గొర్రెలను శ్రద్ధగా చూసుకునే గొర్రెల కాపరిని ఉదాహరిస్తూ, యేసు ఇలా చెప్పాడు: “ఒక మనుష్యునికి నూరు గొఱ్ఱెలుండగా వాటిలో ఒకటి తప్పిపోయిన యెడల తొంబది​తొమ్మిదింటిని కొండలమీద విడిచివెళ్లి తప్పిపోయినదానిని వెదకడా? వాడు దాని కనుగొనిన యెడల తొంబదితొమ్మిది గొఱ్ఱెలనుగూర్చి సంతోషించునంతకంటె దానినిగూర్చి యెక్కువగా సంతోషించునని మీతో నిశ్చయముగా చెప్పుచున్నాను. ఆలాగుననే ఈ చిన్నవారిలో ఒకడైనను నశించుట పరలోకమందున్న మీ తండ్రి చిత్తముకాదు.” (మత్తయి 18:11-14) యెహోవా తన ఆరాధకుల్లో ప్రతీ ఒక్కరిపట్ల చూపించే వాత్సల్యపూరిత శ్రద్ధను యేసు ఇక్కడ ఎలా వర్ణిస్తున్నాడో చూద్దాం.

ఆ దృష్టాంతాన్ని వివరిస్తూ యేసు, ‘ఈ చిన్నవారిలో ఒకడైనను నశించడం’ దేవునికి ఇష్టం లేదని చెప్పాడు. అంతకుముందు ఒకసారి యేసు, “[తన] యందు విశ్వాసముంచు ఈ చిన్నవారిలో ఒకనిని అభ్యంతరపరచే” విషయంలో తన శిష్యులను హెచ్చరించాడు. (మత్తయి 18:⁠6) అయితే యేసు చెప్పిన ఆ దృష్టాంతం యెహోవా గురించి మనకేమి తెలియజేస్తోంది? యెహోవా ‘చిన్నవారిపట్ల’ అంటే లోకం దృష్టిలో అల్పులుగా ఉన్న తన గొర్రెలన్నిటిపట్ల ఎంతో శ్రద్ధ చూపించే కాపరిగా ఉన్నాడు. తనను ఆరాధించే ప్రతీ ఒక్కరూ దేవుని దృష్టిలో నిజంగా విశేషమైనవారే, విలువైనవారే.