Sesta, 9 Outubru
Haʼu sei aumenta haʼu-nia sinál no haʼu-nia milagre sira iha rai-Ejitu.—Éx 7:3.
Moisés serbí nuʼudar profeta, juís, ulun-naʼin, no istória-naʼin. Nia dirije nasaun Izraél sai husi Ejitu no haree Jeová nia milagre barak. Jeová uza nia atu hakerek livru lima primeiru iha Bíblia, Salmo 90, no mós karik Salmo 91. Karik nia mós hakerek livru Job. Lakleur antes Moisés mate ho idade 120, nia halibur povu Izraél atu fó-hanoin sira kona-ba buat neʼebé Jeová halo ona ba sira. Sira haree ona Jeová nia milagre oioin no oinsá nia fó kastigu ba ema Ejitu. (Éx 7:4) Sira laʼo liu Tasi Mean no haree oinsá Faraó no ninia tropa sira mate. (Éx 14:29-31) Iha rai fuik, sira haree oinsá Jeová proteje no tau matan sira. (Deut 8:3, 4) Ema Izraél besik ona atu tama ba rai neʼebé Maromak promete, tan neʼe Moisés hakarak uza ninia oportunidade ikus atu hametin sira. w24.11 p. 8-9 par. 3-4
Sábadu, 10 Outubru
Se ema ruma han ai-han neʼe nia sei moris ba nafatin . . . Ai-han neʼebé haʼu sei fó mak haʼu-nia isin atu fó moris ba mundu.—João 6:51.
Jesus nia liafuan ba apóstolu sira iha Naʼi nia Han-Kalan la hanesan duni ho ninia liafuan iha Galileia neʼebé nia koʼalia ba ema-lubun. Bainhira Jesus iha Galileia iha tinan 32 EC, ema Judeu barak hakarak atu hetan ai-han husi nia. Maibé Jesus dada sira-nia atensaun ba buat neʼebé importante liu fali ai-han. Nia fó sai buat neʼebé sei ajuda sira atu hetan moris ba nafatin. No Jesus hatete katak sira neʼebé mate ona bele hetan moris-hiʼas iha loron ikus no bele moris ba nafatin. Jesus la koʼalia kona-ba ema uitoan deʼit, hanesan iha Naʼi nia Han-Kalan. Iha Galileia, Jesus dada ema nia atensaun ba bensaun neʼebé ema hotu bele hetan. w24.12 p. 11 par. 10-11
Domingu, 11 Outubru
Laʼen sira, kontinua hadomi imi-nia feen.—Kol 3:19.
Jeová odi ema neʼebé gosta halo violénsia. (Sal 11:5) Jeová fó sai ho klaru katak nia la simu laʼen sira neʼebé halo violénsia ba sira-nia feen. (Mal 2:16) Se laʼen ida la trata feen ho didiʼak, neʼe sei kona ninia relasaun ho Maromak. Karik Jeová mós la rona ba ninia orasaun. (1 Ped 3:7) Laʼen balu trata aat feen ho hirus no liafuan kroʼat. Maibé Jeová odi hahalok “hirus, laran-nakali, hakilar malu, koʼalia aat”. (Éf 4:31, 32) Laʼen neʼebé koʼalia makaʼas ba feen, laʼós deʼit estraga relasaun kaben nian, maibé mós ninia relasaun ho Maromak. (Tgo 1:26) Nuneʼe mós ho laʼen neʼebé haree pornografia. Nia mós bele estraga ninia relasaun ho Jeová no la hatudu respeitu ba feen. Jeová hakarak laʼen atu laran-metin ba feen laʼós deʼit liuhusi hahalok maibé mós liuhusi hanoin. Jesus hatete katak mane neʼebé haree ba feto seluk hodi kaan feto neʼe, nia halo ona adultériu “iha ninia laran”.—Mt 5:28, 29. w25.01 p. 9 par. 6-8