Oinsá atu fó resposta?
1. Tansá mak diʼak atu aprende husi Jesus nia ezemplu kona-ba fó resposta ba ema neʼebé husu pergunta?
1 Toʼo agora, ema barak hakfodak ho Jesus nia matenek atu fó resposta ba ema sira neʼebé husu pergunta. Kuandu ema husu pergunta oioin mai ita iha serbisu haklaken, ita mós bele halo tuir Jesus nia ezemplu.—1 Ped 2:21.
2. Hodi halo saida mak ita bele hatán pergunta ho diʼak?
2 Rona uluk: Kuandu ema ruma husu pergunta, Jesus hanoin uluk tansá mak nia husu pergunta neʼe. Ita mós dala ruma presiza husu fali pergunta ba ema neʼebé husu, atu buka-hatene saida loos mak nia hanoin iha ninia laran. Porezemplu, kuandu ema husu, “Imi fiar Jesus ka lae?”, karik nia hakarak hatene tansá ita la selebra Natál. Se ita buka-hatene saida loos mak ema hakarak hatene, sai fasil liu ba ita atu esplika ho klaru.—Lc 10:25-37.
3. Ita bele hetan ajuda saida deʼit atu fó resposta husi Bíblia?
3 Uza Maromak nia Liafuan: Baibain, diʼak liu loke Bíblia atu fó resposta. (2 Tim 3:16, 17; Ebr 4:12) Livru kiʼik Hanorin neʼebé Importante husi Bíblia no livru Bertukar Pikiran ajuda ona haklaken-naʼin barak atu fó resposta neʼebé loos. Maski ema neʼebé husu pergunta ladún fiar Bíblia, karik hodi uza matenek ita bele hatudu Eskritura ba sira. Fó laran-manas ba sira atu hanoin didiʼak kona-ba matenek husi Bíblia, neʼebé ajuda ona ema barak husi tempu uluk toʼo agora. Kuandu halo nuneʼe, ita halo tuir Jesus nia ezemplu hodi ‘koʼalia ho laran-diʼak hodi tau masin uitoan’, neʼe katak koʼalia moos no loos, no ho respeitu.—Kol 4:6.
4. Iha situasaun saida deʼit mak karik diʼak atu la fó resposta?
4 Ita tenke hatán pergunta hotu ka lae? Se la hatene fó resposta, keta moe atu hatete: “Haʼu ladún hatene, maibé haʼu sei buka-hatene kona-ba ida-neʼe no mai fali atu fó resposta ba Ita.” Se ita hatudu haraik-an no hatudu mós katak ita hanoin ema neʼebé ita koʼalia daudaun bá, ida-neʼe bele book sira atu simu ita kuandu ita vizita fali. Se ita haree katak ema husu pergunta atu kontra ita no hakarak haksesuk malu, karik diʼak liu atu la hatán hodi halo tuir Jesus nia ezemplu. (Lc 20:1-8) Hanesan neʼe mós ho ema neʼebé la iha interese maibé hakarak deʼit atu troka hanoin ho ita, diʼak atu la koʼalia kleur, maibé uza ita-nia tempu atu buka fali ema seluk neʼebé hakarak duni hatene lia-loos.—Mt 7:6.
5. Jesus fó ezemplu diʼak saida kuandu nia fó resposta?
5 Jesus hatene katak nia presiza duni atu sadere ba Maromak Jeová atu halaʼo ninia knaar hodi “fó sasin kona-ba lia-loos”, inklui mós atu hatán ba pergunta sira husi ema neʼebé laran-moos. (Joao 18:37) Ita mós bele fó resposta iha dalan neʼebé tuir Jesus nia ezemplu hodi ajuda ema neʼebé prontu ona “atu simu moris rohan-laek”!—Apos 13:48.