Ebaibuli​—Eitabo Loebunit Kama Ejai Edeke

1, 2. Epone ani eraar Ebaibuli ainakinet naka Edeke naejok noi?

IPEDORI ijo aitun apak naijaikina ijo opaperokon lominat ainakinet naejok? Eebo, abu ijo kiyalamikin ido kolakar da noi. Ainakinet duc elimokini ijo nuikamunitos loainakinan​—ebe itopolorit nges epaperone kus. Ibusakinit abu ijo kisialamik opaperokon kanu akeinakinet.

² Erai Ebaibuli ainakinet kama ejai Edeke, adiopet naibusakinitor oni aiyalamar noi. Itodiarit eitabo loitegelina lo iboro ti lumam oni ipedo ajenun koipone ece. Kwape aanyunet, elimokinit oni nuikamunitos asubio naka akuj, akwap, etunganan losodit ka aberu nasodit. Ejaatar Ebaibuli kaicoreta numunon nuepedorete aingarakin ijo atitingikin atiokisio nuka aijar. Itetemit eipone loebunio Edeke aitodolikin akelosikineta ido ayangaun ejautene loka ajokan toma akwap. Erai teni Ebaibuli ainakinet naitalakari!

3. Anyoika nu elimokit oni ainakinet naka Ebaibuli nuikamunitos Edeke ido kanukinyo italakarata nu etau?

³ Erai bobo Ebaibuli ainakinet naitalakari etau, naarai itodiarit icebore yenikamunit Loayinakinan, Edeke Yawe. Abeit ebe ejaiki ngesi oni eitabo lo, erai ngin aitigogongoret ebe ekoto ngesi oni ajenun ngesi ejok. Eebo, epedori Ebaibuli aingarakin ijo adukun epaperone kede Yawe.

4. Kanukinyo eraar epone loekorere Ebaibuli nuka aumokin?

⁴ Arai ijaatar ijo Ebaibuli, mam erai ijo bon ijaatar. Itolomunitai Ebaibuli kere araibo atutubet kotoma angajepa nuedeparitos 2,300, kwangin do epedoritos itunga 90 kotoma akwatat kalu iboiete kakwap adumun nges. Ibaibulin luedeparitos emilionit kesi ekorio kangol sabiti! Ibilionin luka Ibaibulin kaileleba araibo atutubet adaun ainomun. Abeit, emamai ediotabo loeputos kede Ebaibuli.

5. Epone bani eraar Ebaibuli ‘loiyengakinit Edeke’?

⁵ Aiyatakin, erai Ebaibuli ‘loiyengakinit Edeke.’ (2 Timoteo 3:16) Koipone bani? Ebongokinit Ebaibuli elopet ebe: ‘Enerenenasi itua nukepote kama ejai Edeke kodoikinite emoyo lokalaunan.’ (2 Petero 1:21) Kwape aanyunet: Epedori akagwelanaran aijaikin ekalani aiwadikakin ngesi ebalua. Ebalua ngol ejaatar aomisio ka aicorakineta nuka akagwelanaran. Aso erai cut ebalua ngon loke, mere loka ekalani. Kwape kwangin, Ebaibuli da ejaatar akiro nuka Edeke, mere nuka itunga luewadikaete. Kanukangun do, erai Ebaibuli kere kabeit “akirot naka Edeke.”​—1 Isesalonikan 2:13.

ECAMANARA IDO KODOLITE

6, 7. Kanukinyo eraar acamanara naka akiro nuejaas toma Obaibuli nueumokina?

⁶ Aponi kiwadikai Ebaibuli adaun apak naka ikar 1600. Ekewadikak eboitos kotoma apakio nuagelegela ido kolomunitos koponesio luka aijar luipu. Araasi ice akoriok, alokak agaria, ka ecokok. Ice da araasi inabin, atubok, ka ikabakan. Eiwadikan Ejiri loka Luka kerai emukian. Karaida agitigita ejautene loka ewadikak Ebaibuli, ecamanara Ebaibuli kageuneteke kiton awasia.a

⁷ Elimokinit oni eitabo losodit loka Ebaibuli eipone loageunata atiokisio nuka itunga. Itodunit eitabo loawasia ebe ebuni akwap na kere araun eparadais, araibo emanikor. Itetemit Ebaibuli akiro nueswamasi kolosek ikar ilukumin ka ilukumin ido kikamunitos alosikineta nuka Edeke ka nuebuni ngesi aswam. Acamanara naka Ebaibuli erai nueumokina, konye eraasi ngun nuimunokina oni kanejai eitabo loebuni kama ejai Edeke.

8. Koinak aanyununeta nuitodunitos ebe edolit Ebaibuli kotoma akiro nuka esayanis?

⁸ Edolit Ebaibuli kotoma akiro nuka esayanis. Ejaatar da akiro nuaringa ejenuna kapakikec. Kwape aanyunet, ejaatar eitabo loka Ilebin ikisila luekamunitos agitanar luadekak ka iponesio luka aila komam atekerin nualukunitos kesi kejenete ngun. Kapak na ajaatar aomisio numam acaete nuekamunitos eipone loajaar akwap, etodunit Ebaibuli ebe erai kwap nalungur, araibo alukunet. (Isaia 40:22) Elimunit Ebaibuli kotoma abeit ebe ‘ikaja akwap apak atai’ (Yob 26:7) Eebo, mam Ebaibuli erai eitabo loka esayanis. Konye netiroria akiro nuka esayanis, edolit cut. Mam cut nuerai nuimuno ijo kanejai eitabo loijaikinit Edeke?

9. (a) Eipone ani itodunitor Ebaibuli ebe edolit nges kotoma akiro nukolosek ido korai lomunot? (b) Ayoika nuelimokini ijo amunonut naka ewadikak Ebaibuli nuikamunitos Ebaibuli?

⁹ Erai bobo Ebaibuli loedolit ido lomunon kakiro nueswamasi kolo. Ibecokina akekiro. Ijaikinit akiro nukamunitos ikiroria luka itunga kane elomunitotor ikaliakec.b Kaitirian kede ewadikak luewadikaete akiro nueswamasi kolosek, lumam ewadikaete aitelekanario naka itunga kec, amunoko ewadikak Ebaibuli, ewadikaete aibucanareta kec kede nuka akwap kec. Kotoma Obaibuli, koitabo loka Aimario, kwape aanyunet, iwadikata Musa nuikamunit adiakaret ke nabu koinaki ngesi adumun alecorio. (Aimario 20:2-12) Amunonut kwangin mam edumakinio oitabon ice, konye edumakinio bon Obaibuli naarai erai eitabo loebunit kama ejai Edeke.

EITABO LOKA ACOA NAINGARAKINI

10. Kanukinyo mam eraar nukaumokin ebe erai Ebaibuli eitabo loingarakini?

¹⁰ Naarai iyengakinit Edeke Ebaibuli, erai loejai “ajokis aisisianakinia, aikwenyaria, aitetenia, aituutooria da toma adolit.” (2 Timoteo 3:16) Eebo, erai Ebaibuli eitabo loingarakini oni. Itacaunit ejautene loka itunga. Komam abuonokin, ewadikan ke, Edeke Yawe, erai Lokasuban! Emisikinit nges aomoom ka ejautene wok adepar oni. Aiyatakin, ejeni Yawe nuipuda oni tetere kidumuni aiyalama. Ejeni bobo nges irotin luibusakinit oni ainac.

11, 12. (a) Anyoika akiro nuabu Yesu kiner komoru? (b) Anyoika akiro ace nuingarakinete nuitetemitai kotoma Obaibuli, ido kanukinyo imedata aicoretake apakio kere?

¹¹ Komoom akiro nuabu Yesu kiner omoru nuiwadikatai Matayo osulai 5 kiton 7. Kotoma aisisianakin naetelekarit, abu Yesu kiner akiro nuegelegela, nuimoriaritos eipone lodumunet aiyalama nabeit, loinapakinet iceleta, loebeitor ailip, ka eipone loibusakinitor asesen iboro ejok. Eringa akiro nuabu Yesu kinerit ejaasi kede ajokis ido ingarakinete da kwape nepekolo kinerar nges.

¹² Aicoreta ace nuka Ebaibuli iriamara kede aijar nakokale, iponesio luka aswam, ka eidicane kaluce. Akiro nuka Ebaibuli ikamunitos itunga kere ido akecoreta eraasi duc nuamedaete. Acoa naejai Obaibuli itogogongorit akirot naka Edeke naenerit enabi Isaia ebe: “Arai eong jaikait Ekonideke, lokisisianakini jo aimeda.”​—Isaia 48:17.

EITABO LOKA ADWARETA

13. Anyoika akiro nuabu Yawe kolimok enabi Isaia aiwadik nuekamunitos Babulon?

¹³ Ejaatar Ebaibuli adwareta nuipu, ido nuipu kakesi adautu aitodolikinio. Kwape aanyunet. Kitoritor nejai enabi Isaia loajai toma akwap Eroko Keuruna Yesu (E.K.Y), abu Yawe kodwarite ebe ebunio amudiar ere loka Babulon. (Isaia 13:19; 14:22, 23) Ainakinitai kaileleba eipone loabeitor nu aiswamaun. Adwaritai ebe ebuni ajore nakasurup aitoonikin akipi kocilet loka Babulon kosodete alomar ore komamei ejie. Mam erai ngun bon. Etijenunit adwarasit naka Isaia ekabaka loebuni aikamar Babulon​—Kuro.​—Isaia 44:27–45:2.

14, 15. Eipone ani apotu akiro nuka adwarasit naka Isaia nuekamunitos Babulon kitodolikinotor?

¹⁴ Akaulo naka ikaru 200, kotoma akuare naka elap loka Okitoba 5/6, 539 E.K.Y., edukurit ajore eiduny ka Babulon. Ingai bo loengarenikinit ajore ngin? Ekabaka loka Perusia loanyaritai Kuro. Atenit do ejautene kanu aitidolikin adwarasit naumokina. Konye, apedori kereka ajore naka Kuro aikamar Babulon komamei ejie kwape adwaritere?

¹⁵ Ajaasi itunga luka Babulon ainumunum epucit akuare kangin ido koomitos ebe eyuaritos kesi arwatatin nuegogong nuka ere kec. Konye kacoa, abu Kuro kitapaa akipi nuka ecilet nualeleete aitorit ore. Katipet kikidiokoto akipi kocilet, kotuboros iketunga kocilet loasedeny, kodolokisi arwatatin nuka ere. Konye epone ani ti apedoria ajore naka Kuro atubor karwatatin nuko Babulon? Kanu acekiro numam ajenas, kakuare kangin, aponi kojalakinai irutei luka ere engaara komam epodokinitai!

16. (a) Anyoika nuadwararit Isaia nuikamunitos nuepote atakanikin Babulon kawasia? (b) Epone ani etodolikinor adwarasit naka Isaia naikamunitos amudiario cut naka Babulon?

¹⁶ Nuikamunitos Babulon, adwaritai ebe: “Mam bobo ituanan iboienenei kotoma, kwabo mam iboienenei anyoun katurio kiton aturio: Mam eyarabut idukuri ina; Mam bobo ikecokok ituriakete isipaninikec kaina.” (Isaia 13:20) Enerit adwarasit na nuedeparito aibirorio naka ere. Etodunit ebe mam bobo edukio Babulon cut. Ipedori ijo aanyun aitodiareta nuka aitodolikineta nuka akiro kanu. Aiboisit naka Babulon nakolosek naemamei lolo yen edukit​—amairon bala 50 angalakimak naka Baghdad kotoma Iraq, itogogongitos akiro nuabu Yawe kinerit kitosomai Isaia kwape nuetodolikinos: “Apiari da kigweren luka amudiar.”​—Isaia 14:22, 23.c

17. Epone ani itogogongata aitodolikineta nuka adwarasia nuejaas Obaibuli aiyuun wok?

¹⁷ Aisisia akiro nuka adwareta nuka Ebaibuli numunon epedori aitogogong aiyuun wok, mam erai kwangin? Aitodolikinio naka adwareta nukokau ijaikinitos oni amuno ebe ebuni bobo Edeke Yawe aitodolikin aisumunetake naka ajulakin akwap araun eparadais. (Amario 23:19) Eebo, ijaatar oni “amun naka aijar naka ikar kere, nabu Edeke, lomam ialai, kisumun eria apakio nuka ikar.”​—Tito 1:2.d

“ERAI AKIROT NAKA EDEKE NAKAJARAN”

18. Anyoika nuebala ekiyakia Paul nuikamunitos “akirot naka Edeke”?

¹⁸ Kakiro nuidau oni aitetem kosula kalo, idelelei ebe erai cut Ebaibuli eitabo loitegelikina. Konye, epol akemeda noi adepar akecamanara bon, adolit kotoma sayanis, akiro nukolo sek, acoa naingarakin, ka adwareta numunon. Ewadikat Paul ekiyakia lo Kristayot ebe: “Erai akirot naka Edeke nakajaran, nakapedor da, ekwana adepar olikile loekwana kowaitin kere, ipelori da kiton aitiak aijar ka emoyo, ailenyeta ka asum, emisiikin da aomisio ka nuelosikinit etau.”​—Iburanian 4:12.

19, 20. (a) Epone ani epedoria Ebaibuli aingarakin ijo angicakin bon? (b) Epone ani ipedoria ijo aitodun ebe isimarit ijo Ebaibuli kwape akirot naka Edeke?

¹⁹ Asiomenen “akirot” naka Edeke, nejai Obaibuli epedori aijulakin aijar wok. Epedori aingarakin oni angicakin bon adepar lem. Ipedori oni atemar ebe imina oni Edeke, konye epone loiyangaria oni nuisisianakin Ebaibuli itoduni aomisio kanu ejaasi otaoun wok.

²⁰ Erai Ebaibuli cut eitabo loebunit kama ejai Edeke. Erai eitabo loibusakinit aisiom, aisisia, ka aminun. Kitodu akonisimar kanu ainakinet naka Edeke kotoma ainyikokin angicenen nuejaas tomake. Nepe iswamaa ijo ngun, ibuni ijo ajenun alosikinet naka Edeke kanuka itunga. Alosikinet ngin ka epone lodumunet nges, ebunio aitetem kosula loetupakini.