బ్రదర్స్‌, మీరు సంఘ పెద్ద అవ్వాలనుకుంటే మీ మీద “ఏ నిందా ఉండకూడదు,” అంటే మీ ప్రవర్తననుబట్టి సంఘంలో మంచిపేరు ఉండాలి. అలాగే ఎవ్వరూ మీ మీద నింద వేయడానికి అవకాశం ఇవ్వకూడదు. (1 తిమో. 3:2) అంతేకాదు, మీకు “బయటివాళ్ల దగ్గర కూడా మంచిపేరు ఉండాలి.” మామూలుగా మీ క్రైస్తవ నమ్మకాల్ని బయటివాళ్లు తప్పుపట్టవచ్చు. కానీ మీ నిజాయితీ గురించి, ప్రవర్తన గురించి వేలెత్తి చూపించడానికి వాళ్లకు ఎలాంటి కారణం ఉండకూడదు. (దాని. 6:4, 5) ఇలా ప్రశ్నించుకోండి: ‘నాకు సంఘం లోపల-బయట మంచిపేరు ఉందా?’ ‘మంచితనాన్ని ప్రేమించేవాళ్లు’ ఇతరుల్లో మంచిని చూస్తారు. ఇతరుల మంచి లక్షణాల్ని బట్టి మెచ్చుకుంటారు. (తీతు 1:8) మంచి చేయడానికి సంతోషంగా ముందుకొస్తారు. అంతేకాదు అవసరమైన దానికంటే ఎక్కువగా, ఒక అడుగు ముందుకెళ్లి ఇతరులకు సహాయం చేస్తారు. పెద్దలకు ఈ లక్షణం ఉండడం ఎందుకంత ప్రాముఖ్యం? ఎందుకంటే వాళ్లు సంఘాన్ని కాయడానికి, నియామకాల్ని చూసుకోవడానికి ఎక్కువ సమయం పెట్టాలి. (1 పేతు. 5:1-3) నిజమే దానికోసం వాళ్లు ఎన్నో త్యాగాలు చేయాలి, బాగా కష్టపడాలి. కానీ దానికి మించి ఎన్నోరెట్లు ఎక్కువ సంతోషాన్ని పొందుతారు.—అపొ. 20:35. w24.11 20-21 ¶3-5

సంఘ పరిచారకులు సంఘంలో చాలా ముఖ్యమైన పనులు చేస్తారు. అపొస్తలుడైన పౌలు ఈ నమ్మకమైన సహోదరుల్ని ఎంతో విలువైనవాళ్లుగా చూశాడు. అందుకే ఫిలిప్పీలోని క్రైస్తవులకు రాస్తున్నప్పుడు, సంఘ పెద్దలతో పాటు ప్రత్యేకించి సంఘ పరిచారకుల గురించి కూడా ప్రస్తావించాడు. (ఫిలి. 1:1) బాప్తిస్మం తీసుకున్న బ్రదర్స్‌ చిన్నవాళ్లయినా-పెద్దవాళ్లయినా సంఘ పరిచారకులుగా సేవచేయడంలో ఎంతో ఆనందాన్ని పొందుతారు. డెవన్‌ అనే బ్రదర్‌ 18 ఏళ్లకే సంఘ పరిచారకుడు అయ్యాడు. లూయిస్‌ అనే ఇంకో బ్రదరేమో 50 ఏళ్లు దాటాక అయ్యాడు. సంఘ పరిచారకుడిగా సేవ చేయడం గురించి ఆయనకు ఏం అనిపిస్తుందో ఇలా అంటున్నాడు: “సంఘంలో ఉన్న బ్రదర్స్‌సిస్టర్స్‌కు ఇలా సహాయం చేయడం నాకు చాలా సంతోషాన్ని ఇస్తుంది. వాళ్లు నామీద ఎంతో ప్రేమను కురిపించారు, ఇప్పుడిది నా వంతు!” చాలామంది సంఘ పరిచారకుల నోట ఇదే మాట వినిపిస్తుంది. మీరు బాప్తిస్మం తీసుకున్న సహోదరుడై, ఇంకా సంఘ పరిచారకుడు అవ్వకపోతే, మీరు ఇప్పుడు ఆ లక్ష్యాన్ని పెట్టుకోగలరా? w24.11 14 ¶1-3

యూదా రాజైన హిజ్కియాకు 39 ఏళ్ల వయసులో ఒక పెద్ద అనారోగ్య సమస్య వచ్చింది. దానివల్ల ఆయన చనిపోతాడని యెహోవా యెషయా ప్రవక్త ద్వారా చెప్పాడు. (2 రాజు. 20:1) అసలు హిజ్కియాకు ఇంక ఏ ఆశా లేదనే చెప్పాలి. అది విన్నప్పుడు బాధతో హిజ్కియా బోరున ఏడ్చాడు, యెహోవాకు తీవ్రంగా ప్రార్థించాడు. హిజ్కియా చేసిన కన్నీటి ప్రార్థనలు యెహోవా మనసును తాకాయి. ఆయన ఇలా అన్నాడు: “నేను నీ ప్రార్థన విన్నాను. నీ కన్నీళ్లు చూశాను. ఇదిగో నేను నిన్ను బాగుచేస్తున్నాను.” యెహోవా ఎంతో కరుణ చూపిస్తూ హిజ్కియా ఆయుష్షును పొడిగిస్తానని, అష్షూరీయుల చేతుల్లో నుండి యెరూషలేమును కాపాడతానని యెషయా ప్రవక్త ద్వారా మాటిచ్చాడు. (2 రాజు. 20:4-6) నయంకాని ఏదైనా పెద్ద అనారోగ్యం మీకు కూడా వచ్చిందా? అయితే యెహోవాకు ప్రార్థించండి. అలా ప్రార్థిస్తున్నప్పుడు మీకు ఏడ్పు వచ్చినా ఫర్వాలేదు, మీ మనసులోని మాటల్ని ఆయన ఖచ్చితంగా వింటాడు. “ఎంతో కరుణగల తండ్రి, ఎలాంటి పరిస్థితిలోనైనా ఓదార్పును ఇచ్చే దేవుడు . . . కష్టాలన్నిటిలో మనల్ని ఓదారుస్తాడు” అని బైబిలు మనకు భరోసానిస్తుంది.—2 కొరిం. 1:3, 4. w24.12 24 ¶15-17