Eipone Bo Ani Ipedoria Ijo Araun Epapero Loka Edeke?

1, 2. Lubo angai ipapero luka Yawe?

ITUNGANAN yenikoni bo ai ikoto ijo araun epaperokon? Itunganan yenimina ijo. Ido kiswamanara kede ijo. Kojaasi da ka iponesio luejokuka luisiyalamikinitos ijo.

² Eseununei Yawe itunga araun ikepapero. Kwape aanyunet, arai Aburaam epapero loka Edeke. (Isaia 41:8; Yakob 2:23) Amina bobo Yawe Daudi. Abu ngesi kotema ebe erai Daudi ‘etunganan loitalakarit eketau.’ (Aswamisio 13:22) Ido ‘amina’ Yawe enabi Daniel noi.​—Daniel 9:23.

3. Kanukinyo araunotor Aburaam, Daudi, ka Daniel ipapero luka Yawe?

³ Koipone bo ani araunotor Aburaam, Daudi, ka Daniel ipapero luka Edeke? Abu Yawe kolimok Aburaam: ‘Irima ijo ekaporoto.’ (Ageun 22:18) Erauni Yawe epapero loka ngul luerimaaritos ngesi. Karaida itunga luka atekerin kere epedorete araun ipapero luka Edeke. Abu Yawe kitetemik ateker nako Isirael ebe: “Kiiranarete ekaporoto, eong da araun Edekekus, yes da iraunos ikatunga.” (Yeremia 7:23) Aso ibusakinit ijo arimaar Yawe arai cut ikoto ijo araun epaperoke.

EYUWARIT YAWE IPAPEROKE

4, 5. Eipone bo ani eyuwaria Yawe ipaperoke?

⁴ Ebala Ebaibuli ebe emoot Yawe iponesio kere luka “aitodikin akegogong kanuka ngul luetenito itauonokec kakonyeneke.” (2 Aisiitonokin 16:9) Isumunikit Yawe ipaperoke kotaibo loka Isabulin 32:8 ebe: “Ketuutonor jo, kesisianakin da koroto loiloseneneo: Kekwenyari jo kakakongu.”

⁵ Ejai lokasurup loepol agogong loekoto aitanang epaperonewok keda Edeke. Konye ekoto Yawe ayuwar oni. (Kosiom Isabulin 55:22.) Kwape ipapero luka Yawe, ekoto oni aijaanakin ngesi keda etau kere. Ido kamunokina nejai ngesi karaida etiono ejautenewok. Ido ijai oni kamun naeputos keda na ekayoon Isabulin. Loabala ebe: “Naarai ejai ngesi akanika nakoteten, mam eriangiriangenena.” (Isabulin 16:8; 63:8) Eipone bo ani etamitor Satan aitikokin oni araun ipapero luka Edeke?

AITEPEGET NAKA SATAN

6. Inyoin bo ebala Satan kanuikamunitos itunga?

⁶ Apotu oni kesisiautu Kosula lo 11 ebe abu Satan kitepeg Yawe ido kitoronite ngesi kwape ekengalan ido erai loerono, ebe mam ecamakinit Adam ka Keba aseun nuejokuka ka nueroko kanukec. Isisianakini oni eitabo loka Yob ebe itoronit Satan itunga kere luekotosi araun ipapero luka Yawe. Ebala Satan ebe ijaanakinete itunga Edeke kanu iboro luedumununete kesi, konye mere naarai eminasi Edeke. Ido ebala bobo ebe epedori ngesi aitapaar idiotunganan kere kanejai Edeke. Kaanyutu ber oni nuisisiauni oni kanejai Yob ka eipone loabu Yawe koyuwara ngesi.

7, 8. (a) Eipone bo ani abu Yawe kopupuna kanuikamunitos Yob? (b) Anyoika bo nuabu Satan kolimunite kanuikamunitos Yob?

⁷ Ingai bo Yob? Erai ngesi etunganan loajokan loajai toma akwap ikar 3,600 luatuboros. Abu Yawe kolimu ebe kapakio kangun amamei idiotunganan kere yenekoni nen kotoma akwap. Ayongit Yob Edeke noi. (Yob 1:8) Eebo, arai Yob epapero loka Yawe obe.

⁸ Ebala Satan ebe ejaanakini Yob Edeke kanuka esoswai. Abu Satan kolimok Yawe: “Mam ibwaikinit abwas aisirimor nges, ka etogoke, ka iboro kere luejaatar, kowaitin kere? Isirerengit aswam naka akaninike, iyatakina ikeboro kakwap. Konye korio cani akonikan, kotiro kere luejaatar, ido kingerokini ngesi jo kakonyenekon.”​—Yob 1:10, 11.

9. Anyoika nuabu Yawe kocamak Satan aswam?

⁹ Abu Satan kitoron Yob ebe ijaanakini ngesi Yawe kanu iboro luedumununei ngesi. Abala bobo Satan ebe epedori ngesi ainakin Yob apalaar aijaanakin Yawe. Mam Yawe abu kocam nuenera Satan, konye abu ngesi kocamak Satan aitem arai amina Yob Edeke.

ABU SATAN KITEM YOB

10. Eipone bo ani etemio Satan Yob, ido anyoika nuabu Yob kiswama?

¹⁰ Nasodit, abu Satan komudia iboro kere luka Yob. Abu Satan koyar ibulesin luka Yob. Abu Yob kotwania ikeboro kere. Kotoma aitemisiot nakawasia, abu Satan koyar idwe luka Yob itomon. Konye abu Yob kopaik emunokina nejai Yawe. “Kotoma kangun kere mam abu Yob kodiaka mam da abu komoro Edeke.”​—Yob 1:12-19, 22.

11. (a) Anyoin bobo abu Satan kiswamaki Yob? (b) Anyoika nuabu Yob kiswama?

¹¹ Mam Satan abu kopala. Abu ngesi kitepeg Edeke kobala ebe: “Korio cani akonikan, kotiro akekojo ka akekuan, ido kingerokini ngesi jo kakonyenekon.” Kanu kangun abu Satan kijaik Yob ariebo naronon noi. (Yob 2:5, 7) Konye abu Yob kosalak emunokina nejai Yawe. Kobala ebe: “Mam alemari akabeit kamakang aitodol neatwania!”​—Yob 27:5.

12. Eipone bo ani abu Yob itodunia ebe erai Satan ekengalan?

¹² Mam Yob ajeni idiobore kere kanuikamunitos aitoronet naka Satan araibo kanukinyo eticanitor ngesi noi. Aomit ngesi ebe Yawe nges eyangaunit atiokisio nejai ngesi. (Yob 6:4; 16:11-14) Karaida ejaasi ngun, abu Yob kosalak emunokina nejai Yawe. Komam abuonokin. Mam Yob arai loesoswaikinit. Arai ngesi epapero loka Edeke naarai amina ngesi Edeke. Aitoroneta kere nuka Satan eraasi nukaisab!

13. Anyoika nuabu Yob kodum kanu amunonutuke?

¹³ Karaida mam ajeni nueswamasi kotoma akuj, abu ngesi kosalak emunokina nejai Yawe ka aingarakin aitodun ebe erai Satan lokaronon. Abu Yawe kisirereng Yob kanu amunonutuke.​—Yob 42:12-17.

EIPONE LOITEMIO SATAN IJO

14, 15. Biai itoronitor Satan itunga kere?

¹⁴ Ipedori ijo aisisiaun akiro nuepolok kanejaasi nuapotu kotakanikis Yob. Kapaarasia kanu, itoronit Satan oni ebe ijaanakini oni Edeke kanu iboro luijaikinit ngesi oni. Koitabo loka Yob 2:4, abu Satan kotema atiar: ‘Einakini etunganan kere luejaatar itia aijar.’ Itoronit Satan itunga kere ebe eraasi lukesoswai, konye mere Yob bon. Ketuboros ikar luipu akaulo natwania Yob, konye inyikokinit Satan amoromor Yawe ka aitoronit ikejaanakinakake. Kwape aanyunet, esioma Awaragasia 27:11: “Okokuka, kocou, kisiyalamik ekatau, Kasodi abongokin lokamori.”

¹⁵ Ipedori ijo aseun arimaar Yawe ka araun epaperoke lomunot, aitodun ebe erai Satan ekengalan. Karaida ibusakinit ijo aswam aijulanakineta nuepolok kotoma aijarakon kanu araun epapero loka Edeke, erai na aseunet naejok kakere naipedori ijo aswam! Erai na aseunet naepol noi. Ebala Satan ebe mam ijo ipedori amunokin Edeke arai ejaasi ijo atiokisio. Etamit ngesi aingalar oni tetere mam oni imunokin Edeke. Koipone bo ani?

16. (a) Inyoika bo iponesio luitosomai Satan kanu aitam aisimik oni aijaanakin Yawe? (b) Epone bo ani etamitor ekejodijodon aisimik ijo aijaanakin Yawe?

¹⁶ Itosomai Satan iponesio luipu kanu aitam aisimik oni araun ipapero luka Edeke. Eputosi ngesi keda “engatuny loegat, emoot yenenyamari.” (1 Petero 5:8) Sirikiwumok arai etamata ipaperokon, ipajanakon ka itunga ice aisimik ijo aisisia Ebaibuli ka aswam nuejokuka. Ipedori ijo aipup bala isurokinitai ijo.a (Yokana 15:19, 20) Ituluonor Satan “bala emalaika loka aica.” Epedori ngesi aingalakin oni aimwang Yawe. (2 Ikorinton 11:14) Eipone bobo ece loitosomai Satan kanu aitam aisimik oni aijaanakin Yawe ngesi aijaikin oni aomit ebe mam oni kidolit kotoma aijaanakin Yawe.​—Awaragasia 24:10.

KORIMA AICORETA NUKA YAWE

17. Kanukinyo ibusakinitor oni arimar Yawe?

¹⁷ Arai kirima oni Yawe, itoduni ngin ebe erai Satan ekengalan. Inyo epedori aingarakin oni araut luirimaaka? Ebala Ebaibuli ebe: “Kominenena EJAKAIT Ekonideke kekonitau kere, ka akonijar kere, ka akonigogong kere.” (Ikisila 6:5) Irimaari oni Yawe naarai kimina oni nges. Naiyatakinor aminawok, ebuni ngin aijaikin oni akote aswam nuicorakinit ngesi oni. Iwadikat ekiyakia Yokana ebe: “Na nges amin naka Edeke ebe kiricit aicorakinetake. Ido mam aicorakinetake elangir.”​—1 Yokana 5:3.

18, 19. (a) Inyoin iceboro luebala Yawe ebe eroko? (b) Eipone bo ani ipedoria oni ajenun ebe mam Yawe ingisit oni aswam numam oni ipedori?

¹⁸ Konye inyoika bo iboro elimokinit oni Yawe ebe eroko? Kwape aanyunet, koany asaduku naebala ebe “Kola Nuelait Yawe.” Kageunet, ipedori ijo aomit ebe iboro ice kane mam eraas luarokok. Konye arai kisiom ijo ikokoron lu Obaibuli kosodi ijo aomoom ejok nuikamunitos ikokoron ngun, ibuni ijo amisiikin ajokis naka arimaar ikisila luka Yawe. Ebuni bobo ngin aijaikin ijo aipup ebe ibusakinit ijo aswam aijulanakineta kotoma aijarakon. Karaida etiono, arai kiswama ijo aijulanakineta ngun, ibuni ijo adumun ainapakin ka aiyalama naka araut epapero loka Edeke. (Isaia 48:17, 18) Eipone bo ani ijenunia oni ebe ipedori oni aswam aijulanakineta ngun?

¹⁹ Mam Yawe ingisit oni aswam numam oni ipedori. (Ikisila 30:11-14) Kwape epaperowok, ejeni ngesi oni adepar eipone loijenia oni awatewok. Ejeni ngesi nuipedori oni aswam ka numam oni ipedori. (Isabulin 103:14) Abu ekiyakia Paul kisinyikok oni ebe: “Erai Edeke lomunot, mam ejalakini yes acodunio adepar nuipedorete, konye nenipe kacodunet itemokini neekuianara, tetere ipedorete atitingikin.” (1 Ikorinton 10:13) Ipedori oni amunokin ebe ijaikini oni Edeke agogong. Ijaikini ngesi oni “aidiles naka apedor” kanu aingarakin oni kapakio nuetioko. (2 Ikorinton 4:7) Akaulo naanyun eipone loingarakinia Edeke kapakio nuetioko, abu Paul kotema atiar: “Apedorit kere kotoma kangol kaloketogogongi.”​—Ipilipin 4:13.

KISISIAU AMINUN NUEMINA EDEKE

20. Ani iponesio ibusakinit ijo atupaar, ido kanukinyo?

²⁰ Arai ikoto oni araun ipapero luka Edeke, ekoto oni ajalakin aswam iboro luebala Edeke ebe eroko, keswamata nuipu nuibusakinito. (Iromayon 12:9) Ipapero luka Edeke eminasi iboro luemina Edeke. Itetemitai iboro ngun koitabo loka Isabulin 15:1-5. (Kosiom.) Etupaaritos ipapero luka Edeke iponesioke kwape nat “amin, aiyalama, ainapakin, atitingikin, asianut, ajokis, aiyuun, aiyapepera, aitikokina.”​—Igalatian 5:22, 23.

21. Eipone ani ipedoria ijo aitodun iponesio luemina Edeke?

²¹ Eipone bo ani ipedoria ijo aitodun iponesio ngul? Ekoto ijo aisisiaun iboro luemina Yawe koipone lo ijo asiomenen ka aisisianen Ebaibuli duc. (Isaia 30:20, 21) Arai kiswama ijo ngun, ebuni aminakon apoloor, ido isinyikokini ngin ijo arimaar nges.

22. Anyoika nuepote atakanun arai kirima ijo Yawe?

²² Aijulanakineta nuibusakinit ijo aswam kotoma aijarakon eputosi keda alacar igoen lumojong kosodi anapakin luitetiak. Ebala Ebaibuli ebe ekoto ijo alacar “etunganan lokolo” kosodi anapakin “etunganan lokitetet.” (Ikolosain 3:9, 10) Kiswama oni aijulanakineta ngun kasodete arimaar Yawe, karaida ketiono, isumunikinit ngesi oni “eropit loepol.” (Isabulin 19:11) Eebo, koseu arimaar Yawe kosodi aitodun ebe erai Satan ekengalan. Kijaanak Yawe mere kanu eropit loebeit oni adumun koingaren, konye kotoma amin naemamei esoswai. Iraun do ijo epapero loka Edeke!