Mitaoa Soa Naho fa Mitsanogne

1-2. a) Akore ty agnomea i Jehovah hanegne ara-pagnahy o vahoa’eo ty amy izao? (Salamo 23:1, 2, 5) b) Ino ty hodinehentika amy ty lahatsoratse toy?

MAGNOMEY hanegne ara-pagnahy maro ho antika ty Jehovah tie amy izao. Azo antoke fa mitovy hevetse amy i Davida tika. Nihira hoe izao reke: “I Jehovah ro Mpiarake ahy. Tsy ho ore ndra inogn’ino raho.”​—Vakio ty Salamo 23:1, 2, 5.

² Agnisa ty fomba agnomea i Jehovah hanegne ara-pagnahy antika o fivoriagneo. Mateteke tika ro maharey fagnazavagne fa fireintika naho fa mivory. Ndra tie “fa mioregne soa amy ty hamaregnagne” aza tika, le mbe mila i faniahiagne rey. (2 Pet. 1:12) Faie sarotse ama’o vao ty mifantoke naho fagnazavagne fa firei’o mateteke ty rehafegne amy i fandaharagney? Hagnampe azo ty lahatsoratse toy. Hotreantika ato tie nagnino tika ro mila mitsanogne soa naho fa mivory, le ino ty azo ty ndaty mampianatse agnivo ty fiangonagne eo atao mba hagnampeagne ty hafa hitsanogne soa. Handineke soso-kevetse hagnampe antika hitsanogne soa ka tikagne ato. Faie andao hodinehentika hey tie ia maregne ty tena misaontsy amantika naho fa mivory.

TADIDIO TIE I JEHOVAH TY TENA MISAONTSY AMANTIKA

3. Akore ty isaontsia i Jehovah amantika, le akore ty hahavy o mpanompo’eo hahay hampiasa soa ty Saontsi’e?

³ Misaontsy amantika amy ty alala ty Baiboly ty Jehovah. (2 Tim. 3:16, 17) Nahatakatse soa izay ty Jesosy le nampiasa soa ty Saontsin’Agnahare. Izay ty nahavy ty ndaty nitsanogne aze nirehake hoe izao: “Boake aia ty nahaia o lahio Soratse Masigne, ie amy zao reke tsy nianatse tamo o lakilasintikagneo?” (Jaona 7:15) Nifale ze ndaty nanagne toe-po soa naho fa naharey ty fomba nagnazavà i Jesosy ty Saontsin’Agnahare. Nampiasa soa ty Soratse Masigne ka o Kristiana tamy ty taonjato voaloha’eo naho fa nampianatse, agnisa izay ty apostoly Paoly naho i Apolosy. (Asa. 17:2, 3; 18:24, 28) Fantantika Vavolombelo i Jehovah ka fa mifototse amy ty Baiboly ze raha iaby ampianaregne amy ty lahatsoratse, tele JW, lahajaka naho amo o video aboantikagneo. Mahalatse ze ndaty vaho samba’e mivory ty mahatrea ty fomba ampiasà o vahoa i Jehovah-o o Baibolio naho fa am-pivoriagne agne. Atao ze managne anjara am-pivoriagne agne mifototse amy ty Saontsin’Agnahare ty fampianara’e. Tsy tihoe mamaky ty Saontsin’Agnahare avao iareo, fa atoro iareo i mpagnatrekey ka tie akore ty hampiharagne i raha vakiegney.​—Lioka 24:32.

4. Ino ty teagne horehafegne amy tihoe “maharey” naho “mitsanogne”?

⁴ Amy Baiboly ao, le mateteke ty rehake tihoe “maharey” naho “mitsanogne” ro ampiasaegne mba hirehafagne fankatoavagne ndaty. Naho fa misaontsy amantika amy ty alala ty Saontsi’e am-pivoriagne agne ty Jehovah sady manjare mahafantatse ty zoton’arofo’e tika, le ho mora amantika ty hankatò aze. Afake matoky tika tie hampifale i Jehovah naho mitsanogne aze sady manao raha mifagnarake amy izay.​—Ohab. 27:11.

NAGNINO TIKA RO TOKO’E HITSANOGNE SOA NAHO FA MIVORY?

5. Toko’e handrisike antika hanao ino ty hateantika i Jehovah? (Jaona 4:23, 24; 1 Jaona 5:3)

⁵ Mitsanogne soa tika naho fa am-pivoriagne agne satria teantika ty Jehovah. (Mat. 22:37) Arakarake ty ahafantarantika ty miomba aze ty vao mainke hiteavantika aze. O hatea iohoe ty mahavy antika te hitsanogne aze, hankatò aze naho hanompo aze arake ty iteava’e aze. Vakio ty Jaona 4:23, 24; 1 Jaona 5:3.

6. Inogne ty ampianaregne antika am-pivoriagne agne miomba ty fagnampeagne ty hafa?

⁶ Mitsanogne soa tika naho fa am-pivoriagne agne satria teantika o ndatio. (Mat. 22:39) Ampianare i Jehovah antika am-pivoriagne agne ty fomba hagnampeantika o mpiara-manompò naho o ndaty mbe tsy mahafantatse azeo. Hagnampe antika hanagne ty toetse ilaegne amy i fanompoagney ey ohatse ty bokekele tihoe Atorò fa Tea’o o Ndatio le Ampianaro Iareo. Sarotse ama’o vao ty manombo-drehake amo o ndatio? Naho izay, le mifantoha soa naho fa misy rahalahy naho rahavave manao fampisehoagne ty fanoagne izay amy ty fivoriagne andavanandro.

7. Nagnino ro tena lahibey tihoe mitsanogne i Jehovah lognandro?

⁷ Mitsanogne soa tika naho fa am-pivoriagne agne satria mamintika ty fiaintika. Naho fa mankatò ty Saontsin’Agnahare manahake o mpanompo’e talohao tika, le hahazo i havelogney. (Deot. 32:44-47) Ty fitsanognagne soa am-pivoriagne agne, le mahavy antika hahazo hery hiatrehagne ty raha sarotse amy izao, amy izay tika mahaligne ty hiavia i tontolo vaovaoy. (Rom. 8:25) Tena ilaegne ty mitsanogne i Jehovah tie amy izao, satria miaigne amy ty andro fara’e tika sady tsy maintsy miambegne avao.​—Mat. 24:42-44; Apok. 1:3.

AMPEO TY HAFA MBA HITSANOGNE SOA NAHO FA AM-PIVORIAGNE AGNE

8. Nagnino ty rahalahy mampianatse amy polipitray ey ro toko’e hagnasoa ty fahaia’e mizaka avao?

⁸ Ze rahalahy mampianatse amy i polipitray ey, lohotsie naho manao lahajaka hoahy ty ndaty maro, le toko’e hagnasoa lognandro ty fahaia’e mampianatse. Hagnampe o ndatio hagnantogne ty hamaregnagne sady hagnampe o mpiara-manompò tsy hiala amy i Jehovah ty lahajaka voaomagne soa. Toko’e hanao soa ty anjara’e ze managne anjara. Naho managne anjara rehe, le dineho tie akore ty azo’o ampiharagne ty hevetse ambane eo retoa. Maregne fa natao hoahy ze manao lahajaka hoahy ty ndaty maro o hevetse rehoe, faie azontika ampiharegne amy ze anjara iaby anendreagne antikagne avao ka.​—2 Tim. 4:2; Tit. 1:9.

9. Nagnino ro tena lahibey tihoe atao mora orihegne i lahajakay?

⁹ Alaharo soa ty hevetse ho rehafe’o. Azo antoke fa tea’o naho mora orihegne ty lahajaka’o. Va’e tsy hifantoke i mpagnatrekey, naho mikorontagne ty hevetse horehafe’o. Ino areke ty azo’o atao mba hilahatse soa ty hevetse amy i lahajaka’oy? Intoa misy dingagne tsiampeampe: 1) Ampanomboha i lahajakay le rehafo tie inogne iaby ty hevetse lahibey hohazavae’o. 2) Hazavao tsikiraidraike i hevetsey. Mitofà kede hey isake tie avy nagnazava hevetse lahibey raike, le rehafo mazava soa ty hevetse lahibey magnarake, aloha ty hagnazava’o aze. 3) Fintigno ty hevetse lahibey naho fa manao rehake famaragnagne i lahajaka’oy rehe.

10. Nagnino ro tena ilaegne tihoe tea i lahajaka hataoy?

¹⁰ Anò ze hitiava’o i lahajaka’oy. Azo antoke fa hafana fo rehe naho fa magnazava ty hevetse tea’o. (Ohab. 2:4, 5; Asa. 4:20) Ho tea’o ty hagnazava i lahajaka’oy naho misaintsaigne ty andinin-teny naho ty hevetse agnate’e ao rehe. Mbe tsiaro ze rahalahy raike 70 taogne eo ho eo a Etazonia agne zay ty lahajaka nirei’e tamy ireke mbe nitanora. Hoe reke: “Mbe tsiaroko avao ty fomba nandrisiha i mpizakay anay mba hisaintsaigne laleke naho fa mamaky Baiboly. Nafana fo reke sady nazava soa ty fomba nagnazava’e aze. Tena nagnova ty fiaignako i lahajaka ignehoe satria nagnampe ahy handaligne soa naho fa mamaky Baiboly sady nagnasoa ty fifandrambesako tamy i Jehovah.”

11. Nagnino ro tena soa tihoe magnomey fampiharagne naho soso-kevetse voafaritse soa naho fa manao lahajaka? (1 Timoty 4:13-16)

¹¹ Eretsereto ze raha ilae i mpagnatrekey le magnomeza soso-kevetse azo ampiharegne. Ko manao fagnazavagne amy ty ankapobei’e avao fa mampiasà andinin-teny mba hagnomeagne torohevetse voafaritse soa. Nagnomey torohevetse voafaritse soa hoahy i Timoty ohatse ty apostoly Paoly, mba hagnampeagne aze hatanjake ara-pagnahy avao naho fa hanao ty fanendreagne aze a Efesosy agne reke. (Vakio ty 1 Timoty 4:13-16.) Eretsereto ty raha ilae i mpagnatrekey, le ampeo iareo mba hahatrea ty fomba hampiharagne i fagnazavagne mei’oy amy ty fiaigna’e.

12. Nagnino ro tena soa tihoe atao hoe mirehake andavanandro naho fa manao lahajaka?

¹² Aherenkeregno amy ty feo mafe i lahajaka’oy amy izay rehe hoe mirehake andavanandro naho fa manao aze. Naho hoe mirehake andavanandro rehe fa tsy mamaky, le ho mora amy i mpagnatrekey ty hitsanogne soa naho hahatakatse i fagnazava’oy. Izao ty rehafe ty bokekele Hasoao ty Fahaia’o Mamaky Teny Naho Mampianatse: “Ko amboamboaregne ty fireha’o ndra ty fihetseham-po tsapa’o fa anò vokatse ty fo.” Naho mirehake amy ty fo’o rehe, le hotrea i mpagnatrekey tie velombelogne soa i lahajaka’oy, mahaliagne sady mandrisike.

13. Nagnino ty rahalahy amy i fiangonagne eo ro toko’e hangatake soso-kevetse amy ty mpizaka fa za-draha? (Henteo ka i sarey.)

¹³ Mangataha torohevetse amy ty mpizaka fa za-draha. Akore ty azo’o anoagne izay? Azo’o atoro aze mialoha ze hevetse sinora’o hampiasae’o amy i lahajaka’oy. Ampiliro amy i lahajakay ze soso-kevetse mei’e. Angataho reke mba hitsanogne ty fomba hanoa’o aze, amy izay reke afake manoro azo ty fomba hagnasoa’o aze indraike. (Ohab. 1:5) Mateteke ro tsy tsapantikagne ty raha mila hasoaentika, le mila fagnampeagne tika mba hahavy i lahajakay ho mora azo naho ho azo ampiharegne. Te hagnasoa ty fahaiantikagne mizaka naho mampianatse iaby tikagne, amy izay afake magnampe o ndatio handrambe soa amy ty vatosoa ara-pagnahy agnate ty Saontsin’Agnahare ao.a

MIKEZAHA HITSANOGNE SOA

14. Nagnino tika ro toko’e hanahake ty fomba fiheve i mpanoratse ty Salamo 119​-oy? (Salamo 119:24, 111, 167)

¹⁴ Hanjare ho mpitsanogne soa tika naho mankasitrake laleke ty faniahia i Jehovah. Mila faniahiagne boake aman’Agnahare tikagne, mba hagnampe antikagne hiatreke ty fotoan-tsarotse “tsy mora atrehegne” toy. (2 Tim. 3:1) Misy fotoagne tika va’e hahatsapa tie hoe miherenkeregne zay ty fagnazavagne reintika. Faie toko’e hanahake i mpanoratse ty Salamo 119​-oy tika le hihevetse irey ho faniahian’Agnahare.​—Vakio ty Salamo 119:24, 111, 167.

15. Ino ty hagnampe antika hankasitrake avao ty hanegne ara-pagnahy meagne antika am-pivoriagne agne?

¹⁵ Toko’e ho heverentikagne ho fagnomezagne boake amy i Jehovah i hanegne ara-pagnahy meagne antikagne rey. Toko’e ho nikezake nanagne ze toe-tsaigne zay o Israelitao, tamy iareo nimea i Jehovah mana tam-patrambey agney. (Eks. 16:15, 31) Azo antoke fa nankasitrake i manay hey iareo tamy ty voaloha’e. Boake amy i Jehovah o mana iohoe sady hanegne soa naho nahavelogne. Faie naho fa nandeha ty fotoagne, le nisy tamy ty ila’e amy iareo nientsake i mana nihane iareo isan’androy. (Nom. 21:5) Inogne ty lesogne ho antikagne? Tsy toko’e hoheverentikagne ho tsy lahibey sasa ndra fa tsy ilaegne sasa i hanegne ara-pagnahy meagne antikagne rey satria miherenkeregne. Mila tadidientika avao tie i Jehovah ty nifotora irey. Tsy maintsy tadidientika avao ka tie, boake amy ty fandamina i Jehovah rey sady magnavotse ty fiaintikagne ty fahendreagne boake ama’e.​—Ohab. 3:13, 16-18; Jaona 17:3.

16. Ino ty nagnampe ty ndaty ila’e fa nanompo i Jehovah tan-tao’e maro hitsanogne soa lognandro naho fa am-pivoriagne agne? (Henteo ka ty efajoro tihoe “Soso-kevetse Hagnampe azo Hitsanogne Soa.”

¹⁶ Hahay hitsanogne soa tika naho mampihatse ty soso-kevetse retoa. Mareho ty raha nagnampe ty mpanompo i Jehovah fa ela retoagne hitsanogne soa avao naho fa am-pivoriagne agne. Fa 30 taogne nanompoagne i Jehovah ty Ashley. Izao ty nirehafe’e: “Ty fagnomanagne soa ty lakilé ty fifantohagne. Naho fa tsy magnomagne raho, le sarotse amako ty magnomey toin-drehake sady miriorio ty saiko.” Fa nanompo i Jehovah tagnate ty 52 taogne ka ty József. Izao ty nirehafe’e: “Teako ty mitsanogne i hevetse miherenkeregne am-pivoriagne agne rey. Naho fa maharey lahajaka naho toin-drehake sambe hafa mirehake miomba igne raho, le lava miana-draha vaovao avao. Naho fa rahalahy tsy le mahay mizaka rey ty manao lahajaka, le mifantoke amy i hafatse boake amy ty Saontsin’Agnahare rehafe’ey ao raho fa tsy mifantoke amy ty fomba fanoa’e i lahajaka’ey.”

17. Ino ty azo’o atao mba hahavy azo hitsanogne soa naho fa am-pivoriagne agne? (Henteo ka i sarey.)

¹⁷ Afake mampihatse ty raike ndra ty maromaro amy ty soso-kevetse retoa vao rehe, mba hagnampe azo hitsanogne soa? 1) Ko manao vontsigne loatse naho fa hivory amy izay tsy te hikonkogne. 2) Miavia aloha, le paliavo ty toeragne hisy azo aloha ty hanomboha i fandaharagney. 3) Ko asiagne feo’e ty varam-bazaha ampiasae’o sady ko engagne hagnelengelegne azo am-pivoriagne ao. 4) Saintsaigno mialoha ty raha hohazavaegne amy i fivoriagney. 5) Henteo soa i mpizakay. 6) Mandrambesa an-tsoratse ndra anò sare tsotsotra ze hevetse lahibey. 7) Mikezaha hifantoke amy i andinin-teny rey le dineho ty ifandrambesa irey amy i hevetsey. 8) Eretsereto zao: ‘Akore ty azoko ampiasagne itoy mba hagnampeagne ty ndaty amy fiangonagne ao ndra amy faritaney ey?’ 9) Naho hagnatreke havoriambey faritse ndra vondrom-paritse rehe, le henteo mialoha ty andinin-teny hoahy ty andro tsikiraidraike, ty foto-kevetse ho rehafegne agne ndra ty andinin-teny ioregna ty lahajaka tsikiraidraike. 10) Mitoboha le oriho soa i mozike naho i video fanokafagney, amy izay ho vognogne soa amy i fandaharagney ty fo’o.

TSANOGNO LOGNANDRO TY JEHOVAH

18. Nagnino tika ro toko’e hitsanogne soa avao naho fa mivory?

¹⁸ Toko’e hitsanogne i Jehovah lognandro tika naho fa am-pivoriagne agne. Naho manao izay tika, le magnenga i Jehovah hitarike antika amy ty “lala ty hamaregnagne.” (Sal. 23:3; 31:3) Mila torohevetse tika amy izay tsy miviombiogne manahake o sambo aviombio ty tiokeo. “Mitaoa soa areke naho fa mitsanogne”, le ampiharo ty tari-dalagne azo’o boake am-pivoriagne agne. (Lioka 8:18) Ze mitsanogne i Jehovah, le ho sambatse manomboke amy izao sady hahazo i havelogne nainai’ey amy ty hoavy.​—Sal. 119:2, 14.