, mbiʼyuu xujkhú xkawi̱i̱ʼ o número ndrígóo mbiʼyuu. 18 Mu ma̱ta̱ya̱a̱ rígi̱ ndayóoʼ maraʼdáá ku̱ma̱: Bi̱ nakro̱ʼo̱o̱ gaguxnuu número ndrígóo xujkhú xkawi̱i̱ʼ rí nindxu̱u̱ 666, numuu rí nindxu̱u̱ número ndrígu̱ún xa̱bu̱.

14 Ikhú ndi̱yo̱o̱ A̱ʼdá múgú wíji̱ náa kúbá Sion, gajmíi̱n bi̱ mbá 144,000 bi̱ nigumaraʼmáʼ náa xkídúnʼ mbiʼyuu ikhaa ga̱jma̱a̱ mbiʼyuu Anu̱u̱. 2 Nidxawun mbá aʼwá rí nawáán mekhuíí; nindxu̱u̱ xóo aʼwóo iyaʼ dí naʼndatígú ga̱jma̱a̱ xóo nawán índo̱ najmidá a̱jkhu̱u̱n. Aʼwá dí nidxawuun nindxu̱u̱ xóo aʼwún bi̱ nuni̱ ajmúú ga̱jma̱a̱ nudi̱i̱ arpa. 3 Ikhiin kúwá runi̱ ajmúú náa inuu xílí* ga̱jma̱a̱ náa inún a̱jkhui̱i̱n querubines* ma̱ngaa náa bi̱ kuya̱ edxu̱u̱ rí nakujmaa dí nindxu̱u̱ mbá ajmúú nuxi̱ʼ. Nimbáa tséjmaa gájma̱ñuu májánʼ ajmúú rígi̱ i̱ndó bi̱ mbá 144,000 bi̱ nijuiʼtsiwíin náa ku̱ba̱ʼ. 4 Bugi̱ ni̱ndxu̱ún bi̱ tunitsagamíjná gajmiún gu̱ʼu̱; túbúnʼ gajmiún nimbáa. Ikhiin ni̱ndxu̱ún bi̱ nagún má xúʼko̱ náa kidxuuʼ A̱ʼdá múgú asndu náa má ejkha̱. Nijuiʼtsi̱i̱n náa majñúnʼ xa̱bu̱ numbaaʼ xóo rí najma̱a̱ ginii mu makhánáá Dios ga̱jma̱a̱ A̱ʼdá múgú, 5 ga̱jma̱a̱ tákujmaa nimbá minduwaʼ náa rawúúnʼ; na̱nguá guáʼdáá nimbá aʼkhá.

6 Ndi̱yo̱o̱ imba̱a̱ ángel bi̱ na̱jkha̱ náa tapo̱o̱ mekhu. Gíʼdoo ajngáa rí májánʼ maʼthúún bi̱ nduya bi̱ kúwá náa tsu̱du̱u̱ ku̱ba̱ʼ: Bi̱ kúwá náa xúgíʼ xuajen mba̱ʼu̱, xuajen majkhaʼ,* bi̱ nuthi mixtiʼkhu ajngáa ga̱jma̱a̱ xúgíinʼ enii xa̱bu̱. 7 Niʼthí ga̱jma̱a̱ aʼwá gakhi̱i̱: “Gamiñála ku̱ya̱a̱ Dios ga̱jma̱a̱ guxna̱a̱la gamajkhu, numuu rí ni̱ʼkha̱nú má hora rí manda̱ʼa̱a̱ cuenta. Ikha jngóo guyamajkuíí bi̱ niʼni mekhu, ku̱ba̱ʼ, lamáa ga̱jma̱a̱ iduu iyaʼ”.

8 Nda̱wa̱á ni̱ʼkha̱ bi̱ maʼni raga̱jmi̱i̱n ángel, bi̱ niʼthí: “¡Niguámbáa! ¡Babilonia rí Mba̱a̱ niguámbáa! Bi̱ naʼni rí xúgíinʼ xa̱bu̱ numbaaʼ muwa̱a̱n vino rí nagua̱ʼa̱* mabóoʼ xkawiʼ kayuuʼ gajmíi̱n eʼwíinʼ”.*

9 Bi̱ maʼni ragajtsíin ángel ni̱jkha̱ kidxuuʼ, ga̱jma̱a̱ niʼthí gakhi̱i̱: “Á mu mbáa ndaʼyamajkhuu xujkhú xkawi̱i̱ʼ ga̱jma̱a̱ xtiʼkhuu, ga̱jma̱a̱ nagruigú mbá tsinaʼ náa xkídooʼ ga̱jma̱a̱ náa ñawúunʼ, 10 ma̱ngaa maga̱a̱n vino rí nakásngañu̱u̱ʼ Dios, vino rígi̱ nindxu̱u̱ rí xágandawo̱o̱ʼ ga̱jma̱a̱ nimbá índo̱ gáguxiʼñánʼ náa copa rí naʼni makásngañu̱u̱ʼ, ma̱ngaa maguma gínáa náa aguʼ ga̱jma̱a̱ náa azufre,* náa inún ángeles bi̱ kaʼwiin ga̱jma̱a̱ náa inuu A̱ʼdá múgú. 11 Gúniuu aguʼ rí naʼni mumíniiʼ marigá asndu kámuu mbiʼi. Ga̱jma̱a̱ bi̱ nduyamajkuíí xujkhú xkawi̱i̱ʼ ga̱jma̱a̱ xtiʼkhuu, ma̱ngaa bi̱ nundrigú tsinaʼ ndrígóo mbiʼyuu, xúya̱a̱ xu̱únʼ ni má mbiʼi ni má mbruʼun. 12 Ikha jngóo bi̱ kaxtaʼwíin,* bi̱ nunimbu̱ún kiʼtáñajunʼ ndrígóo Dios ma̱ngaa guáʼdáá má xúʼko̱ fe náa Jesús, ndayóoʼ rí maʼngu̱u̱n”.

13 Nidxawuun i̱mba̱ aʼwá rí niwáán mekhuíí rí niʼthí: “Ataniraʼmáʼ rígi̱: ‹Gagi kúwá wajinʼ bi̱ nakháñún mbóó gajmiún Tátá asndu nákha xúgi̱, xúʼko̱, espíritu naʼthí, guya̱a̱ xu̱únʼ ga̱jma̱a̱ náa ñajunʼ gakhi̱i̱ rí nini̱. Numuu rí xúgíʼ dí májánʼ nini̱ marigá má xúʼko̱ náa ikhiin›”.

14 Ikhú ndi̱yo̱o̱ mbá du̱u̱n miʼxá, ikhí náa du̱u̱n rúʼko̱ grígu mbáa bi̱ xóo a̱ʼdióo xa̱biya̱ kaʼnii, náa edxu̱u̱ grígu mbá corona dí oro ga̱jma̱a̱ náa ñawúunʼ kayá mbá chídí xngaa rí mixíníʼ.

15 Imba̱a̱ ángel nigájnuu náa goʼwóo Dios bi̱ niʼthúu̱n gakhi̱i̱ bi̱ grígu náa du̱u̱n: “¡Atagíʼdi̱i̱ majmaaʼ chídí xngaa ga̱jma̱a̱ atrajxi̱i̱ dí nijma̱a̱, nijkha̱nú má mbiʼi, numuu rí nikhi̱i̱ má rí nijuiʼdu náa ku̱ba̱ʼ!”. 16 Bi̱ gíʼ náa du̱u̱n nijmuu chídí xngaa náa ku̱ba̱ʼ ga̱jma̱a̱ dí nijma̱a̱ náa ku̱ba̱ʼ nixtagijxi̱i̱.

17 Imba̱a̱ ángel nigájnuu náa goʼwóo Dios náa mekhuíí, ikhaa ma̱ngaa kayá mbá chídí xngaa mixíníʼ.

18 Náa nakarámáʼ tsigijñaʼ nigájnuu xóó imba̱a̱ ángel, bi̱ gíʼdoo tsiakii náa aguʼ. Ga̱jma̱a̱ nindxaʼwá gakhi̱i̱ niʼthúu̱n bi̱ kayá chídí xngaa rí mixíníʼ: “¡Atagíʼdi̱i̱ majmaaʼ chídí xngaa ga̱jma̱a̱ atadrígu̱u̱ juáyuu uva dí nijuiʼdu náa ku̱ba̱ʼ, numuu rí nikhi̱i̱ má!”. 19 Ángel nijmuu chídí xngaa náa ku̱ba̱ʼ, nirujthu ixu̱u̱ uva dí rígá náa ku̱ba̱ʼ ga̱jma̱a̱ nidama̱ʼa̱n náa iñáʼ mba̱a̱ náa najuiʼduunʼ uva rí naʼni makásngañu̱u̱ʼ Dios. 20 Wáyú nijnguprigu̱u̱n uva* náa rexo̱o̱ xuajen ga̱jma̱a̱ eʼdi rí nagájnuu ikhí najkha̱nú asndu náa rawúúnʼ wáyú ga̱jma̱a̱ na̱jkha̱ itháan rí maʼni 300 kilómetro.*

15 Ndi̱yo̱o̱ mekhuíí imbo̱o̱ seña rí nindxu̱u̱ mba̱a̱ ga̱jma̱a̱ mitsaanʼ: Mbá juwiin ángeles ga̱jma̱a̱ mbá juwan gamiéjunʼ. Rígi̱ nindxu̱u̱ rí iwáá kayuuʼ, ga̱jma̱a̱ numuu rígi̱ maʼni rí mawi̱ji̱i̱ dí nakiʼnáa Dios.

2 Ma̱ngaa ndi̱yo̱o̱ xóo lamáa rí ki̱ʼni̱ ga̱jma̱a̱ niwan’ rí kanda̱wo̱o̱ʼ aguʼ ma̱ngaa ndi̱ñu̱u̱n bi̱ niʼngu̱u̱n nini̱ gajmiún xujkhú xkawi̱i̱ʼ, xtiʼkhuu ga̱jma̱a̱ número ndrígóo mbiʼyuu. Ikhiin guájun náa níjniuu lamáa rí ki̱ʼni̱ ga̱jma̱a̱ niwan’, kuda náa ñawúúnʼ arpa ndrígóo Dios. 3 Kúwá runi̱ ajmúú ndrígóo Moisés bi̱ nindxu̱u̱ ñumbáá ndrígóo Dios ga̱jma̱a̱ ajmúú ndrígóo A̱ʼdá múgú, nuthi:

“Rí nitani̱ nindxu̱u̱ mba̱ʼu̱ ga̱jma̱a̱ mitsaanʼ Jeobá* Dios, bi̱ gíʼdoo xúgíʼ tsiakii. Kamba̱a̱ʼ nindxu̱u̱ jmbu ga̱jma̱a̱ gajkhun, Rey bi̱ xtáa asndu kámuu. 4 Jeobá,* tsáá xámiñuuʼ kaʼyaaʼ rá. Tsáá xáʼni mba̱a̱ mbiʼyaaʼ rá. I̱ndó ikháán nindxa̱a̱ʼ jmbii. Xúgíʼ xuajen mba̱ʼu̱ maguwáʼ náa ikháán ga̱jma̱a̱ mbuyamajkuaaʼ numuu rí xtángoo jmbu ndrígáaʼ niwasngájma má”.

5 Nda̱wa̱á dí rígi̱, ndi̱yo̱o̱ rí nimbaʼtoo náa mekhu náa phú mikaʼwu ndrígóo guʼwá xtíin rí Dios naʼni marmáʼáan a̱jkiu̱ún, 6 náa phú mikaʼwu nigájnún mbá juwiin ángeles ga̱jma̱a̱ mbá juwan gamiéjunʼ. Ikhiin kugíʼ xtíin dí lino rí kaʼwu ga̱jma̱a̱ naxpíbínʼ ma̱ngaa náa tsoxtún ka̱ʼwa̱n mbá xtíin rí ki̱ʼni̱ ga̱jma̱a̱ oro. 7 Mbáa bi̱ mbá a̱jkhui̱i̱n querubines* nixnúún bi̱ mbá juwiin ángeles mbá juwan xua̱a̱ dí oro rí kajni̱ʼ rí nakásngañu̱u̱ʼ Dios bi̱ xtáa asndu kámuu mbiʼi. 8 Náa phú mikaʼwu nijnííʼ gúní ga̱jma̱a̱ numuu rí nixpíbiinʼ Dios ma̱ngaa ga̱jma̱a̱ numuu tsiakii ndrígóo. Nimbáa xándoo mato̱ʼo̱o̱ náa rí phú mikaʼwu asndu índo̱ gájngoo juwan gamiéjunʼ ndrígu̱ún bi̱ mbá juwiin ángeles.

16 Ikhú nidxawun mbá aʼwá gakhi̱i̱, rí niwán náa rí phú mikaʼwu rí niʼthún bi̱ mbá juwiin ángeles: “Aʼgua̱la, gúxidíí náa ku̱ba̱ʼ rí nakásngañu̱u̱ʼ Dios rí ka̱jnu̱ʼ náa mbá juwan xua̱a̱”.

2 Timbáa ángel ni̱jkha̱ ga̱jma̱a̱ nixídíí náa ku̱ba̱ʼ rí ka̱jnu̱ʼ náa xua̱a̱ ndrígóo. Ikhú mbá ska mbiiʼ rí naʼni mi̱khu̱ niʼni mumíniiʼ xa̱bu̱ bi̱ kuda tsinaʼ ndrígóo xujkhú xkawi̱i̱ʼ ga̱jma̱a̱ bi̱ nduyamajkuíí xtiʼkhuu.

3 Bi̱ maʼni raga̱jmi̱i̱n ángel nixídíí náa lamáa rí ka̱jnu̱ʼ náa xua̱a̱ ndrígóo. Ikhú lamáa nigutajxi̱i̱ eʼdi xóo eʼdiuu mbáa bi̱ nikháñuu, xúgíinʼ bi̱ kúwá náa lamáa nikháñún.

4 Bi̱ maʼni ragajtsíin ángel nixídíí náa mañu ga̱jma̱a̱ náa iduu iyaʼ rí ka̱jnu̱ʼ náa xua̱a̱ ndrígóo. Ikhú nigutajxi̱i̱ eʼdi. 5 Ikhú nidxawun niʼthí ángel bi̱ gíʼdoo tsiakii náa iyaʼ: “Ikháán, bi̱ ninindxa̱a̱ʼ ga̱jma̱a̱ bi̱ nindxa̱a̱ʼ, Dios bi̱ Jmbii, nindxa̱a̱ʼ májáanʼ numuu dí niratá marigá xígi̱ kaʼnii. 6 Numuu rí ikhiin nixidíí eʼdiún bi̱ kaxtaʼwíin* ga̱jma̱a̱ profetas,* ikháán niraxnún muwa̱a̱n eʼdi. Kaʼñún má mugiʼníí xígi̱ kaʼnii”. 7 Ga̱jma̱a̱ nidxawun niʼthí náa nakarámáʼ tsigijñaʼ: “Xúʼko̱, Jeobá* Dios, bi̱ gíʼdoo xúgíʼ tsiakii, jmbu ga̱jma̱a̱ gajkhun nindxu̱u̱ dí naratá matani̱”.

8 Bi̱ maʼni ragajkui̱i̱n ángel nixídíí náa a̱jkha̱ʼ rí ka̱jnu̱ʼ náa xua̱a̱ ndrígóo. Ikhú a̱jkha̱ʼ nijuatsíñáánʼ rí matsikhiin xa̱bu̱ ga̱jma̱a̱ aguʼ. 9 Rí mijkha wéñuuʼ nitsikhiin xa̱bu̱. Mú nitawéñííʼ mbiʼyuuʼ Dios, bi̱ gíʼdoo tsiakii náa tsíginá rígi̱, na̱nguá nitanga̱a̱ a̱jkiu̱ún ni má na̱nguá nixnáá gamajkhu.

10 Bi̱ maʼni witsiin ángel nixídíí náa xíliu̱u̱* xujkhú xkawi̱i̱ʼ rí ka̱jnu̱ʼ náa xua̱a̱ ndrígóo. Ikhú náa naʼtáñajunʼ niʼni mikrína. Ikhú xa̱bu̱ nigíʼdi̱i̱ niʼphujtu rajuún ga̱jma̱a̱ numuu ga̱ʼkhu̱, 11 mú nitawéñííʼ Dios bi̱ xtáa mekhuíí ga̱jma̱a̱ numuu rí na̱ʼkhu̱ ma̱ngaa ga̱jma̱a̱ numuu ska, na̱nguá nitanga̱a̱ a̱jkiu̱ún náa xúgíʼ dí nuni̱.

12 Bi̱ maʼni majuiin ángel nixídíí náa mañu mba̱a̱ Éufrates rí ka̱jnu̱ʼ náa xua̱a̱ ndrígóo. Ikhú iyaʼ nijndo̱o̱ʼ mu maʼni mújúunʼ kambu̱ún reyes bi̱ naguwáʼ náa nagájnuu a̱jkha̱ʼ.*

13 Ndi̱yo̱o̱ ajtsú ajngáa* tsaga rí ni̱ndxu̱ún xóo go̱boo rí nagájnuu náa rawuunʼ a̱bu̱nʼ mba̱a̱* ma̱ngaa náa rawuunʼ xujkhú xkawi̱i̱ʼ ga̱jma̱a̱ náa rawuunʼ profeta bi̱ minduwaaʼ. 14 Nindxu̱u̱ ajngáa rí nuthi xa̱bu̱ wéñiiʼ ga̱jma̱a̱ nuni̱ milagro; bi̱ nagún náa inún reyes bi̱ kúwá náa xúgíʼ ku̱ba̱ʼ mu magimbíin náa guerra dí marigá náa mbiʼi mba̱a̱ ndrígóo Dios bi̱ gíʼdoo xúgíʼ tsiakii.

15 “¡Atadxawíín! Ma̱ʼkhá xóo mbáa kuʼwáʼ. Xtáa gagi bi̱ tséʼgu ga̱jma̱a̱ kagíʼ xtíñuu, mu xáriyaʼ majkhuu jngrui̱go̱o̱ tsaʼtsaaʼ náa inún xa̱bu̱”.

16 Nigimbíin reyes náa mbaaʼ rí náa ajngáa hebreo nagumbiʼyuu Armagedón.*

17 Bi̱ maʼni juwiin ángeles nixídíí náa giñánʼ rí ka̱jnu̱ʼ náa xua̱a̱ ndrígóo, ikhú nigájnuu mbá aʼwá gakhi̱i̱ náa rí phú mikaʼwu, asndu náa xílí ga̱jma̱a̱ niʼthí: “¡Nimbánúu má rá!”. 18 Ikhú nixpíbínʼ, niwán aʼwá, ga̱jma̱a̱ nijngutíguiin a̱jkhu̱u̱n ma̱ngaa gakhi̱i̱ wéñuuʼ niʼxma xóo nimbá miʼtsú táʼxma asndu nákha ni̱ʼkha̱ gáxtáa xa̱bu̱ náa tsu̱du̱u̱ ku̱ba̱ʼ. Xúʼko̱ mba̱a̱ ga̱jma̱a̱ gakhi̱i̱ niʼxma. 19 Xuajen mba̱a̱ niwiʼtáa mbá ajtsú níʼkhóo ga̱jma̱a̱ xuajen dí kaʼyoo xuajen mba̱ʼu̱ nigudiriga̱a̱. Ma̱ngaa Dios nirmáʼáan a̱jkiu̱u̱n kaʼyoo Babilonia rí Mba̱a̱ mu maxnúu copa ndrígóo vino rí ka̱jnu̱ʼ rí nakásngañu̱u̱ʼ. 20 Ma̱ngaa xúgíʼ islas* ga̱jma̱a̱ kúbá niguámbáa. 21 Ikhú asndu mekhuíí nijngutígú eʼtsí rí nindxu̱u̱ xóo itsí náa xa̱bu̱, mámbá eʼtsí itháan maʼni 20 kilo* rí ki̱wu̱n. Xa̱bu̱ nitawéñííʼ Dios ga̱jma̱a̱ numuu gamiéjunʼ rí nijngutígú eʼtsí, numuu rí gamiéjunʼ rígi̱ nindxu̱u̱ mba̱a̱ wéñuuʼ.

17 Mbáa bi̱ mbá juwiin ángeles bi̱ kuda mbá juwan xua̱a̱ ni̱ʼkha̱ ga̱jma̱a̱ niʼthúnʼ: “Aye̱ mu masngajmáanʼ xóo mamínuuʼ a̱ʼgu̱ bi̱ nagujuamínáʼ bi̱ nagi̱ʼi̱ náa rígá mbaʼa iyaʼ. 2 Reyes bi̱ kúwá náa tsu̱du̱u̱ ku̱ba̱ʼ nibúúnʼ xkawiʼ kayuuʼ gajmiún ikhaa* ma̱ngaa xa̱bu̱ bi̱ kúwá náa tsu̱du̱u̱ ku̱ba̱ʼ nijngi̱i̱n ga̱jma̱a̱ vino ndrígóo rí nindxu̱u̱ xóo rí nabóoʼ xkawiʼ kayuuʼ gajmíi̱n eʼwíinʼ”.*

3 Ikhaa nijkha kañún náa ku̱ba̱ʼ mijxooʼ* ga̱jma̱a̱ tsiakii ndrígóo espíritu santo.* Ikhí ndi̱yo̱o̱ mbáa a̱ʼgu̱ kríguii mbáa xujkhú xkawi̱i̱ʼ mañaaʼ xngeʼdii, náa ikhaa rígá mbaʼa wéñuuʼ mbiʼñún bi̱ nutawéñííʼ Dios ma̱ngaa gíʼdoo mbá juwan edxu̱u̱ ga̱jma̱a̱ mbá gu̱wa̱ʼ chi̱jyu̱u̱ʼ. 4 A̱ʼgu̱ kagíʼ mbá xtíin rí miʼñuu ga̱jma̱a̱ mbá rí mañaʼ xngeʼdi ma̱ngaa kijmarataa ga̱jma̱a̱ oro, itsí mitsaanʼ ma̱ngaa perla. Ikhaa kayá mbá copa dí oro náa kajnííʼ xúgíʼ enii rí xkawiʼ ga̱jma̱a̱ rí mitsaga dí nabóoʼ xkawiʼ kayuuʼ gajmíi̱n eʼwíinʼ.* 5 Náa xkídoo kiʼnirámáʼ mbá mbiʼi rí tséjmaʼnuuʼ, “Babilonia rí Mba̱a̱, ru̱du̱ún gu̱ʼu̱ bi̱ nugujuamíjna̱ ma̱ngaa xúgíʼ rí xkawiʼ dí rígá náa tsu̱du̱u̱ ku̱ba̱ʼ”. 6 Ndi̱yo̱o̱ rí a̱ʼgu̱ najnga̱a̱ ga̱jma̱a̱ eʼdiún bi̱ kaxtaʼwíin* ma̱ngaa eʼdiún xa̱bi̱i̱ Jesús,

niʼniuʼ tsiánguá índo̱ ndi̱yo̱o̱. 7 Ikhú ángel niʼthúnʼ: “Náá numuu rí naʼniaaʼ tsiánguá. Ikhúún ma̱tha̱a̱nʼ rí tséjmaʼnuuʼ ga̱jma̱a̱ numuu a̱ʼgu̱ ma̱ngaa ga̱jma̱a̱ numuu xujkhú xkawi̱i̱ʼ bi̱ kríguii bi̱ gíʼdoo juwan edxu̱u̱ ga̱jma̱a̱ gu̱wa̱ʼ chi̱jyu̱u̱ʼ. 8 Xujkhú xkawi̱i̱ʼ bi̱ nitayáá, ninindxu̱u̱ mú nánguá nindxu̱u̱, maski ajndu xúʼko̱ xtáa má magajnúu náa iñá mbiʼ ga̱jma̱a̱ na̱jkha̱ náa maguma gámbáa. Xa̱bu̱ bi̱ kúwá náa tsu̱du̱u̱ ku̱ba̱ʼ, bi̱ asndu nákhá nigi̱ʼi̱ numbaaʼ na̱nguá nigumaraʼmáʼ mbiʼñún náa libro rí ndaʼya,* maʼniún tsiánguá índo̱ gúyáá xujkhú xkawi̱i̱ʼ rí ninindxu̱u̱ mú nánguá nindxu̱u̱ maski ajndu xúʼko̱ maxtáa ikhí.

9 Mu ma̱ndoo mikrua̱ʼa̱a̱ʼ rígi̱ ndayóoʼ rí majmañaaʼ. Juwan edxu̱u̱ nandoo gáʼthúu̱n mbá juwan kúbá rí náa a̱ʼgu̱ nagi̱ʼi̱. 10 Kúwá mbá juwiin reyes: Witsiin nijngutíguíin má, xtáa má mbáa mú i̱mba̱a̱ xóó tséʼkha̱nú, índo̱ gáʼkha̱nú maguanúu káaʼ mbá nguáthá mbiʼíí. 11 Xujkhú xkawi̱i̱ʼ bi̱ ninindxu̱u̱ mú nánguá nindxu̱u̱, ikhaa ma̱ngaa nindxu̱u̱ mbáa rey bi̱ maʼni migiñiinʼ, ikhaa nagájnuu náa majñúnʼ bi̱ mbá juwiin ma̱ngaa na̱jkha̱ náa maguma gámbáa.

12 Gu̱wa̱ʼ chi̱ji̱ʼ rí nitayáá nandoo gáʼthúu̱n gu̱wi̱i̱nʼ reyes bi̱ xóó tséndrigú rí mutañajunʼ, mú mudrigú tsiakii xóo reyes mbá hora gajmiún xujkhú xkawi̱i̱ʼ. 13 Ikhiin mbóó rí endxa̱ʼwa̱míjna̱ ikha jngóo nuxnáá tsiakii ga̱jma̱a̱ rí maʼtáñajunʼ xujkhú xkawi̱i̱ʼ. 14 Muxmijná gajmiún A̱ʼdá múgú, mú A̱ʼdá múgú maʼngo̱o̱, numuu rí ikhaa nindxu̱u̱ Tátá náa xúgíinʼ tátá ga̱jma̱a̱ Rey náa xúgíinʼ reyes. Bi̱ kúwá gajmiún ikhaa, ikhiin ni̱ndxu̱ún bi̱ watsaʼwúún, bi̱ niwaxtaʼwíin ma̱ngaa bi̱ jmbiin, mangiin maʼngu̱u̱n”.

15 Ikhaa niʼthúnʼ: “Iyaʼ rí nitayáá náa gíʼ a̱ʼgu̱ bi̱ nagujuamínáʼ nandoo gáʼthúu̱n xuajen, mbaʼin xa̱bu̱, xuajen mba̱ʼu̱ ga̱jma̱a̱ bi̱ nuthi mixtiʼkhu ajngáa. 16 Mbá gu̱wa̱ʼ chi̱ji̱ʼ rí nitayáá ma̱ngaa xujkhú xkawi̱i̱ʼ mawiñu̱u̱nʼ kuyáá a̱ʼgu̱ bi̱ nagujuamínáʼ, murigú káyííʼ xúgíʼ rí gíʼdoo ga̱jma̱a̱ muniña̱a̱ʼ tsaʼtsaaʼ. Mu̱phu̱ xuyuuʼ ga̱jma̱a̱ mutsikha̱a̱ náa aguʼ. 17 Numuu rí Dios nigíwánʼ náa a̱jkiu̱ún dí munimbaníí dí ikhaa nandxaʼwámina’, xóo muʼthá, munimbaníí mbóó rí e̱ndxa̱ʼwa̱míjna̱ xúgíinʼ dí muxnáá tsiakii mu maʼtáñajunʼ xujkhú xkawi̱i̱ʼ asndu mbiʼi rí gámbánúu ajngóo Dios. 18 A̱ʼgu̱ bi̱ nitayáá nandoo gáʼthúu̱n xuajen mba̱a̱ rí naʼtáñajúúnʼ xúgíinʼ reyes bi̱ kúwá náa tsu̱du̱u̱ ku̱ba̱ʼ”.

18 Nda̱wa̱á dí rígi̱ ndi̱yo̱o̱ i̱mba̱a̱ ángel bi̱ nagajtaa mekhuíí bi̱ gíʼdoo mba̱a̱ wéñuuʼ tsiakii, ga̱jma̱a̱ náa ku̱ba̱ʼ nimbiʼiti̱ga̱ ga̱jma̱a̱ rí naxpíbíinʼ. 2 Ikhaa nindxa̱ʼwa̱ gakhi̱i̱: “¡Niguámbáa! ¡Babilonia rí Mba̱a̱ niguámbáa! Niguajta̱a̱ guʼwún xa̱bu̱ wéñiiʼ ga̱jma̱a̱ náa nurkaʼwumijná espíritus mitsagiin, ma̱ngaa xúgíinʼ xujkhú xnaʼ bi̱ mitsagiin bi̱ nimbáa tsíyóo gáʼñún. 3 Numuu rí xúgíinʼ xa̱bu̱ xuajen niʼwa̱a̱n vino rí nagua̱ʼa̱* mabóoʼ xkawiʼ kayuuʼ gajmíi̱n eʼwíinʼ,* reyes bi̱ kúwá náa tsu̱du̱u̱ ku̱ba̱ʼ nibúúnʼ xkawiʼ kayuuʼ gajmiún ga̱jma̱a̱ bi̱ nigujua̱ náa tsu̱du̱u̱ ku̱ba̱ʼ niguánu niguáʼdáá ga̱jma̱a̱ numuu rí ikhaa tséti̱yu̱u̱ʼ ga̱jma̱a̱ xúgíʼ rí gíʼdoo”.

4 Nidxawun i̱mba̱ aʼwá mekhuíí rí niʼthí: “Agajnáanʼla ikhí xuajñunʼ, á mu tsíyala gúyambáá náa aʼkhá rí ikhaa naʼni ga̱jma̱a̱ á mu tsíyala mundrígú tsíginá rí ikhaa maraʼnuu. 5 Numuu rí aʼkhá ndrígóo nixtagujxu̱u̱ asndu mekhuíí ga̱jma̱a̱ Dios nirmáʼáan a̱jkiu̱u̱n náa xúgíʼ dí ra̱májánʼ eʼni. 6 Gu̱ni̱ numa̱a̱ ga̱jma̱a̱ ikháá má mbújkha̱a̱. Xúʼko̱, gurtanga̱a̱ a̱jma̱ nuthu itháán xúgíʼ rí niʼni. Náa copa rí niʼni mújúunʼ vino, gu̱ni̱ májáánʼ a̱jma̱ nuthu itháán mu muxna̱a̱ maga̱a̱n. 7 Gu̱ni̱ rí mamínuuʼ ga̱jma̱a̱ maxtáa gíná xó má tsiakii rí nigiʼdoo ga̱jma̱a̱ dí táti̱yu̱u̱ʼ náa xúgíʼ rí nigiʼdoo. Numuu rí ikhaa tséniñuuʼ raʼtáminaʼ: ‹Gúnʼ xóo reina, na̱nguá nindxu̱ʼ a̱ʼgú xuáʼa̱ ga̱jma̱a̱ nditháan xáxtáá ngíná›. 8 Ikha jngóo káaʼ mbóó mbiʼi gáʼkha̱nú rí mamínuuʼ, ewiʼ, tsingíná ga̱jma̱a̱ makhañúu, mikha̱a̱ mbá kayuuʼ náa aguʼ. Numuu rí Jeobá* Dios bi̱ xtáa randa̱ʼa̱a̱ cuenta, gíʼdoo tsiakii.

9 Índo̱ reyes bi̱ kúwá náa tsu̱du̱u̱ ku̱ba̱ʼ bi̱ nibúúnʼ xkawiʼ kayuuʼ gajmiún ikhaa* ga̱jma̱a̱ bi̱ niguáʼdáá rí ikhaa táti̱yu̱u̱ʼ magiʼdoo, mbuyáá gúniúu rí nagájnuu náa nakhaa, ikhú mumbi̱ya̱ʼ gínún* ga̱jma̱a̱ numuu ikhaa. 10 Mitsínguánʼ gáguanún ga̱jma̱a̱ numuu rí namíñúún xóo ikhaa namínúuʼ. Muthi: ‹¡Ngínáá! ¡Ngínáálá ikháán xuajen mba̱a̱, Babilonia, xuajen rí gíʼdoo tsiakii! ¡Numuu rí káaʼ mbá hora ni̱ʼkha̱nú rí matamíniiʼ!›.

11 Bi̱ nugujua̱ náa tsu̱du̱u̱ ku̱ba̱ʼ mumbi̱ya̱ʼ ga̱jma̱a̱ magáwíinʼ a̱jkiu̱ún kuyáá ikhaa, numuu rí ní nda̱wa̱a̱ nimbáa tsáá ma̱ʼtsi̱ xúgíʼ rí ikhiin nugujua̱, 12 xóo oro, plata, itsí mitsaanʼ, perla, lino rí itháan májánʼ, xtíin miʼñuu, seda ga̱jma̱a̱ xtíin maña̱ʼ xngeʼdi, xúgíʼ rí naguma ga̱jma̱a̱ ixi̱ rí ndataun ga̱jma̱a̱ xúgíʼ rí naguma ga̱jma̱a̱ marfil ma̱ngaa xúgíʼ ixi̱ rí mitsaanʼ, cobre, hierro o mármol, 13 ma̱ngaa canela, iná rí na̱ʼkha̱ India, rí ndataun, aceite rí ndataun, olíbano, vino, aceite dí oliva, ejndo̱o̱ʼ harina, trigo, xede̱, mugu̱, wáyú, carro rí nuxmajtaa wáyú, ñumbáá ga̱jma̱a̱ xa̱bu̱ numbaaʼ. 14 Xúʼko̱, xúgíʼ rí májánʼ* rí nindaaʼ maraʼdáá ní xáraʼdáá ga̱jma̱a̱ xúgíʼ ganitsu rí miʼtsí ma̱ngaa nagui̱i̱ magajta káyáaʼ. Nánguá mata̱nga̱a̱ maraʼdáá.

15 Bi̱ nugujua̱ rígi̱, bi̱ niguáʼdáá wéñuuʼ ga̱jma̱a̱ numuu ikhaa, tsínguánʼ gáwájunʼ numuu rí namíñúún dí xtáa ramínúuʼ ikhaa. Mumbi̱ya̱ʼ ga̱jma̱a̱ magáwíinʼ a̱jkiu̱ún 16 muthi: ‹¡Ngínáa! ¡Ngínáala xuajen mba̱a̱, bi̱ kagíʼ xtíin lino rí májánʼ, rí miʼñuu ga̱jma̱a̱ maña̱ʼ xngeʼdi, kiʼnirataa ga̱jma̱a̱ oro, itsí mitsaanʼ ga̱jma̱a̱ perla! 17 ¡Numuu rí káaʼ mbá hora niguma gámbáa xúgíʼ rí mitsaanʼ dí nigiʼdoo!›.

Xúgíinʼ bi̱ nagún kuñu̱u̱n barco, ma̱ngaa xúgíinʼ bi̱ nuñambáá ga̱jma̱a̱ bi̱ nagún ikhí, mangiin xúgíinʼ bi̱ nduyáʼ rí makuwá ga̱jma̱a̱ náa lamáa niguájun tsínguánʼ. 18 Índo̱ ndiyáá gúniúu rí nikhaa, nindxa̱ʼwa̱: ‹Lá rígá i̱mba̱ xuajen mba̱a̱ xóo rígi̱ ráʼ.› 19 Nixtajmáá idiʼ náa edxu̱ún, nimbi̱ya̱ʼ ga̱jma̱a̱ nigáwíinʼ a̱jkiu̱ún, ikhiin nindxa̱ʼwa̱: ‹¡Ngínáa! ¡Ngínáala xuajen mba̱a̱, ga̱jma̱a̱ numuu rí gíʼdoo niʼni maguaʼdáá xúgíinʼ bi̱ guáʼdáá barcos náa lamáa! ¡Káaʼ mbá hora niguma gámbáa xúgíʼ!›.

20 ¡Ikháanʼla bi̱ kúwáanʼ mekhuíí, bi̱ kaxtaʼwáanʼ, ikháanʼ apóstoles ga̱jma̱a̱ profetas* gaʼdxala ga̱jma̱a̱ numuu dí nirígá! Numuu rí Dios niʼni káwáanʼla ikháanʼ índo̱ niʼthí rí magíʼnuu ikhaa”.

21 Mbáa ángel bi̱ gíʼdoo tsiakii nikujxi̱ mbá itsí rí nindxu̱u̱ xóo itsí ndrígóo molino nidama̱ʼa̱ náa lamáa ga̱jma̱a̱ niʼthí: “Xúʼko̱ giʼdama̱ʼa̱ Babilonia rí nindxu̱u̱ xuajen mba̱a̱ ga̱jma̱a̱ nánguá mata̱nga̱a̱ marigá. 22 Ní xátanga̱a̱ mawán náa ikháán rí nuni̱ ajmúú bi̱ nudi̱i̱ arpa ni má bi̱ nudi̱i̱ ajua̱nʼ, bi̱ nundií flauta o trompeta. Ní xátangi̱ín makujmiin bi̱ nuni̱ mixtiʼkhu ñajunʼ. Ní xátanga̱a̱ mawán aʼwóo itsí ndrígóo molino. 23 Ní xátanga̱a̱ mambiʼi aguʼ ndrígóo nimbá lámpara, ní xátanga̱a̱ mawán náa ikháán aʼwóo bi̱ manigúnʼ o manújunʼ. Numuu rí bi̱ nugujua̱ bi̱ ikháán niraʼdiin ni̱ndxu̱ún bi̱ niguáʼdáá wéñuuʼ náa tsu̱du̱u̱ ku̱ba̱ʼ, ma̱ngaa numuu rí nitani̱ nduwaʼ náa xúgíʼ xuajen mba̱ʼu̱ ga̱jma̱a̱ numuu xúgíʼ enii xawan* rí nitani̱. 24 Ikhí nigadíí eʼdiún profetas, bi̱ kaxtaʼwíin* ga̱jma̱a̱ xúgíinʼ bi̱ niradíin náa tsu̱du̱u̱ ku̱ba̱ʼ”.

19 Nda̱wa̱á dí rígi̱ nidxawuun xóo aʼwá gakhi̱i̱ ndrígu̱ún mbaʼin xa̱bu̱ náa mekhuíí. Ikhiin nuthi: “¡Gu̱ni̱ mba̱a̱ Ja!* Rí niguma káwáánʼ, gamajkhu ga̱jma̱a̱ tsiakii kaʼyoo magruigú Dios ndrígúlú, 2 numuu rí na̱nda̱ʼa̱a̱ cuenta nindxu̱u̱ gajkhun ga̱jma̱a̱ jmbu; numuu rí ma̱ngaa niʼni mamínuuʼ a̱ʼgu̱ bi̱ nagujuamínáʼ, bi̱ niʼni gachúu ku̱ba̱ʼ numuu rí nabóoʼ xkawiʼ kayuuʼ gajmíi̱n eʼwíinʼ,* ma̱ngaa niruma̱a̱ eʼdiún ñumbáá bi̱ ikhaa nigudíin”.* 3 Mbu̱júu̱ʼ nithi dí maʼni a̱jma̱ aʼphu̱: “¡Gu̱ni̱ mba̱a̱ Ja!* Gúniúu Babilonia matsimuu má xúʼko̱ asndu kámuu mbiʼi”.

4 Bi̱ mbá 24 bi̱ kuya̱ edxu̱u̱ mangiin a̱jkhui̱i̱n querubines* nismbati̱gu̱u̱n ga̱jma̱a̱ ndiyamajkuíí Dios, bi̱ gíʼ náa xílí* ga̱jma̱a̱ nithi: “¡Xúʼko̱ gáʼni!* ¡Gu̱ni̱ mba̱a̱ Ja!”.*

5 Ma̱ngaa náa xílí nigájnuu mbá aʼwá dí niʼthí: “Gu̱ni̱ mba̱a̱ Dios ndrígúlú, xúgiáanʼ ikháanʼ bi̱ nindxa̱la ñumbáá ndrígóo, bi̱ namíñala ku̱ya̱a̱, bi̱ majkiáanʼ ga̱jma̱a̱ bi̱ guaniáanʼ”.

6 Ga̱jma̱a̱ nidxawuun mbá aʼwá xóo aʼwún mbaʼin xa̱bu̱, xóo aʼwóo mbaʼa iyaʼ ma̱ngaa xóo índo̱ nawáán gakhi̱i̱ endxa̱ʼwa̱ a̱jkhu̱u̱n. Ikhiin nithi: “¡Gu̱ni̱ mba̱a̱ Ja!* ¡Numuu rí Jeobá* Dios ndrígúlú, bi̱ gíʼdoo xúgíʼ tsiakii, nigíʼdu̱u̱ má niʼtáñajunʼ! 7 Gakuwa̱a̱nʼlú gagi wéñuuʼ ga̱jma̱a̱ guxnáá gamajkhu numuu rí ni̱jkha̱nú má mbiʼi dí manigúnʼ A̱ʼdá múgú ga̱jma̱a̱ xtáa má xawii a̱ʼgiu̱u̱. 8 Xúʼko̱ kaʼnii, a̱ʼgu̱ nikhánáá magíʼ xtíin lino dí májánʼ, dí nambiʼi ga̱jma̱a̱ kaʼwu, lino dí májánʼ nandoo gáʼthúu̱n dí jmbu rí nini̱ bi̱ kaxtaʼwíin”.*

9 Ángel niʼthúnʼ: “Ataniraʼmáʼ rígi̱: ‹Gagi kúwá bi̱ niguwáʼ gúphiʼtsu náa nanigúnʼ A̱ʼdá múgú›”. Ga̱jma̱a̱ niʼthí xóó: “Ajngáa rígi̱ nindxu̱u̱ gajkhun ndrígóo Dios”. 10 Ikhú nismbatígo̱ʼ náa rajkhúu mu mbayamajkuu. Mú ikhaa niʼthúnʼ: “¡Tsumálá! ¡Xátani̱ rúʼko̱! Ikhúún mangúún nindxu̱ʼ mbáa ñumbáá xó má ikháán ga̱jma̱a̱ a̱ngia̱a̱nʼ, bi̱ guaʼdáá ñajunʼ dí mutaraʼa ga̱jma̱a̱ numuu Jesús. ¡Atayamajkuíí Dios! Numuu dí nijuiʼtáriya̱ʼ nindxu̱u̱ mu majuiʼthá rí gajkhun ga̱jma̱a̱ numuu Jesús”.

11 Ndi̱yo̱o̱ rí kambaʼta mekhu; ikhí nikujmaa mbáa wáyú miʼxáa. Bi̱ gríguíi mbiʼyuu Jmbii ga̱jma̱a̱ Gajkuwiin, ma̱ngaa na̱nda̱ʼa̱a̱ cuenta ga̱jma̱a̱ naʼni guerra xóo gíʼmaa. 12 Iduu nindxu̱u̱ xóo riʼyu̱u̱ aguʼ, ga̱jma̱a̱ náa edxu̱u̱ rígá mbaʼa corona.* Ma̱ngaa kayá mbá mbiʼyuu rí i̱ndó ikhaa naninuuʼ ga̱jma̱a̱ nda̱wa̱a̱ imba̱a̱ bi̱ ndaʼyoo ndiéjunʼ eyoo gáʼthúu̱n. 13 Kagíʼ mbá xtíin rí kagu̱u̱ eʼdi,* ga̱jma̱a̱ nagumbiʼyuu xígi̱ kaʼnii: Ajngóo Dios. 14 Mangiin soldados bi̱ kúwá mekhuíí nagún kidxuuʼ gajmiún wáyú miʼxíin ma̱ngaa kugíʼ xtíin lino rí májánʼ, miʼxá ga̱jma̱a̱ kaʼwu. 15 Náa rawuunʼ ikhaa nagájnuu mbá espada mixíníʼ ga̱jma̱a̱ mbaʼ mu maʼni gajmíi̱n xuajen mba̱ʼu̱. Ma̱ngaa mu mañewu̱u̱n ga̱jma̱a̱ xkuíyá rí ajua̱nʼ. Mu makujmbi̱i̱ uva náa iñáʼ rí naʼni makásngañu̱u̱ʼ Dios, bi̱ gíʼdoo xúgíʼ tsiakii. 16 Ga̱jma̱a̱ náa xtíñuu náa mijngii xtiyuu, kiʼnirámáʼ rígi̱: Rey náa xúgíinʼ reyes ma̱ngaa Tátá náa xúgíinʼ tátá.

17 Ma̱ngaa ndi̱yo̱o̱ mbáa ángel wíji̱ náa a̱jkha̱ʼ. Ikhaa niʼthí gakhi̱i̱ ga̱jma̱a̱ ikhaa niʼthún xúgíinʼ xujkhúʼ xnaʼ bi̱ nagún náa tapo̱o̱ mekhu: “¡Aguwaʼla gi̱i̱! Gagimbáanʼ mu muphu ganitsu wañuu Dios. 18 Guphula xuñúnʼ reyes, xuñúnʼ bi̱ nutañajúúnʼ soldado ma̱ngaa xuñúnʼ xa̱bu̱ bi̱ guáʼdáá tsiakii, ga̱jma̱a̱ xuñúnʼ wáyú ma̱ngaa xuñúnʼ bi̱ trámiúnʼ; xuñúnʼ xúgíinʼ, xó má bi̱ ni̱ndxu̱ún ñumbáá ga̱jma̱a̱ bi̱ rañájúnʼ ñumbáá, bi̱ majkhiinʼ ga̱jma̱a̱ bi̱ wanii”.

19 Ma̱ngaa ndi̱yo̱o̱ xujkhú xkawi̱i̱ʼ, reyes bi̱ kúwá náa tsu̱du̱u̱ ku̱ba̱ʼ gajmiún soldado ndrígu̱ún, xúgíinʼ nigimbíin mu muxmijná gajmiún bi̱ gríguii wáyú gajmíi̱n soldado ndrígóo. 20 Ikhú xujkhú xkawi̱i̱ʼ nixtugua̱a̱, ga̱jma̱a̱ profeta bi̱ minduwaaʼ bi̱ niʼni milagro náa inuu ikhaa dí nijmuu mu maʼni nduwiinʼ bi̱ nindrigú tsinaʼ ndrígóo xujkhú xkawi̱i̱ʼ ga̱jma̱a̱ bi̱ ndiyamajkuíí xtiʼkhuu ikhaa. Índo̱ kaʼníí xóó kúwá ruya ikhú mbá nájmi̱i̱n nijthiin náa mañu rí nakha ga̱jma̱a̱ azufre.* 21 Bi̱ xóó niguanún nikháñún ga̱jma̱a̱ espada dí mbaʼ dí nagájnuu náa rawuunʼ bi̱ gríguii wáyú. Ga̱jma̱a̱ xúgíinʼ xujkhú xnaʼ ni̱ʼphu̱ xuñúnʼ asndu nigiʼmún.

20 Ndi̱yo̱o̱ mbáa ángel nagajtaa mekhuíí kayá llave ndrígóo iñá mbiʼ ga̱jma̱a̱ kayá mbá cadena mba̱a̱. 2 Nigujtuwiin a̱bu̱nʼ mba̱a̱,* a̱bu̱nʼ wayuu bi̱ nindxu̱u̱ Gixa̱a̱,* niroʼoo mbá 1,000 tsiguʼ. 3 Ga̱jma̱a̱ nidama̱ʼa̱a̱n náa iñá mbiʼ, náa niruguaraʼaa ga̱jma̱a̱ nirugua̱a̱ jxa̱ʼ mu ní xátanga̱a̱ maʼni nduwiinʼ xa̱bu̱ bi̱ kúwá náa xuajen mba̱ʼu̱ asndu índo̱ gárámuuʼ 1,000 tsiguʼ. Nda̱wa̱á mbaʼyóoʼ magajnáa mbá nguáthá tiempo.

4 Ndi̱yo̱o̱ mbaʼa xílí* ga̱jma̱a̱ bi̱ nitri̱gi̱i̱n ikhí nikhánún awan rí munda̱ʼa̱a̱ cuenta. Xúʼko̱, ndi̱yo̱o̱ eʼdiún* bi̱ niradíin* ga̱jma̱a̱ numuu rí nitaraʼa numuu Jesús ma̱ngaa rí nithi ga̱jma̱a̱ numuu Dios, ikhiin ni̱ndxu̱ún bi̱ na̱nguá nixnáá gamajkhu xujkhú xkawi̱i̱ʼ ni má xtiʼkhuu, bi̱ na̱nguá nindrigú tsinaʼ náa xkídún ni má náa ñawúúnʼ. Ikhiin niguánú nikúwá ga̱jma̱a̱ nitañajunʼ gajmiún Cristo mbá 1,000 tsiguʼ. 5 Bugi̱ ni̱ndxu̱ún timbíin bi̱ nigabi̱ín.* (Ga̱jma̱a̱ eʼwíinʼ bi̱ xóó tsétujxi̱ín niguánú nikúwá nda̱wa̱á rí gárámuuʼ mbá 1,000 tsiguʼ). 6 Gagi kúwá bi̱ nigabi̱ín ginii, numuu rí ikhiin ni̱ndxu̱ún bi̱ niwaxtaʼwíin* ní xákháñún rí maʼni a̱jma̱ nuthu,* mani̱ndxu̱ún ndxajkun ndrígóo Dios ga̱jma̱a̱ ndrígóo Cristo, mutañajunʼ gajmiún ikhaa mbá 1,000 tsiguʼ.

7 Mú índo̱ gárámuuʼ mbá 1,000 tsiguʼ, Gixa̱a̱* magajnáa náa nigúguaraʼaa 8 ga̱jma̱a̱ maʼni nduwiinʼ xuajen mba̱ʼu̱ bi̱ kúwá náa a̱jkhu̱ níʼkhóo ku̱ba̱ʼ, bi̱ nindxu̱u̱ Gog ga̱jma̱a̱ Magog, mu magimbíin náa marigá guerra. Xóo mbaʼa jui̱ʼi̱ dí rígá náa lamáa xúʼko̱ mbaʼin. 9 Ikhiin nigún náa xúgíʼ tsu̱du̱u̱ ku̱ba̱ʼ ga̱jma̱a̱ niruguamaʼa̱a̱n náa kúwá bi̱ kaxtaʼwíin ga̱jma̱a̱ xuajen rí Dios nandoo kaʼyoo. Mú nigajtaa aguʼ mekhuíí ga̱jma̱a̱ nitsikiin. 10 Gixa̱a̱ bi̱ nixtáa raʼni nduwiin nijuidamaʼa̱a̱n náa mañu rí nakha ga̱jma̱a̱ azufre,* náa kaʼwa̱a̱n má xujkhú xkawi̱i̱ʼ ga̱jma̱a̱ profeta bi̱ naʼni nduwaʼ. Ikhí mumíniiʼ* mbiʼíí mbruʼun asndu kámuu mbiʼi.

11 Ndi̱yo̱o̱ mbá xílí mba̱a̱ rí miʼxá ga̱jma̱a̱ bi̱ gíʼ ikhí. Ku̱ba̱ʼ ga̱jma̱a̱ mekhu nigáñún náa inuu ga̱jma̱a̱ nánguá nitangi̱i̱n nikujmiin. 12 Ndi̱ñu̱u̱n bi̱ nikháñún, bi̱ wanii ga̱jma̱a̱ bi̱ majkhiinʼ wájun náa inuu xílí, nimbaʼtoo mbaʼa rollo. Mú nimbaʼtoo i̱mba̱ libro: Libro rí ndaʼya.* Xó má naʼthí náa rollos, nixtandi̱ʼi̱i̱n cuenta bi̱ nikháñún ga̱jma̱a̱ xó má rí nini̱. 13 Lamáa nixnájxi̱ín bi̱ nikháñún ikhí, rí nakháñulú ga̱jma̱a̱ Iñá wajinʼ* nixnajxi̱ín bi̱ nikháñún ikhí. Mámbáa nixtanda̱ʼa̱a̱ cuenta ga̱jma̱a̱ rí xóo niʼni. 14 Rí nakháñulú ga̱jma̱a̱ Iñá wajinʼ* nijuiʼdama̱ʼa̱ náa mañu rí nakha. Mañu rí nakha nandoo gáʼthúu̱n rí makhañún a̱jma̱ nuthu. 15 Ma̱ngaa bi̱ na̱nguá kiʼnirámáʼ mbiʼñún náa libro rí ndaʼya nijuiʼdamiʼi̱i̱n náa mañu rí nakha.

21 Ikhú ndi̱yo̱o̱ mbá mekhu nuxi̱ʼ ga̱jma̱a̱ mbá ku̱ba̱ʼ nuxi̱ʼ, numuu rí mekhu dí nirígá nákha ginii ga̱jma̱a̱ ku̱ba̱ʼ dí nirígá nákha ginii nindáti̱ga̱a̱ ga̱jma̱a̱ lamáa nánguá rígá. 2 Ma̱ngaa ndi̱yo̱o̱ xuajen kaʼwu, Jerusalén dí nuxi̱ʼ, nagajtaa mekhuíí asndu náa xtáa Dios. Kijmarataa xóo mbáa a̱ʼgu̱ bi̱ nacho̱o̱ manújúnʼ mu mbayáa xa̱bu̱. 3 Nda̱wa̱á nidxawuun mbá aʼwá rí nigájnuu náa xílí,* rí niʼthí: “¡Atayáá! Guʼwá xtíin ndrígóo Dios rígá náa xa̱bu̱ numbaaʼ. Ikhaa maxtáa gajmíi̱n ga̱jma̱a̱ ikhiin mani̱ndxu̱ún xuajñuu, mina̱a̱ʼ má Dios gáxtáa gajmíi̱n. 4 Makudi̱i̱ xúgíʼ iyaʼ idún, ni xákháñún itháan, ni xárígá itháan tsingíná ni má xtambi̱ya̱ʼ ni má ga̱ʼkhu̱. Xúgíʼ dí nirígá nákha ginii nindáti̱ga̱a̱ gáʼni̱ ikhú”.

5 Bi̱ nigi̱ʼi̱ náa xílí niʼthí: “¡Atayáá! Xtáá ra̱ni̱ xúgíʼ nuxi̱ʼ”. Ma̱ngaa niʼthí: “Ataniraʼmáʼ ajngáa rígi̱, numuu rí nindxu̱u̱ gajkhun ga̱jma̱a̱ jmbu”. 6 Ga̱jma̱a̱ niʼthúnʼ: “¡Nimbánuu má! Ikhúún ñajunʼ Alfa ga̱jma̱a̱ Omega,* bi̱ ginii ga̱jma̱a̱ bi̱ iwáá kayuuʼ. Asndu tsáá bi̱ gákándawuuʼ, maxnu̱u̱ maga̱a̱n xúʼkhiín iyaʼ rí ndaʼya rí nagájnuu náa iduu. 7 Bi̱ gáʼngo̱o̱, magruigúu xúgíʼ rígi̱ ga̱jma̱a̱ ikhúúnʼ mani̱ndxu̱ʼ Dios ndrígio̱o̱ ga̱jma̱a̱ ikhaa mani̱ndxu̱u̱ a̱ʼdióʼ. 8 Mú bi̱ namíñúún, bi̱ raguáʼdáá fe, bi̱ tsagiin ga̱jma̱a̱ bi̱ nuni̱ rí tsaga, bi̱ nuradíin xa̱bu̱, bi̱ nubúúnʼ xkawiʼ kayuuʼ gajmiún eʼwíinʼ,* bi̱ nuni̱ xawan,* bi̱ nduyamajkhún xándú ga̱jma̱a̱ xúgíinʼ bi̱ nuninduwaʼ kuáʼti̱i̱n mañu rí nakha ga̱jma̱a̱ azufre,* rí nandoo gáʼthúu̱n rí makhañún a̱jma̱ nuthu”.

9 Mbáa bi̱ mbá juwiin ángeles bi̱ kuda mbá juwan xua̱a̱ náa ka̱jnu̱ʼ juwan tsingíná rí iwáá, ni̱ʼkha̱ ga̱jma̱a̱ niʼthúnʼ: “Aye̱ mu masngajmiáanʼ a̱ʼgu̱ bi̱ manújúnʼ, bi̱ maʼni a̱ʼgiu̱u̱ A̱ʼdá múgú”. 10 Ga̱jma̱a̱ tsiakii ndrígóo espíritu santo* ni̱jkha̱ kañún náa mbá kúbá mba̱a̱ ga̱jma̱a̱ tsídánʼ, nisngájmuʼ Jerusalén xuajen kaʼwu, rí nagajtaa mekhuíí asndu náa xtaa Dios, 11 ga̱jma̱a̱ gíʼdoo tsiakii ndrígóo Dios rí naxpíbínʼ. Rí naxpíbínʼ xóo mbá itsí rí mitsaanʼ wéñuuʼ, xóo jaspe dí nangujuíi agiuuʼ. 12 Gíʼdoo mbá xtátsí* mba̱a̱ ma̱ngaa mitsídánʼ, gíʼdoo mbá 12 xkrugua ma̱ngaa nguájun mbá 12 ángeles ga̱jma̱a̱ kiʼnirámáʼ mbá 12 mbiʼyuu xuajen majkhaʼ* ndrígu̱ún e̱ji̱i̱n Israel náa xkrugua. 13 Náa nagájnuu a̱jkha̱ʼ rígá mbá ajtsú xkrugua, xígií rijma̱a̱* rígá mbá ajtsú xkrugua, kawáá* rígá mbá ajtsú ga̱jma̱a̱ náa narámaaʼ a̱jkha̱ʼ rígá mbá ajtsú xkrugua. 14 Ma̱ngaa náa rajkhúu xtátsí ndrígóo xuajen tuáʼán mbá 12 itsí ga̱jma̱a̱ ikhí nigumaraʼmáʼ mbá 12 mbiʼñún bi̱ mbá 12 apóstoles ndrígóo A̱ʼdá múgú.

15 Bi̱ xtáá ratamíjná ga̱jmu̱ʼ kayá mbá rí magiewan ga̱jma̱a̱, mbá xkuíyá dí oro, mu magiewan ga̱jma̱a̱ xuajen, xkrugua ga̱jma̱a̱ xtátsí. 16 Xuajen gíʼdoo a̱jkhu̱ níjñúu, ikháá má mbaʼ ga̱jma̱a̱ rí ma̱ja̱nʼ. Ikhaa nigiewan xuajen ga̱jma̱a̱ xkuíyá: Gíʼdoo mbá 2,220 kilómetro* rí mbaʼ, rí ma̱ja̱nʼ ga̱jma̱a̱ dí mitsídánʼ ikháá má nindxu̱u̱. 17 Ma̱ngaa nigiewan xtátsí: Gíʼdoo mbá 144 guʼxuʼ,* xó má rí nugiewun xa̱bu̱, ikhaa rúʼko̱ má nijmuu ángel ma̱ngaa. 18 Xtátsí niguma ga̱jma̱a̱ itsí jaspe ga̱jma̱a̱ xuajen niguma ga̱jma̱a̱ mbawíí oro, rí naʼkuta̱ʼa̱ xóo niwanʼ. 19 Dí niguma ga̱jma̱a̱ rajkhúu xtátsí ndrígóo xuajen kiʼniratáá ga̱jma̱a̱ xúgíʼ enii itsí dí mitsaanʼ wéñuuʼ: Timbá rí niguma ga̱jma̱a̱ rajkhúu nindxu̱u̱ itsí jaspe, ragajma̱ zafiro, ragajtsú calcedonia, rí maʼni a̱jkhu̱ esmeralda, 20 rí maʼni witsu sardónica, rí maʼni majun sardio, rí maʼni juwan crisólito, rí maʼni migiñuʼ berilo, rí mijnagu̱wa̱ʼ topacio, rí gu̱wa̱ʼ crisoprasa, rí gu̱wa̱ʼ i̱mba̱ jacinto ga̱jma̱a̱ rí maʼni gu̱wa̱ʼ e̱jma̱ amatista. 21 Ma̱ngaa 12 xkrugua̱ nindxu̱u̱ 12 perla, mámbá xkrugua̱ niguma ga̱jma̱a̱ mámbá perla. Ga̱jma̱a̱ náa kamba̱a̱ ma̱ja̱nʼ ndrígóo xuajen, nindxu̱u̱ mbawíí oro rí naʼkuta̱ʼa̱ xóo niwanʼ.

22 Na̱nguá ndi̱yo̱o̱ nimbá goʼwóo Dios ikhí, numuu rí Jeobá* Dios bi̱ gíʼdoo xúgíʼ tsiakii nindxu̱u̱ guʼwá, xó má A̱ʼdá múgú. 23 Na̱nguá má eyóoʼ rí agiuuʼ a̱jkha̱ʼ ni má agiuuʼ gu̱nʼ mambiʼi náa xuajen, numuu rí agiuuʼ Dios nambiʼi ga̱jma̱a̱ lámpara ndrígóo nindxu̱u̱ A̱ʼdá múgú. 24 Xa̱bu̱ bi̱ kúwá náa xúgíʼ xuajen magún ga̱jma̱a̱ numuu agiuuʼ, ga̱jma̱a̱ reyes bi̱ kúwá náa tsu̱du̱u̱ ku̱ba̱ʼ muxnáá gamajkhu xuajen. 25 Xkrugoo mambaʼtoo má xúʼko̱ kañiʼ mbiʼi numuu dí ikhí xárígá mbruʼun. 26 Ga̱jma̱a̱ xa̱bu̱ bi̱ kúwá náa xúgíʼ xuajen muxnáá gamajkhu ga̱jma̱a̱ muni̱ mba̱a̱. 27 Mú nimbá rí nigumagachíí, ni má nimbáa bi̱ naʼni rí xkawi̱ʼ ga̱jma̱a̱ bi̱ naʼninduwaʼ nditháan xáto̱ʼo̱o̱ ikhí. I̱ndó matu̱ʼu̱u̱n bi̱ kiʼnirámáʼ mbiʼñún náa libro rí ndaʼya* ndrígóo A̱ʼdá múgú.

22 Ikhú ikhaa nisngájmuʼ mbá mañu náa rígá iyaʼ rí ndaʼya, nindxu̱u̱ xngiyaʼ ga̱jma̱a̱ nagájnuu náa xíliu̱u̱* Dios ma̱ngaa náa xíliu̱u̱ A̱ʼdá múgú, 2 ga̱jma̱a̱ na̱jkha̱ náa tapho̱o̱ kamba̱a̱ ma̱ja̱nʼ ndrígóo xuajen. Náa mbá nájma̱ rawuunʼ mañu rígá ixi̱ rí ndaʼya dí naxná 12 aʼphu̱ xndúu, mambá igu̱nʼ naxná xndúu ma̱ngaa inúu najmaa mu maʼni̱i̱ a̱jkiu̱ún xa̱bu̱ bi̱ kúwá náa xúgíʼ xuajen.

3 Dios ni xáʼtátsríguíi xuajen numuu rí xíliu̱u̱ Dios ma̱ngaa ndrígóo A̱ʼdá múgú marigá ikhí ga̱jma̱a̱ ñumbáá ndrígiu̱ún muni̱ ñajunʼ dí nindxu̱u̱ mitsúʼkháan, 4 mbuyáá inuu ga̱jma̱a̱ maguaʼdáá mbiʼyuu ikhaa náa xkídún. 5 Ma̱ngaa ni xátanga̱a̱ marigá mbruʼun, ni xáʼyóoʼ aguʼ, ni lámpara ni má agiuuʼ a̱jkha̱ʼ, numuu rí agiuuʼ Jeobá* Dios gámbíʼñún ga̱jma̱a̱ ikhiin mutañajunʼ asndu kámuu mbiʼi.

6 Ángel niʼthúnʼ: “Ajngáa rígi̱ nindxu̱u̱ jmbu ga̱jma̱a̱ gajkhun. Xúʼko̱, Jeobá,* Dios bi̱ nijmuu espíritu santo* ndrígóo mu profetas* mutari̱ya̱ʼ, nikuʼmaa ángel ndrígióo mu masngájmún ñumbáá ndrígióo rí inu má marigá. 7 Atayáá, naʼkhá má nacha̱. Gagi xtáa bi̱ naʼnimbo̱o̱ ajngáa rí nijuiʼtáriya̱ʼ náa rollo rígi̱”.

8 Ikhúúnʼ, Juan, nindxu̱ʼ bi̱ niʼdxawun ga̱jma̱a̱ ndiʼyoo rígi̱. Nda̱wa̱á rí ndi̱yo̱o̱ ga̱jma̱a̱ nidxawuun rígi̱, ikhú nismbatígo̱ʼ náa rajkhúu ángel bi̱ nisngájmuʼ xúgíʼ rígi̱ mu mbayamájkhuu. 9 Mú ikhaa niʼthúnʼ: “¡Tsumáálá! ¡Xátani̱ rígi̱! Ikhúún ma̱ngaa i̱ndó nindxu̱ʼ mbáa ñumbáá xó má ikháán, xó má a̱ngia̱a̱nʼ, xó má profetas ma̱ngaa xó má bi̱ nunimbu̱u̱n náa ajngáa rí kiʼnirámáʼ náa rollo rígi̱. Dios gátayamajkuíí”.

10 Ga̱jma̱a̱ niʼthúnʼ xóó: “Xátiejxíi ngu̱ʼwa̱* ajngáa rí kiʼtáriya̱ʼ náa rollo rígi̱ numuu rí mbiʼi dí niwaxtaʼwíí gíʼ má mijngii. 11 Bi̱ ra̱májáanʼ gaxtáa má xúʼko̱ náa dí ra̱májánʼ, bi̱ tsagaa gaxtáa má xúʼko̱ náa rí tsaga. Mú bi̱ jmbii gaxtáa má xúʼko̱ náa rí jmbu ga̱jma̱a̱ bi̱ kaʼwii gaxtáa má xúʼko̱ náa rí mikaʼwu.

12 ‹¡Atadxawíín! Na̱ʼkhá má nacha̱, ga̱jma̱a̱ ka̱ya̱ rí maxnu̱u̱ mada̱a̱ʼ mámbáa xó má rí naʼni. 13 Ikhúún nindxu̱ʼ Alfa ga̱jma̱a̱ Omega,* bi̱ ginii ga̱jma̱a̱ bi̱ iwáá kayuuʼ. 14 Gagi kúwá bi̱ nujñáa xtíñún rí mbi̱jua̱ mu xúʼko̱ ma̱ndoo mu̱phu̱ xndúu ixi̱ dí naxná rí ndaʼya ma̱ngaa xúʼko̱ ma̱ndoo manújngún náa xkrugua mu matu̱ʼu̱u̱n náa xuajen. 15 Rexa̱a̱ gíi̱nʼ xuwánʼ,* bi̱ nuni̱ xawan,* bi̱ nubúúnʼ xkawiʼ kayuuʼ gajmiún eʼwíinʼ,* bi̱ nuradíin xa̱bu̱, bi̱ nduyamajkhún xándú, bi̱ nanigu̱u̱nʼ muni̱ nduwaʼ ga̱jma̱a̱ bi̱ naguʼwún nuni̱ nduwaʼ›.

16 ‹Ikhúún, Jesús, nikuʼmáa ángel ndrígióʼ mu maʼtála rígi̱ mu xúʼko̱ makuwá májánʼ bi̱ nagimbíi̱n. Ikhúúnʼ nindxu̱ʼ bi̱ na̱ʼkha̱ náa goʼwóo ga̱jma̱a̱ náa e̱ji̱i̱n David, ma̱ngaa nindxu̱ʼ a̱ʼgua̱a̱n bi̱ nambiʼii rí miʼcha̱›”.

17 Espíritu santo ga̱jma̱a̱ a̱ʼgu̱ bi̱ manújúnʼ tséniña̱a̱ʼ ruthi, “¡Aye̱!”. Asndu tsáa bi̱ gáʼdxuun gaʼthí “¡Aye̱!”. Ga̱jma̱a̱ asndu tsáa bi̱ nakandawuuʼ ga̱ʼkha̱. Asndu tsáa bi̱ gándoo, gaga̱a̱n xúʼkhiín iyaʼ rí ndaʼya.

18 “Xúgíinʼ bi̱ nudxawíín ajngáa rí nijuiʼtáriya̱ʼ náa rollo rígi̱, ikhúún na̱thu̱u̱n: Á mu mbáa naʼnirámáaʼ itháan rí kiʼnirámáʼ rígi̱, Dios maʼnirámáanʼ itháán rí mamínuuʼ rí kiʼnirámáʼ má náa rollo rígi̱, 19 ga̱jma̱a̱ á mu mbáa rígá dí narígúu náa ajngáa dí kiʼtáriya̱ʼ náa rollo rígi̱, Dios marígúu dí kaʼyoo náa ixi̱ dí naxná rí ndaʼya ma̱ngaa náa xuajen rí kaʼwu xó má kiʼnirámáʼ náa rollo rígi̱.

20 Bi̱ naxná ajngáa ga̱jma̱a̱ numuu rígi̱ naʼthí: ‹Xúʼko̱, na̱ʼkhá má nacha̱›”.

“¡Xúʼko̱ gáʼni!* Aye̱, Tátá Jesús”.

21 Rí májánʼ wéñuuʼ a̱jkiu̱u̱n Tátá Jesús garigá má xúʼko̱ náa bi̱ kaxtaʼwíin.*