Jeobá naʼni tsajkurámíinʼ bi̱ nuni̱ mba̱a̱ a̱jkiu̱ún

 1. Ndiéjunʼ ekudaminaʼ maʼni Jeobá ga̱jma̱a̱ numuu bi̱ nixudami̱jná aʼkhá bi̱ gajkhun natanga̱a̱ a̱jkiu̱ún rá.

JEOBÁ ni̱ndxu̱u̱ bi̱ Niʼniánʼlu bi̱ naʼni Xtángoo ga̱jma̱a̱ Juez, ma̱ngaa ni̱ndxu̱u̱ Anu̱lú bi̱ nandoo kaʼyulú bi̱ xtáá mekhuíí (Sal. 100:3; Is. 33:22). Ikha jngó, índo̱ nuxudamíjna̱ aʼkhá náa ikhaa ga̱jma̱a̱ natanga̱a̱ gajkhun a̱jkiu̱lú. Ikhaa nandoo maʼni mba̱a̱ a̱jkiu̱u̱n kaʼyulú (Sal. 86:5). Jeobá nijmiuu profeta Isaías, mu maʼnirámáʼ dí ikhaa nikudaminaʼ mbá dí naʼni̱i̱ a̱jkiu̱lú. Ikhaa niʼthí: “Maski ajndu aʼkhá ndrígála nindxu̱u̱ mañaʼ xngeʼdi, maʼni̱i̱ miʼxá xóo idiʼ” (Is. 1:18).

 2. Ndiéjunʼ gíʼmaa muʼni á mu nandulú makuwáanʼ tsímáá gajmiúlú eʼwíinʼ rá.

² Numuu dí xúgiáanʼ ni̱ndxu̱lú xa̱bu̱ aʼkhá, mbáa nuʼni o nuʼthá dí naʼnigawúúnʼ eʼwíinʼ (Sant. 3:2). Mú, rúʼko̱ na̱nguá e̱yo̱o̱ gáʼthúu̱n dí xándoo muguaʼdiin bi̱ mambáxulu gajmiúlú. Dí phú gíʼmaa muʼni nindxu̱u̱ dí maguʼwunlu muʼni mba̱a̱ a̱jkiu̱lú kuʼñúún eʼwíinʼ (Prov. 17:9; 19:11; Mat. 18:21, 22). Jeobá gíʼthu̱u̱n rí mu̱ni̱ mba̱a̱ a̱jkiu̱lú kuʼñúún eʼwíinʼ bi̱ nuni gawúnlú (Col. 3:13). Numuu dí Jeobá naʼni mba̱a̱ a̱jkiu̱u̱n kaʼyulú ikháanʼ, mangáanʼ gíʼmaa muʼni xúʼko̱ ma̱ngaa (Is. 55:7).

 3. Ndiéjunʼ guʼyáá náa artículo rígi̱ rá.

³ Náa artículo rígi̱ mbuʼyáá dí maski ajndu ni̱ndxu̱lú xa̱bu̱ aʼkhá, ma̱ndoo mbuʼyaridáá Jeobá dí muʼni mba̱a̱ a̱jkiu̱lú kuʼñúún eʼwíinʼ. Ndiéjunʼ aʼkhá dí ma̱ndoo muʼthúún a̱ngiu̱lú bi̱ kuya̱ edxu̱u̱ rá. Náa numuu dí Jeobá nandoo dí muʼni mba̱a̱ a̱jkiu̱lú kuʼñúún eʼwíinʼ rá. Ndiéjunʼ gándoo gajmañulú náa a̱ngiu̱lú bi̱ nimíniiʼ ga̱jma̱a̱ numuu aʼkhá dí nini̱ eʼwíinʼ rá.

 4. a) Ndiéjunʼ eyóoʼ maʼni bi̱ nikudaminaʼ mbá aʼkhá mbiiʼ rá. b) Ndiéjunʼ ñajunʼ kajkuáa ñawúúnʼ bi̱ kuya̱ edxu̱u̱ rá.

⁴ Ndayóoʼ muʼthúún bi̱ kuya̱ edxu̱u̱ índo̱ mbáa nakudaminaʼ aʼkhá mbiiʼ. Tikhu aʼkhá mbiiʼ na̱ʼkhá náa 1 Corintios 6:9, 10, aʼkhá rígi̱ nanújngorámuuʼ náa xtángoo ndrígóo Dios. Á mu mbáa nakudaminaʼ aʼkhá xóo rígi̱ ndayóoʼ ma̱ndo̱ʼo̱o̱ Jeobá rí maʼni mba̱a̱ a̱jkiu̱u̱n kaʼyoo ga̱jma̱a̱ maʼthúún’ bi̱ kuya̱ edxu̱u̱ náa congregación (Sal. 32:5; Sant. 5:14). Ndiéjunʼ ñajunʼ kajkuáa ñawúúnʼ bi̱ kuya̱ edxu̱u̱ rá. I̱ndó Jeobá ma̱ndoo maʼni mba̱a̱ a̱jkiu̱u̱n kaʼyoo mbájkhu aʼkhá, naʼni rígi̱ ga̱jma̱a̱ numuu tsigijñaʼ ndrígóo Jesús.b Mú, Dios nirajkuáa ñawúúnʼ bi̱ kuya̱ edxu̱u̱ dí muraʼwíí ga̱jma̱a̱ Ajngáa rawuunʼ á mu bi̱ nakudaminaʼ aʼkhá ma̱ndoo maxtáa xóó náa congregación o nánguá (1 Cor. 5:12). Dí ikhiin nuni̱ nindxu̱u̱ rí muriʼña̱a̱ graxe̱ rígi̱: Lá nindoo makudaminaʼ aʼkhá xáʼ. Nigíʼ markaʼwumuʼúun xáʼ. Nixtáa nikudaminaʼ aʼkhá mbaʼa nuthu xáʼ. Lá nisngajmá rí gajkhun nitanga̱a̱ a̱jkiu̱u̱n xáʼ. Lá rígá náa nisngájma dí Jeobá niʼni mba̱a̱ a̱jkiu̱u̱n kaʼyoo xáʼ. (Hech. 3:19.)

 5. Xóo kaʼnii embañun bi̱ kúwá náa congregación dí nuraʼwíí muni̱ bi̱ kuya̱ edxu̱u̱ rá.

⁵ Índo̱ a̱ngiu̱lú bi̱ kuya̱ edxu̱u̱ nagimbúun gajmiún xa̱bu̱ bi̱ nakudaminaʼ aʼkhá ikhiin ndayóoʼ muraʼwíí xó má Dios niraʼwíí maʼni mekhuíí (Mat. 18:18). Xóo embañún bi̱ kúwá náa congregación rígi̱ rá. Á mu xa̱bu̱ bi̱ nakudaminaʼ aʼkhá tsétanga̱a̱ a̱jkiu̱u̱n, nánguá eniñaaʼ maxtáa náa guʼwá nagimbáanʼ, xúʼko̱ naxtie̱wu̱u̱n bi̱ kúwi̱i̱n ikhí (1 Cor. 5:6, 7, 11-13; Tito 3:10, 11). Ma̱ngaa rígi̱ nambáyúu xa̱bu̱ bi̱ nakudaminaʼ aʼkhá mu mata̱nga̱a̱ a̱jkiu̱u̱n ga̱jma̱a̱ mu xúʼko̱ Jeobá maʼni mba̱a̱ a̱jkiu̱u̱n kaʼyoo (Luc. 5:32). A̱ngiu̱lú bi̱ kuya̱ edxu̱u̱ nutajkháan ga̱jma̱a̱ numuu xa̱bu̱ bi̱ natanga̱a̱ a̱jkiu̱u̱n ga̱jma̱a̱ nunda̱ʼa̱a̱ dí mambáyúu mata̱nga̱a̱ mu mambajxúu ga̱jma̱a̱ mbu̱júu̱ʼ (Sant. 5:15).

 6. Arathá á mu ma̱ndoo maʼni mba̱a̱ a̱jkiu̱u̱n Jeobá kaʼyoo xa̱bu̱ bi̱ ni̱jkha̱ expulsado

⁶ Gundxaʼwámíjná dí mbáa bi̱ nikudaminaʼ aʼkhá tsétanga̱a̱ a̱jkiu̱u̱n índo̱ nutamijná gajmiún bi̱ kuya̱ edxu̱u̱. Á mu dí xúʼko̱ xa̱bu̱ bugi̱ na̱jkha̱ expulsado náa congregación. Ma̱ngaa, á mu mba̱a̱ nanújgorámúʼ xtángoo ndrígu̱ún xa̱bu̱ ñajunʼ bi̱ kuya̱ edxu̱u̱ xúrkaʼwumaʼáánʼ dí ra̱májánʼ dí ikhaa niʼni. Jeobá nirajkuáa ñawúúnʼ xa̱bu̱ ñajunʼ mu munda̱ʼa̱ cuenta ga̱jma̱a̱ muxnáá castigo asndu tsáa xa̱bíi bi̱ nanújgorámún xtángoo tséʼniún má á mu natanga̱a̱ a̱jkiu̱u̱n o na̱nguá (Rom. 13:4). Mú, á mu nda̱wa̱á xa̱bu̱ ndaʼyoo dí gajkhun nikiéʼkúun ga̱jma̱a̱ natanga̱a̱ a̱jkiu̱u̱n nariʼkhu̱u̱ xóo edxa̱ʼwáminaʼ ga̱jma̱a̱ rí naʼni, Jeobá xtáa xawii maʼni mba̱a̱ a̱jkiu̱u̱n kaʼyoo (Luc. 15:17-24). Xúʼko̱ ma erígá índo̱ mbáa nakudaminaʼ aʼkhá rí mbiiʼ wéñuʼ (2 Crón. 33:9, 12, 13; 1 Tim. 1:15).

 7. Ndiéjunʼ eyoo gáʼthúu̱n dí muʼni mba̱a̱ a̱jkiu̱lú kuʼyáá mbáa á mu niʼni gawúnlú rá.

⁷ Nadxulú índo̱ nduʼyáá dí rakáʼyulú ikháanʼ muraʼwíí á mu Jeobá maʼni mba̱a̱ a̱jkiu̱u̱n kaʼyoo xa̱bu̱ bi̱ nikudaminaʼ aʼkhá. Maski ajndu xúʼko̱ rígá dí ndayóoʼ muraʼwíílu muʼni. Ndiéjunʼ nindxu̱u̱ rá. Á mu mbáa bi̱ niʼñulú mbá dí raʼkhí kayúʼ, na̱nda̱ʼa̱ dí muʼni mba̱a̱ a̱jkiu̱lú kuʼyáá. O mbáa asndu xáʼthúlú dí muʼni mba̱a̱ a̱jkiu̱lú kuʼyáá. Asndu xkáʼnii má ma̱ndoo muraʼwíí dí muʼni mba̱a̱ a̱jkiu̱lú kuʼyáá, xóo muʼthá, xuyexíi̱lu sia̱nʼ ga̱jma̱a̱ xákiʼnáanʼlú kuʼyáá xa̱bu̱ buʼko̱. Gajkhun má dí rígi̱ mbajyúuʼ ga̱jma̱a̱ maʼni gakhii, itháan á mu xa̱bu̱ buʼko̱ niʼni gawúnlú wéñuʼ. Náa i̱yi̱i̱ʼ Bi̱ Nayejngoo dí nigájnuu 15 ñajunʼ gu̱nʼ septiembre tsiguʼ 1994 naʼthí: “Dí matani̱ mba̱a̱ a̱jkia̱a̱nʼ xtayáá mbáa bi̱ nikudaminaʼ aʼkhá na̱nguá eyoo gáʼthúu̱n dí niʼni nindxu̱u̱ májánʼ. Ikháanʼ bi̱ ni̱ndxu̱lú cristiano, dí muʼni mba̱a̱ a̱jkiu̱lú kuʼyáá mbáa nandoo gáʼthúu̱n dí muniʼñááʼ náa ñawúunʼ Jeobá dí ikhaa maʼnimbánuu. Numuu dí ikhaa nindxu̱u̱ mbá Juez jmbii bi̱ xtáa náa xúgíʼ tsu̱du̱u̱ ku̱ba̱ʼ, ikhaa maʼnimbánuu xkujndu mbiʼi rí kaʼyoo”. Náa numuu dí Jeobá nandoo muʼni mba̱a̱ a̱jkiu̱lú kuʼyamijná ga̱jma̱a̱ muniʼñááʼ náa ñawúunʼ ikhaa xkujndu, xóo muʼthá, dí makumulú kuʼyáá dí ikhaa ma gaʼnimbánuu xá.

 8. Xú kaʼnii esngajmá dí nuxnáa núma̱aʼ ga̱jma̱a̱ numuu rí nagáwíinʼ a̱jkiu̱u̱n Jeobá rá.

⁸ Índo̱ nuʼni mba̱a̱ a̱jkiu̱lú, nusngajmá dí nuxnáa núma̱aʼ Dios ga̱jma̱a̱ numuu dí nagáwíinʼ a̱jkiu̱u̱n. Náa mbá xkri̱da dí Jesús niʼthí, niʼni mbríguii Jeobá xóo mbáa patruun bi̱ niʼni mba̱a̱ a̱jkiu̱u̱n kaʼyoo mbáa ñumbáá bi̱ tséʼngo̱o̱ gáʼni̱i̱ dí gíʼmaa. Mú, ñumbáá buʼko̱ tagáwíinʼ a̱jkiu̱u̱n kaʼyoo i̱mba̱ bi̱ na̱nguá ma gíʼmaa mba̱a̱ wéñuuʼ náa inuu (Mat. 18:23-35). Ndiéjunʼ nindoo maʼsngúlú Jesús rá. Á mu nuxnáa núma̱aʼ ga̱jma̱a̱ numuu dí nagáwíinʼ a̱jkiu̱u̱n kaʼyulú Jeobá. Rúʼko̱ gaxkaxáanʼ mu muʼni mba̱a̱ a̱jkiu̱lú kuʼñúún eʼwíinʼ (Sal. 103:9). Niʼni mbayuuʼ tsiguʼ náa i̱yi̱i̱ʼ Bi̱ Nayejngoo niʼthí tséʼñuu ma nguáthá nuthu guʼni mba̱a̱ a̱jkiu̱lú kuʼñúún eʼwíinʼ, mu tsémbríguii ga̱jma̱a̱ xóo “eʼni mba̱a̱ a̱jkiu̱u̱n Jeobá ma̱ngaa dí nagáwiinʼ a̱jkiu̱u̱n xúgíʼ rígi̱ eʼni ga̱jma̱a̱ numuu tsigijñaʼ ndrígóo Cristo”.

 9. Tsíin ñajúúnʼ egáwin’ a̱jkiu̱u̱n kaʼñúún Jeobá rá. (Mateo 6:14, 15.)

⁹ Á mu nuʼni mba̱a̱ a̱jkiu̱lú, Jeobá maʼni mba̱a̱ a̱jkiu̱u̱n kaʼyulú. Ikhaa nagáwiinʼ a̱jkiu̱u̱n kaʼñúún xa̱bu̱ bi̱ nagáwiinʼ a̱jkiu̱u̱n kuñúún eʼwíinʼ (Mat. 5:7; Sant. 2:13). Jesús nisngájma kaʼwu rígi̱ índo̱ niʼsngúún mutájkháan xa̱bi̱i̱ (atraxnuu Mateo 6:14, 15). Ga̱jma̱a̱ Jeobá nisngájma rígi̱ mbiʼi dí nixtáa Job. Ikhaa ndiyóoʼ maʼngo̱o̱ índo̱ nini gawíínʼ mbá ajtsíin xa̱bu̱ ga̱jma̱a̱ ajngáa dí nithi: Elifaz, Bildad ga̱jma̱a̱ Zofar. Jeobá nindo̱ʼo̱o̱ Job dí maʼtájkháan ga̱jma̱a̱ numún. Índo̱ Job niʼni rígi̱ Jeobá niʼni tsájkurámáaʼ (Job 42:8-10).

10. Náa numuu dí muyéjxíi sia̱nʼ naʼni gacháánʼ rá. (Efesios 4:31, 32.)

¹⁰ Dí matiéjxíi sia̱nʼ naʼni gachíín. Sia̱nʼ nindxu̱u̱ xóo mbá eʼda rí kíwu̱u̱n ga̱jma̱a̱ Jeobá nandoo rí murígúu eʼda rúʼko̱ (atraxnuu Efesios 4:31, 32). Ikhaa naxnulu consejo rígi̱: “Atatsíñáánʼ rajmanguaaʼ ga̱jma̱a̱ rí nakásngañaaʼ” (Sal. 37:8). Dí munimbulú consejo rígi̱ nambáyulú ma ikháanʼ numuu dí sia̱nʼ nindxu̱u̱ ra̱májánʼ ga̱jma̱a̱ maʼni dí maʼniulú nandii ga̱jma̱a̱ xundxaʼwáá májánʼ edxu̱lú (Prov. 14:30). Dí muyejxíi sia̱nʼ náa i̱mba̱a̱ nindxu̱u̱ xóo muʼwáanlu veneno. I̱ndó nuʼni gachímíjnálú ikháanʼ. Ikha jngó índo̱ nuʼni mba̱a̱ a̱jkiu̱lú kuʼñúún eʼwíinʼ, nambáyulú ma ikháanʼ (Prov. 11:17). Naʼni makuwáanʼ tsímáá ga̱jma̱a̱ nandoo muʼni ma xúʼko̱ ñajuunʼ Jeobá.

11. Dí eʼthí náa Biblia ga̱jma̱a̱ numuu dí matangáan muʼniu̱u̱n xóo ma niniulú xá. (Romanos 12:19-21.)

¹¹ Guniʼñááʼ dí Jeobá maʼnimbánuu xkujndu. Jeobá taniñulú dí mutángáanʼ muʼniu̱u̱n eʼwíinʼ xóo ma niniulú ikháanʼ (atraxnuu Romanos 12:19-21). Numuu dí ni̱ndxu̱lú xa̱bu̱ aʼkhá tséʼngo̱o̱ guʼyáálu xúgíʼ ikha jngó xáʼngo̱o̱ guʼnimbánii xkujndu xóo ma Jeobá (Heb. 4:13). Ma̱ngaa, nguáná ga̱jma̱a̱ numuu xóo ku̱mu̱lu maʼni dí xúʼyáá májánʼ dí muʼni. Santiago niʼnirámáʼ: “Numuu rí xa̱bu̱ bi̱ nakásngañu̱u̱ʼ tséʼni marigá dí jmbu xóo rí nandoo Dios” (Sant. 1:20). Ma̱ndoo mbuʼyáá gajkhun dí Jeobá maʼni rí májánʼ ga̱jma̱a̱ maʼnimbánuu xkujndu xóo ma kaʼyoo.

12. Xóo kaʼnii esngajmá dí nakumulú kuʼyáá Jeobá rá.

¹² Índo̱ nuʼni mba̱a̱ a̱jkiu̱lú, nusngajmá dí nakumulú kuʼyáá Jeobá dí ikhaa gaʼnimbánuu xóo má kaʼyoo. Á mu nuniʼñáánʼ náa ñawúunʼ ikhaa mbá xkujndu, nusngajmá dí nakumulú dí ikhaa maʼni májánʼ xúgíʼ dí niʼni gachúu aʼkhá. Náa numbaaʼ nuxi̱ʼ dí ikhaa nakudaminaʼ maxnúlú ikhaa naʼthí dí xúgíʼ rí niʼni gawúnlú nditháan ‹xárma̱ʼa̱a̱nʼ a̱jkiu̱lú gaʼni› (Is. 65:17). Mú, lá gajkhun ma̱ndoo muʼni gámbáa dí nakásngáñulú ga̱jma̱a̱ sia̱nʼ dí kuaʼdáá índo̱ mbáa naʼni gawúnlú wéñuʼ ráʼ. Guʼyáá xóo nini̱ tikhunʼ.

13, 14. Ndiéjunʼ eʼsngáaʼ numuu Tony ga̱jma̱a̱ José rá.

¹³ Mbaʼin a̱ngiu̱lú niraʼwíí dí muni̱ mba̱a̱ a̱jkiu̱ún kuñúún xa̱bu̱ bi̱ nini gawúúnʼ wéñuʼ. Xú kaʼnii nimbáñún dí niraʼwíí muni̱ rígi̱ xá.

¹⁴ Guʼyáá ga̱jma̱a̱ numuu Tony,c bi̱ xtáa náa Filipinas. Mbayuuʼ tsiguʼ nákha xóo ikhaa na̱nguá nindxu̱u̱ testigo de Jeobá, nikháñúu mbáa ndxájuu bi̱ giʼnii, nidxawuun dí José mbiʼyuu xa̱bu̱ bi̱ nixiyáa. Numuu dí Tony nindxu̱u̱ mbáa xa̱bu̱ bi̱ najmanguuʼ ikha jngó nindoo maxíyáa José. Mú José nixuda̱a̱ʼ náa guʼwá e̱jua̱nʼ ga̱jma̱a̱ dí niʼni. Índo̱ José nigájnáa náa guʼwá e̱jua̱nʼ, Tony niʼthí dí maxkamaa ga̱jma̱a̱ maxíyáa ikha jngó nitsi mbá ajua̱nʼ. Mú nákha ikhú nigíʼdu̱u̱ niʼnigajmaa Biblia gajmíi̱n testigos de Jeobá. Ikhaa naʼthí: “Índo̱ xtáa ranigajmaa nijmañuʼ dí ndayóoʼ mariʼkuminaʼ ga̱jma̱a̱ maniʼñúuʼ rí nakasngáñuʼ”. Tony nijngúun iyááʼ nda̱wa̱á nijkhánú ninindxu̱u̱ mbáa niyéjkha̱ edxu̱u̱ náa congregación. ¡Ra̱ʼkhá tháán niguanúu tsiánguá índo̱ niʼdxawuun dí José ma̱ngaa ni̱jkha̱nú ninindxu̱u̱ testigo de Jeobá! Índo̱ ndiyamijná nidaraʼamijná, ikhú Tony niʼthúu̱n José dí niʼni mba̱a̱ má a̱jkiu̱u̱n kaʼyoo. Tony naʼthí dí nda̱a̱ ajngáa maʼthí xóo kaʼnii gagi nikumu̱u̱ índo̱ niʼni mba̱a̱ a̱jkiu̱u̱n kaʼyoo José. Ndxájulú bugi̱ niʼni mba̱a̱ a̱jkiu̱u̱n ga̱jma̱a̱ Jeobá niʼni tsajkurámaaʼ ga̱jma̱a̱ numuu rúʼko̱.

15, 16. Ndiéjunʼ eʼsngáaʼ dí nigíʼnuu Peter ga̱jma̱a̱ Sue rá.

¹⁵ Nákha 1985, mbáa xa̱bu̱ nijkha ka̱yo̱o̱ bomba náa Salón índo̱ Peter ga̱jma̱a̱ Sue kúwi̱i̱n náa reunión nda̱a̱ tsu̱ma̱ nijmídá bomba ga̱jma̱a̱ numuu dí nirígá Sue nánguá eya xi̱ʼ, nánguá krui̱go̱o̱ ga̱jma̱a̱ nánguá edxa̱wu̱n.d Nángi eʼni xa̱bu̱ gajmii bugi̱ nurajximíjna̱: “Tsáá niʼni dí xkawiʼ kayuuʼ rígi̱ rá.” Mbayuuʼ tsiguʼ nda̱wa̱á, xa̱bu̱ bi̱ nijkha ka̱yo̱o̱ bomba nirugua̱a̱ ga̱jma̱a̱ nixuda̱a̱ʼ náa guʼwá e̱jua̱nʼ nirajxi̱i̱ Peter ga̱jma̱a̱ Sue á mu nini̱ mba̱a̱ a̱jkiu̱ún kuyáá, ikhiin niriʼña̱a̱: “Jeobá naʼsngúlú dí muyejxi sia̱nʼ ga̱jma̱a̱ makiʼnáánʼ naʼni gacháánʼ wéñuʼ ga̱jma̱a̱ naʼni dí xúndxaʼwamíjna̱ májánʼ. Ikha jngó asndu nákha mbiʼi dí nirígá rígi̱, ninda̱ʼa̱a̱ Jeobá dí mambáyuxuʼ mu xúʼko̱ muniʼñán rakasngáñunxu ga̱jma̱a̱ dí xúyexíi sia̱nʼ mú xúʼko̱ ma̱ndoo makuwáanʼxu tsímáá”.

¹⁶ Lá táʼniún gakhii muni mba̱a̱ a̱jkiu̱u̱n xa̱bu̱ gajmii bugi̱ ráʼ. Niʼniún gakhii. Guʼyáá dí ikhiin nuthi. “Nguáná índo̱ Sue naxiéʼkhá dí na̱ʼkhu̱ náa nigawúunʼ naʼni dí matangáanʼ makináaʼxu mbujuáaʼ. Mú, nuni̱ mbá tsiakii mu xundxa̱ʼwa̱míjna̱xu ga̱jma̱a̱ numuu dí nirígá, ikhú mbá nacha̱ nambumuxu rúʼko̱. Mú rí xúgi̱ ma̱ndoo muthaxu, á mu xa̱bu̱ buʼko̱ na̱jkha̱nú mbá mbiʼi nanindxu̱u̱ ndxájulú mundriguíixu májánʼ náa xuajñuu Jeobá. Dí nirígá rígi̱ naʼsngúlú dí ikha ndrígóo Biblia ra̱ʼkhá tháán embáyulú. Ma̱ngaa naʼni a̱jkiu̱lú índo̱ nduʼyáá dí na̱nguá ma mbayuuʼ Jeobá maʼni májáanʼ xúgíʼ dí niguma gachíí”.

17. Ndiéjunʼ ejmañaaʼ dí nigíʼnuu Myra rá.

¹⁷ Myra nininiiʼ Jeobá índo̱ ndiyáa ma xa̱bu̱ ga̱jma̱a̱ gíʼdiin a̱jmi̱i̱n e̱ji̱i̱n tsíjkiinʼ, mu ajmbio̱o̱ tagruigú dí gajkhun. Nda̱wa̱á ajmbio̱o̱ niʼni nduwaaʼ ga̱jma̱a̱ niniñúúnʼ bi̱ kúwíin náa goʼwóo. Myra naʼthí: “Índo̱ a̱jmbio̱ʼ niniñuxu táyóo dí mani. Niku̱mu̱ʼ xóo ekumu̱ún xúgínʼ bi̱ nugíʼníí rígi̱: Nagawúnʼ nánguá ku̱mu̱ʼ kayóo nimbáa naku̱mu̱ʼ dí gúʼdóʼ aʼkhúnʼ ga̱jma̱a̱ nakiʼnún”. Maski ajndu niniñuuʼ ajmbio̱o̱, mú nagawúnʼ ma xúʼko̱ ga̱jma̱a̱ numuu dí nirígá. Myra naʼthí xóó: “Nigáwúnʼ má xúʼko̱ mbayuuʼ gu̱nʼ ga̱jma̱a̱ nijkhánú ndi̱yo̱o̱ dí rúʼko̱ xtáa raʼni gachúu rí nambájxúʼ gajmuʼ Jeobá ma̱ngaa dí nambájxu gajmíʼ eʼwíinʼ”. Dí xúgi̱, Myra ma̱ndoo maʼthí dí nánguá kiʼnáa ga̱jma̱a̱ dí na̱nguá má eʼthí tsríguíí ajmbio̱o̱. Rí naʼni, nagi̱ʼthu̱u̱n rí mbóoʼ mbiʼi magruigú rí gajkhun. Myra nandxa̱ʼwáminaʼ má xúʼko̱ dí marigá nda̱wa̱á, raʼkháa dí nigíʼnuu. Maski ajndu mbawíi ndiyóoʼ dí maʼni mbáji̱i̱n a̱jmi̱i̱n e̱ji̱i̱n náa gajkhun, rí xúgi̱ xtáa gagi raʼni ñajunʼ Jeobá gajmíi̱n e̱ji̱i̱n.

18. Numuu dí Jeobá nindxu̱u̱ mbáa Juez bi̱ itháán mba̱a̱, ndiéjunʼ rí nduʼyáá gajkhun rá.

¹⁸ Numuu dí Jeobá nindxu̱u̱ mbáa Juez bi̱ itháán mba̱a̱, ikháanʼ xáʼyóoʼ maxmiéjunlú dí muraʼwíi xóo kaʼnii gáxtandi̱ʼi̱i̱nʼ cuenta eʼwíinʼ. Ikhaa kaʼyoo maʼni rúʼko̱. ¡Naʼni̱i̱ a̱jkiu̱lú índo̱ nduʼyáá rígi̱! (Rom. 14:10-12). Ma̱ndoo makuwáanʼ gajkhun dí ikhaa mandi̱ʼi̱i̱n cuenta xóo ma naʼthí xtángoo ndrígóo ndiéjunʼ dí nindxu̱u̱ májánʼ ga̱jma̱a̱ dí ra̱májánʼ (Gén. 18:25; 1 Rey. 8:32). Ikhaa nditháan xáʼni dí ra̱májánʼ.

19. Ndiéjunʼ gáʼga̱nú marigá ga̱jma̱a̱ numuu dí Jeobá naʼni mbánuu xó má kaʼyoo rá.

¹⁹ Jeobá maʼni májáanʼ xúgíʼ dí niʼni gachúu aʼkhá. ¡Ra̱ʼkhá tháán nandulú dí maʼga̱nú mbiʼi rúʼko̱! Numuu dí ikhú maʼnii xúgíʼ náa rí nigawúnlú (Sal. 72:12-14; Apoc. 21:3, 4). Xúgíʼ rúʼko̱ mambumulú. Índo̱ kuwáanʼlu ruguaʼthi̱i̱n mbiʼi rúʼko̱, guʼyamájkhuíí dí Jeobá nixnulu dí ma̱ndoo mbuʼyaridáá xóo dí muʼni mba̱a̱ a̱jkiu̱lú kuʼñúún eʼwíinʼ.